انا حرفيا معنديش اي مهاره بحاول اتعلم برمجه لسه و جرافيك وداخله علي اولي جامعه ومدخلتش الكليه اللي كان نفسي فيها بس الحمدلله علي كل حال
مش معايا غير فون بس ومش كويس قد كدا وانا محتاجه لاب علشان البرمجه وبابايا لما سأل علي الأسعار شاف انه غالي ومجابوش ف انا مضغطتش عليه احراجا يعني وقولت هحوش او اشتغل واجيبه واحده واحده ( حاسه انه مبقاش عاوز يصرف عليا لمجرد جيبت مجموع مش حلو او الله أعلم ممكن أكون فاهمه غلط لمجرد زعلي وكدا بس والله انا تعبت اوي طول السنه علي أمل اجي يوم النتيجه واكون مبسوطه والحمدلله قدر الله ما شاء فعل)
ف انا بدور علي شغل اجمع منه تمن اللاب وانا معنديش مهاره لقيت تفريغ صوتي وكم خدمه تانيه علي المواقع بس انا جربتهم قبل كدا( جربت الدخول وعمل ملف شخصي بس في المواقع مش جربت شغل فيه)
ف لما دخلت المواقع دي لقيت اني مش منافسه قويه خالص في اقل الخدمات وهياخد مني وقت كبير اوي علي ما اجمع حتي الف جنيه
حتي لو كان الشغل فيها بالدولار
المهم اقترحت علي نفسي اعمل محتوي تيك توك زي فيديوهات توعيه او قرآن او اي محتوي من دا
مع ان حددت هدفي بس مش عارفه امنتج وحاسه ان لو اخدت فيديو متمنتج جاهز وحد منزله وعليه ريتش ونزلته من غير العلامه المائيه هاخد ذنب علشان الشخص التاني اكيد دافع فيه دا غير ان لو مثلا نزلت ممكن ملاقيش مشاهدات ولا تفاعل
مش عارفه أعمل اي ولو قولت انزل اشتغل اوفلاين مش هيوافقو
حد يقترح عليا حاجه او اي انواع الفيديوهات اللي ممكن تلم ريتش كويس أقدر ألم منه ربح كويس واجيب اللاب دا
وانا بصراحه مش عاوزه اعمل زي بتوع اليومين دول " ممكن تفاعل علشان مصاريف دراستي او ايًا يكن السبب " بحسها شحاته والله واتكسف من نفسي لو عملت كدا
انا انزل الفيديوز اهاا بس مقولش الكلام دا لأن اللي هيرزقني ربنا مش هما
واسفه لو طولت بس حقيقي نفسي حد يقترح عليا اعمل اي
ولو مفيش عندك اقتراح ادعيلي دعوه لعلكم أقرب مني الي الله عز وجل وحبيبي 💗💗
السلام عليكم، هل فيه مشكلة تشوفي لابات مستعملة؟ بالنسبة للربح من على الانترنت فخلي بالك إن أي حد يقول لك فيه ربح سريع يبقى بيضحك عليكِ. ومتخليش فيه قلق عندك من ناحية إن لازم ألاقي شغل وأجيب فلوس لأن ده بيجيب نتيجة عكسية ويؤخر فرص إنك تلاقي شغل فعلا. فاهدي كده وبلاش سربعة وتوتر وتشتت، وخلي خطواتك هادئة وعملية. ** لو ناوية على حوار الفيديوهات ده فمش شرط على فكرة تعملي فيديوهات بوجهك أو حتى بصوتك لو مش حابة ده. ممكن فيديوهات مكتوبة مع صور مناسبة ومؤثرات صوتية. بس خدي بالك برضه، لازم تبقي عارفة جمهورك المستهدف وموجودين فين وإزاي تجذبيهم وتكوني برضه محددة النيش (المجال) اللي هتعملي الفيديوهات عليه. كتابة وصناعة المحتوى خاصة محتوى السوشيال ميديا لها أسس وقواعد لازم تكوني عارفاها عشان توصلي لجمهورك وتحققي انتشار. ممكن تشوفي على يوتيوب أي كورس مجاني عن صناعة المحتوى هيفيدك إن شاء الله. ** ممكن تشوفي كمان حاجة اسمها مشاريع الدخل السلبي، وهي بتعتمد على فكرة صناعة وبيع المنتجات الرقمية في مواقع مخصصة لده. شوفي الكورس ده عنها وممكن تتابعي برضه بعض الفيديوهات على نفس القناة هتلاقي كتير فيديوهات عن الدخل السلبي والعمل الحر عموما. https://www.youtube.com/playlist?list=PLrNsV6fh5oPNKM9H5fxtizS32T9Hs00RN ** نصيحة أخيرة، حاولي تخصصي مبلغ ولو صغير تخرجيه صدقة وإن شاء الله ربنا هيبارك لك ويرزقك من واسع فضله. بالتوفيق.💚
تم النشر الجمعة، ٢١ أغسطس ٢٠٢٦
