محتاجة إجابة سريعة للأسف .
انا اللي زوجي بيقولي دايما روحي بيت أهلك
رحت المرادي و رجعت للاسف عشان مشاكل مع والدي و عاوزني أرجعله من غير ما يجيبلي أي حق منه و انا خفت على بنتي اللي عندها خمس شهور و رجعت .
كنت ناوية ارجع و كل دوري اراعي بنتي و اطبخ و اغسل الهدوم أي حاجة غير كدة مش هعملها ....
قامت خناقة بيني و بين زوجي حاليا و واقفة عالطلاق أو اني انضفله بيته و اعمل كل أمور البيت، و العلاقة هو مش عاوزها مني .
انا رافضة. غير كدة عاوز يطلق من غير ما يجيب مسكن حضانة أو يديني مؤخري .
أعمل ايه دلوقتي.
ما عنديش مكان أروحه و واخدة من الحكومة رعاية طفل و بنتي صغيرة أوي
بصي يا بنت الحلال الموضوع محتاج هدوء عشان تضمني حقك وحق بنتك واهم حاجة ماتسيبيش البيت بمزاجك عشان تضمني حقك في التمكين من شقة الزوجية طالما معاكي طفلة رضيعة والقانون معاكي في النقطة دي جدا ولو هو عايز يطلق يبقى لازم يطلق رسمي ويدفع كل حقوقك من مؤخر ونفقة ومتعة ويوفر ليكي مسكن حضانة وماتسمحيش ليه يضغط عليكي بالتنازل عن اي حق مادي وروحي نيابة الأسرة هي طريقك لطلب قرار تمكين من الشقة عشان تعيشي فيها انتي وبنتك واستشيري محامي متخصص في اسرع وقت عشان يمشيكي في الاجراءات الصح وتأمني مستقبل بنتك وماتخافيش ربنا مش بيضيع حق حد طالما متمسكة بحقك بالحلال وبالقانون وعليكي بالدعاء والاستغفار عشان ربنا يفتحلك ابواب الخير ويهديلك الحال وهدوء ومتتنازليش عن اي حق من حقوقك القانون في صالحك وجد والله ربنا يحفظك ويسعدك
تم النشر السبت، ٤ أبريل ٢٠٢٦
ما هي هي دي المشكله انا في كل المسج انا ما لقيتش حاجه واحده عنك اهتمي بالبيت اهتمي بكل حاجه اولهم نفسك يعني انت لما تهتمي بكل ده وتهملي نفسك طبيعي مش هتفرقي حاجه غير المربيه المنزليه والحياه هتكون مشاكل ما فيش راجل ما بيكونش عايز حقوقه من مراته فهو صدقيني المشكله هنا في ان انت اهتمامك كله متركز اه في بيت اه في الطفله كل ده مهم بس انت اهم حاولي الفتره الجايه انك تبداي تركزي على نفسك شكل شعرك لبسك اهتمي بنفسك زهقتي من شكل شعرك غيري ستايله اولا ده لنفسك حاولي ان انت تشوفي لو تعملوا قاعده مثلا كبارات البلد او انك تحاولي تتكلمي معاه بالحسنه بخصوص الموضوع ده ولو انت مثلا قادره ان انت تشتغلي في وظيفه حلوه اعملي ده طبعا
تم النشر الأربعاء، ٨ أبريل ٢٠٢٦
السلام عليكم، أولا ربنا يعينك ويصلح أحوالك ويلهمك الصواب في مشكلتك. هو طبعا الطلاق مش سهل ومنقدرش ننصح به خاصة إننا منعرفش أبعاد المشكلة ووجهة نظر الطرفين. مشكلة الزواج في مصر إنه بقى ينبني على أسباب غلط وبسبب ضغط المجتمع ممكن الطرفين يتسرعوا في قبول زواج مش مناسب والعيوب بتتكشف بعد الزواج وممكن عدم التفاهم وسوء التواصل يزيد لحد ما يوصل للطلاق، كل طرف هيبقى شايف إنه معه الحق والطرف التاني هو المقصر والمشكلة. يعني لو قعدتم في جلسة وكل طرف حكى هتلاقي زوجك من كلامه وجهة نظره أنتِ اللي غلطانة وهو اللي معه الحق، عشان كده لازم تراجعوا حد مختص في العلاقات