هل طبيعى بعد مرور سنة و شهرين من الارتباط انه الاهتمام يقل هو بيقول انه مشغول اوى و مش لاقى وقت
و هو في البداياات كانت بتيجى عليه فترات انشغال لكن كان بيحاول يوازن لكن حاليا لا لدرجة مبقاش يعرف عنى حاجة و مع انه لما حصلت مشكلة كنا هننفصل اتمسك بيا جدا و عمل المستحيل و هو كل ما يكلمنى يقولى يلا نكتب الكتاب طولنا فمبقتش فاهمة هو مواقفه تبين الحب لا اهتمام قليل كلام قليل
هو هتلاقي فترة الخطوبه بيبقي الشباب مضغوطين بين شغلهم وبين الشقه وتجهيزات لجوازكوا ومدام ان هو متمسك بيكي وانكوا متنفصلوا وعايز تكتبوا الكتاب هو بيحبك وصدقيني الرا ل اللي يحب بجد اوعي تسيبي زي ما بتعيشوا مع بعض كل الخلو حاولي تقربي انتي شويه وتقوليلوا انا شايفاك مضغوط طب احكيلي وكده وربنا يسرلكوا الحال ويتملكوا علي خير يا قلبي
تم النشر الاثنين، ٣٠ يونيو ٢٠٢٥
بصي هو ممكن يكون عنده ضغط او حاجه و مش عارف يتكلم و أنه قال نكتب الكتاب يبقا شاريكي و انتي قلتي أنه كويس جدا معاكي ف حاولي متحكميش عليه لانه اكيد في حاجه ضاغطاه بس ممكن تحاولي تتواصلي مع والدته او اخته لو عنده اخوات تحاولي تفهمي هو ماله لو عنده حاجه خليكي جنبه بس عشان اكون صريحه الشباب مش دايما بيهتموا على ما اعتقد يعني أنهم يكونوا في البدايه متحمسين لكن بعد كده بتكون حاجه عاديه و اي إنسان بيكون عنده مشاكل ف متحكميش عليه حاولي تتكلمي معه براحه أو تكلمي حد من أهله والدته اخته لكن خلي سؤالك يكون بطريقه كويسه يعني مثلا ازاي حضرتك يا طنط عامله ايه و الجماعه عاملين ايه هو ... كويس متعرفيش لو في حاجه بيحبها بيكرها طب متعرفيش في حاجه مزعلها مفرحه كده خليكي هديه لأنها ممكن يكون مضغوط فانا انصحك تكوني هاديه و تفكري و تصلي صلاة استخاره و ربنا يوفقك و يكتبلك اللي فيه الخير واتمنى ان اكون قدرت افيدك
تم النشر السبت، ٢٨ يونيو ٢٠٢٥
السلام عليكم ورحمه الله وبركاته طبيعي جدا بيكون الشخص في بدايه الخطوبه عاوز يجذب اهتمام ومشاعر الشخص اللي قدامه تجاهه علشان يعني يتاكد ويطمن انه بقى فيه رابط ما بيننا فيكون حاسس بنوع من انواع الاستقرار ودي طبيعه الراجل هو بيبذل مجهود كبير جدا لحد ما يحس انه خلاص بقى في رابط واحنا بقينا في حاجه مخليانا متمسكين ببعض فتمام خلاص كده احنا في الامان فعشان كده بتلاقيه بيبطل نفس المجهود اللي هو كان بيبذله في الاول. كمان انت بتكلمي ان هو عدى سنه وشهرين فاكيد في تجهيزات وفي مصاريف مطلوبه في الاغلب هو منشغل كثير جدا بالتحضيرات وتجهيزات دي اكثر من ان هو يشتغل يعني على علاقته بيكي يعني فدي امور كلها عادي جدا بتحصل وبتحصل بشكل طبيعي ومش دائما بتكون دليل على انه كده خلاص الراجل فقد اهتمامه يعني هو لسه موجود ولسه منتظر وانت قلتي لما حصل موقف لا ساب بقى كل حاجه في ايده وقعد ثاني يدي مجهود في ان هو يثبت انه احنا محتاجين نكمل مع بعض واظهر انهم متمسك فدي نقطه كويسه مش محتاجة يعني كل اما تلاقي ان هو قال لا وانشغل تبداي تشكي في اهتمامه بيكي او احساسه ليكي ويعني فتره الخطوبه مش محتاجه ان احنا نبقى طول الوقت عمالين بندي مشاعر مشاعر طول الوقت ولكن بنحتاج ان احنا نركز مع المواقف نشوف فعلا من خلال المواقف الشخص ده مناسب لينا واحنا مناسبين ليه ولا لا
تم النشر السبت، ٢٨ يونيو ٢٠٢٥
