انا كنت معجبه بواحد زميل بالشغل انا لسه طالبه وهو طالب بس كانت فتره تدريب فى الاجازه اللى فاتت فى شهر 8 شوفته واعجبت به طول الاجازه من غير ما اقول اى شيء
وجيت فى شهر 10 مع بداية الدراسة مع العلم هو بجامعه وانا بجامعه تانيه ومش من نفس البلد اخدت رقمو ودخلتلو فكرت ان هو معجب هو كمان بس مطلعش كدا ف صحبتي عرفت دخلت قالتلو انا انا معجبه فيه فالمهم رفضنى ففضلت فتره طويله اعيط وحاولت اتعافى
دخل هو كلمنى فى شهر 12 كان عاملى ريبلاى على الاستوري واتكلمنا يومين حلوين كدا وبعدين اختفى تاني رجع فى شهر 2 بعتلي وهنا بقا اتكلمنا تقريباً اسبوع متواصل بشكل حلو اووى فجأة اتغير ف قولتلو انت حابب تبعد قالى اه سبته وعملت بلوك من كل حته معداش اسبوعين لقيتو بعتلى تانى وطلب يشوفنى حددنا معاد المعاد ده كان امبارح الاسبوعين اللى فاتو كانو حلوين وتلميحات كدا
جه امبارح خرجنا عمل معايا كميه مواقف حلوه مش طبيعية كان غيران عليا وطول الوقت خايف عليا كنت بردانه ادانى الجاكت هدومى اتوسخت ادانى هدومه الحذاء اتفك نزل هو ربطه مخلنيش انزل حصل موقف وكنت خايفه اوى فضل يطمنى وعمل كل حاجه تخلينى اهدى جابلى حاجات كتيير حلوه وفى اخر اليوم قالى اكتر كلام يوجع قالى ان هو كان بيبعتلى لما ميكونش فى حد متاح ان هو يكلمه وان هو حتى مش معجب بيا ازاى انا والله شايفه الحب فى عيونه
المهم انا من امبارح وانا مصدومه وبعيط مش قادره اوجه العالم مش قادره اعيش انا تعبت وادمرت خصوصا ان حياتى مدمره ووجوده مكنش ببخلينى احس بأى حاجه وحشه فى الدنيا
حب من طرف واحد ، لأ للأسف ده أسوأ ، ده اعجاب لطرف متجاوب وقت ملله ، الصدمة اللي في الموضوع ان انتي ما تعرفيهوش ، اه بجد ، انتي مالحقتيش تتكلمي معاه وقت كافي انك تعرفيه و تعرفي شخصيته و طباعه و حاجات كتيرة اوي ، فأنتي اتعلقتي بالصورة الخارجية اللي بيقدمها للعامة من غير ما تعرفي هو مين فعلاً ، طبعاً مش محتاجه حد يقولك انك ترفضي أي نوع من التواصل بينكم تاني علشان انتي اغلى من انك تستهلكي نفسك في شبه علاقة انتي مش متشافه فيها ، اللي حصل ان عقلك لقى مسكن لمشاكلك. ، مش حل ، مجرد مسكن من ادرينالين من اعجابك بيه ، فبقى بيهرب من مشاكلك مش له هو ، لأ هو بيهرب في تفكيرك فيه ( علشان انتي ما تعرفيهوش) ، في حين ان تركيزك على حلول لمشاكلك هو احسن حل ليكي ، فالعلاقة دي زيها زي الإدمان ، مسكن لوجع مؤقت مسبب مشكلة لحد ما تتعودي عليه و يبقى هو نفسه المشكلة، فارفعي من عزة نفسك و من شخصيتك و ما تقبليش بأقل من ما تستحقي ، وهو انك تكوني مرغوب فيكي ، و بالتوفيق 😊
تم النشر الأربعاء، ٢٥ مارس ٢٠٢٦
مجرد تسلية ..عايز يرضي نفسه وغروره وإن في حد عايزه وزي ما قال مجرد لما يلاقي مفيش حد متاح عارف إنك متاحة في ييجي ويتسلى شوية حافظي ع نفسك مش انت اللي تروحي وتقولي انا عايزاك حتى لو عايزة المبادرة منهم .. حاولي متعلقيش قلبك ب اي حد وادعي ربنا يرزقك بالخير وبس
تم النشر الأربعاء، ٢٥ مارس ٢٠٢٦
