السلام عليكم
انا مش عارف اقول ايه الصراحة كان نفسي من زمان الاقي مكان اتكلم فيه براحتي
دلوقتي بيتي مليان مشاكل غريبة امي بتعمل مشاكل من ولا شئ و بيخيل ليها أن انا و اخويا و ابويا عاملين تيم بقا و مخاصمينها و ينكرها و احنا الوحشين
المشكلة في أنها بدأت باني فضلت نايم لوقت متأخر ف عملت زعيق جامد اوي في البيت و زعقتلي عشان صحيت متأخر مع انها مش اول مرة بس بحسها ماشية بمزاجها
في نفس اليوم لما ابويا جه من الشغل قامت زعقتلي عشان خاطر بتحسبني استخدمت كيس شامبو بقولها مستخدمتوش بتقولي انت كداب انا مش فاهم ايه التفاهة دي ولا هي بتزعق كده ليه
بعدها راحت مزعقة مع ابويا و السبب أنه مقامش زعقلي و قالي انت مزهق انك ايه
انا مش فاهم بجد ايه ده و ليه بتعمل كده
بعدها النهاردة جينا نقعد ع الأكل ف حصلت حاجة كده فضلت تحسبن على ابويا و تزعق معاه و تشتم فينا و كلامها مليان لا هما ولا انت ولا اي حد ليه عندي ريحة الازمة و في ستين داهية و في حاجات من دي و بتلمح أنها عايزة تطلق
انا مش فاهم بجد ايه اللي حصل و اللي ممكن يخلي الام تقلب مرة واحدة كده
هو مش اول مرة يحصل كده تقريبا كل سنة لازم يحصل الحوار الكبير ده
محتاج حد يساعدني و يقولي المفروض اتصرف ازاي بعيدا اني اتكلم معاها لأنها صعبة بجد و مش هتخلي حد يتكلم معاها هتعمل مشكلة تانية
يا ريت حد يساعدني بعد اذنكو
الحل سهل جدا ، ماما كانت كده ف فترة من فترات حياتها وكنت مستغربه جدا لدرجة حقيقي كنت بدعي عليها لحد ما لقيتها ف مرة انهارت وقعدت تفضفض بزعيق عرفت ان حاجة مضايقاها جيت ف أكتر وقت كانت نوعا ما هادية فيه وقعدت احاول افهم فيه ايه طبعا كانت مصدرة الوش الخشب ومش عاوزة تتفاعل خالص حتى افهم فيه ايه لحد ما هديت خالص وفهمت أنها فترة مضغوطة من اخوالي وحاجات تانية قعدت اشرحهلها أن العصبية م حل ل اي حاجة شوية شوية بدأت تهدى ف ممكن مامتك بتمر بفترة ضغط حاول تقعد معاها وتعرف الحل ايه معرفتش تتكلم ادعيلها ربنا يهديهالكم وربنا يهديكم يارب ويربط ع قلوبكم كأسرة
تم النشر الخميس، ١١ يونيو ٢٠٢٦
امتصاص الغضب وعدم الجدال لما تبدأ مشكلة من "ولا شيء"، الجدال لإثبات البراءة (زي: أنا مأخدتش الشامبو) بيترجم في عقلها فوراً على إنه "تحدي وكدب". الأفضل في اللحظة دي هو الرد بكلمات هادية وموجزة جداً زي: "حصل خير يا أمي" أو "خلاص مش مشكلة" والانسحاب بهدوء.
تم النشر الخميس، ١١ يونيو ٢٠٢٦
بص، طالما الموضوع بيتكرر كل فترة بنفس الشكل فغالبًا المشكلة مش فيك ولا في المواقف نفسها. لما تلاقيها متعصبة متحاولش تثبت إنك صح أو تدخل في نقاش وقتها لأن ده بيزود الخناقة. رد بكلمتين زي حاضر أو ماشي، وابعد لحد ما تهدى. بعدين في وقت هادي اتكلم معاها وقولها إنك بتتضايق من طريقة الكلام وإنك عايز تفهم إيه اللي مزعلها فعلًا. ولو في حد من إخواتك الكبار أو أبوك يقدر يكلمها بهدوء ويبقى وسيط يبقى أفضل. أهم حاجة متدخلش نفسك ،،أكيد هيا بتسمع من حد مثلا ليه متكلمش جدو أو نينه أو مثلا خالتو اكيد دول اقرب ناس ليها ،،بالنسبه لموضوع الطلاق فدا عادي أكيد هيا مخنوقه فجأه وإتراكم عليها ضغوطات مامتنا كلنا بتعمل كدا وبعدين بيهدوا لكن آسفه بجد إني هقول كدا سامحني لو غلطت🥹🙏🏻مش طبيعي انها تزعق علي كيس شامبو او انك صحيت متأخر يعني ممكن نفسيه ممكن تتكلم مع باباك بيحملها تروح .therapist هتبقي أحسن التراكمات اللي فيها أكيد هتبعد والطاقه السلبيه مثلا أنا شايفه الحل تكلم جدو أو نينه تحكي معاهم لأنهم والدينها وهما عارفين أكتر اي اللي ممكن يضايقها اسفه عالاطاله
تم النشر الخميس، ١١ يونيو ٢٠٢٦