يا بنتي، أول حاجة أحب أقولها لك إن شعورك مفهوم جدًا، والتعب اللي مريتي بيه طول السنة مش هيروح هدر. ربنا كتب لك اللي فيه الخير، والحمد لله على كل حال زي ما قلتِ. اللي بيحصل دلوقتي فرصة إنك تبني نفسك بنفسك، وده هيخليكِ أقوى. بالنسبة لفكرة التيك توك، فكرتك كويسة لو نفذتيها بطريقة صح. أهم حاجة دلوقتي إنك تبدئي بمحتوى أصيل من عندك عشان ما تقعيش في مشاكل حقوق النشر. جربي تعملي فيديوهات قصيرة عن: رحلتك في تعلم البرمجة من الصفر (حتى لو لسه بتتعلمي). الناس بتحب تشوف "قصة شخص بيحاول"، وده ممكن يجذب متابعين مهتمين بنفس المجال. نصائح بسيطة للطلبة الجدد في الجامعة (تنظيم الوقت، أفكار مذاكرة، كيف تتعاملي مع ضغط الدراسة). محتوى توعوي خفيف عن مواضيع يومية زي "إزاي تختاري كورس مجاني" أو "أخطاء شائعة في أول سنة جامعة". المحتوى ده ممكن يجيب ريتش كويس لو كان منتظم وصادق، ومع الوقت تقدري تفعلي خاصية الـ Creator Fund أو الإعلانات. ابدئي بفيديوهات قصيرة (15-30 ثانية) عشان ما تتعبيش نفسك في الأول. وادعي لك ربنا ييسر لك الطريق ويفتح لك أبواب الرزق الحلال، ويشرح صدرك ويبارك في جهدك. أنتِ قادرة، وخطوة بخطوة هتوصلي. 💗
تم النشر الخميس، ٢٠ أغسطس ٢٠٢٦
لاء هو مافيهاش فيديوهات خالص ده مجرد تجيه وتعبئه داخل فرع أو المحل
تم النشر الخميس، ٢٠ أغسطس ٢٠٢٦
اللهم آمين ولك بالمثل أضعاف الفكره اني مش بعرف أعمل الحاجات دي ومش عاوزه اظهر في الفيديوهات
تم النشر الخميس، ٢٠ أغسطس ٢٠٢٦
اسال الله العلي العظيم ان يعطيك حتى يرضيك يا رب
تم النشر الأحد، ٢٣ أغسطس ٢٠٢٦
انا بحاول أجيبه بنفسي بس جيل أعلي علشان تكون مره واحده بس الفكره حاليا في الشغل وأي خدمه عموما أبدأ منين واي الرود ماب اللي أمشي عليها حاسه اني متلخبطه عندي حاجات كتير أعملها ودخول كليه وعاوزه اثبت نفسي فيها واي الشغل اللي ممكن يكون كويس في الفتره دي يمكن اللغبطه دي علشان اول مره اشتغل واعتمد علي نفسي بس عموما جزاك الله كل الخير وانا هحاول اتعلم لغه ممكن تفيدني بعدين
تم النشر السبت، ٢٢ أغسطس ٢٠٢٦
بصي انت مش محتاجه لاب إمكانياته عاليه علشان تبدئي أقل حاجه هتكون كفايه ان شاء الله ومش بقولك كلام وخلاص أنا كنت بتعلم برمجه برضو علي لاب core i5 جيل اول 😅فا في البدايه هيمشي معاكي شويه فتره مأقته طبعا بالنسبه لوالدك هو ممكن كان بس متعشم فيكي فا علشان كده هو فاكر انو كده مثلا بيعاقبك أو حاجه حاولي معاه انك تقنعيه تاني او حتي تخلي والدتك (انت ادري لوالدك ممكن تقنعيه ازاي ) طب بالنسبه انك عاوزه مصدر دخل ممكن تتعلمي تسويق الكتروني أو تحاولي تتعلمي لغه وتشتغلي كول سنتر واحده من اللغات الي مرتبها بيبقي علي ما شاء الله هي الألماني ومش محتاجه غير التلفون بس علشان تتعلمي الحاجات دي وعلي فكره كمان البرمجه ممكن تبدأ فيها من علي التلفون فا مش تعطلي نفسك لحد ما الاب يجي أن شاء الله وربنا يوفقك
تم النشر السبت، ٢٢ أغسطس ٢٠٢٦
الفكره ان امكانيات كسر الزيرو القليل متنفعنيش في تعلم برمجه عاوزه جيل اعلي وهارد اعلي وفي نفس الوقت انا مش معايا خالص اصلا فلوس حتي لو جيبت كسر الزيرو بنفترض مثلا السوق الحر صعب اوي وفيه منافسين موت فلازم يكون عندي خبرات ومش هكتسبها الا اما يكون معايا لاب علشان اقدر اتوسع في البرمجه
تم النشر الجمعة، ٢١ أغسطس ٢٠٢٦
ممكن تشوفي لابات كسر زيرو او تستخدمي تابلت الثانويه وتشتري كيبورد
تم النشر الخميس، ٢٠ أغسطس ٢٠٢٦
انتي شبهي انا بردو بتعلم برمجه مع نفسي وبدرس طب بيطري وبصراحه مكنشي فارق معايا بس بردو كنت زعلانه اني مجبوس المجموع اللي عاوزاه وعدي سنتين ولسه متخطتشي ثانويه عامه وللأسف احنا اتربينا علي انها كلها حاجه
تم النشر الخميس، ٢٠ أغسطس ٢٠٢٦
ما هو الفكره ان انا مش هقدر اشتغل اوفلاين اصلا
تم النشر الخميس، ٢٠ أغسطس ٢٠٢٦
علي خمسات او شوفي مواقع تانيه بس أحسنهم خمسات
تم النشر الخميس، ٢٠ أغسطس ٢٠٢٦
بتاعت التفريغ الصوتي دي على اي موقع؟
تم النشر الخميس، ٢٠ أغسطس ٢٠٢٦
أسأل الله أن يعطيك أكثر ما تتمنّى ويصلح لك ولنا الحال.. انصحك اختي الكريمه ان تبحث عن المجال الموسمي لسوق العمل في الوقت الحالي مثل (موسم حلويات المولد النبوي الشريف) كثير ما يحتاجون عماله في هذه الفتره
تم النشر الخميس، ٢٠ أغسطس ٢٠٢٦
لعرض السؤال في فدني اضغط هنا