أنا طالب في الثانوية العامة، وفاضل 15 يوم على الامتحانات. حاسس بخنقة ومش قادر أذاكر، وكأني نسيت المنهج ومش عارف أبدأ منين، وحاسس إني ضايع.
السلام عليكم ورحمه الله وبركاته. ان شاء الله فتره وهتعدي على خير باذن الله بس يعني انا بحب ادي نصيحه دي لكل اللي مضغوطين حاليا في ثانويه عامه وحسني ان الدنيا ضاع منهم جدا خدود بريك يا جماعه دي مش حاجه غريبه حتى ولو في التوقيت ده مش لازم اقضي ال 24 ساعه بذاكر لازم اخذ بريك لازم اسمح لمخي ان هو يعمل شد انه يفصل انه يبعد تركيزه لو فضلت باصص على حاجه هقول مثال عبيط جدا حاجه وبدور عليها وعماله بص وارجع ابص في نفس المكان وادور مش لاقيها مش لاقيها مش شايفها مش شايفها لكن بعد شويه بعد ما بخرج بقول خلاص انا خلاص ما لقيتهاش واخرج اروح مشوار وارجع ابص الاقيها في المكان اللي انا جيت ودورت فيه طب وانا ما كنتش شايفها ليه من كتر ما انا مركز في نفس الحاجه بيبدا مخي حرفيا يعمل ازاحه للحاجه اللي انا شايفها قدامي دي كثره تركيز ممكن يجي بعكسه. لاني عملت دلوقتي ارهاق لمخي بالفكره فبدا يشوش على الفكره نفسها فاحنا مش محتاجين نعمل دفنه مذاكره لازم يكون في عندي بريك لازم يكون في عندي فصالات هاخذ بعضي وانزل اتمشى واشرب كوبايه عصير وارجع ومش هعمل اي حاجه مش هامسك موبايل مش هبص على حاجه ليها علاقه بالامتحانات مش هبص على مراجعات مبعوثه لي مش عارفه pdf مش هعمل اي حاجه من دي خالص الوقت بتاع البريك ده. انا متبصش على اي حاجه فيها منهج وهكذا كل الكلام ده والله ضروري جدا بالتوفيق ان شاء الله.
تم النشر السبت، ٦ يونيو ٢٠٢٦
يا صاحبي، اللي بتمر بيه طبيعي جدًا قبل الامتحانات، كتير من الطلاب بيحسوا بنفس الضغط والنسيان. خلينا نركز على خطوات عملية عشان تخرج من الدوامة دي: ابدأ بخطة يومية بسيطة : قسم الـ15 يوم على المواد حسب أهميتها وصعوبتها. ركز على مراجعة سريعة للمنهج (مش دراسة من الصفر)، وخصص يومين للمراجعة النهائية. ابدأ بجلسات قصيرة : 45 دقيقة دراسة + 10-15 دقيقة راحة. ابدأ بالمواد اللي بتحس إنك نسيتها أقل عشان تبني ثقة. راجع الملخصات والأسئلة السابقة : متضيعش وقت في قراءة كل حاجة، ركز على النقاط الرئيسية والامتحانات السابقة. ادعُ ربنا : صلي وادعُ بالتوفيق، ده هيطمن قلبك ويخفف الضغط. أنت قادر، و15 يوم كفاية لو ركزت. لو عايز خطة أكثر تفصيلاً أو نصائح إضافية، قولي. وممكن تشوف أسئلة مشابهة على فدني عشان تلاقي تجارب تانية.
