السلام عليكم،
ردوا السلام أولا
أنا طلبي ممكن يكون غريب شويه وناس تشوفه سهل لكن بالنسبالي معقد جداً لدرجة نفسي غير قادره عليه انا الحمد لله بصلي بقرأ قرآن بخاف من ربنا في أكثر الأشياء اللي فيها حرام وحلال الحمد لله طبعاً كلنا بنعمل ذنوب لكن بنحاول نجاهد نفسنا،
الموضوع مش أنا ، قبل ما اتكلم ربي انت تعلم أني لا اقصد رياء ولا أقصد أن افتري على أحد،
طب ياجماعه أنا امي واخويا مش بيصلوا وامي كمان للعلم بتتعب اوقات كتير مما يمنعها عن الصلاة شرعاً واخويا الثاني أعتقد اوقات بيقطع في الصلاة
اخويا بيسمع اغاني الله اعلم بطل ولا لأ وكمان للاسف المسلسلات اللي بيشوفوها يعني طبعاً في نساء بدون حجاب ومتبرجات ربنا يهديهم ويهدينا وموسيقى وهكذا وامي للاسف اوقات كتير بتتكلم على ناس لما تكون زعلانه منهم مثلاً أو واخده موقف منهم بتتكلم عليهم وبتتلفظ بتفقد أعصابها يعتبر ويؤسفني انها اوقات بتس/ب الدين استغفر الله والله مكنتش احب اقول كده وهحذف بعد ماتجاوبوني
المهم ف أنا نفسي فعلاً اساعد كل الناس تتحسن ولاني مدركه مدى خطورة الكلام ده فنفسي اكلمهم ويستجيبوا أنا اتكلمت كذا مره ومفيش فايده يعتبر وأوقات امي بتتعصب عليا معرفش هي شايفه إن دا مش غلط ولا هي بتكابر وبتجاهد نفسها عشان تتوب
الله اعلم والواحد ممكن يكون عند ربنا في أي وقت ربنا يحفظهم ليا طبعاً لكن دي الحقيقه،
الاول كان ممكن اعرف اتكلم معاهم شويه لكن دلوقتي للاسف في مشاكل بيننا بسبب ضرب وشتم امي ليا واكيد أنا بغلط وكتير كمان لكن بتكلم عنهم دلوقتي فأنا مش عارفه اعمل اي اخليهم يدركوا ده ازاي خصوصاً في وقت زعلي منهم مش بنتكلم غير قليل ودي طبيعتي مش بعرف اتكلم براحتي وقتها
فبالله عليكم اعمل اي انا كل هدفي فيهم دلوقتي يرجعوا للدين بجد وهما كبار مش صغيرين ولو صغيرين زي ماقلت لازم يرجعوا خايفه عليهم من العذاب زي ما بخاف على نفسي ونا ضميري مش مستحمل يكونوا كده عادي ونا معملش حاجه،
معلش على الاطاله بس مهم جداً تجاوبوني ومن غير ما اضطر اتناقش معاهم كتير لان جربت قبل كده وكمان زي ماقلت احنا في فترة زعل بسيطه كده واي حد يعرف حد ميبخلش عليه بالنصائح والله الواحد خايف، ربنا يرحمنا ويغفرلنا جميعاً والسلام عليكم.
السلام عليكم ورحمة الله، أولا ربنا يثبتك على الهداية ويهديك أهلك. حابة بس أنبهك بس لكم نقطة تاخدي بالك منها، *** أولا، أنتِ مش مطلوب منك تنجحي في إقناعهم، مجرد تبليغك للحق وإنك تعرفيهم ده حلال وده حرام فأنتِ كده نصحتِ وأخليتِ ضميرك وأديتِ واجب النصح لهم، اخذوا بالنصيحة كان بها، اصروا على نفس الطريق رغم كل النصح فكل واحد يتحمل مسؤولية نفسه وحسابه. ** ثانيا، الأمر بالمعروف والنهي عن المنكر له قواعد، مينفعش في أي وقت وظرف وبأي طريقة... لازم تراعي الوقت اللي بتنصحي فيه وطبيعة الشخص اللي بتنصحيه وطريقة كلامك معه. ممكن لو شعروا من كلامك نبرة انتقاص لهم أو يوصل لهم إنك شايفة نفسك أفضل منهم ومش بتغلطي وهم العصاة الوحشين ده يخليهم يرفضوا الاستجابة. ** ثالثا، تركيزك إنك تكوني قدوة بأفعالك ده في كتير من الأوقات بيكون أفضل بكتير ومؤثر أكتر من إنك تفضلي تلحي عليهم بالنصح. يعني حاولي قدر الإمكان تلتزمي بالدين في كيفية التعامل مع الأم وعدم الغضب أو رفع الصوت على الأكبر منك وغيرها من الاخلاق... خلي أثر قربك من ربنا يظهر عليكِ. ** وواظبي دائما على الدعاء لهم وخاصة في أوقات استجابة الدعاء. (إنك لا تهدي من أحببت ولكن الله يهدي من يشاء) قلوبنا جميعًا بين يديّ الله فهو وحده القادر على هدايتهم فادعي لهم باستمرار. وادعي لنفسك كمان ربنا يثبتك ولا يجعل الشيطان يدخل لك من باب الاغترار بالعبادة. هدانا الله وإياكم للحق وثبتنا عليه.
