السلام عليكم
جماعه انا عندي مشكله هو انا مش شايفاها مشكله كبيره وتستاهل لكن بدأت تبان وده اللي مخوفني
المشكله هيا اني انا بعور نفسي ، بعور جسمي جامد يعني بدأت الاول في ايدي وكانت جروح سطحيه ، بعدها بدأت الجروح تكون اعمق وتجيب دم ، بعدها ايدي كلها اتملت فدخلت على رجلي ولما خلصت علامات فيها دخلت اعمق في جسمي منغير تفاصيل يعني
انا حاولت ابطل كذا مره عشان بس الآثار بتطول وبخاف ان اهلي يلاحظوها
الاسبوع اللي فات حد من اهلي عرف الموضوع ده و اخد باله ان ايدي كلها علامات قديمه وجديده
انا صارحته يعني باللي بعمله بعد م خفت يقول لحد تاني
هو حسسني اني مريضة نفسيه ومحتاجه علاج
انا شايفه اني مش محتاجه
دي طريقتي عشان أهدى
مفيش حاجه بتعرف تهديني زيها حتى لو طريقه مش كتير بيعملوها لكن هيا فعلا بتريحني
هو قعد يخوفني وقالي كلام كتير عن انه يعني لو استمريت ههحب الأذي وهتلذذ بيه
انا مبحبش الأذى انا بس عايزه ارتاح فاهمين
انا مبأذيش نفسي انا بس عايزه اريحها هيا تستاهل ده
انا معرفش اللي بعمله صح ولا غلط لكن دماغي مش ناويه تبطل
حلفتله كتير اني مش هعملها وموقفه بقالي ٥ ايام
لكن الرغبه جوايا بتزيد خصوصا في فتره الامتحانات
ازاي اشيل الرغبه دي من جوايا؟ لان الآثار بقا شكلها بشع وانا بنت في الآخر وعايزه شكلي حلو .
بحس بالنقص لما بقيت ابص عليها
ومش لاقيه طريقه تانيه تهديني .
اتمني حد يفهم الحيره اللي جوايا
السلام عليكم، أولا ربنا يقويكِ وإن شاء الله تكملي لحد ما تتخلصي من السلوك ده تماما. ** كلمة مريضة نفسية مش معناها إنك مجنونة، كلنا بدرجة أو أخرى عندنا مشاكل وأعراض نفسية والذهاب لطبيب نفسي مش حاجة وحشة، لو ده السبب اللي مانعك فأعيدي برمجة تفكيرك في النقطة دي. بالنسبة لجرحك لجسمك فطبعا مشكلة ومحتاجة تتعالج، حتى لو أنتِ مرتاحة ومش شايفاها مشكلة لكن هتتطور للأسوأ، ومن كلامك فضلت تتطور لمراحل أعلى ومع الوقت هتبقى إدمان صعب التخلص منه. جسمك أمانة من ربنا وله حق عليكِ، ومش كل حاجة بتريحنا مفيدة لنا، الراحة المؤقتة دي ممكن تجلب وراها تعب أكبر. لازم تتابعي مع دكتورة عشان تعرفي جذور المشكلة وظهرت امتى وليه وتعالجيها. نصيحة بجد، لا تستهوني بالموضوع. ** ممكن هي بالنسبة لك طريفة تفريغ توتر شديد، زي ما قلت دلوقتي فترة امتحاناتك فشوفي طرق تانية لتفريغ التوتر لحد ما تتابعي مع الدكتورة وتعااجي المشكلة من جذورها. وربنا يوفقك.
