السلام عليكم ورحمه الله وبركاته
انا طالبة في تالتة ثانوي و حاسة ان مذاكرة الجغرافيا اصعب من السنة اللى فاتت
يعني اول محاضرة اخدتها فيها حفظ مناطق كتير جدا زي بتوع تفكك الاتحاد السوفيتي في آسيا صعبين جدا كلهم ستان في اساميهم صعبة و اللى موجودين في اوروبا دا غير تفكك الاتحاد اليوغوسلافي و لازم احفظ كل دولة مطلة على انهى بحر دا غير اني لازم احفظ أماكنهم على الخريطة. يعني اول محاضرة فيها كل الحفظ دا فما بالي بطول السنة. دا غير امتحان المحاضرة الأولى بردو جبت فيه درجة مش راضية بيها.
و حاليا مش عارفه افتح المحاضرة التانية ولا ارجع للاولى بس اخاف اراكم بصراحة، فمش عارفة اعمل ايه و حاسة ان الجغرافيا صعبة بعد ما كنت بقول هتكون اسهل مادة🥲
ممكن علشان مثلا انتِ شايفة الدرس كبير واكيد مليان حفظ.. انتِ قسميه لحتت صغيرة وذاكري واحدة واحدة وخلي فيه ١٠ دقايق بين كل جزء والتاني وقبل ما تدخلي على جزء اتأكدي انك فهمتي اللي قبله كويس... واقنعي نفسك انه سهل علشان عقلك ميصدقش انه صعب ومفيش فايدة
تم النشر الثلاثاء، ٢٢ سبتمبر ٢٠٢٦
السلام عليكم، استعيني بالله الأول ومفيش حاجة صعبة بعون الله. بلاش تقلقي من البداية كده، زي ما قلتِ دي أول محاضرة وطبيعي الجغرافيا والتاريخ فيهم تفاصيل كتيرة محتاجة حفظ وعادي إنك متفتكريش كل ده من أول مرة. وبلاش تأجلي ثاني محاضرة إلا لما تتقني الأولى عشان كده مش هتتحركي وهتراكمي المحاضرات فوق بعضها. ممكن تخصصي ساعة مثلا لقراءة ومراجعة المحاضرة الأولى ومتركزيش قوي على تذكر كل معلومة أو أسامي كل الدول والتفاصيل دي كلها، وبعدها ابدئي المحاضرة الثانية. *** الجغرافيا محتاجة تذاكريها بذكاء مش مجرد حفظ. يعني تعتمدي على الخرائط الذهنية وربط المعلومات ببعضها وممكن تألفي مقاطع تحفظي بها أسماء الدول أو أي معلومات مرتبطة ببعض. يعني أنا لسه لحد الآن فاكرة من الرياضيات (كل جبار ظالم جته داهية) 😅 كنا بنحفظ منها إشارات الدوال المثلثية. وحاجات شبيهة كنا بنفتكر بها أسماء الهرمونات والأعصاب ومعلومات تانية في الطب. فأنتِ ممكن تستخدمي نفس الطريقة وتألفي مقاطع أو جمل أو حتى قصص تربطي بها المعلومات وهتفتكريها بسهولة بعد كده. الاعتماد على الذاكرة البصرية وربط المعلومات هيساعدك أكتر من مجرد ما تحاولي تحفظي المعلومات صم. *** تدربي على الخرائط ومش شرط ترسميها بإتقان، أي رسمة مقاربة وتدربي على كتابة أسماء الدول والبحار وعادي لو نسيتِ حاجة، مرة مع مرة هتثبت. ممكن تنزلي من على النت خرائط بدون أسماء الدول والبحار واطبعيها وكل يوم أو كم يوم تدربي على كتابة الأسماء من الذاكرة، المعلومات بتحتاج مراجعة مستمرة على فترات فاستخدمي طريقة (التكرار المتباعد) هتلاقي كتير شارحينها على جوجل ويوتيوب. *** أخيرا، فيه فيديوهات كتيرة على يوتيوب فيها نصائح لإتقان مذاكرة الجغرافيا ممكن تبحثي عنها وتطبقي من النصائح دي اللي يناسبك. وكمان شوفي فيديو في قناة أحمد أبو زيد أو غيره بعنوان (ذاكر أقل ذاكر بذكاء) فيه طرق ذكية للمذاكرة أقل وقت بأكبر تركيز وتحصيل. https://www.youtube.com/watch?v=A7zCOOEBxhU المهم لا تيأسي، مفيش مادة صعبة لو عرفتِ تذاكريها بطريقة صحيحة. بالتوفيق.💚💚
تم النشر الاثنين، ٢١ سبتمبر ٢٠٢٦
وعليكم السلام ورحمة الله وبركاته يا حبيبتي. أولاً، أحب أطمئنك إن اللي بتمرين بيه طبيعي جدًا، خاصة في السنة دي اللي مليانة ضغط. الجغرافيا بتتطلب حفظ كتير وتركيز على التفاصيل زي الدول والخرائط والأسماء، وده بيخليها تبدو صعبة في البداية، لكنها مش مستحيلة ومش هتفضل كده طول السنة لو نظمتي طريقة مذاكرتك. ابدئي بخطوة صغيرة وواضحة: خذي 15-20 دقيقة بس عشان تراجعي المحاضرة الأولى بطريقة مختلفة، مثل رسم خريطة بسيطة بنفسك أو استخدام ألوان لتمييز المناطق (مثل آسيا وأوروبا)، واربطي الأسماء بقصص أو أحداث تاريخية عشان تسهلي الحفظ. بعد كده، افتحي المحاضرة التانية وخذيها على مراحل، قسميها لأجزاء صغيرة وحددي هدف يومي بسيط زي "أحفظ 3 دول النهاردة مع موقعهم". لو خايفة من التراكم، جربي طريقة "المراجعة السريعة" كل يومين للمحاضرات السابقة عشان ما تتراكمش. تذكري إن الدرجة اللي جبتيها مش نهاية العالم، وهي فرصة تتعلمي منها. ادعي الله بالتوفيق واستعيني بالصبر، وربنا هيسهل الأمور إن شاء الله. لو عايزة نصائح أكتر عن طرق حفظ الخرائط أو تنظيم الوقت، قوليلي. وممكن تبحثي عن أسئلة مشابهة على فدني عشان تشوفي تجارب بنات تانيين. أنتِ قادرة، وهتتغلبي على ده خطوة بخطوة! 💪
تم النشر الاثنين، ٢١ سبتمبر ٢٠٢٦
سهليها بتسهل
تم النشر الثلاثاء، ٢٢ سبتمبر ٢٠٢٦
لعرض السؤال في فدني اضغط هنا