انا ذكرى ميلادي قربت، بخاف من اليوم ده اوي، زمان كان دايما لازم يحصل مشكلة او ابعد عن حد بحبه ف اليوم ده و كان بيعدي بشكل صعب اوي عليا و السنة اللي فاتت كان معايا ناس جداد اتبسطت اوي بيهم و كان احلى يوم يعتبر ف حياتي، الناس دول مبقوش موجودين دلوقتي و انا خايفة و مش عايزة احس بالنقص و ف نفس الوقت مش عايزة يكون معايا حد عشان انا مش هقدر اثق فيهم تاني، هل في حل إني اتخطى الخوف ده
السلام عليكم، بيقولوا: "كل متوقع آت" وفيه مثل بيقول "اللي يخاف من العفريت يطلع له" فاللي أنتِ بتعمليه هو إنك بتتوقعي إن يحصل مشاكل أو خلل أو أي حاجة تزعلك وده اللي بيخلي الحاجة فعلا تتحقق لأن لاشعوريا هتعملي وهتتصرفي تصرفات تخليكِ في النهاية توصلي للنتيجة اللي خايفة منها. فاسألي نفسك، إيه فائدة الخوف والأفكار السلبية؟ هل هتغير حاجة مكتوبة؟ وبالنسبة لوجود حد، هل عدم وجود حد معك سواء في اليوم ده تحديدا أو غيره ينقص منك في شيء؟ ليه بتعتقدي إنه ده ممكن يحسسك بنقص؟ أنا عادي من زمان ما احتفلت بيوم ميلادي زي ما كنت بعمل وأنا صغيرة وأصحاب بيحضروا وهدايا وبقى مجرد يوم بيفكرني إن فيه سنة عدت من عمري وسنة جديدة جاية إن شاء الله أستعد لها إزاي وأغير من نفسي فيها إزاي. فبدل ما تركزي على مخاوفك سواء لليوم ده أو بعده، ركزي على أفكار إيجابية، ركزي على إنك هتبدئي سنة جديدة فنشوف إيه اللي قصرنا فيه أو غلطنا فيه السنة اللي عدت ونستعد إزاي للسنة اللي هتبدأ. اشغلي نفسك بالتفكير في أهداف جديدة، مهارات كان نفسك تتعلميها، أماكن ممكن تروحيها السنة دي عشان تغيري من روتينك وهكذا. اشغلي عقلك وبلاش مقاومة فكرة الخوف نفسها، يعني متحاوليش تمنعي نفسك بالقوة إنك توقفيها لأن مقاومة الشيء بتقويه ولو قلتِ لنفسك متفكرش في شيء هتفكر فيه فالحل زي ما قلت لك اشغلي فكرك بحاجات تانية حتى لو الخوف لسه بيحاول يسطر على أفكارك، أنتِ واحدة واحدة هتتحكمي في الأفكار والخوف هيتراجع للخلفية إن شاء الله. استعيني بالله ومتخافيش من حاجة. وربنا معك ويوفقك للي فيه الخير دايما. 💚
تم النشر الخميس، ٢٤ سبتمبر ٢٠٢٦
أنا فاهمة خوفك ده كويس أوي، ومش غريب إنك تحسي كده بعد اللي مريتي بيه. اليوم ده ارتبط عندك بذكريات مؤلمة، والسنة اللي فاتت لما كان حلو خلّى الخوف يزيد دلوقتي لأنك خايفة ترجعي للنقص تاني. ده شعور طبيعي، بس مش لازم يفضل مسيطر عليكِ. الحل مش إنك تتجنبي اليوم أو تمنعي نفسك من الثقة خالص، لأن ده هيخلّي الخوف أقوى. جربي تغيّري الرواية اللي في دماغك عن يوم ميلادك. مثلاً، حددي لنفسك نشاط بسيط وممتع تعمليه لوحدك أو مع حد موثوق فيه (حتى لو حد قريب من العيلة)، زي إنك تكتبي 3 حاجات إيجابية حصلت في السنة اللي فاتت، أو تعملي حاجة صغيرة بتحبيها زي شرب قهوة في مكان جديد أو مشوار قصير. الهدف إنك تربطي اليوم بتجربة إيجابية جديدة، حتى لو بسيطة. كمان، خلّي في بالك إن الثقة مش لازم تكون كاملة من أول يوم. ابدئي بخطوات صغيرة مع ناس جدد أو حتى مع نفسك، واعتمدي على ربنا في إن اللي هيحصل هيكون للخير. السنة اللي فاتت أثبتت إن اليوم ممكن يكون حلو، فالخوف ده مش حقيقة مطلقة. لو حسيتِ إن الموضوع بيأثر عليكِ بقوة، جربي تكتبي مخاوفك وتردي عليها بطريقة منطقية، ده بيساعد كتير في تخفيف القلق. أنتِ قادرة تتخطي الخوف ده خطوة بخطوة، وكل سنة هتكون فرصة جديدة تبني فيها ذكرى أحلى. لو عايزة تتكلمي أكتر عن اللي بيحصل معاكِ، أنا هنا.
تم النشر الخميس، ٢٤ سبتمبر ٢٠٢٦
شكرا حقيقي ل حضرتك و عموما مش بحتفل باليوم ده
تم النشر السبت، ٢٦ سبتمبر ٢٠٢٦
بصي يا بنت الناس متخليش عقدة القديم تخرب عليكي الجديد واليوم ده زي أي يوم عادي خالص واللي مشي يغور يجي غيره أحسن منه وما تظلميش روحك ولا تقفلي على نفسك عشان شوية خوف أوهام انبسطي بعيد ميلادك وافرحي بحياتك ومستقبلك وسبيه على الله وما تفكريش في اللي فات وربنا هيعوضك بالأحسن...وجد والله انا كذلك كام يوم واكمل سنه جديده وبيحصل معاي مشاكل كل يوم عيد ميلاد لكن مش عامل اي اهتمام لده لان كل شيء بيد الله.. ربنا يحفظك ويسعدك
تم النشر الجمعة، ٢٥ سبتمبر ٢٠٢٦
بالنسبة لموضوع الناس فمش هنقول ان مفيش حاجة والأمور كويسة ولكن هنقول لازم يكون في مساحة معينة من الحذر أكيد وعدم التدخل في الخصوصيات لأن في ناس مش كويسين وخصوصا قد يستغلوا حساسيتك .. ولكن الحذر لا ينبغي أنه يصل للوسوسة فعلى النقيض في ناس نواياهم طيبة وايضا في ناس لا هو كويس ولا هو وحش ولكنه شخص عادي ..... فالخلاصة عليكي بالحذر ولكن مش لدرجة الوسوسة ... ولو تسيبي موضوع يوم الميلاد يكون جزاكي الله خير لأنه يدخل في التشبه بالكفار
تم النشر السبت، ٢٦ سبتمبر ٢٠٢٦
انا متفهم تفكيرك ومن خلاله انا شايف انك شخصية حساسة .. ومن سماتها التأثر الشديد بالفقد ممكن لدرجة الشعور بالخذلان والوحدة والوحشة الشديدة ..... طبعا الحساسية حاجة في طبعك مش مطلوب تغيريه بل بالعكس دي حاجة لها فوائد كثيرة ... ولاكن مطلوب انك تتقبلي الشعور ده وتحاولي تحسنيه ... أنصحك بقيام الليل ودي لله خالصة مخلصة فاكتفي بالله عن الناس ....
تم النشر السبت، ٢٦ سبتمبر ٢٠٢٦
لعرض السؤال في فدني اضغط هنا