انا تعبت وقرفت وجبت أخرى من المكان الي عايشه فيه والناس الي حواليا حرفيا مهما احكى لحد انى محتاجه امشي من المكان ده وأبدأ حياه جديده مع ناس جديده يقولوا غيرى من نفسك انتى مع انى مش محتاجه اغير من نفسي انا براعي ربنا فى كل علاقتى وببذل جهد كبير جدا مع صحابي عشان أسعدهم ومع ذلك بتإذى بشكل مش طبيعي وانا مغفله جدا وبيضحك عليا المهم يجماعه انا الدفعه بتاعتى والله العظيم انا عارفه أن محدش هيصدق بس بحس أن هما اجسام بأرواح كبيره يعنى الواحد عندو 17 سنه وحقده وتصرفاتو المؤذيه مش طبيعيه ابدا ابدا وبيعملوا حجات وحشه اوى يجماعه والحرام منتشر بطريقه مش طبيعيه انا مش متشدده ولا بقعد ازعق لأى حد بيعمل حاجه حرام انا قصدى انى مش عارفه اتعامل ابدا معاهم بسبب أنهم مؤذيين وتصرفاتهم مش زى عمرهم ابدا والله بيلقحوا علي بعض وبيعملوا حوارات وبيمشوا مع بعض ونفاق وغدر كل ده ولسه موصلوش ال20 حرفيا انا حكيت لماما كتير أن انا عاوزه اعيش فى مكان وسط ناس عارفه ربنا لأن انا زهقت من انى علطول لوحدى حرفيا الدفعه كلها بتتكلم علي بعض ومين مرتبط بمين وكلام كتير مقرف بجد انا مكروها جدا من الدفعه وفى كذا شله من البنات بتكرهنى وبتتكلم عنى بكلام وحش وده بسبب انى مختلفه عنهم ومش زيهم فى الطباع وكمان انا بجد زهقت من انى افضل عايشه فى مجتمع بقا مقرف كده والحرام فيه منتشر انا بقيت خايفه علي نفسي عشان ماما عاوزانى اصاحبهم لأن هى مش مقتنعه ازاى ممكن يكونو صغيرين بس تصرفاتهم عجيبه هما بيعملوا حجات وحشه اوى بس انا مش عاوزه اغتابهم بجد انا بس بحكيلكم قد ايه أنا مدايقه انى لوحدى بسبب الناس الي حواليا
طيب لو فرضنا .. افتراض وهو انك روحتي في مكان جديد، والمكان الجديد ده الناس اللي فيه طلبوا منك تتغيري؟ هتعملي ايه؟ هو العيب في مين بالظبط؟ المكان والناس اللي فيه؟ ولا فيه طريقة تفكيرك انتي الخاصة بالعلاقات!! يعني لو جينا نفكر شوية .. هنلاقي ان كل شخص اكيد حواليه اشخاص مؤذية، هنلاقي كمان ان كل شخص كان في حياته اشخاص مش كويسة، واتصرف معاهم التصرف المناسب وقتها. لكن نروح مكان جديد؟ لا احنا كده نبقى بنهرب مش اكتر .. وفي نفس الوقت المكان الجديد ده .. ما هو برضه هتلاقي ناس مؤذية .. الدنيا كلها كده. القصد من ده كله ايه؟ اتعلمي فقط ازاي تديري علاقاتك، وتقربي من الناس الصح. + انتي مش مضطرة تغيري من نفسك علشان تعجبي حد. انتي تغيري من نفسك ف حالات معينه .. اما تكون الحاجه ديه حرام .. وتغيريها. او تكوني انتي مش حابه شئ معين في شخصيتك ف تقرري تغيريه من نفسك.