وعليكم السلام ورحمة الله. أول حاجة أحب أقولها لك: اللي بتمر بيه صعب جدًا، وإحساسك بالحيرة والضيق طبيعي لأن الأم هي مصدر الأمان في البيت، فلما تتقلب فجأة كده بيحصل ارتباك كبير. اللي وصفته يشير إلى نمط متكرر (كل سنة تقريبًا) من التوتر الشديد والشكوك والتهديد بالطلاق، وده غالبًا مش بيحصل بدون سبب داخلي عندها، حتى لو مش واضح لكم. من منظور نفسي واجتماعي، السلوك ده ممكن يكون تعبير عن ضغوط متراكمة مش بتتكلم عنها (ضغط يومي، إحساس بالإهمال، تغيرات هرمونية، أو حتى مشاكل نفسية زي القلق أو الاكتئاب). لما بتزعق على تفاصيل صغيرة زي النوم المتأخر أو كيس الشامبو، غالبًا بتكون الزعيق موجه لشيء أكبر جواها مش قادرة تعبر عنه. والتلميح المتكرر للطلاق بيبقى وسيلة للتعبير عن الغضب أو اليأس مش بالضرورة رغبة حقيقية في الانفصال. إزاي تتصرف عمليًا دلوقتي بدون ما تتكلم معاها مباشرة: حافظ على هدوئك قدر الإمكان. لما بتزعق، ردودك الهادية بتقلل من تصعيد الموقف (مثلاً: "تمام، هعمل كده" بدل الدفاع عن نفسك). شارك في أعمال البيت بدون ما تنتظر طلب، ده بيقلل من إحساسها إنكم "بتتجاهلوها". راقب الأوقات اللي بتحصل فيها المشاكل (قبل الدورة الشهرية، بعد ضغط معين في الشغل…) عشان تقدر تتوقع وتتجنب بعض الصدامات. ادعُ لها وللبيت في صلاتك، واستغل أوقات الصلاة عشان تطلب من ربنا يصلح الحال، لأن التغيير الحقيقي بييجي من جوا. لو الموضوع بيتكرر بنفس القوة كل سنة، فكر في إشراك شخص كبير محترم من العائلة (عم أو خال) يقدر يتكلم معاها بهدوء بدون ما يحسسها إنكم "بتتآمرون عليها". الأهم إنك متاخدش الموضوع على نفسك شخصيًا. الأم اللي بتعمل كده غالبًا بتكون هي نفسها متألمة ومش عارفة تعبر. استمر في الدعاء والصبر، وربنا يصلح حال بيتكم ويهدي قلبها. لو عايز تتكلم أكتر عن موقف معين حصل، أنا هنا.
تم النشر الأربعاء، ١٠ يونيو ٢٠٢٦
النساء خلقن من ضلع اعوج ،فان ذهبت تقيمه كسرته ،تفكيرهم كله بالعاطفه انت تفكيرك منطق ،حاول تهدى كدا واقعد معاها شوف ال مضيقها اى كان السبب حاول تسمع بس وحسسها انك فى صفها وابدا خد خطوه فى تعديل ال مضيقها سواء كان التقصير من والدك او اخوك او انت حاول تقعد معاهم وتعرفهم ان مش هنفضل كدا كتير عاوزن نعيش كويسي شوف السلوك ال بيضيقها وامنعوه ،مهما عملت فهيا امك
تم النشر الخميس، ١١ يونيو ٢٠٢٦
ربنا يصلح ذات بينكم ، تودد لأمك ففضلها عليك كبير حاول تتفاهم معها في وقت تكون هاديه فيه
تم النشر الخميس، ١١ يونيو ٢٠٢٦
ما تتكلمش معاها فقط عليك الصبر والبر .... الله أعلم قد تكون عاشت طفولة صعبة كان مثلا بيتهم بيحبوا الولاد أكثر من البنات (ودي حاجة غلط) فهي نشأت على كره الرجال .... وفي احتمالات كثير زي مثلا انها اتعودت على المشاكل من صغرها فمبتعرفش تعيش طبيعي بهدوء ..... عموما انت دلوقتي عشت معاها في مشاكل فمتخليش المشاكل دي تأثر على أولادك لو ربنا رزقك أن شاء الله
تم النشر الخميس، ١١ يونيو ٢٠٢٦
لو انت من عمر 18 فيما فوق ،فإنت ممكن تجرب انك تعمل حاجه زي انك في مره تجيب ليها حاجه حلوة وانت جاي من برا أو حاجه هي بتحبها ، في احتمال كبير انها حاسه بشئ ينقصها ،و بتخرجه في الزعيق فيكم ، و اي ست بتيجي بالحنيه و الاحتواء ، ممكن لما تحسها هادئه روح كلمها و قولها اخبار يومك ايه ، ممكن تتريق و تقولك انك اول مره تسأل ، بس قولها انك حسيت انك مبتسألش فبتسأل ، و هكذا
تم النشر الخميس، ١١ يونيو ٢٠٢٦
الحل في هذه الحاله ،، كلمة *حاضر* فقط
تم النشر الأربعاء، ١٠ يونيو ٢٠٢٦
لعرض السؤال في فدني اضغط هنا