السلام عليكم
انا من كام يوم اتعرفت على بنت اونلاين واتكلمنا شويه وانا بقى يومي كله مستني انها ترد اشوفها فاتحه ولا لا اشوفها اتأخرت ليه ادايق لما تتأخر في الرد وانا اصلا كان عندي اضطراب قلق ولسه متعافتش منه فدورت لقيت ان ده تعلق قلق
المشكله اني مش عايز اكمل مع البنت دي عشان خايف يحصل حب واضطر أبعد عنها لاني مستحيل اتجوز واحده اونلاين لاسباب معينه من وجهه نظري فأنا خايف على مشاعري ومشاعرها وعلى مشاعري اكتر لان انا اكتر واحد هيتاذي لاني هتعلق اكتر واللي خايف منه اني افضل اكلمها ومقدرش أبعد عنها وافضل اكلمها حتى بعد ما اتجوز من واحده تانيه
انا عارف اني المفروض اسيبها من دلوقتي ده الصح وحرام اني كلمتها من الاول بس من وانا صغير محدش بيسمعني ولا بيهتم بيا او بمشاعري فطلعت عندي نقص في الحته دي اي حد يديني اهتمام ويسأل عني بتعلق بيه وانا الفتره دي محتاج لده فعلا مش لاقي حد اتكلم معاه ولا احكي له عن يومي ومشاكلي
فأنا بجد محتاج للبنت في حياتي الفتره دي بس في نفس الوقت انا مش عايز اكمل عشان عارف العواقب وكده كده هطلع خسران فانا مش عارف اعمل اي انا محتار جدا وخايف اقطع معاها وارجع اكلمها تاني انا عارف ان اللي عملته غلط من الاول بس كلنا بنغلط وكانت لحظه شيطان
فانا عايز اعرف بردو هل انا كده عمري ما هعرف اخش في علاقه حتى لو حلال بسبب التعلق القلق ده لاني هبقى حمل على الي قدامي
انا اسف على الاطاله وآسف كمان عشان مشكلتي تافهه جدا بالنسبه لمشاكل الناس هنا بس انا محتاج رايكم
السلام عليكم ورحمه الله وبركاته. طيب حلو جدا تحليلك للموضوع كله وفهمك لكل الجوانب. ومسأله القلق دي بالذات محتاجه علاج يعني اضطراب القلق ده احنا بنعالجه ازاي بقى يعني هل هو تم تشخيصه عن طريق مختص يعني أو عن طريق دكتور ولا احنا اللي مشخصين نفسنا هل بناخد خطوات عشان نعالج الاضطراب ده او نعرف نتعامل معاه صح ازاي ولا مفيش خطوات بنتعامل معاها لان كده ده اللي هيأثر على كل حاجه زي ما انت بتقول كده في سؤالك انه هل انا كده مش هعرف ارتبط اصلا في المستقبل واتجوز عشان احس ان انا احل الجمله دي لوحدها كفيله انها هتدينا جرس انذار ان احنا محتاجين نتعامل مع التراب القلق ده بشكل يعني مركز جدا ويكون اهتمامك الفتره الجايه مش انك تكون مع حد بيملا وقتك او بيديلك الاهتمام اللي انت محتاجه قد ما انت محتاجه انك تعالج الاضطراب ده وتبدا تاخذ خطوات ازاي انك تتعامل معاه وازاي تفهمه اكتر وازاي تتخلص منه كمان ده اللي مهم جدا جدا جدا سواء بقى كلام مع البنت دلوقتي او ما وقفت الكلام معاها رحلتك العلاج الاضطراب هي اللي هتخليك تقدر توقف كلام معاها وتحس بارتياح اكثر وانت بعيد عن شخص انت مش محتاج في حياتك.