تم النشر الاثنين، ١٨ ديسمبر ٢٠٢٣
بالنسبة لفكرة ان الواحد لما يكون فى بيئة مختلفة يغير من نفسه ولا لا...فده معتمد على حاجة مهمة وهى الفرق الايجابي بين صفاته وصفات البيئة دى فإذا كانت البيئة افضل منى فده حافز انى اتغير للأحسن... لكن لو البيئة اقل منى.. فأنا مش لازم اغير نفسى ولا اى كلام من ده وبالعكس ضرورى اتمسك باللى عندى. الوضع اللى انتى فيه بنقابله بمواقف كبيرة ومواقف صغيرة... مش كل مكان هيكون فيه حاجات مش شبهنا هنقدر نسيبة فى الحال... اوقات هتكونى مضطرة تتحملى فترة لحد ما مدة تواجدك فى المكان تخلص.... وأثناء تواجدك تحاول تفصلى نفسك عن لمكان عشان ميسيبش طابع عليكى بعد ما تمشي منه. زى ما تكونى راكبه المواصلات والسواق مشغل اغانى انتى مش عاوزة تسمعيها.. مش دايما هتقولى انا هنزل واركب غيره... بس هتلاقى نفسك مثلا بتطلبي منه يوطى الصوت (زى ما ممكن تكونى وجهتى زمالك دول الصح)... او هتحطى انتى سماعه فى ودنك تقلل الصوت او تشغلى قرآن يكون أفضل من اللى هو مشغله. (وده اللى تعمليه بقي مع عالم الكلية دى... لو لقيتى حد اقلهم ضررا خليكى معاه وقت تواجدك فى الدراسة والباقى خلى علاقتك بيهم سطحية متعرفيش حتى ولا تسمععى هما عملوا ايه ومعملوش ايه). اختارى صحبه صالحه من اى نشاط تانى بره الدراسة وركزى حياتك معاهم.. يكونوا ماشيين فى نفس اتجاهك ويعينوكى على الأفضل بإذن الله
تم النشر الاثنين، ٢٥ ديسمبر ٢٠٢٣
مشكلتنا اننا بنفتح الدايرة...دايرة حيتنا لاي حد....يعني المفروض حياتك تخليها حواليها دايرة وتختار مين عياز يبقي على حدودها ومين يتخطاها ومين براها لكننا بنسيب الحياة سمك لبن تمر هندي بدون حدود عشان كدا بنزعل....لا اللي حوالينا وحشين خلاص اعرف بس اللي يستحق والباقي برة الدايرة ليهم حدود ميتخطوهاش...اعيش حياتي بطريقتي ومركزش في اي حاجة تضايقني....لو عايز ربنا في حياتك اكتر قربي منه اكتر وخليه معاكي فيوكل لحظة...هينورلك حياتك ويتطردلك منها كل ما هو ذميم
تم النشر الاثنين، ١٨ ديسمبر ٢٠٢٣
• لن تجدِي أي مكان كُل الناس فيهِ تتقي اللَّه ، لأن بشكل عام في الوقت الحالي المُلتزمين بشرع اللَّه عن حق قليلين جدًا ، يحدث أن تكون فتاة مُلتزمة وسط أُسرة غير مُلتزمة ، فما بالك الزملاء في الدراسة والعمل وغيره ، لذلك عليكِ أن تبحثي عن من يشبهك وسط مُحيطك ، وهؤلاء النماذج السيئة لا تختلطي بهم ، الأمر بسيط جدًا ، لذا اهدئِي ولا تُسببي لنفسك نوبة هلع وتتوتري كثيرًا حتى لا تتأثري نفسيًا بلا داعي ، والوحدة خيرًا من جليس السوء ، إن لم تجدي صديقات صالحات فأكتفي بنفسك ، ولا تختلطي بالسيئات ، ولا تُدخلي نفسك في أي علاقات مع شباب في هذا السن نصيحة لوجه اللَّه ، ركزي في دراستك فقط.
