السلام عليكم
انا عندي 17سنه لكن للاسف وقعت و اتعرفت على شخص ما عن طريق السوشيل ميديا من اكثر من سنه لكن حابة اوضح حاجه و هي ليست تبرير لي لكن فى اوقات كثير بحس بالوحده لان يعتبر معنديش حد غير بابا و ماما لاني الوحيده فأغلب الوقت ببقى لوحدي او حتى بين اشخاص اكبر مني بكثير لاني اصغر من فى العيلة فمفيش وسيلة للترفيه او الحديث و المناقشة معاهم بحجه عدم التدخل فى كلام الاكبر مني
ما علينا ديه مقدمه بسيطه عني و الحكاية تبدأ كالآتي ان انا كنت بلجأ للتلفون كوسيلة للهروب و الطلوع من وحده لم اصنعها فكنت بنزل تطبيقات للمحادثة و الشات
فى الاول كان نيتي سليمة للتعرف على اشخاص و اني احكي و اتكلم كنوع اني مسموعه و عندي قدرة ع الحديث لكن اكيد اكتشفت انها مش لكده خالص و بدأت اتكلم و اتسلى على الناس ديه بما ان كدا كدا الشخصية مخفية لكن مش هنا المشكله انا عارفة اني غلطانه المشكله اني اتعرفت على شخص بالفعل كان كلام عادي بعدين اتكلمنا على تطبيق تاني و زهقت وقلت له حوار ما و قفلت معاه.
بصدفة بحته نزلت التطبيق القديم مره ثانية و لقيته كانت نيتي سليمه انه شخص قد تعرفت عليه و كان كلامه عادي لكن فى المره ديه كان كلام مختلق بزيف من اول كلمه كتبها فى الشات هو تطبيق لكدا اساسا فى الاساس من غبائي الغير مبرر فكرته بيا و افتكرني و اتكلمنا اكثر و اكثر و كملنا على تلجرام اكيد مش هنستمر على نفس التطبيق و مسحناه احنا الاثنين طبعا كنا بنتكلم كثير بعدين ارتبطنا
مع العلم هو 30 و انا 17فرق كبير و من مجرد التفكير فهو بيستغلني لكن لا مش هنا المشكلة الفكره بعد الارتباط ده انا حبيته فعلا و هو بيقول انه كذلك فعليا انا حبيته جدااا لكن بعيدا عن العواطف هو دايما كلامه جنسي سواء كلام يدل على تلامس او كذا و كذا لدرجه انه بعتلي جسمه هو شخصيا
معرفش اذا كان متعود او انها ثقة غير مبررة لكني محتاجه نصيحه انا عارفة اني غلطانة لكن عندي مشاعر غبية اتجاهه كل مبفكر انه ابعد ببقى عايزة اقرب ليه اكثر معرفش حتى اذا كان حب ام انها مجرد مراهقة زائفة لكن مع تأكيده لحبه لي و انه مش بيكلم غيري و اني بحبه
الحوار معقد انا بالفعل حاولت ابعد كثير جداااا انا عارفة انه غلط لكن بيوحشني لان فعلا بحبه و بحس انه كدا كذلك لكن محتارة و مش عارفة اعمل اى محتاجه فعلا نصيحه و حل و طرق اعرف ازاي اهرب او اقرب بطريقة مرضية اصلا فعليا فرق 14سنه مش احسن حاجه للجواز اصلا ف اى الحل
بصي أنا مريت بنفس العلاقه دي بس مكنش ف فرق سن بنا العلاقات اللي زي لتقوم وتحصل ع أساس التلاعب هو كلامهم وحش واول لما تقولي له هيقولك أنا لما بحب حد بتكلم معه براحتي ف الوقت دا انتي مش لازم تسليه انتي لازم تجري لأن واحده واحده هيفتح عينك ع حاجات اكتر ويبدأ يطلب منك حاجات تعمليها مع نفسك ومش هيطلب منك صور أو الكلام دا عشن ميخسركيش ويفضل مكمل وانا عارفه ومقداره جدا أن كل ماهتبعدي هيوحشك هتحسي انك ممكن تغيريه بس صدقيني لا لا لا من واقع تجربه نصيحتي ليكي اعملي بلوك من كل حاجه بتتواصلوا عليها وحاولي تغلبي شيطانك دا مش حب دا تعلق زائف ولو حبتيه فعلا ف دا حب من طرف واحد هو أكبر منك اوي وعاش وشاف كتير اوي ومزاجه جه مع واحده لسه صغيره متصدقيش كلامهم فوقي فوقي بجد افهمي أنه بيستغلك واحد ف سنه مش بيحبك ويقعد يحكيلك حدوته قبل النوم انا اسفه لو كنت قاسيه بس انا مش عاوزكي تعيشي اللي انا عشته