تم النشر السبت، ٦ يونيو ٢٠٢٦
غالبًا بتحس إنك ناسي المنهج عشان بتحاول تسترجعه كله في لحظة واحدة فجأة ودا مستحيل ما تخليش الشيطان والأفكار السلبية تسيطر عليك عشان تعرف انت فعلًا فاكر ولا ناسي هات امتحانات وابدأ حلها، لو كنت بتذاكر هتلاقي نفسك بتعرف تحل عشان بتركز على معلومة واحدة بتسترجعها وحتى لو لقيت حاجات ناسيها دا طبيعي، لو كنت مذاكرها مراجعة بسيطة هتفكرك بيها تاني وعمومًا حل امتحانات كتير عشان تتعود على شكل الأسئلة وتحل أسئلة متنوعة وربنا يوفقك وتجيب المجموع اللي نفسك فيه وتدخل الكلية اللي تحبها وتوصلك للمستقبل اللي يرضي ربنا ويرضيك
تم النشر الثلاثاء، ٩ يونيو ٢٠٢٦
السلام عليكم، شعورك طبيعي جدا، وخاصة لو كل تفكيرك إن باقي أسبوعين والوقت بيمر أو أنا هلحق ولا لأ... كل الأفكار دي بتوترك زيادة وبتخنقك وهتحسسك فعلا إنك ناسي كل حاجة. اول خطوة إنك تهدى وتفصل تماما من فكرة إن عندك امتحانات. لو مخنوق اخرج من أوضتك وابعد خالص عن المكتب واعمل أي حاجة تانية بعيدة عن المذاكرة، شوف هواية بتحبها أو لعبة كنت بتلعبها وقت فراعك، ارسم أو حتى شخبط، انزل اتمشى وشم هوا، أي حاجة مهاش علاقة بالدراسة. ومتحسش خالص بالذنب تجاه الوقت اللي هتفصل فيه مع نفسك، جسمك وعقلك حاليا عاوزين إعادة شحن، فالوقت اللي هتفصله دلوقتي هو بالضبط إعادة شحن لطاقتك ونفسيتك عشان تقدر تستمر. بعدين هترجع ترتب أفكارك وخطواتك بهدوء. لو مكتبك وغرفتك مش مترتبة أو الكتب كلها قدامك يبقى غير مكان مراجعتك، اقعد في مكان تاني يبقى فاضي ومفيش قدامك غير كتاب ودفتر المادة اللي بتراجعها. مجرد إن فيه فوضى حواليك ولا كتب المواد كلها هيخليك حاسس بالضغط وإن لسه حاجات تانية وراك محتاجة تخلص، فخلي قدامك بس المادة والجزء اللي بتراجعه وبعدها انقل للي بعده. وخلي فيه فترات راحة بين الجلسات تفصل فيها لكن خد بالك فترة الراحة لا تمسك فيها موبايل وتبدأ اسكرول، غمض عينيك أفضل أو اعمل تمارين تمدد أو أقف في البلكونة شم هوا وبعدها ارجع بنشاط للمهمة التالية. الثانوية العامة محتاجة هدوء أعصاب ونوم كويس قبل الامتحانات. بالتوفيق إن شاء الله.
تم النشر الأحد، ٧ يونيو ٢٠٢٦
طبيعي جدا دا انا كنت بمر بحالة اكتئاب علشان مكنتش بذاكر من اول السنة بس اللي اللي انا عملتة اني مسكت المراجعات اللي بينزلوها ف اليوتيوب ٢٤ساعة مذاكرة حتي لو ريحت يبقي ريحت خمس دقايق اكل هو اي نعم اجهاد جامد بس تلحق نفسك انا ف اخر اسبوع من تالتة ثانوي مرحمتش نفسي مذاكر وحل وجبت ف الاخر ٦٧ف المية دا حلو مقارنة بواحدة مكانتش بتذاكر خالص ف الحق نفسك ذاكر وانت نفسك مقفولة معلش عيط وانت بتذاكر اهم حاجة تذاكر وهيعدو الإمتحانات خلاص هما كام يوم اضغط ع نفسك معلش دلوقتي علشان متندمش بعدين صدقني
تم النشر السبت، ٦ يونيو ٢٠٢٦
طبيعي جدا
تم النشر الاثنين، ٨ يونيو ٢٠٢٦
أول حاجه إعرف إنك اللي هتنقذ نفسك بنفسك، محدش هييجي ينتشلك من الفوضى دي فقلل أسئله زي كدا وابدأ نفذ، تاني حاجه وأسهل طريق انك تجيب تلخيص لكل المواد بأهم النقاط في المنهج وتحفظ اللي يتحفظ وتفهم اللي يتفهم وتروح تحل والسؤال اللي يقف معاك هتشوف حله وتفهم ليه اختارنا الإجابه دي او اسمع مراجعات نهائيه لأن مفيش وقت تسمع شرح كل تفصيله وتفهمها وتحفظها وتحل عليها كتير، تالت حاجه إبعد عن التلفون والناس المحيطه بيك الفتره دي خاصةً لو ناس سلبيه هتحبطك وتقلل من قدراتك، متخليش كل يومك في البيت او في الدروس حدد ساعه انزل جيم او مارس أي نوع رياضه حتى لو هتتمشى بس وهتشوف بنفسك ان دي حاجه بتفرق، إبدأ
تم النشر الاثنين، ٨ يونيو ٢٠٢٦
لعرض السؤال في فدني اضغط هنا