تم النشر الثلاثاء، ٢٣ يناير ٢٠٢٤
اتعاملي معامله سطحيه معاهم كلهم مش لازم تتعمقي في العلاقه معاهم عشان متتأذيش و خليكي ذي منتي متحاوليش تغيري من نفسك طالما انتي الصح و مبتعمليش حاجه حرام يبقا متغيريش من نفسك عشان تعجبيهم اتعامل عادي بس بشكل سطحي جدا و كوني حذره يعني متحكيش لحد عن مشاكلك او حياتك ولا حتى تحكي مع حد منهم على حد تاني دايقك مثلا انا كنت زيك على فكره ف مرحله من المراحل و كان كلهم بتوع حوارات و بيحبو يعملو مشاكل كانت كل علاقتي بيهم اضحك شويه اهزر حتى لو عملو مثلا حاجه غلط تنمروا مثلا بنصحهم بس بطريقتهم و عديت المرحله دي الحمد لله منغير مشاكل و كنت الوحيده اللي مدخلتش ف اي مشكله من مشاكلهم عشان حذره معاهم ف كلامي (مع العلم انهم ذي دفعتك بيتكلمو عن ارتباط و كذا حب كذا و دا يتكلم على دا ) كنت ساعتها بسمع و اقولهم رأيي ف الموضع ان دا غلط متقبلوش ده بسكت حتى مع الوقت بقيت محبوبه عندهم عشان مبتكلمش على حد فيهم ولا عملت مشكله مع حد ولا دخلت ف حوار م حد ف جربي انتي كمان تعملي دا و تكوني حذره ف الكلام معاهم لحد متلاقي حد كويس تقدري تتكلمي معاه براحتك
تم النشر الأحد، ٣١ ديسمبر ٢٠٢٣
خليكي بعيدة و حاولي تقربي اوي من ربنا وهو هيبعد عنك الناس اللي مش شبهك
تم النشر السبت، ٢٣ ديسمبر ٢٠٢٣
حضرتك مفيش مفيش بيئه نقيه كامله مفيهاش ناس مؤذيه ، وبعدين فى كذا حد بيقولى هنا فى الكومنتات أن انا متعاملش معاهم مانا مش بتعامل معاهم حضرتك تسمع عن فيلم اسمو بنات ثانوى ؟ ده فيلم مصرى كان فيه قصص كتير من حجات بتحصل فى السن ده انا بقى بقولك أن القصص دى مديقانى انا بحس انى بقرف وانا قاعده فى المدرسه والدرس والي حواليا كلامهم صعب جدا وكمان انا مش لاقيه حد كويس اصاحبو والله لان فعلا كلهم ضد النصيحه ويعاد عن ربنا والي بعيد عن ربنا مالوش خير فى صحابو يعنى هيأذى صحابو لانو مصنش وعدو مع ربنا
تم النشر الثلاثاء، ١٩ ديسمبر ٢٠٢٣
الله عليك انت العاقلة صاحبة الضمير الصاحي والقلب الناصع ربنا يبارك فيكي ويقويك عليهم، انصحك بخيارين .. الاول والاسهل انك تتعاملي معاهم طبيعي وخديهم على مستواهم يعني ماتبينيش بشكل ملفت انهم وحشين وماينفعش تمشي معاهم، .. لا عادي لو ف الفصل وانت قاعدة جارهم اتعاملي عادي يعني ماتبينيش غرابة ملحوظة، واتكلمي معاهم عادي لكن ف مواضيع ملتوية بلاش او انصحيهم بعد ماتقفي معاهم شوية .. عادي يعني مشيها .. واكيد هتلاقي واحدة على الاقل ملهاش ف الطرق الملتوية، .. والحل التاني انك تنتقلي لبيئة أرقى من كده
تم النشر الثلاثاء، ١٩ ديسمبر ٢٠٢٣
طيب أنت إيه اللي مخليكي في الوسط دة؟ لو هو بيئة السناتر ببساطة غيريها ولو بيئة المدرسة فأنت مش محتاجة تختلطي مع كل الدفعة ولكن البنات اللي تشبهك فقط
تم النشر الاثنين، ١٨ ديسمبر ٢٠٢٣
لعرض السؤال في فدني اضغط هنا