دا انسان مريض وToxic معني انه عارف انك معجبة بيه ويتعمد انه يوجعك ب انه يقرب شوية وبعدين يبعد وبعد ما يطلعك سابع سما يرميكي لسابع ارض دا شخص نرجسي واللي انتي فيه يمكن مش حب ومجرد اعجاب ولو حتي حب بجد بدا للشخص الغلط انتي بتستنذفي مشاعرك في الشخص الغلط ف انتي اللي هتتعبي - اعملي بلوك وابعدي ولو شوفتيه تجاهليه وبلاش تبصي عليه وانسي ومتتعلقيش بحد غير ربنا هو الوحيد اللي مش هيوجعك -وغلط ان طلعتي معاه بلاش تقللي من نفسك علشان حاجة او شخص او حتي علشان الحب -الحب اللي بجد هو الحب الحلال في داخل اطار الزواج وبس - علاجك بجد في قربك من ربنا قربي منه واستغفريه وقوي نفسك وخليكي شخصية قوية وبنت صعبة المنال انتي جوهرة غالية ربنا ميزك وخلاكي غالية ف بلاش تدي مشاعرك الغالية لأي حد ميستاهلش
تم النشر الأربعاء، ٢٥ مارس ٢٠٢٦
بصي يا بنت الناس هو بيلعب بيكي عشان يرضي غروره مش أكتر وكلامه الأخير ده هو الحقيقة المرة اللي لازم تصدقيها عشان تفوقي لنفسك وتنقذي كرامتك بطلي تدوري وراه أو تحللي تصرفاته اللطيفة في الخروجة لأنها كانت مجرد تمثيلية عشان يرجعك تحت سيطرته لما لقاكي بعدت وعملت بلوك الشخص ده مبيحبكيش ولا بيحترم مشاعرك وبيدور عليكي بس لما بيفضى أو مبيلاقيش حد يسليه فالحل الوحيد إنك تقفلي الباب ده تماما وتمسحي رقمه وتنسي إنه موجود في الدنيا عشان ترجعي تشوفي حياتك ومستقبلك وتعرفي إنك تستاهلي حد يقدرك بجد مش حد يوجعك بالشكل ده وأنت لسه قدامك طريق طويل في دراستك فبلاش تضيعي طاقتك في حزن على حد مبيسواش . ومتحاوليش تحبي حد تاني عشان تنسيه قربي من ربنا وادعي ربنا يرزقك بشخص كويس ...وهيرجع تاني يكلمك ويحاول معاكي متدهوش فرصه ثانيه خلصي الحوار ...انتي اغلى من كدا .. مترخصيش نفس عشان واحد ميستاهلش
تم النشر الأربعاء، ٢٥ مارس ٢٠٢٦
يا حبيبتي، أنا ذكية، وأنا هنا معاكِ دلوقتي، قلبي معاكِ في اللي بتمرين بيه. ده شعور مؤلم أوي، خاصة لما الإشارات مختلطة كده والكلام في الآخر يوجع زي السكينة. أنتِ شايفة حاجات حلوة فيه، بس كلامه واضح: هو مش جاهز أو مش معجب بجد، وده بيخليكِ تحسي إنكِ مش كفاية، مع إن ده مش حقيقي خالص – أنتِ تستحقي حد يعاملكِ زي الجوهرة بوضوح وثبات، مش لعبة. إيه اللي تعمليه دلوقتي خطوة بخطوة؟ قطعي الاتصال نهائياً : بلوك من كل حتة، وامسحي الرقم والرسايل. ده مش هيخليكِ تحسي أحسن فوراً، بس هيحميكِ من الدورة دي اللي بتدمركِ. الـ"no contact" أقوى علاج للشفاء. ركزي على نفسك : ابدئي روتين يومي بسيط – صلي الفرائض في وقتها، اقرئي قرآن يومياً (سورة الشرح مثلاً للراحة)، وحددي هدف صغير للدراسة زي "أدرس ساعة كل يوم". حياتكِ مش مدمرة، هي بس محتاجة ترتيب، وأنتِ قادرة. تعاملي مع الألم : اكتبي اللي جواكِ في مذكرة (مش تبعتيله)، وبعدين احرقي الورقة رمزياً. مارسي رياضة خفيفة زي المشي، ونامي كويس. لو استمر البكاء أكتر من أسبوعين، روحي لدكتور نفسي متخصص (مش بديل عنه). من منظور إسلامي، الله سبحانه قال: "وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ". التوكل عليه، وادعي ربنا يرزقكِ اللي أحسن بكتير. الراجل الصالح مش بيختفي ويرجع، هو ثابت زي الجبل. ابحثي في فدني عن أسئلة زي "كيف أتخطى حب غير متبادل" هتلاقي إجابات كتير مفيدة. لو عايزة استشارة شخصية، شوفي الخبراء هنا: https://www.fedni.net/experts – في متخصصين في العلاقات والصحة النفسية هيساعدوكِ أحسن. أنتِ قوية يا قمر، وده هيعدي. قوليلي إيه رأيكِ، أنا معاكِ خطوة بخطوة 💕
تم النشر الأربعاء، ٢٥ مارس ٢٠٢٦
أَشْبَه بِروايه من نسج الخيال فوقي لنفسك
تم النشر الأربعاء، ٢٥ مارس ٢٠٢٦
لعرض السؤال في فدني اضغط هنا