ومعالج أسري وزواجي. يعني حتى الأهل ممكن يزودوا المشكلة بتدخلهم والبعض ينحاز لطرف معين وسوء التفاهم يزيد. فحاولي تستعيني كده بخبيرة علاقات أسرية تسمع الطرفين وتساعدكم بخطوات ونصائح... جايز كل ده سوء تفاهم بينكم ومشكلة في التواصل، خلي الطلاق آخر حل تلجأي له، لأن للأسف الطلاق في مصر مش في صالح المرأة ووضعها بيبقى أسوأ في كتير من الأحوال. نصيحة أخيرة، شغلي سورة البقرة على طول في البيت واقرأيها بنفسك كل يوم، وإن شاء الله ربنا يبارك في بيتك وبنتك ويصلح ذات بينكم. وحاولي تشتغلي على نفسك أنتِ وشوفي اللي يطورها ويخليها أفضل في جوانب حياتك كلها. بالتوفيق
تم النشر الاثنين، ٦ أبريل ٢٠٢٦
من كلامك أنك مش فارق معاكِ غير بنتك، وإنك متزوجة عادي يعني وواضح أهلك كإنهم خلصوا منك وبعتذر على الكلمة دي! بس عايزة أقولك حاجة لو فعلًا زوجك وبيتك مهمين عندك عليكِ بالاستغفار بنية أن ربنا يألف بين قلوبكم وصدقًا مش ساهلة عليكِ فكرة الطلاق خاصةً لو فارق معاكِ بنتك الأمر الثاني وهو تنضيف الشقة يا ستي لله أعمليها لله بلاش تفكري هطرد منها لعل وعسى بجد تخلي زوجك يفهم أهميتك في بيتك وأيضًا الإمتحان الله يوقفك بس والله وبالله الفكرة مش إنك تقفي على رجلك وشغلك يسندك لا نفسيتك برضو أنتِ إنسانة وهتحسي إنك عايزة بيت وزوج حاولي تكثفي قيام الليل والاستغفار وتحسني علاقتك بزوجك الله يرضى عنك اللهم آمين 🤍 🫂
تم النشر الأحد، ٥ أبريل ٢٠٢٦
هقولك علي حاجة بخصوص النضافة وانا في تانية اعدادي والدتي تعبت جدا وعملت 3 عمليات ف انا اللي شلت البيت كله من تنضيف لغسيل لاكل واني اراعي اخواتي الصغيرين واحميهم واسرحلهم وفي نفس الوقت كنا بنجهز شقة اخويا في كنت طول اليوم اكل للعمال وشاي وعصير +دراستي الصبح في المدرسة اروح اعمل كل دا وبعدين علي المغرب اروح دروسي واكيد مكنتش ممتازة يعني في كل دا وكنت بغلط كتير وكان بيجيلي اوقات اعيط من الحمل دا وانه تقيل اوي عليا ومفيش حد في سني بيعمل كدا بس سبحان الله مكنتش بذاكر بس ربنا كان بيكرمني بدرجات عالية يوم بعد يوم الحمد لله بقي عندي 19 سنة بس ست بيت شاطرة وطالبة عندها حلم بتحاول تحققه - اسفة اني دخلت في القصة دي بس حبيت اقولك انك تقدري زي ما ربنا كرمني وقدرت بس قولي يا رب
تم النشر الأحد، ٥ أبريل ٢٠٢٦
@أحمد سعيد يا أستاذي انا خارجة من تنضيفة عيد و تنضيفة قبل رمضان و تنضيفة عزومة رمضان كنت بقعد كل مرة فيهم بروق الشقة و امسح حيطان و نجف و عفش و انا معايا طفلة رضيعة .... انا خلال 35 يوم قضيت 10 أيام تنضيف في الشقة . تعبت جدا و الله
تم النشر الأحد، ٥ أبريل ٢٠٢٦
شقتنا اه بس هو كاتبها باسم والدته
تم النشر الأحد، ٥ أبريل ٢٠٢٦
ربنا يعينك ويساعدك ويبعد. عنك الاذي ويعوضك خير ان شاء الله ويحللك مشكلتك يارب
تم النشر الأحد، ٥ أبريل ٢٠٢٦