تم النشر السبت، ٢١ يونيو ٢٠٢٥
عجبني فيكي انك مقيمة الوضع الي أنتي فيه عارفه ان ده غلط وانه حتي مينفعش للجواز احساسك بالتعلق بيه ممكن يكون ناتج من كذا حاجه زي انك وحيده وهو الي دخل حياتك وحس بيكي والخ ممكن يكون ده اول مره تحسي باحساس الحب (بس ده مش حب حقيقي وهقولك ليه) وممكن لأنك في مقتبل العمر ومن الواضح كده ان باباكي ومامتك قافلين عليكي و كانوا طول ال١٧ سنه بيحاولوا يحافظوا عليكي فاول ما يبقي عندك نافذه للحياه وتقدري تاخدي قرار هو أول واحد اتعلقتي بيه طب ليه ده مش حب حقيقي لان الحب الحقيقي يا عزيزتي حب قلب وعقل توافق وتناغم في الصفات والتربية والتعليم حد كده بتحسي انه بيكملك حرفيا مش كلام وخلاص والأهم من الحب انك تكوني مع حد بيراعى ربنا فيكي لان الجمال بيروح والشباب بينتهي والصحة بتتدهور بس التربية والخوف من ربنا بيفضلوا مدي الحياة كل الكلام إلى فوق ده ليه عشان ااكدلك انه مش حب اصلا ده تعلق لو اقتنعتي... نكمل ازاي تفكي من التعلق ده وتخلعي بسرعه 😀 ١ صلي ٢ اشغلي نفسك.... الفراغ هو عدوك الاول لو الفراغ اختفي الكائن ده هيختفي ٣ التطوع يا عزيزتي... هيفرق معاكى جدا ...طاقه الحب والمشاعر إلى عندك هتخرج صح وهتتعلمى كتير اوووووى ٤ خدى كورسات في اى حاجه واشتغلي ع شخصيتك اكتر هتفرق معاكى جدا وكل ده هيكبر نظرتك لنفسك وتقدري تتكلمي مع الكبار عادى اصلا هما الي هيكونوا عايزين يسمعوكى لان عندك حاجه مختلفة وتجارب تستحق المشاركة واخيرا مفيش اي كلام هقوله انا او غيري هيغير وجه نظرك فجأة احنا بنحاول نقولك بعد آخر يمكن تكوني مش شيفاه بحكم الخبره الي عندنا القرار داخلي لازم يكون نابع من جواكي ومش معني انك حاولتي ومقدرتيش انه فعلا حب حقيقي ومشاعر صادقه لا خالص ده اسمه جهاد النفس لازم تحاولي مره واتنين و١٠ لان النفس اماره بالسوء وانتي عندك ميزه انك الحمد لله عارفه ان الي أنتي فيه ده سوء وابداي علاطول بلوك للكائن ده من كل طريق يقدر يوصلك منه وصلي واستغفري ربنا وانزلي من البيت كورسات بقي... أعمال تطوعيه... جيم... رسم.... موسيقي.... اى حاجه بس غيري شكل يومك العادي خصوصا الأوقات الي كنتي بتكلميه فيها ولو عندك المقدره انك تغيري موبيلك شكل غرفتك او المكان الي ديما كنتي بتقعدي تتكلمي معاه فيه يبقي احسن واحسن واخيرا تاني 😀 استعيني بالله وبلاش تضيعي مجهود اهلك الي عاشوا ١٧ سنه بيحاولوا يحموكي من شياطين الانس انتي تستحقي الأحسن من كده بمراحل 🤩
تم النشر السبت، ٢١ يونيو ٢٠٢٥