تم النشر الاثنين، ١٨ أغسطس ٢٠٢٥
وعليكم السلام ورحمة الله وبركاته يا أختي الغالية، أولاً، الحمد لله على خشيتك وخوفك من ربنا وحرصك على هداية أهلك، وهذا شيء جميل ورائع ويبيّن إيمانك الحقيقي وحرصك على الخير لهم. فهمت منك أن الموضوع متعب جداً عليك خصوصاً في ظل الخلافات والمواقف الصعبة التي تعيشينها معهم. خليني أقول لك بعض النقاط التي قد تساعدك بإذن الله، وحأحاول أرتبها لك بشكل عملي ومريح: 1. قبول واقعهم مع الدعاء لهم من المهم بداية أن تقبلي أنهم في مرحلة قد تكون مختلفة عن رؤيتك الآن، وربنا منهم لا يغفل ولا يترك أحد. استمري في الدعاء لهم، لا تفقدي الأمل في رحمة الله، لأن الدعاء له أثر عظيم، وخاصة أنك تدعين بصدق وبدون رياء. 2. قدمي النموذج الحي والإيجابي أفعالك وقبل كلامك هي أفضل وسيلة للتأثير، أي كوني أنت نموذجًا للهدوء والصبر والطاعة بتطبيقك للهداية في حياتك بطريقة تجعلهم يشعرون بالراحة وليس بالمواجهة أو الضغط. كوني هادئة وصبورة ولا تظهري عليهم القلق أو الغضب، فهذه الأمور قد تزيدهم إصرارًا على مقاومتك أو الانغلاق. 3. تواصلي معهم بلطف وعبر أوقات هادئة ليس بالضرورة أن تركزي على النصيحة أو الجدل في وقت الخلاف، بل اختاري أوقاتاً مناسبة تكون فيها القلوب أكثر استجابة. استخدمي كلمات من القلب تعبر عن حبك لهم وحرصك عليهم كعائلة وليس كتعليم أو أمر، مثلا: "أنا فقط أحبكم وأريد الخير لكم، وربنا يهدينا كلنا". 4. أعلمي أن التغيير يحتاج لصبر ووقت لا تتوقعي تغييرهم فجأة أو أنهم يسمعون كلامك من أول مرة، فهو مسيرتهم مع الله، وأدوارك تدعي وتكوني مثال لهم فقط، كما قال رسول الله صلى الله عليه وسلم: “كلكم راعٍ وكلكم مسؤول عن رعيته”. 5. حافظي على صلتك بالله وبصلاتك أوقفي نفسك عند هذا النعمة العظيمة، واطلبي من الله أن يثبت قلبك ويعينك على الصبر ويهدي أهلك. لا تسمحي للحزن أن يغلبك، بل اجعلي إيمانك ومناجاتك لله يمدك بالقوة. 6. في حال استمرت النزاعات والاختلافات حاولي أن تبتعدي عن المواجهة المباشرة، وركزي على تحسين علاقتكم بحيث يكون البيت أقل توتراً، وربما يكفي أن تقتصري على التواصل بالكلام الطيب والصمت عن الدخول في الشجار. أحياناً الصمت الحكيم والصبر بحد ذاتهما أبلغ من الكلام الكثير. 7. التواصل مع خبراء ونصائح إضافية لو شئت، يمكنك متابعة وطرح المزيد من الأسئلة هنا في فدني، وهناك خبراء متخصصون في الشؤون الأسرية والروحانية يمكنهم أن يشيروا لك إلى طرق مناسبة لتوصيل الفكرة بشكل أعمق. يمكنك زيارة صفحة الخبراء من هنا: https://www.fedni.net/experts يا أختي، أنت في موقع صعب وجميل في نفس الوقت، لأنك تحاولين أن تكوني سبب هداية وراحة لأسرتك، وهذا قدر عظيم. مهما طال الزمن، لا تنسي أن الله أرحم الراحمين، وهو يسمع دعاءك ويعلم قلقك. لا تيأسي ولا تضيعي أملك، وابدئي بالخطوات الصغيرة الرقيقة وكوني واثقة أن الخير قادم. أنا هنا معك، وأرحب بأي سؤال أو دعم تحتاجينه. ربنا يحفظك ويحفظ أهلك ويرزقكم الهداية والسكينة، آمين. ذكية ✨
