السلام عليكم ورحمة الله
بصراحه متردده ف الكلام اللي هقوله دلوقتي ومش عارفه هل أنا بعمل الصح ولا الغلط فجه في بالي اعرض مشكلتي والله المستعان أنا طالبة ثانوية ازهريه وفات من سنتي الدراسيه نصفها حاليا ومش عارفه أنا ماشيه صح ولا غلط وهل أنا هوصل للي أنا عايزاه الاخر ولا لأ
كلمت كذا حد قريب مني وبيقولوا انهم شايفين فيا نوع من التيه أنا بصراحه من كلامهم بدأت اراجع نفسي بس حسيت اني مش لاقيه ولا إجابه وازاي أنا مش مضغوطه كدا في المذاكره وكتير من رفقاتي مضغوطين ومش حابين الدراسه أبدا بس أنا مش كدا أنا بفوض امري لله+ وضغط تعدد المواد ولا أنا مش حاسه بالضغط فعلا بس أنا اوقات ببكي كتير وبكون مضغوطه بس مش بلجأ للبشر بلجأ لربي بحسه أقرب حد ليا أنا مش فهماني بجد والله حاسه بالضيق
السلام عليكم، أنا شايفة عادي مفيش مشكلة، عن نفسي وقت الثانوية مكنتش حاسة بضغط وكتير كانوا شايفين إن ده غلط ونوع من اللامبالاة بس أنا كنت حاسة إنه عادي، هي سنة زي غيرها ومش مضطرة أعيش الضغط والتوتر اللي المجتمع مصمم إن الطلبة يعيشوه عشان يثبتوا إنهم مهتمين وخايفين على مستقبلهم. أنت ممكن مش حاسة بضغط وده مش غلط المهم تكوني بتعملي اللي عليكِ وممكن تكوني من النوع اللي بيتعامل مع الضغط بطريقة مختلفة عن الباقيين... يعني لو تراكم بتلجأي للبكاء أو بتفرغيه بطرق تانية حتى لو بتعملي ده لاشعوريًا. ** لكن خدي بالك، فيه فرق كبير بين عدم الخوف والشعور بالضغط وأنتِ بتشتغلي وتعملي اللي عليكِ وبين شعور اللامبالاة وإنك ترمي كل المسؤولية ورا ضهرك ومتهتميش بالنجاح من عدمه. ** تأكدي بس إنك بتعملي اللي عليكِ وبتذاكري وأنتِ موقنة إن ربنا لا يضيع أجر من أحسن عملا، اجتهدي واتقني عملك. لو أنتِ بتذاكري ومرتبة وقتك ومنظمة مذاكرتك فخلاص كملي على نظامك من غير الاستسلام للضغط والتوتر زي الباقيين... لو لقيتِ فعلا فيه تقصير من ناحيتك، يعني مثلا بتلاقي دروس كتير تراكمت ومفتحتيهاش خالص أو بيضيع منك وقت كتير على السوشيال ميديا مثلا أو في حاجات مش مهمة يبقى لأ، محتاجة تراجعي نفسك لأن ممكن يكون عندك نوع من التسويف بيخليك تفتكري إنك بتنجزي في المذاكرة وبتعملي المطلوب لكن الحقيقة العكس. راجعي كده يومك ونظامك وشوفي لو فيه أي خلل محتاج يتعالج. واعملي كل ده من غير ما توتري نفسك... يعني لقيتِ مشكلة لا تتوتري وتبدأي تحسي بخوف وضغط، تعاملي بتوازن وهدوء وافتكري إن لسه فيه وقت على الامتحانات ممكن تصلحي فيه أي مشاكل تكتشفيها. وإن شاء الله ميكنش فيه أي مشاكل. خدي لفة في التطبيق وشوفي قسم التعليمية أو ابحثي عن أسئلة الثانوية وهتلاقي نصائح كتيرة تساعدك لو واجهتك أي مشكلة. وبالتوفيق إن شاء الله.