بصي التنضيف حاليا مش لازم يكون جامد اوي كدا في الظروف اللي فيها حاليا وهي امتحاناتك والطفلة لكن مينفعش بردو تسيبي بيتك مش نضيف حتي لو جوزك وحش بس زي ما استاذ احمد قال دا ابسط حقوقة ومش لازم تنضيف حيطان ونجف يكفي ان بيتك يكون مروق مش مكركب واكنسيه وامسحيه بس واغسلي الهدوم مش اكتر من كدا علشان انتي متكونيش غلطانة وعارفة والله ان الموضوع صعب وانا مريت بدا قبل كدا وعارفة انه صعب جدا بس قولي يارب قويني
تم النشر الأحد، ٥ أبريل ٢٠٢٦
ممكن تركزى معايا فى كلمتين بس محتاج منك كذا حاجه بش ربنا يبارك لك فى بنتك وتفرحى بيها يارب وتعوضك عن كل دا تحليل بسيط ل سؤالك أو رسالتك قولتى ب نص رسالتك إنك كنت ناوية ترجعيله بس كل دورك هيقتصر على مراعاة بنت والطبخ والغسيل أى حاجة غير كدا مش هتعمليها __ممكن أفهم بس إيه الحاجات اللى تقصديها تفصيلا ياريت للتوضيح ؟ قولتى ب نص رسالتك إن فيه مشكلة وصلت للطلاق حرفيا بسبب إنه عايزك تنضفى البيت وتعملى كل أمور البيت __ إيه أمور البيت اللى يقصدها بالظبط ؟ انتى رافضه وهو عايز يطلق بس رافض يديكى ويجيب وما إلى ذلك __معنى كدا إن انتوا أصلا قعدتوا واتناقشتوا فى الطلاق وأمور الطلاق وخلاض عايزين انتوا الاتنين تنفصلوا الطرفين عايزين دا يعنى ولا الكلام دا بيبقى وقت الخناقة أو المشكلة ؟ معندكيش مكان تروحية __معنى كدا إنك اتخانقتى مع والدك ومينفعش ترجعى البيت خالص ولا علشان العلاقة اتوترت مع والدك وكدا ف حاسة انك وحيدة ؟ __ انتى كنت قولتى فوق ان عندك شغل حكومى ؟ وقولتى انك عندك امتحان ولا انتى بتدرسى فى جامعة ؟ وفيه حاجه غريبه مستغربها بتقولى ان زوجك مش عايز العلاقه وانتى من كلامك مش فارقة معاكى __ معلش سؤال ازاى انتوا الاتنين زاهدين فى حلال ربنا وكمان دا انتوا لسة فى سنين زواجكوا الأولى ؟ ممكن توضيح ل طريقة تعامله معاكى هل بيضربك أو بيشتمك شتايم وحشة إى طبيعة التعامل يعنى ؟ معذرة جدا أنا آسف طولت عليكى بس علشان الموضوع توضح أركانة بس ربنا يكرمك ويكتب لك اللى فيه الخير
تم النشر الأحد، ٥ أبريل ٢٠٢٦
الله يعينك الله يعينك ويرزقك القوة اللى تستحملى بيها مراعاة الرضيعة اللى على إيدك ويوفقك فى امتحانك يارب الله يعينك
تم النشر الأحد، ٥ أبريل ٢٠٢٦
هو حاليا زوجك صح؟ لسة ما اطلقتوش ولا اتطلقتوا ................لأنك كدا رافضه تنضفى بيتك اللى انتى عايشة فيه انتى وبنتك وزوجك معلش خليكى معايا لأخر بس انتى رافضه تعملى ألف باء واجبات عليكى طب ممكن أعرف هو المفروض منه يتقبل دا ولا يعمل إيه ؟ انتى شايفه إيه يعنى معلش والله مش بزايد عليكى أنا معاكى والله بس محتاج أعرف رأيك بس ما هو حاجة من اتنين يا زوجك دا مش راجل أو مريض أو انتى بتعندى مثلا هو مضهدك فى البيت يعنى ؟ مش عارف ايه بالظبط طريقة تعامله معاكى اللى يخليكى مش عايزه تنضفى شقتك الللى انتى عايشة فيها معلش محتاج أفهم منك وأنا والله معاكى
تم النشر الأحد، ٥ أبريل ٢٠٢٦
@أحمد سعيد معايا طفلة رضيعة و الموضوع مجهد عليا و محتاجة أذاكر عندي امتحان مهم جدا لو نجحت فيه هبقي واقفة علي رجلي ف محتاجة أذاكر
تم النشر الأحد، ٥ أبريل ٢٠٢٦
@أحمد سعيد نفسيا مش متقبلة أخدم في البيت اللي آخرتها بطرد منه .
