اهلا انا كنت محتاجه اخد رأيكم فى موضوع معين
انا كان ليا صديق بقالنا تلات سنين وهو غالى عندى اوى وبقا يعتبرني الشخص اللى بيكون على طبيعته معاها وبيفضفض ويحكى وكده وبسبب طريقته اللطيفه ووو عوامل كتير خلتنى انجذبله بس مقولتش اى حاجه ولا بينت تعلقي ولا انجذابى ده لمده سنتين كاملين بتعامل طبيعي جدا المهم هو كان ليه تجربه حب من قريبته وكانت هتبقا خطوبه بس هى كسرت قلبه بطريقه ما معرفهاش هو كانوغامض شويه ف شخصيته ومشاعره ومبيحبش يحكى تفاصيل اوى بس كنت بحترم ده كنوع من انواع الخصوصيه
بس اللى اعرفه انه كان بيعشقها ولحد دلوقتي مش قادر يتخطاها وعشان كده انا مرضتش اقول حاجه جوايا لأن ممكن يكون مفيش اى حاجه من ناحيته او مش مستعد او لسه متخطاش او او ف انا قررت ملعبش ناحيه الموضوع ده خالص ولا اسمح لنفسي افكر كتير ولا اعشم نفسي زياده عشان متأذاش نفسيا
بطريقه او بأخرى حصل موقف هو خمن فيه انى ممكن اتعلقت بيه انا قولتله لو حصل ده فعلا ف انا مش هسمح لنفسي حاجة تكبر جوايا عشان عارفه انك متخطتش ده هو راعي ده وقالى انا كمان حسيت انى اتعلقت بيكي شويه بس خايف اظلمك وانتى متستحقيش اى اذيه بسببي بس هحاول اتخطى عشانك خلال فتره غيابك الجايه عشان امتحاناتك اللى هى شهرين ف قولت تمام لحد ساعتها احنا اصدقاء زى ماكنا بس عشمنى اوى والامل لمع جوايا انه خلاص هو هيبادلك نفس المشاعر
وحلمت بقا احلام ورديه وبلا بلا بلا ف جيت بعتله بعد شويه بعتله لقيت طريقته اتغيرت خالص بقا يتجاهل كتير اسلوبه بقا جاف وبيغلط الغلط ويقول مقصدش ومادام مقصدش يبقا معتذرش واصلا ده مينفعش احنا مبناخدش بنيه الشخص ده هو كان قصده ولا لا بناخد باللى خلاص حصل وعنده كبرياء بيخليه مستحيل يعتذر لحد حتى لو هو الغلطان ف حقه وده غلط هيخليه يخسر ناس كتير ف حياته واسلوبه مبيراعيش مشاعر اوى ولا يحب اللى يعلى صوته عليه ولو حاجه بسيطه ولو حتى السبب انه غلطان ف حق الشخص اللى على صوته عليه
قال انا كنت هحاول اتخطى عشان شخصيتك متتخسرش بس لكن انه يتخطى عشانى انا كشخص لا كنت بعديله مواقف وكلام كتير اوى ساعات عشانمنشدش مع بعض وهو مراعاش ده خالص وقال انه مبيثقش ف حد نهائى حتى انا بعد كل العشره دى شايف انه مستحقش الثقه وبيقول السبب انها خلته يشك وميثقش ف كل الناس اللى حواليه
طيب انا بقالى سنين وعمره ماشاف حاجه وحشه وشايفه ان بعد كل ده انه ميثقش فيا دى حاجه زباله اوى وبيقول انه مش عاوز يتكلم او يفتح قلبه ولا يبين شخصيته الحقيقيه قدامى عشان هكرهه يعنى كل ده كانت قشور بس من حياته وهو شايف انه مش هيقدم اى مشاعر لحد وفاقد شغف وامل ف حوار الحب والجواز ده خالص وبيتهرب منه بقوله هتفضل راهب يعني اكيد هييجي وقت واهلك هيزنوا عليك تخطب وتتجوز وبرضو كده او كده هتظلم بنت ملهاش ذنب برضو ف كل اللى جواك ده
وف الاخر هو لابيعرف يتكلم لما بيكون غلطان ف حق حد ولا بيعرف يبرر ولا يراضي اللى قدامه بكلمتين حتى لو مش هيعتذر ودايما بيشوف اى طريقه يقلب بيها الترابيزه على اللى بيكلمه زى اخر مره بقوله انت بتعمل كده لى معايا ومش راضي يرد ف عليت صوتى حاجه بسيطه عشان افهم راح قفل وكتبلى شات انه بيكره الصوت العالى وانه اتعصب ومش عاوز يتكلم دلوقتى وده طبعا تهرب من انه يجاوبنى