تم النشر الأحد، ١٧ أغسطس ٢٠٢٥
السلام عليكم ورحمه الله وبركاته. هحاول اختصر لك على قد ما اقدر بان كوني قدوه. اكثر حاجه تبقى جميله جدا جدا وتجيب اثر افضل مليون مره نصيحه هي اني اكون قدوه. انا محتاجه انه اهلي يشوفوا قد ايه اثر الصلاه جميل فانا محتاجه ان انا اواظب على صلاتي ومواظبتي على صلاتي اكون الطف معهم. فيعرفوا انه انا بمواظبتي على صلاتي رغم ان هم بيتعاملوا بطريقه مش لطيفه لكن انا بتعامل بلطف ازاي كده عشان انا بعمل حاجه مختلفه يا جماعه خذوا بالكم وأؤكد بقى على ده ازاي يعني انا بدل وانصح. ابقى مثلا مخلصه صلاه واروح ابص على راس أمي فتقول لي ليه بتبصي على راسي بقول لها ايه يعني لما بكون مخلصه صلاه بكون حاسه بسكينه وبدوء جميل قوي وببقى مستشعره قد ايه انا بحبك فحبيت اجي اعمل كده. اخلص صلاه واروح اعمل كوبايه شايله اخويا فيقولي ليه عملتيلي شاي من غير ما انا اطلب اقول له انا لسه مخلصه صلاه كنت وانا بصلي بدعيلك فحبيت ان انا كمان اعمل لك كوبايه الشاي دي واديها لك عشان تعرف قد ايه انا بحبك بحبك بكوبايه الشاي وبحبك وبدعي لك. النقاط دي هتكون مهمه جدا جدا جدا وهتبعدني عن النصيحه المباشره ويعني من تجارب كتير شفناها هي ليها أثر كبير قوي قوي انه الانسان بيقعد بعد كده يفكر مع نفسه بيقول شوف هي بتعمل ايه واحنا بنعمل ايه احنا محتاجين فعلا نتعلم منها حتى لو الانسان ده قعد كابر ما بين يعني علنا وهو بيرد علينا لكن هيبقى ما بينه وما بين نفسه بيقول الكلام ده وهو ده الاهم ليه بقى عشان يبقى يتحقق الايه الكريمه اللي بتقول (إنك لا تهدي من أحببت ولكن الله يهدي من يشاء) فلازم هو الشخص نفسه يكون من جواه خلاص عاوز ومحتاج وربنا ساعتها هيعينه وهيساعده فاحنا نحاول نخليهم يتخانقوا الخناقه دي مع نفسهم ويكلموا نفسهم جربي الطريقه دي واتمنى ان هي ان شاء الله معاكي. نقطه أحب بس ازودها لك ارجوكي ما تخليش اهتمامك بانهم ينصلح حالهم فتكوني بتتعصبي عليهم فتكوني بتديهم نظره انتوا حالكوا سيء جدا ويا اسفاه على حالكم خلي بالك عشان الحاجات دي بتوصل حتى لو ما قلتيهاش بصوت عالي بتوصل لما بتتعصبي عليهم بتوصل لما بتطلعي معاهم افعال عنيفه توصل كل الكلام ده بيوصل بيوصل قد ايه انت بتحتقري انه هم في وضع ديني سيئ وان هم بيرموا نفسهم في التهلكات خلي بالك من ده وتصالحي مع نفسك من جواكي انك بتحبيهم رغم إن هم مقصرين انت بتكرهي التقصير ولكن ما بتكرهيش أهلك دول انت بتحبيهم ومن حبك لهم بتتمنى لهم الهدايه فخلي الشعور اللي يغلب عليك شعور إيجابي مش سلبي عشان مينعكسش على أفعالك وخلينا نبقى عارفين كده في الآخر كل منا محاسب فرادى يعني كل واحد هيتحاسب لوحده فاللي انت هتتحاسبي عليه إنك لما شفتي وضع غلط عملت إيه هاه حاولت تغيريه إزاي وأنت الحمد لله حاولت حاولت بكذا طريقة فخلاص أنت أديت ما عليك والأشخاص التانيين هيتحاسبوا على الجزء بتاعهم وخليني اقولك حاجة لطيفة أنا شخصيا بصبر بها نفسي