تم النشر الثلاثاء، ٣٠ ديسمبر ٢٠٢٥
وعليكم السلام ورحمة الله وبركاته يا قمر، أول حاجة أشكرك إنك شاركتيني اللي جواكِ، ده يعني إنك قوية وبتحاولي تفهمي نفسك، وده خطوة كبيرة أوي. حسيت بضيقك وترددك، خاصة إن نصف السنة فات ورفقاتك مضغوطين وأنتِ مش كدا، بس البكاء ده إشارة إن في حاجة محتاجة ترتيب. أنتِ ماشية صح لما بتفوضي ربنا، بس التوكل يجي مع الأخذ بالأسباب. خلينا نرتب اللي جاي عشان توصلي لهدفك (اللي هو إيه بالضبط؟ حدديه دلوقتي، زي "نجاح في الثانوية العامة عشان أدخل كلية معينة"): راجعي خطتك : اكتبي جدول يومي بسيط (مثلاً 4 ساعات مذاكرة مقسمة على موادك، مع 10 دقايق راحة كل ساعة). ابدئي بالمواد اللي فاتت نصفها، وركزي على التلخيص مش الحفظ بس. تابعي تقدمك : كل أسبوع، شوفي إيه اللي خلصتيه وإيه اللي ناقص. لو لقيتِ نفسك بتبكي، قومي صلي ركعتين وادعي ربنا يفتح عليكِ، وخدي كوباية مية أو امشي شوية في البيت. تعاملي مع التيه : سؤال بسيط لنفسك كل يوم: "أنا بعمل إيه النهاردة عشان أقرب من هدفي؟" ده هيخليكِ تشوفي الطريق واضح. أنتِ مش تائهة، أنتِ بس محتاجة خريطة صغيرة. ربنا معاكِ وقادر يقلب الضيق فرح، استمري كدا وهتشوفي النتيجة إن شاء الله. لو عايزة جدول جاهز أو نصائح أكتر، قوليلي. ودوري في فدني على أسئلة مشابهة عن "مذاكرة ثانوية أزهرية" هتلاقي إجابات كتير مفيدة، أو شوفي الخبراء هنا: https://www.fedni.net/experts لو احتجتِ استشارة متخصصة في الدراسة. قوية يا بنتي، هتوصلي! 💪❤️
تم النشر الثلاثاء، ٣٠ ديسمبر ٢٠٢٥
السلام عليكم ورحمة الله وبركاته اختنا احسن الله إليكي •كونك مبتشعريش بالضغط فده مش شرط إيجابي لإن الشعور بالضغط دلوقتي أخف من الشعور بالضغط في الامتحانات •يمكن هم مضغوطين عشان عندهم نوع من الإلتزام .. وشعورك باللامبالاة هو مش توكل بل هو تواكل لأن لو كان فعلا توكل وانك مفوضة امرك لله فليه الناس حسو انك تايهة .. المتوكل واثق وليس تائه •مش هقول لك كوني مثالية ولكن هقول لك انك ضميرك صاحي بدليل انك حسيتي بالذنب وسألتي هنا عالبرنامج .. فلازم تخلي ضميرك يحركك للأفضل • القليل أفضل من لا شئ .. ابدأي بالقليل واحتسبي الأجر .