السلام عليكم ورحمه الله وبركاته وهي يعني موضوع معقد فعلا يعني بس هو معقد بشكل انتي مش هتفهميه في سنك ده خالص لان الحاجات اللي انت بتقوليها انت بتتعاملي معاها على اساس ان هي مساله عاطفيه والموضوع هنا مش عاطفي خالص هنا في استغلال استغلال استغلال استغلال لبنت لسه لم تبلغ سن الرشد الرسمي 18 سنه فحضرتك قدامك قانون الطفله فهنا الشخص ده بيستغل طفله بشكل جنسي انت مش مدركه قد ايه الموضوع معقد وعميق شخص ولا بيحبك ولا اي بيتنجان يعني عشان نبقى كده بنتكلم بالبلدي خالص ده شخص مؤذي ده شخص بيلعب بالبنات ده شخص بيخش الابلكيشن عادي جدا وينقي واحده ويلاقيها صيده جميله جدا. سهله ويخليه معاها بدل ما يبقى بيتنقل من واحده للثانيه ولما يخلص خالص بقى ويزهق عادي جدا يخش الابليكيشن ويوصل لوحده ثانيه صباح الخير احنا ممكن نصحى بقى ممكن نفوق ونشوف انه حتى لو المحيط اللي حوالينا الدنيا فيه هاديه ورايقه وما فيش تفاعلات اجتماعيه كثير فاحنا والله الدنيا مفتوحه فيها تفاعلات اجتماعيه احسن مليون مره من همم. الشات دي دي لو في البيت مش بنتكلم عشان خاطر هم كلامهم وكلام كبار فاحنا في عندنا انشطه تطوعيه ممكن نروح نتطوع ونتعامل مع ناس في سننا ونبقى بنعمل حاجه كويسه ونبقى نتواصل اجتماعيه مع ناس مضيفه ممكن ااا نروح ناخد كور سلاطيف ظريف ممكن نشترك في رياضه احنا ممكن نعمل مليون حاجه احنا ممكن نشترك في كورس ممكن نبدا نتعلم حاجه اونلاين ونبدا ننفذها احنا عندنا يعني مش هقدر اعد الحاجات اللي ممكن تتعمل اللي فعلا هتدي لك الاحتياج بتاع التواصل الاجتماعي والتفاعل وان حد يبقى شايفك وان حد يبقى سامعك وكل الكلام الظريف واللطيف ده دون من انك تدخلي نفسك في ازمه اا نفسيه وازمه عاطفيه زي اللي انت بتحكي عنها دي خالص استاذ جاد قال لك نصيحه المختصره الوافيه جدا اقطعي معاه تماما فجاه بدون كلام بدون مبررات بدون قرارات بدون ما اا ان انا افهمه قد ايه انا فوق مش عايزين نعمل اي حاجه من دي بلوك فورا فقط لا غير.
تم النشر السبت، ٢١ يونيو ٢٠٢٥
هذا الشاب لعب بمشاعرك وحاول استغلال براءتك وأرسل لك كلام جنسي وصور (جسدية أو جنسية) وآذاك في قلبك وطهارتك، وإذا كان لديك ذرة من كرامة فعليك أن تردي له الصاع اثنين وتختفي تماما من حياته فجأة كما تفعل بنات الأصول وتتركيه بعدها يضرب أخماسا في أسداس
تم النشر السبت، ٢١ يونيو ٢٠٢٥
احنا نبعد عن اللي بنحبه علشان ناخد اللي نستحقه ده مش حب يابنتي و انتي بالنسباله تسليه ابعدي عنه هتيحي بعد كذا سنه تحسي بالقرف انك كنتي بتتكلمي معاه اشغلي نفسك باي حاجه و كل ما تبقي عايزه تكلميه قومي نضفي مثلا او انزلي اتمشي و وحده واحده هتبعدي عنه و ربنا يهدينا جميعا ابعدي عنه
تم النشر السبت، ٢١ يونيو ٢٠٢٥
وعليكم السلام ورحمة الله يا غاليتي، شكراً لك على ثقتك ومشاركتك لموقفك بصراحة ووضوح. أقدر تماماً مشاعرك وتعقيد الحالة التي تمرين بها، وخاصة وأنك في عمر حساس تمرين خلاله بتغيرات شعورية وفكرية كبيرة. دعيني أساعدك خطوة خطوة: فهم وضعك ومشاعرك في عمر 17، من الطبيعي جداً أن يكون لديكِ مشاعر حب وانجذاب، وأحياناً يكون ذلك مصحوباً بالحيرة والارتباك. الوحدة وقلة الجلوس مع أقرانك أو من في عمرك تزيد من حاجتك للشعور بأنك مسموعة ومفهومة، وهذا ما يحاول صدقاً أي إنسان أن يحصل عليه. لكن الفرق العمري الكبير (14 سنة) والتواصل مع شخص أكبر بكثير، خاصة إذا كان الحديث يتركز على أمور جنسية، هو وضع خطير وغير صحي لكِ كفتاة في عمرك. نقاط مهمة جداً يجب أن تدركيها: العلاقة التي تتركز على المحادثات الجنسية بغض النظر عن الحب المعلن، غالباً