انه احنا ممكن علشان احنا بنحبهم احنا اللي نجتهد قوي قوي قوي لو انا اجتهدت قوي قوي وإن شاء الله كنت يعني جزائي الجنه في الاخره فابقى مقرره في قررت نفسي ان انا هقول لربنا لو الاشخاص دولت اللي انا بحبهم في النار يا رب انا عايزاهم في الجنه وأنا مش هستمتع بالجنه الا لو هم معايا ويقينا واللي احنا عارفينه عن ربنا ان هو يحقق لنا اللي احنا عايزينه هيروح يجيبهم من الجنه من من النار مخصوص لو لا قدر الله هم في النار عشان أنا طلبت فهما يدخلوا الجنه بسببي فلو هم مصرين ان هم يروحوا النار احنا نبتعد على انفسنا عشان بإذن الله يكون جزانا الجنه ويكون لنا عين كده نقول يا رب انا عايز الناس اللي انا بحبهم دول هاتهم لي حتى لو هم في النار. وربنا يرزقنا واياك الجنه ويكون كلنا في أحسن مكان ويهدي كل أحبابنا.
تم النشر الثلاثاء، ١٩ أغسطس ٢٠٢٥
اول حاجة الشهوة تعمي العقل وقال تعالى :"انك لا تهدي من أحببت ولكنّ الله يهدي من يشاء " فجزاكي الله خير ولكن مش عليكي انقاذهم فقط ركزي على نفسك وكوني قدوة وحاولي تتعافي من آثار الأذى والجو السلبي
تم النشر الثلاثاء، ١٩ أغسطس ٢٠٢٥
وعليكم السلام ورحمه الله وبركاته الأهل بيكونوا محتاجين مجاهده اكتر من اي حد تاني يعني مثلاً مينفعش اكون من صغري بسمع افلام وربنا هداني اول ما اتوب ادخل عليهم وازعق اتقوا الله ونصيحة مجربه والله الدعاء في قيام الليل ليه مفعول سحري وحتى لو زعلتوا دي امك مينفعش المقاطعه لازم تنزلي تبوسي ايديها ورجليها وانتي متدينه وعارفه أن مينفعش تقاطعيهم حتى لو طلبوا منك تشركي مش مجرد خانقه عاديه وخلاص وربنا ينزل على قلبها الهداية
تم النشر الاثنين، ١٨ أغسطس ٢٠٢٥
وعليكم السلام ورحمة الله وبركاته .. انك لا تهدي من احببت ولكن الله يهدي من يشاء .. ما كان على رسولنا وعلى الانبياء والمرسلين الكرام صلوات الله وسلامه على حبيبنا وعليهم جميعاً إلا البلاغ والاستمرار عليه بالتذكير .. البلاغ هذا والامر فيه بالمعروف والنهي عن المنكر مهمة صعبة تحتاج لتدريبات يومية للقلب والروح كالحفاظ على الصلوات في اوقاتها وقراءة ورد من القرآن يوميا وحفظ ورد يومي وتدارس شيئا من العلم الشرعى واخراج الصدقات مما يحب المرء وليس مالا فقط ، فضلا عن قيام الليل .. كل هذه افعال البر تعين النفس على الحق بإذن الله وتثبتها .. فعليك الاستعانه بالله اولا والقيام بهذه الاعمال قدر المستطاع والدعاء لهم وتذكيرهم بالمعروف ونهيهم عن المنكر بلطف وإحسان .. والله هو يهدي السبيل سبحانه .
تم النشر الاثنين، ١٨ أغسطس ٢٠٢٥
وعليكم السلام ورحمة الله وبركاته... الدعاء ليهم بالهداية... ده حقهم عليك... والله هو الهادي التواب علي عباده
تم النشر الاثنين، ١٨ أغسطس ٢٠٢٥
اللهم آمين ،بإذن الله هحاول استمر على قيام الليل وهدعي ليا وللجميع بسمع كتير عن معجزات قيام الليل واستجابة الدعاء ف إن شاء الله خير وربنا يهدينا جميعاً،جزاك الله خير
تم النشر الاثنين، ١٨ أغسطس ٢٠٢٥
لعرض السؤال في فدني اضغط هنا