تم النشر الاثنين، ٢٦ يناير ٢٠٢٦
السلام عليكم، طيب أنت دلوقتي محدد المشكلة وسببها ونتائج الاستمرار فيها وعارف كمان الحل الوحيد لها. فالخيار بيدك وحدك. ممكن تخلي الأمر أوضح بالنسبة لك لو كتبت كل ده على ورق، يعني هات ورقة وقلم واكتب كل النتائج السلبية اللي هتترتب على كلامك معها واللي ذكرت بعضها في سؤالك وكمان اكتب الأسباب اللي تمنعك تمامًا من خوض التجربة مهما كانت مغرية بالنسبة لك دلوقتي. واكتب في الناحية التانية العائد الإيجابي اللي ممكن تاخده من العلاقة رغم كل السلبيات اللي اتذكرت... لا أعتقد إن هيكون فيه عائد إيجابي عامة، ممكن بس شعور مؤقت بالتخلص من الفراغ العاطفي والحاجة لوجود شخص في حياتك يسمعك... وبعد الشعور المؤقت ده هيترتب أذى أكبر مستقبلا. غير كده لا أعتقد فيه أي ثمار تعود عليك من العلاقة دي. *** خلي الصورة واضحة أمام عينيك وفكر فيها كويس، كل ما جسدت النتائج أمام عينيك كل ما كان حسمك للقرار أسهل. ** لما تقطع دلوقتي وتتوجع شوية بسبب شعور الاحتياج والفراغ أقل وأهون بكتير من الألم اللي هتحس به بعدين لما تغرق أكتر والتعلق يزيد لصورة مرضية. *** الفراغ مقدور عليه، والحاجة لاحتواء أو دعم أو وجود شخص في حياتك كل ده مقدور عليه برضه وممكن تتغلب عليه بطرق كتير زي إن يكون عندك هدف جاد تسعى عشانه بكل جهد وإنك تعرف أنت ليه فعلا موجود في الحياة وربنا خلقك ليه وتشتغل على ده. ** نقطة أخيرة أرجو تساعدك تحسم قرارك، فكر في أختك أو لو مش عندك أخت فكر في قريبة لك في مكانة الأخت اللي تغار عليها وتحميها، هتحس بإيه لو شخص فكر يكلمها وهو مش ناوي أصلا على زواج وكل اللي عاوزه منها ملأ فراغ أو حاجة عنده؟ معتقدش تقبل حاجة زي دي. ** بالنسبة لعلاج مشكلة التعلق فابحث في التطبيق هتلاقي إجابات للخبراء ولو لقيت صعب تنفذ لوحدك ومحتاج لخبير يتابعك معك فممكن تشوف قائمة خبراء فدني وتتواصل شخصيا مع خبير مختص وإن شاء الله يقدر يساعدك في التخلص تماما من التعلق. وربنا يوفقك.
تم النشر السبت، ٢٤ يناير ٢٠٢٦
جاهد نفسك انك متكلمهاش واعملها بلوك حتى وانت رغبتك بتقولك كلمها لان ليس قدامك سبيل غير انك متكلمهاش غصب عنك بالقوة لان زي ما انت بتقول هتتأذي دينيا ودنيويا ....وشوف بديل تاني حد تبقا بتتكلم معاه انا هقولك امثلة انا فرقت معايا في النقطة الي بتقول عليها انت اصلا عندك مشكلة فروح لمعالج نفسي وهيبقا معاك او روح احفظ قرآن في مسجد على يد محفظ اتعرف عليه واحفظ قرآن وهتبقوا اخوات في الله بتتعاونوا على الخير وعلى البر والتقوى وبرضوا لو في المسجد فيه حد محترم بيدي درس اتعرف عليه وتبقوا اخوات في الله كدا يعني
تم النشر السبت، ٢٤ يناير ٢٠٢٦
اسمع دورة الداء والدواء للشيخ علاء حامد هتفرق معاك جدا ، ولو مش هتعرف تسمع الدورة كامله هي ١٤ فيديو اسمع آخر فيديوهين منها بس هتفرق جدا جدا جدا
تم النشر السبت، ٢٤ يناير ٢٠٢٦
السلام عليكم .. ابشر بالخير انت عندك بعد نظر وتفكير في العواقب وعندك وعي ان الكلام معاها كدا كدا هيخسرك يعني انت بتعصي من حاجة وليس خبث ... حاجة للاهتمام .. قلة الإهتمام = توتر = لجأت للكلام معها .. فحاول معالجة التوتر ألجأ للصلاة والصيام بإيمان دي أقوى وصفة لعلاج التوتر
تم النشر الجمعة، ٢٣ يناير ٢٠٢٦
بما انك عارف نتيجة افعالك وده هيوصلك لايه فده لوحدو تقدم كبير صعب حد يستوعبو أو يوصلو ، أما بقى بالنسبه للموضوع فممكن تخلي عندك صديق تكونو قريبين من بعض تشكوا لبعض وتحكوا لان الصداقه مهمه جدا واول خطوه تعملها انك تبعد عن البنت وتعمل بلوك قبل ما يحصل التعلق اللي انت متاكد انه هيحصل وتاني حاجه تقرب من ربنا وتتعلق بيه هو وصدقني كل حاجه هتبدأ تتصلح واحده واحده اصلح علاقتك بالصلوات والقرآن والذكر والصيام وتلقائي هتبعد عن الذنوب لأن مفيش قلب هيجتمع فيه حب وطاعه الله مع الذنوب والمعاصي تلقائي هتلاقي نفسك بتبعد عن كل ده مره في مره
تم النشر الاثنين، ٢٦ يناير ٢٠٢٦
سيبها ، اعملها بلوك وكمل حياتك ، ممكن يكون الحوار صعب بالنسبالك أو يومين بعد كده خلاص ، ودا احسن ليك من دلوقت قبل ما تتعلق بيها ووقتها الموضوع هيكون اصعب بالنسبالك ، وكمان ممكن بالنسبالها ف بلاش تأذي نفسك ولا تأذي غيرك ، ودور على صحاب شباب من سنك ، حاول تشغل وقتك بأي حاجة
تم النشر الأربعاء، ٢٨ يناير ٢٠٢٦
لعرض السؤال في فدني اضغط هنا