ما تضر النفوس ولا تبني علاقات متينة وصحية. الحب الحقيقي بين زوجين يكون مبني على الاحترام، المشاركة، والرغبة في بناء حياة مشتركة قائمة على القيم والأخلاق الإسلامية. أنتِ في عمر صغير، وهذه العلاقة قد تؤذيك نفسياً وروحياً وربما جسدياً لاحقاً، خصوصاً إذا لم يكن الشخص ناضجاً أخلاقياً. نصائح عملية لكِ الآن: اغلقي كل الأبواب لهذه العلاقة تدريجياً ولكن بحزم: امتنعي عن الرد على الرسائل، وامسحي حساباته ووسائل التواصل التي تربطكما. اشغلي وقتك بشيء مفيد: ابحثي عن هوايات جديدة، تعلمي مهارات مفيدة، أو حتى انضمي إلى أنشطة تناسب سنك وتساعدك في بناء صداقة حقيقية مع أشخاص في نفس عمرك. ابحثي عن الدعم الروحي: قراءة القرآن، الاستغفار، والصلاة تريح القلب وتساعد على تصفية العقل. تواصلي مع والدتك أو أبيك بلطف عن مشاعرك: حتى لو لم يكونوا متفهمين تماماً، قد يمنحوك نصائح ودعماً قد لا تتصورينه. لا تفكري أن الهروب هو الحل: أنت بحاجة إلى بناء نفسك وتقوية علاقتك بالله أولاً ثم مع نفسك، وبعدها ستكون العلاقات الصحية أمراً سهلاً. من منظور إسلامي: العلاقة بين فتاة في عمرك وشاب أكبر بـ14 سنة ليست صحيحة، ويجب أن تحفظي نفسك وتحترمي حدود الدين. الإسلام يحث على الحشمة والحماية من الوقوع في المحاذير، والحب الحقيقي في إطار الزواج والحلال. إذا أردتِ دعم نفسي أو مشورة أكثر تفصيلاً بعيداً عن المحادثات التي تسبب لك القلق، يمكنكِ دائماً أن تطرحي أسئلتك هنا أو تستشيري خبراء متخصصين في الفكرة من خلال صفحة الخبراء في فدني: https://www.fedni.net/experts وأخيراً يا عزيزتي، تذكري أن الحياة أمامك مليئة بالفرص الحقيقية للحب والسعادة، لا تدعي تجربة واحدة أو نقطة ضعف تأخذ مكانها في قلبك وعقلك. أنت قوية وقادرة على اختيار الأفضل لنفسك دوماً. أنا هنا معك، يمكنك دائماً العودة وطرح أي سؤال أو طلب دعم. دمتِ بخير وسلامة يا غالية، والله يكتب لك الخير ويرزقك الراحة والطمأنينة. 💕
تم النشر السبت، ٢١ يونيو ٢٠٢٥
الحل مش سهل وفيه انتكاسات لأنك اتعودتي على مستوى عالي ومستمر من المدح والمتعة الداخلية .. فعليكي ان تحذفي التطبيق و تبني عادات تعوضك عن المتعة دي وتحسسك بقيمتك زي الرياضة القراءة الصلاة القرآن كتابة الأفكار الرسم الهوايات .. هتتألمي في البداية لكن هتتعودي مع الوقت والله كريم .. او أنك تكملي معاه فلحد امتى؟
تم النشر السبت، ٢١ يونيو ٢٠٢٥
جواز بشخص بيبعتلك جسمه !! .. انتي تعرفي ده ممكن بيكلم غيرك كام !! يعني لا عنده ضمير ولا اي شئ وانتي اساسا متعرفيهوش ولا يعرفك .... النوع ده من الأشخاص لو قابل البنت في الواقع معندوش مشكلة يمسكها يرتكب فيها المحظور ويقتلها ويرميها جثة ويمشي يدور على ضحية غيرها .. انتي بتنجذبي له من الملل .. ضاحك عليكي بالكلام المعسول والوهم الجميل .. بيمتعك بالغزل ويعيشك الدور وتلاقيه بيقول نفس الكلام لغيرك كثير .. فأنتي بسبب الاحتياج للمدح والأمان بتروحي له لأن ده المصدر الوحيد يعني زي الإدمان بالضبط ..
تم النشر السبت، ٢١ يونيو ٢٠٢٥
حاولي تطلعي من العلاقه دي في اسرع وقت ممكن
تم النشر السبت، ٢١ يونيو ٢٠٢٥
لعرض السؤال في فدني اضغط هنا