تم النشر السبت، ٣ يناير ٢٠٢٦
وعليكم السلام ورحمة الله وبركاته ، أنا طالب تالتة ثانوي ازهر ، معاكى يعنى وعارف اللى بتمرى ليه كويس جدا ، فإن شاء الله ممكن أفيدك ، اولا متاخديش برأى حد كل واحد منا لو قصة هو اللى بيكتبها وقصتك مهياش قصة الدفعات اللى قبل كدة ، واحداث القصة انتى اللى بتصنعيها ، وموضوع الضغط دا متاخديش فى بالك أما بس لو بتخلص مذاكرة ومش مراكمة يبقى فى الفل ملهاش لازمة بقا نبص لحد زى ما قلتلك ، واما موضوع هدفك فدا مهواش بإيد حد دى حاجه فى علم الغيب وقدر ، احنا مأمورين نعمل اللى علينا ومجاهد ونترك الله لله ، وربنا مبيضيعش تعب حد ، ربنا هو اللى قال كدة (إن الله لا يضيع أجر من أحسن عملا ) ولو عملنا زى ما ربنا أمرنا يبقى (إن الله لا يخلف الميعاد ) ممكن متحسيش بكمية المذاكرة لكن هتحسى بضغط نفسى ، وهتحسى إن كل الناس بقت واعظة من اول ما دخلنا الثانوى 🙂😂 ، فزي ما قلتلك متسمعيس كلام حد ، وربنا يوفقك ويوفقني و يوفقنا كلنا ، ويعطينا بكرمه لا بتعبنا ،ويرزق كل واحد منا ما يتمنى ، ومتنسيش تدعيلى بقا 🙂🤎🍂
تم النشر الجمعة، ٢ يناير ٢٠٢٦
مش عايز اقولك ان الثانوية مش نهاية العالم لإن اكيد ناس كتير قالولك كدة بس فعلا هي مش نهاية العالم، ممكن متكونيش مدركة هي قد اي تافهة دلوقتي بس هي فعلا مستاهلش كل البروباجندا اللي الاهالي عاملينه، فحاولي تذاكري المواد بنظام تحطيه انت وفقا لقدرتك على استيعاب المواد دي و نصيحة مهمة جدا هي انت اللي تذاكريه حلي عليه وقتي والله المستعان
تم النشر الأربعاء، ٣١ ديسمبر ٢٠٢٥
ايوا والله كلام حضرتك حقيقه جدا + جزاك الله خيرا
تم النشر الأربعاء، ٣١ ديسمبر ٢٠٢٥
ربنا يوفقك ومتقلقيش خالص لسة بدري اعملي بس اللي عليكي
تم النشر الأربعاء، ٣١ ديسمبر ٢٠٢٥
صراحة كلامك فيه نوع من الطمأنينه بالنسبالي +جزاكي الله خيرا غاليتي💐
تم النشر الأربعاء، ٣١ ديسمبر ٢٠٢٥
انتي صح الشكوى للناس مذله أما لما تشتكي لربنا هو الي هيحللك كل امورك ويوفقك في حياتك اوعي تسيبي طريق ربنا ابدا وربنا يعينك ويوفقك يارب
تم النشر الثلاثاء، ٣٠ ديسمبر ٢٠٢٥
اوكي شكرا + ان شاءالله
تم النشر الخميس، ١ يناير ٢٠٢٦
تمام + امين واياك
تم النشر الخميس، ١ يناير ٢٠٢٦
اكيد هعمل بنصيحتك ان شاءالله وباخد منها اللي يفيدني +جزاك الله خيرا وربي يهديك ويهديني معك
تم النشر الخميس، ١ يناير ٢٠٢٦
احلى حاجه انك بتلجأي لربنا ربنا يوفقك وييسر لك امورك ابدأي حاجه بسيطه قولي لنفسك انك هتقعدي تذاكري عشرة دقائق واول ما تقعدي علي الكتاب هتلاقي نفسك اندمجتي وذاكرتي وهكذا و بردو خليك ديما قريبه من ربنا واطلبي منه أنه يعينك على مذاكرتك وبس إن شاء الله خير ما تقلقيش ربنا هيوفقك
تم النشر الخميس، ١ يناير ٢٠٢٦
نا كنت ثانوي ازهري برضه وزيك وبقولك فكك منهم كلهم بيقولو كده حتى لو نتي محصله بس متقوليش لحاد انك مرتاحه ف دراستك عشان مش كل الل حواليكي بيتمنولك الخير
تم النشر الأربعاء، ٣١ ديسمبر ٢٠٢٥
حصل معايا نفس الكلام والله السنة اللي فاتت وكنت بقول ازاي كله بيقول انه مقتول من المذاكرة وانا مش حاسة بأي حاجة بس بعد كدة اكتشفت ان مش كلنا واحد وان الضغط مش واجب يعني وفي `إعدادي هندسة دلوقتي الحمد لله فمتقلقيش كدة كدة هتتضغطي موووت في المراجعة+طالما بتعملي اللي عليكي وبترضي ربنا يبقا خلاص سيبيها على الله
تم النشر الأربعاء، ٣١ ديسمبر ٢٠٢٥
شكرا +جزاك الله خيرا
تم النشر الأربعاء، ٣١ ديسمبر ٢٠٢٥
لعرض السؤال في فدني اضغط هنا