مرحبًا عزيزتي، شكرًا لك على مشاركتك مشاعرك بكل صراحة، وهذا بالفعل وقت صعب تشعرين فيه بالارتباك والحيرة. دعيني أساعدك في فهم الوضع وتحليل ملامحه خطوة خطوة: التغير في الاهتمام مع مرور الوقت: من الطبيعي أن تقل فترة "الشيّق" في بداية العلاقة بعد فترة من الوقت، خاصة إذا كان الطرف الآخر مشغول جدًا. لكن هذا لا يعني أن الحب انتهى، لكنه قد يعكس انشغاله أو تغير أولوياته. الانشغال وقلة التواصل: الانشغال قد يكون حقيقيًا، لكن عدم محاولته إيجاد وقت لك ولو بشكل بسيط - كما كان يفعل في البداية - يثير التساؤلات. الحب يحتاج إلى بذل جهد مستمر، حتى ولو كان المشغل كبير. سلوكه بعد المشكلة: من المثير للإعجاب أنه "تمسك بك" وحاول أنه يحل الأمور بعد المشكلة التي كادت تؤدي إلى الانفصال. هذا يدل على مشاعر حقيقية، لكنه ربما لم يتمكن من الحفاظ على نفس المستوى من الحضور بعدها. حديثه المتكرر عن الزواج: هذا أمر إيجابي فقد يدل على جديته تجاهك، لكنه غير متوازن مع قلة الاهتمام والتواصل في الوقت الحالي، وهذا يسبب لك هذا الإحساس بعدم الوضوح. نصيحتي لك: التحدث بصراحة: اجلسي معه في هدوء وعبري عن شعورك بالحيرة واحتياجك إلى وضوح في العلاقة. اسأليه مباشرة عن مشاعره تجاهك ومخاوفه أو ضغوطه التي يمر بها. تقديم مساحة: بما أنه مشغول، ربما يحتاج دعمك وصبرك مع وضع حدود صحية حتى لا تشعري بالإهمال الكامل. التركيز على الأفعال لا الكلمات فقط: هل هو يبذل جهدًا ولو بسيطًا ليحافظ على العلاقة؟ التفكير في المستقبل: لو استمر الوضع كما هو، هل أنت مستعدة أن تسمحي لنفسك بمزيد من عدم اليقين؟ هل هذا النوع من العلاقة يمنحك السعادة والاطمئنان الذي تستحقينه؟ تذكري أنك تستحقين الحنان والاهتمام والوضوح. لا تترددي في البحث عن مساعدة من خبراء في العلاقات إذا شعرتِ أنك تحتاجين ذلك، ويمكنك أن تجديهم على صفحة الخبراء في فدني. وأخيرًا، لا تنسي أن تدركي أن الزواج هو شراكة مبنية على تفاهم واحترام متبادل ودعم مستمر، فلا تقبلي بما يقلل من قيمتك أو يسبب لكِ القلق المستمر. إذا أحببتِ يتسنى لي مساعدتك أكثر أو التحدث عن هذا الموضوع بشكل أعمق. ذكية هنا دائمًا لأجلك. 🌷
تم النشر الجمعة، ٢٧ يونيو ٢٠٢٥
أعتقد عليكي التمهل وعدم التسرع .. فالآن انتي مش جاهزة نفسيا بشكل كامل .. لأنك معتمدة على الإمداد العاطفي .. فلما كان في إمداد في البداية قبلتيه ولما قل الإمداد فكرتي في صرف النظر ....... والمفترض انك بتشوفي الشخص نفسه وسمعته مش إمداد الحب اللي منه .. لأن الإمداد العاطفي مؤقت ومغري وخادع
تم النشر الاثنين، ٣٠ يونيو ٢٠٢٥
ربنا يعينك ويباركلك ويكتبلك بإبن الحلال، عموما احنا كولاد بنتعرض لضغط كبير بس مش لدرجة التجاهل التام، لو شايفاه بيحاول تقبليه وتمسكي بيه، وممكن يكون بيحبك وخايف يخسرك عشان كدا قال نكتب الكتاب. بس دي كلها احتمالات خلينا نخش في المنطقي: بس لو هو بيتجاهلك او بيستغلك ابعدي عنه، او ملاحظة انه بيكلم بنت تانية ابعدي عنه (اي شكل من اشكال الخيانة او انه مش بيجتهد في المسئولية)، ودي حاجه مش هعرف احكم عليها لأنها بتتطلب معرفة ظروفك بتفاصيلها المملة، وفي موضوع الفتور بعد سنين حب، طبيعي بيحصل، ودي طبيعة الانسان، والرسول نصح بتزين الزوجات والازواج (وقت الجواز) عشان علاقتهم تستمر وولا واحد يخون التاني، وكل واحد يحب التاني ويجامل التاني ويسامح التاني، حتي ربنا قال: "وجعل بينكم مودة ورحمة"، بس الصراحة اللي بيستمر احترامكم لبعض، ولكن شهوة الحب مسيرها تنطفئ، اللي مبينطفئش الحب بالعقل.
تم النشر الجمعة، ٢٧ يونيو ٢٠٢٥
لعرض السؤال في فدني اضغط هنا