اعمل ايه لو حاسه دايما اني محتاجه قوي خارجيه يعني دايما بيبقى نفسي ان مامتي او حد من اهلي يبقى مسؤول عني وعن مذاكرتي يتبسط بيا لما اخلص اللي ورايا ويكافئني وياخد مني الموبايل لعند ما اذاكر حد مهتم بجد مش
بس للاسف الحاجه دي مش متوفره ليا خالص ومهما حاولت اعمل كدا مع نفسي وانا اللي اديها مكافآت وابقى مسؤوله عن نفسي بس مش بقدر فالاخر بزهق انا مش بقدر اسحب التليفون مني لما اقصر في حاجه وغالبا كل مره بفشل لدرجه اني لجأت لبرامج الذكاء الاصطناعي عشان تحاول تقوم بالدور دا ولو حتى بالكلام للأسف حاولت كتير وفشلت كتير
ومع اني كبيره والمفروض ان خلاص مش لسه صغيره بس ما زال جوايا طفله عايزه حد ياخد باله منها ويبقى مسؤول عنها
وفيما في ذلك مجاهده عظيمه مع النفس عشان تبعد عن أي علاقه محرمه او اي حاجه آخرتها مش هتبقي مرضيه وهتوصلني لحاله أسوأ
نفسي حد يفيدني ولو بنصيحه هتفرق معايا لاني داخله على سنه مصيريه كمان كام شهر بس
بصي يا بنتي ربنا لما خلقنا خلق فينا حاجة اسمها النفس الأمارة بالسوء ودي دايما عايزه الراحة والهروب من التعب بس في نفس الوقت ربنا قال "وأن ليس للإنسان إلا ما سعى" يعني سعيك ده هو اللي ربنا هيحاسبك عليه مش النتيجة فاستعيني بالله وجددي نيتك إن مذاكرتك دي عبادة وطاعة لله عشان تنفعي نفسك وأهلك وخليكي عارفة إن ربنا هو السند الحقيقي اللي مش بيغيب فكل ما تحسي بضعف أو إنك محتاجة حد جنبك روحي صلي واشكي لربنا وهو هيقويكي وبالنسبة لمجاهدتك لنفسك في البعد عن الغلط فده أعظم جهاد وربنا قال ..والذين جاهدوا فينا لنهدينهم سبلنا...يعني ربنا هيفتحها في وشك ويرزقك القوة من عنده طول ما إنتي بتتقي الله وتذكري دايما إن اللي بيسيب حاجة لله ربنا بيعوضه بأحسن منها فاستعوضي ربنا في التعب ده واستبشري خير باللي جاي. وجد والله ربنا يحفظك ويوفقك 🌷 🤍
تم النشر الخميس، ٢٣ أبريل ٢٠٢٦
السلام عليكم، هو مسألة إن الاهتمام مبيطلبش دي مش صح.. الاهتمام بيطلب عادي. ساعات الأهل أو الناس عامة ممكن مياخدوش بالهم من احتياجات اللي قصادهم أو يفهموا إيه ناقصه أو محتاجه منهم، كمان الأهل ممكن حسب ما تربوا يبقوا فاكرين إن ما دام بيشقوا ويتعبوا عشان يوفروا لقمة وتعليم ومصاريف يبقى هم كده قاموا بواجبهم، مسألة العواطف والتشجيع والكلام الحلو يا إما هيكون بالنسبة لهم (بفهم خاطئ) مش من المسؤولية المطلوبة تجاه ولادهم أو رفاهية ميقدروش عليها وسط زحمة الحياة والظروف الصعبة. ** فلو أهلك مشغولين أو مش فاهمين أو شايفين أنتِ محتاجة إيه اقتحمي أنتِ دائرتهم واطلب حقك. عاوزة متابعة للدراسة اطلبي ده بجرأة وصراحة لأنه حقك، عاوزة تسحب منك الموبايل عشان تذاكري روحي واطلبي ده منها أو من والدك أو أخ كبير. اطلبي الاهتمام عادي. ** ده اولا... ثانيا.. ومع إني بقول لك اطلبي حقك لازم برضه أنصحك إنك توازني الجانبين وإنك تعلمي نفسك الاعتماد على الذات والتحفيز الذاتي... مش صح لحياتك ومستقبلك انتظار التحفيز من الخارج لأنه مؤقت وغير مضمون يفضل جنبك طول العمر. ** والمجاهدة مع صعوبتها بتؤجري عليها... الحياة كلها مجاهدة والدنيا متوقع فيها إننا نجاهد ونسعى. أنتِ كل معافرتك وكل خطوة بتمشيها وحدك وتقعي وترجعي تقفي ربنا إن شاء الله هيجازيكِ عليها فاخلصي نيتها لله واستعيني به وهو هيقويكِ إن شاء الله. بالتوفيق.💚
تم النشر السبت، ٢٥ أبريل ٢٠٢٦
فكرة إنك تستني حد ييجي يقومك مش هتفيدك لأن حتى لو حد جه فترة هيمشي وترجعي لنفس النقطة الأحسن إنك تبدأي تعملي لنفسك “مرجعية” صغيرة في يومك حاجة ثابتة ترجعي لها من غير ما تفكري زي معاد معين تقعدي فيه أو حاجة بسيطة بتبدئي بيها يومك ومش مطلوب منك دلوقتي تضغطي على نفسك ولا تكبّري موضوع تالتة ثانوي إنتي لسه قدامك وقت المفروض تستغليه إنك تتعلمي تمشي يومك بإيدك تعرفي تبدأي حتى لو مش مزاجك وتكمّلي حتى لو مفيش حد بيشجعك اللي بيدخل السنة دي وهو متعود على النظام حتى لو بسيط بيبقى أهدى بكتير من اللي داخل معتمد على الحماس أو الناس فخدي الموضوع بهدوء مش محتاجة تبقي حد تاني ولا تبدأي بداية كبيرة بس كل يوم تحاولي تمسكي يومك بإيدك شوية..(دي حاجه حبيت اضيفها ليكي جنب كلام الأعضاء الكرام اختصارا لإعادة الكلام مره تاني)..
