عندى مشكلة انى متقلب المزاج خصوصا فى علاقاتى مع اى بنت برتبط بيها.. يعنى فى الاول بتكون الامور تمام وحابب الموضوع بعدها بفترة بزهق والشعور بيتغير وبيبقى في ملل وانا بحس بنفسي مع الوقت بتغير ١٨٠ درجة من واحد كله شغف وكلام وتفتح مواضيع وتفكر فى الى معاك لواحد مطفى وساكت ومابكملش والحوار دا اتكرر كذا مرة..
السلام عليكم ورحمه الله وبركاته هي دي مش مشكله تقلب مزاج قد ما هي فكره الصوره الذهنيه اللي موجوده عندك عن كلمه ارتباط او كلمه علاقه ما بين واحد وواحده دايما عندك صوره نمطيه هي دي اللي انت بتكون باصصلها وبتحط كل طاقتك في تطلع الصوره دي وتحقق الصوره دي طبعا هنيجي بعد وقت اكيد الطاقه مش هتفضل في نفس الليفل الطاقه بتاعتنا هتقل لانه طاقتنا متوزعه على بقيه مسؤوليات حياتنا وبقيت الظروف الحياتيه والروتين الحياتي فلما تجيئي حاجات بقى تبدا غصب عنك تاخد جزء من طاقتك عندك نفس الطاقه اللي انت بتلهث بيها ورا الصوره الذهنيه دي. وكمان بتبدا ااا علاقتك بالطرف الاخر تكون ااا برده فيها جهد روتيني مش اكتر من كده ما بحسش ان انا بعمل حاجه عشان هي ليها زهوتها الجديده هي زي م تمام وهي.ا بشتري حجم جديده فلو انت الشخص ده ان انت دائما بتاخذ زهوه الحياه الجديده وبعدين يعني تلاقي نفسك وصلت لمرحله من الملل لو ده بيتكرر معاك عموما فامور اخرى غير انت ذكرتها واللي انت بتعرض الموضوع بخصوصها فهنا لازم نفكر كويس قوي ليه انا بهتم بالحاجه وهي جديده وما بيكونش عندي نفس.
تم النشر السبت، ٩ أغسطس ٢٠٢٥
ممكن لأنك خلاص ضمنت وجودها أو خلصت حلاوة البدايات أو إنك عايزه تعيش شعور معين بس إللي بيبقي ف بداية اي علاقه لكن انت م شخص لسه مش جاهز بالفعل إنك تتدخل علاقه مع بنت او انك تخطب أو تتجوز يعني لسه مش مؤهل بالفعل ل ده
تم النشر الجمعة، ٨ أغسطس ٢٠٢٥
السلام عليكم، لو ارتباط غير رسمي فعادي يحصل ملل بعد فترة لأن الهدف في الغالب تقضية وقت ممتع وعيش مشاعر لطيفة وملء فراغ عاطفي، بعد فترة بتنطفي شعلة الشغف وزهوة البدايات وبيصبح الطرف الآخر عادي بعد ما راحت هالة الغموض واتعرفت عليه. حتى لو ارتباط رسمي وخطوبة وكان بس معتمد على نفس الهدف من غير التفكير الجاد سواء عن عمد أو جهل بطبيعة الفترة ودورها في الاستعداد للزواج، فبدل ما يبقى التركيز على التعرف على الطرف المقابل وفهمه والاستفادة من فترة الخطبة في تحديد إذا ما كانوا متوافقين ويصلحوا كزوجين أو لا، بيكون التركيز على المشاعر الفياضة والكلام والشغف اللي عادي بعد وقت بتدخل الطبيعة البشرية ويبدأ الشعور بالملل. وحتى الزواج بيحصل فيه نفس الملل والروتين والاعتياد على الطرف الآخر، لكن في النهاية الزواج الصح بيكون قائم على أسس أكثر من الحب والشغف فبيقدر يصمد وبيقدر يتجدد الحب لو الطرفين عاوزين يعيدوا شعلته. مش شرط تكون مشكلة بنفسيتك بتدفعك للملل، قد ما يكون السبب غياب هدف جاد من الارتباط أو فهم خاطئ له، أو تسرعك في الشغف والميل العاطفي للشخص قبل ما تتأكد من إنه فعلا الشخص اللي بتدور عليه ويناسبك. يعني بتندفع بالأول وبعدين تكتشف إنها مكنتش مبهرة زي ما تخيلت أو مش هي دي اللي كنت بتدور عليها.
