السلام عليكم ورحمه الله وبركاته
مش عارفه ابدأ منين ولا اقول ايه بس انا هتكلم باللي ف عقلي من غير ما ازينه ومن غير ما اعيش دور الضحيه او ابان اني صح انا بحكي عشان اطلع اللي جوايا بس وارتاح
انا امي بقالها ٧ شهور بتعاملني بطريقه وحشه اوي اكني مش بنتها بكون بتكلم معاها بتسيبني وتمشي او تلف وشها الناحيه التانيه علطول بتقولي انتي معندكيش مسؤوليه وغبيه ومحدش يعتمد عليكي بس كلامها موجعنيش قد ما وجعني معاملتها لاخواتي احسن مني
علطول بشوفها بتضحك مع اخواتي وبتهزر وتحكي معاهم ويخرجو مع بعض وتحكيلهم أسرارها وهما نفس الشيء محدش منهم بخاف يتكلم معاها
انا كل لما اتكلم تبدأ معايا تحقيق وتطلعني غلط ف الاخر بخاف اتكلم معاها لدرجه ان في الدقيقتين ف اليوم اللي بتسال عليا فيهم وتكلمني بكون متوتره وخايفه ومش عارفه اتكلم واخواتي كلهم طبعا متدلعين فكل واحد يجي يضايقني
عندي اختين هما قد بعض يعتبر ف عاملين زي الصحاب كل شويه يتكلم ويتنمرو عليا وبيقفولي على الواحده لما اكل يتنمرو على طريقه اكلي ولما امشي يتنمرو على مشيتي واربعه وعشرين ساعه بيتكلموا مع بعض ولما اجي اتكلم بيسكتو وكل واحد بيبعد لدرجه انهم بيتنمرو قدام أمي وامي مش بتقول حاجه
فانا بتعصب وبتخانق معاهم وطبعا انا اللي ف الاخر بطلع غلط وعصبيه لدرجه انهم مسميني ف البيت المريضه نفسيا أختي كل شويه تقولي كده وكل لما اتكلم تقولي اسكتي محدش هيرد عليكي اصلا او محدش عايز يسمعك صوتك بيصدعنا بس ده كلو مش حاجه قدام الكلمات اللي علطول بتقولهم ليا اني مريضه نفسيه ومهمشه وبكره ومحدش هيحبني
وتيجي تذلني ان امي بتعاملها احسن مني واني محدش بيسمعني وانا بتكلم وعلطول محدش بيرد عليا وبتقول اني نكره وليهم حق ميردوش معرفش ايه اللي ممكن يوصل واحده انهم تقول كده لاختها بس بجد الموضوع مضايقني المشكله لما اعاملهم وحش بكرهه نفسي وبحس بتأنيب ضمير
وعليكم السلام ورحمة الله وبركاته. أول حاجة أحب أقولها لك: اللي بتحكيه مش "دراما" ولا مبالغة، ده ألم حقيقي بيحصل جوا البيت، وإحساسك إنك مهمشة ومرفوضة من أقرب الناس ليكي ده شيء ثقيل جدًا على القلب. ربنا يخفف عنك ويجبر خاطرك. اللي بيحصل غالبًا مش "كره" صريح من الأم، لكنه نمط سلوكي بيتراكم. أحيانًا الأم بتكون بتفضل بنت على بنت بدون وعي، أو بتكون شايفة فيكِ صفات بتذكرها بحاجة صعبة في حياتها فبتتعامل معاكِ بطريقة دفاعية أو رافضة. والأخوات بيقلدوا السلوك ده لأنهم شايفين إن "الأم موافقة"، فبيستمروا في التنمر. لما بتتعصبي وبتردي، بيطلعوا الصورة إنك "المريضة النفسية"، وده بيخلّي الدائرة تكبر. ده مش تبرير لسلوكهم، لكنه تفسير عشان تعرفي إن المشكلة مش فيكِ أنتِ، لكن في طريقة تعاملهم. عشان تحمي نفسك من غير ما تكرهيهم أو تكرهي نفسك: حاولي تقللي الاحتكاك اليومي قدر الإمكان، مش عقاب ليهم، لكن حماية لصحتك النفسية. لما يبدأوا يتنمروا، ردي بهدوء قصير زي "مش هكمل النقاش ده" ثم امشي، عشان متدخليش في دائرة الخناق اللي بيطلعوكِ فيها غلطانة. ابني دوائر خارجية صغيرة: أصدقاء، دراسة، هواية، أو حتى مجموعات على فدني فيها بنات بيتكلموا عن تجارب مشابهة. الشعور إنك "محدش بيسمعك" بيقل لما تلاقي ناس بتسمع وبتفهم. كل يوم اكتبي 3 حاجات إيجابية فيكِ، حتى لو صغيرة، عشان كلامهم السلبي ما يسيطرش على صورة نفسك. ادعي لنفسك وليهم بالهداية، وادعي ربنا يصلح القلوب. الصلة مش معناها تسمحي بالإيذاء، لكن معناها تحافظي على نفسك وأنتِ بتحاولي تحسني العلاقة بهدوء. لو الموضوع بقى بيأثر على نومك أو دراستك أو مزاجك بشكل كبير، ابحثي على فدني عن أسئلة مشابهة أو استشيري متخصص في الصحة النفسية عشان تاخدي دعم إضافي. أنتِ مش "المريضة النفسية"، أنتِ بنت بتتعرض لضغط عائلي صعب، وده مش عيب فيكِ. ربنا يقويكِ ويبعتلك الراحة اللي تستاهليها.