تم النشر الجمعة، ٢٤ أبريل ٢٠٢٦
حبيبتي، أنا فاهمة تمامًا اللي جواكِ.. الطفلة اللي جواكِ دي محتاجة احتواء، وده شعور طبيعي جدًا، خاصة في سنة مصيرية زي دي. بس الحمد لله، إنتِ قادرة تبني الاحتواء ده مع نفسكِ خطوة بخطوة، بالاعتماد على ربنا سبحانه وتعالى. خلينا نعمل خطة عملية تساعدكِ: 1. ابدئي بالتوكل والدعاء : كل صباح بعد الفجر، قولي: "اللهم أعنِّي على ذكرك وشكرك وحسن عبادتك"، وادعي ربنا يملأ قلبكِ بالقوة. اقرئي سورة الشرح 3 مرات قبل الدراسة، هتفتح لكِ صدركِ وييسر أمركِ. 2. روتين دراسي صارم : حددي جدول يومي مكتوب على ورقة (مش موبايل): مثلاً، 50 دقيقة دراسة + 10 دقيقة راحة. استخدمي تطبيقات زي "Forest" أو "Focus Booster" تحصر الموبايل تمامًا أثناء الدراسة (حمليها دلوقتي وفعّليها بكلمة سر صعبة). ضعي الموبايل في غرفة تانية أو في صندوق مقفول، وخلّي مفتاحه بعيد. 3. مكافآت ذاتية ذكية : مش أي حاجة، حدديها: بعد 3 ساعات دراسة ناجحة، كافئي نفسكِ بشيء تحبيه زي فنجان شاي مع قطعة شوكولاتة (بس بعد الإنجاز!). سجّلي النجاحات في دفتر "إنجازاتي"، وكل أسبوع شوفي اللي عملتيه – هتحسي بالفخر بنفسكِ. 4. مجاهدة النفس ضد المحرمات : ذكّري نفسكِ: "اللي حرام مش هيملأ الفراغ، بالعكس هيزيده". استبدليه بهوايات حلال ومفيدة. كل ما حسيتِ الضعف، اغسلي وجهكِ وقولي "أعوذ بالله من الشيطان الرجيم". إنتِ مش صغيرة، بس الطفلة دي هتكبر مع الاستمرار. جربي الخطة دي أسبوع واحد بس، وهتشوفي الفرق. لو عايزة دعم أكتر، ابحثي في فدني عن "كيف أركز في الدراسة" أو روحي لصفحة الخبراء https://www.fedni.net/experts – فيه مدربين حياة ونفسيين هيساعدوكِ بشخصي. ربنا يوفقكِ يا قمر، إنتِ هتنجحي إن شاء الله! 💪❤️ قوليلي بعد أسبوع إيه اللي حصل.