تم النشر الأحد، ٥ أبريل ٢٠٢٦
طب انتى ليه مش عايزه تنضفى شقتك اللى انتى قاعدة فيها ؟ بغض النظر عن نقص الراجل دا وان كاتب الشقة باسم والدتة وحارم بنته من أبسط حقوقها
تم النشر الأحد، ٥ أبريل ٢٠٢٦
بلاش تطلعي من الشقة وطالما عاوز طلاق اوكي طالبي بحقوقك كلها نفقة ومؤخر ودهبك ونفقة الطفلة ومسكن الحضانة القانون مع الام الحاضنة
تم النشر الأحد، ٥ أبريل ٢٠٢٦
أكيد فيه عمك فيه فيه جدك جدتك سواء جدك لوالدك أو والدتك ،على الأقل تكونى بعيده عنه لحد متحله أموركم ، والدك كده شرعا يأثم على إل هو بيعمله ده ، حاولى توصلى ل إتفاق معاه دا ضهرك وسندك بعد ربنا مينفعش يفرط فيكى حتى لو غلطانه
تم النشر الاثنين، ٦ أبريل ٢٠٢٦
بصي سواء كاتب الشقة باسمه او اسم والدته مش هتفرق هو مطالب عند الحكومة بسكن لبنته حتي لو طلعتي من الشقة دي ورفعتي قضية الحكومة هتجبره يجبلك سكن حتي لو بالايجار وهو اللي هيدفع طبعا
تم النشر الأحد، ٥ أبريل ٢٠٢٦
طب هو ليه مكبر حوار النضافة دا واتعمل منه أزمة ولا هو بيعند أو بيتلكك
تم النشر الأحد، ٥ أبريل ٢٠٢٦
يعنى أبوكى اللى كلمه أصلا ! هو أبوكى كدا للأسف اداله الفرصة انه يعمل اللى هو عايزه للأسف الله يعينك يارب ويهون عليكى يارب معلش مردتيش عليا بيتك دا اللى هو شقتكم ولا بيت تانى بتاع أهله مثلا ؟
تم النشر الأحد، ٥ أبريل ٢٠٢٦
رعاية طفل دي أجازة من عملي الحكومي فأقصد ما عنديش مصدر دخل
تم النشر الأحد، ٥ أبريل ٢٠٢٦
ابويا اللي كلمه يجي ياخدني . هو جه خدني من مشتشفي لاني كنت ف مستشفي بعد مشكلة كبيرة مع والدي .
تم النشر الأحد، ٥ أبريل ٢٠٢٦
ويعنى إيه واخده من الحكومة رعاية طفل هو انتى رفعتى حاجه أو عملتى مع محامى أى حاجه ؟؟ ممكن توضيح أكتر
تم النشر الأحد، ٥ أبريل ٢٠٢٦
وتقصدى ب بيتة دا اللى هو بيتك انتى وهو شقتكم يعنى ؟ ان انتى مش راضيه تنضفيها ولا البيت دا فيه حد تانى أهله مثلا وكدا ؟!
تم النشر الأحد، ٥ أبريل ٢٠٢٦
يعنى انتى رجعتى لوحدك من غير ما هو يكلم أبوكى على الأقل ؟ أو حتى يجى ياخدك !؟
تم النشر الأحد، ٥ أبريل ٢٠٢٦
لعرض السؤال في فدني اضغط هنا