تم النشر الخميس، ٧ أغسطس ٢٠٢٥
ابعد عن الارتباط طالما انت مش مقبل علي زواج دلوقتي... ولو انت مقبل علي زواج لازم تعرف ان الزواج والارتباط نعمه كبيره من ربنا..والزواج سكن وسعاده وإرجع للقرءان.. إقرأ واسمع عن معاناه الناس في الزواج وإن فيه نساء ورجال وصلو لل٤٠ ولسه مش قدرين يرتبطو... الملل في العلاقات سببه ممكن ان الشخص مش مناسب وده طبيعي .. او ان مفيش هدف من الارتباط بالشخص ده.. إقرأ في احكام النكاح والزواج واعرف السنن عشان تعرف تختار البنت المناسبه الي ترتبط بيها وتكون ام لأولادك ...عندك مثلا قصه جليبيب وغيرها من قصص الزواج الرائعه في عهد الرسول وبعده... ووفقك الله لما هو صواب
تم النشر الأربعاء، ٦ أغسطس ٢٠٢٥
ممكن يكون بسبب ان دي طبيعة الإنسان .. دائما بيزهق ويدور على حاجة أعلى دائما عايز بداية جديدة ونشوة ومتعة أعلى / لكن بعيدا عن كدا هل انت مستوعب ان اللي وصلوا لجرائم وسجون كانت بدايتهم بسيطة وكل شوية يزيدوا يزيدوا لحد ما وصلوا لده / هتقول لي مستحيل هقول لك ماشي بس لحد امتى وإلى أين ! ..شوف ايه السبب انك بتحتاج ترتبط هل خواء في علاقتك بوالديك ؟
تم النشر الأربعاء، ٦ أغسطس ٢٠٢٥
صدقني هتلاقي ربنا سبحانه وتعالى. بييسر الموضوع لوحده وعن تجربه والله
تم النشر السبت، ٩ أغسطس ٢٠٢٥
دى النتيجة الى وصلتلها بعد تفكير مع نفسي فعلا.. بس فى نقطة هتعرف ازاى الشخص الى قدامك واذا كان مناسب او لا ؟
تم النشر السبت، ٩ أغسطس ٢٠٢٥
انت تبعد عن الارتباط ويوم م تقرر انك تتجوز اتجوز علي طول متدخلش ف خطوبه علشان هتزهق برضه أما لما تتجوز ويبقي حتمي عليك غصب عنك هتلتزم
تم النشر السبت، ٩ أغسطس ٢٠٢٥
ممكن تكون طبيعتك كده أو طاقه سلبيه عامة اقرأ سورة البقرة كتير جدا وحاول تبعد عن العلاقات العشوائية اللي خارج نطاق الزواج لانك كده للأسف لو فضلت مكمل بالشكل ده هتفضل طول عمرك وحيد وللأسف لا هتقدر تكون أسرة ولو كونتها بعد فترة هتهدها وتظلم عيال مالهمش ذنب غير انك انت ابوهم حصن نفسك بغض البصر ثم غض البصر وعف نفسك بكثرة الصيام والقيام وقراءة القرآن حتى لو النفس ضعيفه بالصلاة وبالاستعانه بقراءة القرآن بتقوى اكتر واكتر
تم النشر الخميس، ٧ أغسطس ٢٠٢٥
حتى مع وجود الدين الشيطان بيقنعك بألف مبرر .. زي مثلا اعمل المعصية الفلانية والله غفور رحيم .. ممكن تعمل اي رياضة تساعد في تخفيف الملل
تم النشر الخميس، ٧ أغسطس ٢٠٢٥
الارتباط هنا من ضمنة انى كنت خاطب ومكملتش بسبب كدا.. طبيعة الانسان بيحب التغير ويكرة الروتين.. نقطة البداية البسيطة والزيادة معاك حق فيها بس دا بسبب غياب الدين ووضع حدود للغلط
تم النشر الأربعاء، ٦ أغسطس ٢٠٢٥
لعرض السؤال في فدني اضغط هنا