للامانه مش عشان انا بكتب لنفسي والله العظيم عمرى ماعملت معاه حاجه وحشه تخليه اصلا يفكر يعمل كل ده معايا ولو كان اى عتاب بيننا ف ده من المحبه وانى عاوزه اتفاهم ومش عاوزه اقطع العلاقه خالص وانه غالى اوى عندى رغم ان اخر فتره عيطت اوى اوى بسببه وهو عارف ده كويس ومعلقش على اى حاجة
بعد كووووول كان بيطلب منى افضل صديقه وانه مش عاوزنى ابعد عنه مع انه عارف ده هيتعبنى نفسيا بس مش مراعي ده هو عاوزنى جنبه بس
السلام عليكم، أولًا العلاقة دي حرام شرعًا يعني إيه صديقك؟؟؟ وكمان ٣ سنين هل أهلك عادي عندهم الصداقة ما بين الولد والبنت وحتى لو أهلك عادي فـ هي حرام حرام، ثانيًا يا غالية الأخ باين عليه بيلعب بيكِ هو إيه يعني تفضلي جنبه هو عيل صغير يعني، وكمان يتعصب وأنتِ مستحملة مين قالك إنه ليه عليكِي حق ولا هو ليه عليكي حق ولا أنتِ ليكي عليه حق محدش ليه حق ومفيش حاجة إسمها صداقة ما بينكم، وعامةً هو لما يلاقي بنت تكون زوجة ليه مش هيتكلم معاكي أصلًا عشان طبيعي مفيش زوجة هتقبل إن زوجها يكون معاه صديقة بنت وأنتِ بجد إزاي تقبلي دا على نفسك، متتعبيش نفسك ولا تستمري في علاقة زي دي أبعدي وأقطعي العلاقة وتوبي عشان دا ذنب وركزي في دراستك وفي حياتك وأهدافك وأحلامك ومستقبلك، وكان عندي سؤال هل عادي عندك لما ربنا يكرمك وتتزوجي زوجك يعرف إنك عندك صاحب ولد؟؟؟ راجعي نفسك بالله الأمر صعب جدا وبلاش تزلي نفسك لحد وتكسري قلبك بإيدك وتتعبي نفسك
تم النشر الثلاثاء، ٢ يونيو ٢٠٢٦
السلام عليكم، أنتِ ليه تاعبة نفسك في علاقة زي كده؟ مش هتكلم في نقطة إن مفيش صداقة بين ولد وبنت ولا طبعا هلوم مشاعرك إنها تحركت.. طبيعي مع الوقت والكلام تكوني تعلقتِ به لكن مهما كانت مشاعرك ناحيته لازم وقفة مع نفسك تشوفي هي رايحة على فين وهل تستحق التعب ده كله؟ شخص يا إما أصلا كان بيتسلى وبيضيع وقت معك أو على الأقل شكاك ومش بيثق في الناس ومليان تعقيدات. أعتقد نفسك تستحق تكون مع شخص يقدرها وشاريها وواثق فيها. رأيي بلاش تهلكي نفسك في علاقة زي دي وفكري في نفسك ومصلحتك. وبلاش حتى تبعدي مؤقتا بنية إنك بتعطيه فرصة.. هترجعي لنفس الدوامة. افتكري إن مفيش حاجة اسمها (I can fix him) طالما معقد ومكلكع والحكاية مليانة ريد فلاجز فابعدي أفضل لك. ركزي في حياتك واملي وقتك بحاجات تنفعك وتطورك ومع الوقت هتتخطيه. تحياتي.💚
تم النشر الثلاثاء، ٢ يونيو ٢٠٢٦
أنتِ مش غلطانة خالص يا صديقتي، إحساسك طبيعي بعد ثلاث سنين من الصداقة والدعم. اللي حصل إنه هو مش مستعد عاطفيًا، وعنده مخاوف وكبرياء ومشاكل ثقة عميقة من تجربته السابقة، فهو بيهرب ويغير أسلوبه بدل ما يواجه. ده مش ذنبك، ومحاولتك تحافظي على نفسك كانت قرارًا ناضجًا. نصيحتي لكِ: ركزي على حماية قلبك دلوقتي. لو استمر التجاهل والجفاف، حددي حدود واضحة أو خدي مسافة مؤقتة عشان متتأذيش أكتر. هو قال إنه عايزك جنبه، لكن بدون جهد حقيقي منه مش هيحصل تغيير. استثمري في نفسك ودراستك، وخلي أملك في شخص يقدرك ويثق فيكِ ويبادلك الجهد. لو عايزة دعم إضافي، شوفي صفحة الخبراء على Fedni.net/experts، وجربي تبحثي عن أسئلة مشابهة في التطبيق عشان تلاقي تجارب أخرى. أنتِ تستاهلي علاقة فيها احترام وثقة متبادلة.
تم النشر الثلاثاء، ٢ يونيو ٢٠٢٦
والله انتي اللي تاعبة نفسك
تم النشر الثلاثاء، ٢ يونيو ٢٠٢٦
لعرض السؤال في فدني اضغط هنا