تم النشر الخميس، ٢٣ أبريل ٢٠٢٦
الدنيا مش وردي بالشكل اللي إنتي متخيلاه ده نهائي ، كل إنسان بيحاول وبيجاهد لإنه مسئول عن نفسه وله حياته الخاصه ومشكله اللي بتواجهه سواء كان أب أو أم كلهم بيحاولوا بقدر الإمكان توفير المتطلبات اللي عليهم لكن صعب اوي إن حد يتابع معاكي حياتك خطوه بخطوه مش موجودة عند أي حد دي غير في الخيال بس والأفلام أما في الطبيعي لأ فأنتي محتاجه تفوقي شويه وخرجي نفسك من جو دور الضحيه لإنه بجد متعب وخليكي حد متماسك كده ،، ورينا يوفقك لمعالي الأمور 😊
تم النشر الجمعة، ٢٤ أبريل ٢٠٢٦
انا شايفه اننا نمسك طرف الخيط ده اول حل للمشكله، بمعني انك لو عرفتي اي السبب من البدايه الوصلك لكده هتعرفي تمانعيه جوا عقلك بمعني ان لو اهلك عودوكي وانتي صغيره علي ده وانهم يشيلو مسؤليتك ده هو المخليكي كده، ف في حل انا سمعته عنه وهو انك من جوا عقلك تقنعي نفسك انك لازم تكوني مسؤله عن نفسك يعني لو كل يوم اقنعتي نفسك ب ده هيحصل فعلا وعقلك هيتعود علي ده ومع الوقت ولله وعن تجربه يعني لما الانسان بيقنع نفسه من جواه بصوت كده من جواكي بيحصل العجايب حقيقي يعني بو قولتي انا فاشله هتكوني كده ولو قولتي العكس هيحصل برضو
تم النشر السبت، ٢٥ أبريل ٢٠٢٦
مش عارفه إذا كلامي هيساعدك ، بس بقولك كدا لاني عايزك تعرفي انك مش لوحدك في احساسك دا ، انا كدا بس لم ببقي محتاجة اكلم حد بتكلم مع ربنا و انا واثقة انه سمعني و ان هلاقي حل لامري ، كمان اخترعت شخصيات خيالية ليهم اسماء و حياه ، و صدقي رغم انك ممكن تشوفي موضوع تافه ، لكن شخصيات الخيالية دي ساعدتني في حاجات كتير منهم اني متجه للغلط و اكلم حد ، و كمان بتشجعني . حاولي يكون ليكي هواية تمرسيها ، اتعرفِ علي بنت تبقي كويسه حتي لو اونلاين ، و متقلقيش هتبقي كويسه
تم النشر الجمعة، ٢٤ أبريل ٢٠٢٦
اهلا. يمكن الموضوع ملوش علاقه بالعمر خلصت سنتين وربع قرن في هذه الحياه ونفسي كمان الاقي حد يعمل معايا كده بس في الحقيقة محدش بيعمل كده مع نفسه عشان يعمله مع حد تاني فمفيش حد هيساعدك غير نفسك . في برنامج ظريف على جوجل بلاي اسمه الرفاهية الرقمية منه تقدري تفرضي وقت على كل تطبيق بتشغليه . فكرة الصحبه الصالحه وان كانت مش سهل تكون موجودة لكن لو قدرتي تعمليها دي هتخفف عليكي كتير في احتياجاتك النفسي. انك تكافئي نفسك مش رفاهيه دي حاجه مهمه جدا جدا. ممكن تلعبي رياضه منزليه في تطبيقات على جوجل بلاي للرياضه المنزلية بتنشط الواحد وبتحافظ على صحته وتركيزه ونفسيته
تم النشر الخميس، ٢٣ أبريل ٢٠٢٦
@Menna والله انا مش شايفه الدنيا وردي ولا حاجه بس بتكلم عن المتطلبات الاساسيه عن أي حد او لي بنت خصوصا ف سن المراهقة اكيد من حقي احس اني عايزه اهتمام من مامتي او كلمه كويسه من بابايا ياخدو بالهم مني بعمل اي مبعملش ايه لاني فعلا معنديش لسه الوعي الكافي اللي يخليني ابعد عن الغلط ماما تشوفني اذا كنت كويس وبذاكر كويس ولا بقضي وقت كتير على الموبايل وببهيالي ان كل راع مسؤول عن رعيته وانا مازالت لسه مسؤوله منهم ولو بعمل حاجه هما مفهمونيش انها غلط وانا معرفش اكيد ربنا هيحاسبهم وعن عمره فيما افناه لما يقولك انت كأب كنت فين لما بنتك بتشحت الكلمه الحلوه من برا او انتي كأم كنتي بتعملي ايه اهم من انك تعلمي بنتك دينها وازاي تطبقه وتعمل بيه في حياتها بيتهيألي الحياه كلها مش عباره عن اب وام وظيفتهم انهم يجيبوا اكل وشرب وفلوس بس الموضوع مش كدا انا لو مش هعيش ولادي عيشه كويسه وههتم واخد بالي منهم واختارلهم اب كويس يحضنهم ويسمعهم كلمه كويسه من الأكيد مش لازم اخلف اصلا ربنا يصلح حالنا وحالك يا اخت اذا كنتي مش قادره تدي النصيحه اتمنى بلاش نقول اي كلام
تم النشر السبت، ٢٥ أبريل ٢٠٢٦
لعرض السؤال في فدني اضغط هنا