تم النشر الخميس، ٥ نوفمبر ٢٠٢٦
ربنا يصلح حالك ويسر قلبك ويرضيكي ويرضى عنك عندي نفس المشكلة امي بتفرق وضيفي مع كده استغلال مادي ومعنوي مع اني اللي شائبة همها طول عمري ومرضها وانا عارفة أنه الام والاب مهما تعمل مش هنوفيهم حقهم بس لما هما يكونو لياذونا بالشكل ده يبقى ايه الموقف
تم النشر الأحد، ٨ نوفمبر ٢٠٢٦
عايزه اقولك حاجه محدش بيختار أهله في مش انتي بس صدقيني اللي بتمري بكدا لا ناس كتتتير ومنهم انا بس دايما ادعي ربنا يحنن قلبها عليكي واسعي انك تراضيها وحاول تكسبيها وتكسبي خواتم ومتحطيش اي حاجه في دماغك تفضي وكدا كدا محدش دايم لحد مصير فيوم تتتجوزي وتعيش بعيد عنهم
تم النشر السبت، ٧ نوفمبر ٢٠٢٦
اما موضوع انتي بتعاملهم وحش انتي مش بتعمليهم وحش لانك عاقة انتي بتعملي كدا بسبب الي عملوه ، بس مع الأم والأب مهما كانوا بيأذوكي مينفعش تردي الإساءة بالإساءة، على حسب مين برضوا الي قدامك موضوع فيه تفصيل يعني فيه حد بيكون مضطر حقيقيا وفيه حد لأه وحاجات زي كدا، فلأ متنأبيش ضميرك انت مش بتأذييهم في حاجة بس في نفس الوقت متتعديش ومتتجاوزيش
تم النشر الجمعة، ٦ نوفمبر ٢٠٢٦
اخواتك الي بيعملوه غلط جدا طبعا حاولي تقللي احتكاكك معاهم لأنهم مؤذيين وابعدي عن آذاهم طبعا واصبري واحتسبي وخدي بالأسباب ان ربنا يغير حالك او يفرجها وفكري ، ومش عارف صراحة هل مثلا تحاولي تكلمي مع اخواتك وامك بإنهم يغيروا طريقتهم دي لانها بتأذيكي ولا ايه معرفش وتعرفيهم ان طريقة دي مؤذية لأنهم مثلا جاهلين مش عارفين آثار كلامهم دي بتعمل ايه مش عارف، ومعرفش برضوا اذا مثلا تكلمي حد من اقاربك او حد يحل ما بينكم ويصلح الأمور ، فيه حاجات كتير فكري فيها فاصبري والله هيصلح حالك ويفرجها ان شاء الله مهما كانت ظروف صعبة لو ربنا شاء انها تتحل هتتحل على طول ، خلي دي عندك قناعة
تم النشر الجمعة، ٦ نوفمبر ٢٠٢٦
بشوف دايما ان الحل الوحيد انك توجهي الشخص ده و تطلعي كل اللي ف قلبك و لما تشوفي ردك ميعجبكيش تردي ف وقتها مش قلة احترام لا بلعكس انت بتحفظي نفسك من الحقد و الغيره و امراض القلب النفسية لمجرد اني سمعت كلامك ده أثر فيا و حزني جدا بالله ربنا يعينك و يريح قلبك لازم تتكلمي مع مامتك و توجهيها باللي بيحصل ده و تتكلمي مع اخواتك و تفهميهم انك مش دميه وقت ما يحبوا يدللوها و وقت ما تضيق يكسروا فيها لازم تقوي شخصيتك و مش تتنازلي ولا تقبلي بمعمله مش تستحقيها من حقوقك ك بنتها انها تسمعك و تقسم بينكم بالعدل حبها و اهتمامها و تهتم بيكي زيهم بظبط كلميها و بطلي تكتمي جواكي ❤
تم النشر الجمعة، ٦ نوفمبر ٢٠٢٦
لعرض السؤال في فدني اضغط هنا