تم النشر الثلاثاء، ١٩ مايو ٢٠٢٦
يا حبيبتي ولا تلقوا بايديكم الى التهلكه لنفسك عليك حق انت شايفه نفسك مرتاحه باللي انت بتعمليه بس ده ظاهريا الموضوع ده ليه ابعاد نفسيه انت مش مدركاها ومش ملمه بيها دلوقتي بس نصيحه من اختك اتكلمي مع دكتوره نفسيه مش عشان انت مريضه نفسيا احنا كلنا مرضنا نفسيين كلنا جوانا بلاوي بس انت كده بتاذي نفسك لما تعملي انت في نفسك كده وفي جسمك كده وتضريها هتستني العالم الخارجي يعاملك ازاي كوني رحيمه بنفسك استغفري ربنا وحاولي في اقرب وقت تتكلمي مع دكتوره نفسيه او معالجه نفسيه وده هيفيدك مش هيقلل منك بالعكس وكونك حكيتي الموضوع ده هنا فانت ادركتي انه في حاجه غلط في الموضوع كلنا بني ادمين وبنغلط بس لازم نلم بالموضوع قبل ما يكبر حاولي تكوني رحيمه بنفسك انت كده بتفرغي غضبك حتى لو انت مش واخده بالك في نفسك جسمنا ربنا مديهولنا امانه نحافظ عليها ولازم نرد له الامانه دي سليمه للمره المليون كوني رحيمه بنفسك ودوري على معالجه نفسيه وباذن الله الموضوع ده يتحل
تم النشر الثلاثاء، ١٩ مايو ٢٠٢٦
هو انت ممكن تشوفيها من منظور تانى غير انك مريضه نفسيه هو الشخص اللى اقترح عليك الدكتور النفسي دا صح علشان ممكن تكون توتر مفرط توتر بدرجه اكبر شويه من الطبيعي وخصوصًا انك بتقولى " دي طريقتي علشان اهدي " زي مثلا فى ناس وقت التوتر بتعضعض القلم او بتضغط على اصابعها او اشياء اخري كتيره ولكن انت مش مريضه ولا حاجة انت بس محتاجه تطمنى من دكتور كويس علشان دى مشكلة خطيرة طالما وصل لإيذاء نفسك وترك آثار وجروح فده معناه إنك محتاجة دكتور يشخص حالتك ومش معناه انك مريضه خالص بالمره واهم حاجه وقت التوتر تبعدى اى حاجه ممكن تأذي نفسك بيها لحد ما تروحى للدكتور علشان حتى لو اوقفتيها هترجعي تانى فأنك تروحي عند دكتور وتحكيلها المشكله دى وهى هتعرف ايه دا علشان فعلا دى ممكن بعد فترة تأثر بالسلب عليك
تم النشر الثلاثاء، ١٩ مايو ٢٠٢٦
وعليكم السلام. أنا فاهمة حيرتك وتعبك يا بنتي، وأقدر إنك بتحاولي توقفي من ٥ أيام وده إنجاز كبير. الرغبة دي مش هتختفي لوحدها بسهولة، لكنها إشارة إن في ضغط نفسي محتاج يتعالج بطريقة آمنة وصحية. أنصحك بشدة تتواصلي مع متخصص نفسي عبر صفحة الخبراء في فدني ( https://www.fedni.net/experts ) عشان يساعدوكِ بخطة عملية تناسب ظروفك. كمان ابحثي عن أسئلة مشابهة في فدني لتشوفي تجارب ونصائح إضافية. ركزي على أنشطة يومية بسيطة زي الدراسة المنظمة أو هوايات خفيفة تساعدك تفرغي التوتر بدون أذى. أنتِ تستاهلي تشعري بالراحة بطرق تحافظ على صحتك وجمالك. لو الرغبة زادت، لا تترددي تطلبي مساعدة فورية. أنا هنا لدعمك.
تم النشر الاثنين، ١٨ مايو ٢٠٢٦
ماشي شكرا ، بس انا قريت عن الموضوع كتير فمش جاهله بيه وكل الضرر بس انه يتطور وانا حاسه اني اقدر اتحكم في ده واخليه يقف عند ليميت معين بس هجرب برضو الدكتوره م هخسر حاجه بس حاليا في فتره امتحانات واللي هيساعدني قالي اركز دلوقتي وهياخدني في الاجازه لحد الوقت ده مش عارفه اوقف ازاي رغم اني مش عايزه اوقف بس زي ما قولت عشان بس اهلي ميلاحظوش
تم النشر الثلاثاء، ١٩ مايو ٢٠٢٦
لا، فيه حاجات هي على علم بيها وانت مش عارفاها، المشكلة في حالتك مش في قدر انك مش عارفة على قدر مانت مش عارفة انك مش عارفة، فجهل الجهل ده اخطر من الجهل، لما تروحي مستحيل تخسري اي حاجة واسألي نفسك كدة انا لو رحت هخسر اي، هتلاقي انك يا هتخرجي كسبانة يا مش هتخسري حاجة، وفي الآخر انت المستفيدة
تم النشر الثلاثاء، ١٩ مايو ٢٠٢٦
لما بفكر فيها بقول هيا الدكتوره هتيجي تحل مشاكلي يعني ماهي مشاكلي هتفضل موجوده و طول ماهيا موجوده والضغط ده موجود عمري ما هتعالج فاهم؟
تم النشر الثلاثاء، ١٩ مايو ٢٠٢٦
معلش جربي مش هتخسري حاجة
تم النشر الثلاثاء، ١٩ مايو ٢٠٢٦
مش عارفه حاسه حتي لو روحت مش هستفاد حاجه وهرجع تاني
تم النشر الثلاثاء، ١٩ مايو ٢٠٢٦
لازم تروحي لدكتورة نفسية، انت مش حاسة بالمشكلة، ولعلك مبسوطة كدة، بس ده غلط والغلط هيفضل غلط حتى لو بتحسي انك مبسوطة بيه ولازم نسعى لعلاجه، جربي روحي اكيد اكون عليكي من الاحساس بإنك عايزة تعملي كدة
تم النشر الثلاثاء، ١٩ مايو ٢٠٢٦
لعرض السؤال في فدني اضغط هنا