أنا طول عمري بحب أساعد الناس وأشارك أي حاجة أتعلمها، لدرجة إني كنت أحيانًا أبقى مستعجلة أبعت المعلومة لغيري قبل ما أخلص مذاكرتي أنا. بس الفترة الأخيرة بقيت بحس إني مش عايزة أدي كل اللي عندي بسهولة زي الأول، وده مضايقني لأن ده مش طبعي.
في نفس الوقت أنا مؤمنة إن زكاة العلم نشره، فبحس بتأنيب ضمير لما أحتفظ بمعلومة لنفسي. لكن المشكلة مش إني مش عايزة أفيد حد، المشكلة إني مش عايزة الناس تعتمد عليا في كل حاجة أو تبقى علاقتهم بيا مبنية على إني مصدر للمعلومات والملخصات وبس.
محتارة بين رغبتي إني أساعد الناس، وبين احتياجي إني أحط حدود تحافظ على وقتي ومجهودي وما تخلينيش مسؤولة عن مذاكرة كل اللي حوالي بس بردو حرام عليا كدا أنا أنانيه كبيره ودا مش طبعي زعلانه اني بقيت كدا 💔علي الرغم اني بحب الجميع وبحب أساعد بس مش عارفه اي الحقد اللي ملأ قلبي دا
لا دا مش انانيه كل حاجه ولها حدود ياقلبي انت كدا بتديي بس وعلاقتك باللي حواليكي مبنيه على عطاءك لهم بس وهما كدا هيفكروا دا حق مكتسب ومش هيراعوا بعد كدا ولا حتى هيحسوا انك كدا بتعملي معاهم خدمه هياخدوها كحق لهم وانك لازم تعملي كدا وهيحصلك انت استنزاف لمشاعرك فلازم تعملي حدود لكل حاجه معلوماتك مشاعرك دا غير انهم مينفعش يوصلوا لكل حاجه بسهوله انت تعبتي عشان تعرفي المعلومه دي ودورتي وبحثتي وعرفتي فمينفعش تقدميها بسهوله مبقولش انك تمنعي عنهم كل حاجه بس في نفس الوقت ممكن تقوليلهم ابحثوا في المكان الفلاني هتعرفوها اقرأوا عن كذا وهتعرفو وهكذا يعني فهماني فدي مش انانيه بس لكل مجتهد نصيب وهما مفروض يجتهدوا شويه لاجل المعلومه الا لو انت عاوزه تقدميها بنفس راضيه لكن لو حسيتي انك مش عاوزه يبقى خلاص
تم النشر الثلاثاء، ٩ يونيو ٢٠٢٦
السلام عليكم، مش أنانية ولا حاجة. المفروض أصلا يكون فيه توازن بين العطاء والأخذ في حياتك، لو فضلتِ بس الشخصية اللي بتعطي دون حدود فأولا ، هتتعبي جدا وتُستنزفي وأعتقد ده اللي وصلتِ له حاليا، واضح إن نفسك محتاجة فاصل لكن أنتِ فسرتِ ده إنها بدأت تبخل على الغير. ثانيا، العطاء بلا حدود مع الوقت هيتفسر عند الطرف المقابل إنه حقه المكتسب وأمر مُسلّم به عنده وأي تقصير منك مستقبلا ولو صغير هيكون كأنك أجرمتِ في حقه وظلمته. فتعلمي التوازن وصححي كمان أفكارك عن نشر العلم. آه زكاة العلم نشره لكن أنتِ غير مطالبة بنشر كل حاجة تتعلميها ولا كل معلومة بذلتِ جهد وتعبتِ فيها ومحدش هيعاتبك لو احتفظتِ بمجهودك لنفسك. وبعدين فين المشكلة في إنك تحبي نفسك؟ هتحبي الغير وتساعديهم إزاي إذا مش بدأت بحب نفسك ومساعدتها؟ شاركي وساعدي لكن بحدود وحافظي على مجهودك ووقتك وافتكري إن لنفسك عليك حق. وربنا يوفقك.💚💚
تم النشر الاثنين، ٨ يونيو ٢٠٢٦
لا، مش أنانية ولا فيكِ حقد، ده شعور طبيعي جدًا بيحصل لما الإنسان يتعب من العطاء بدون حدود. أنتِ طول عمركِ بتساعدي وبتشاركي العلم، وده شيء جميل ومؤمنة بـ"زكاة العلم نشره"، بس دلوقتي جسمكِ وعقلكِ بيطلبوا توازن عشان ما تتعبيش. الرغبة في حماية وقتكِ ومجهودكِ مش كره للناس، ده حماية لنفسكِ عشان تقدري تستمري تساعدي بطريقة صحية. جربي تحطي حدود بسيطة زي: تشاركي المعلومات لكن مش تلخصي كل حاجة، أو تقولي "هقدر أساعد في النقطة دي بس"، كده بتفيدي بدون ما تبقي المصدر الوحيد. ده مش حرام، ده حكمة. لو الموضوع بيضايقكِ أكتر، ابحثي عن أسئلة مشابهة في فدني عشان تشوفي تجارب غيركِ، أو استشيري متخصصة من صفحة الخبراء: https://www.fedni.net/experts . أنتِ كويسة زي ما أنتِ، وده تغيير مؤقت مش دائم. 💛
تم النشر الاثنين، ٨ يونيو ٢٠٢٦
السلام عليكم، هو على فكرة مش حقد يمكن وقتك ضايع وبتساعدي كتير جدًا عشان كدا عايزة تحافظي على وقتك فـ الشيطان بيقولك أنتي عايزة تأخدي كل حاجة وحدك؟؟ لأ حافظي على وقتك ومجهودك كان في وقت معاكي تشاركي حد شاركي مفيش خلاص أنتِ فاهمة زكاة العلم خطأ لأن ساعات كثرة المشاركة بتقلب بالضدد بمعنى ممكن تشاركي المحاضرة والمذاكرة او كورسات على حسب وفي الآخر تتحسدي أعتقد الأفضل تتعملي الأول وتعملي حاجة لنفسك وبعدين شاركي لكن هي مش حقد ولا غل هي حفاظًا على وقتك ومجهودك وطاقتك، وكمان قضاء الحاجة في الكتمان لأني بلاحظ فكرة الحسد ما بين طلبة العلم، أنا كنت بشارك زيك بس بطلت عشان اكشفت إني فاتحة حياتي بقيت بشارك لو في وقت لكن أعتقد الكل بيكون عارف كل حاجه بس مش بيشارك فكرة الإعتماد عليكي دي خطا متخليش حد يعتمك عليكي كل واحد يشيل مسؤولية نفسه بنفسه
تم النشر الاثنين، ٨ يونيو ٢٠٢٦
لازم حدود هتتدمرى ودا هيصبح لغيرك شبة تعود ساعدى ولكن فى حدود برضة وازنى ما بين الأمرين
تم النشر الاثنين، ٨ يونيو ٢٠٢٦
لعرض السؤال في فدني اضغط هنا