انا كان ف حد دخل ف حياتي و اعترفلي بالحب و انا اعترفتله و وعدني لما يخلص هيخطبني و كان مناسب من كل حاجة و شخص زي مانا عايزاه بالظبط قعدنا حوالي خمس شهور لقيته مرة واحدة اتغير عليا و بقي يتجاهلني و لما واجهته قالي مبقتش حاسس بمشاعر و مش عايز اظلمك و المرة الي بعدها قالي طيب استنيني انا عندي مشاكل ف حياتي و هعرفك كل حاجة بعدين استنيته اكتر من سنة مكانش بيكلمني و لا يطمن عليا و كنت وفية ليه كلمته من يوم و قلتله انا مش هفضل مستنية كده غير لما اعرف في ايه قالي بصراحة مبقاش ف مشاعر و كان صعب عليا اني اقولك قولتله ليه سيبتني سنة من غير ماتبرر و ليه قولتلي استنيني و انا هفهمك بعدين قالي افتكرتك هتفهمي لوحدك و قالي انا مش فاكر إني قلت استنيني و كان صعب عليا اقولك كده فقلتله بصراحة و انا كمان كنت بطصنع معاك و عمري ما حبيتك انا بس كنت شايفاك مناسب و قلت الحب هيجي بعدين و كنت باجي ع نفسي علشان احبك سمع الكلام و اتصدم و قالي انا مش مصدقك قولته طيب ليه انا اصدق الي انت قولته قالي علشان انا صريح انتي لأ و قلت الكلام ده و محبتش ابان ضعيفة قدامه و لا حبيت ابان اني كنت عايزاه قلتله انا كنت مستنية علشان وفية ليك بس عمري ما حبيتك و كنت بطصنع علشان انت مناسب قالي بس انا عمري ما اطصنعت معاكي ابدا بس مشاعري مبقتش موجودةو حسسني ان انا الي غلطانة هل انا غلطت ف الي قولتهوله ولا كان مفروض امشي م غير ما اقول حاجة و اطلعه هو الي غلطان
لا انتي صح وفكك منه واياكي تزعلي على واحد زي ده. اللي باعك بيعيه وغير كده لو سمحتي بلاش تدخلي في علاقه ملهاش مسمى. لان هيحصل كده. اللي عايزك يروح بيت والدك وانتي معززه مكرمه تشوفي هل توافقي ولا لا. إنما نستنى سنه على أمل زائف انتي كده ظلمتي نفسك
تم النشر السبت، ٤ أبريل ٢٠٢٦
هو محبكيش أصلا ويعنى إيه أصلا شوفته مناسب ف بدأت أكلمه واستناه لحد لما يجى يخطبنى والله يا بنتى نصيحة من شاب زيه هو قالك استنى وبتاع علشان لما يحس انه عنده فراغ ومحتاج يكلمك يرجع يكلمك ويسلى وقته وبمجرد ما حضرتك كلمتيه وبدأتوا تتكلموا هو خلاص كان استحالة يتقدملك بس فى حيلة الشباب بتلجألها أنا عايز أكلمك مثلا ومعجب بيكى وبتاع فهعيشك فى أوهام وحنية واهتمام وكمان وعود بالخطبة والزواج رغم إن الشاب بيبقى عارف فى قرارة نفسة ان عمره ما هيخطبك حتى بس الوعود والحنية ديه علشان يضمنك ويضمن استمرار العلاقة فانتى بالنسبة له محطة طب سابك ليه فجأة لأنه فى الغالب شاف حاجة تانية أو خلاص زهق فاهمانى ومش بعيد كمان بعد فترة يرجع يكلمك تانى ويقولك انه لسه بيحبك وبتاع ساعتها اعرفى انه مش لاقى حاجة يسلى وقته بيها كلام من شاب زية وعارفين تفكير بعض ....... نصيحتى ليكى يا بنت الناس مفيش حاجة اسمها شوفته مناسب ووعدنى إنه هيخطبنى كدا العلاقة مش موجودة فى النور ولا ليها ملامح وكلها بتبقى علاقات مسمومة بتدمر قلبك ونفسيتك ومستقبلك فيه حاجة اسمها جيه اتقدم ف شوفته مناسب ف خطبنى فاهمانى حافظى على نفسك يا بنت الحلال انتى غاليه وحافظى على قلبك واحفظى نفسك وقلبك ومشاعرك لحلالك وساعتها هتحسى انك فى الجنة حرفيا مش واحدة مدمرة نفسيا بسبب عيل كرف لها اعملي له بلوك واقع ومواقع وامسحى كل حاجة ممكن تفكرك بيه أو حتى يجى على بالك واهتمى بنفسك وبحياتك وحاولى تعملى عادة جديدة مثلا وليكن زى القراءة تنشغلى بيها وتلجأليها وقت حزنك واحساسك بالفراغ ربنا يوفقك ويهدى قلبك وعقلك ويكتب لك اللى فيه الخير.
تم النشر السبت، ٤ أبريل ٢٠٢٦
يا عزيزتي، أول حاجة أقولها: أنا فاهمة تمامًا إحساسك بالغضب والألم ده، وده طبيعي جدًا بعد اللي مريتي بيه. اللي عملته مش سهل، وأنتِ كنتِ وفية وصابرة، بس هو اللي خيب أملك بتغييره ووعوده الفاضية. هل غلطتِ في اللي قولتيه؟ مش غلط كبير، يا حبيبتي. قولتِ كده عشان تحمي نفسك ومتبانيش ضعيفة، وده رد دفاعي طبيعي لما الطرف التاني يحاول يلومك. بس الحقيقة، هو اللي غلطان أساسًا: وعد وخان، قال "استنيني" وسابك سنة بدون كلمة، وده عدم احترام واضح. أنتِ مش ملزمة تبرري أو تشرحي مشاعرك ليه، خاصة إنه هو اللي هرب. كان مفروض تمشي بدون كلام؟ أيوة، ده كان الأفضل. الرد بهدوء وصمت بيحافظ على كرامتك أكتر، ويخليه يفكر في غلطه لوحده. الكلام اللي قولتيه ممكن يخليه يشك في صدقك، بس في النهاية، اللي بينكم خلص، وأنتِ مش محتاجة تثبتي حاجة. النصيحة العملية دلوقتي: اقفلي الصفحة دي نهائيًا: بلوك كل حاجة، ومتفتحيش الباب تاني. اللي فات مات. ركزي على نفسك: ابدئي هوايات جديدة، طوري مهاراتك، وادعي ربنا يرزقك اللي أحسن (زي ما قال ربنا: "وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ"). العلاقات دي قبل الرسمي مش مناسبة إسلاميًا، وبتوجع كده. المستقبل: دوري على شريك يحترمك من الأول، وخلّي أي علاقة تبدأ بخطبة رسمية عشان تحمي قلبك. لو عايزة دعم أكتر، ابحثي في فدني عن أسئلة مشابهة زي "كيف أتجاوز خيبة أمل عاطفية"، أو شوفي الخبراء هنا: https://www.fedni.net/experts. أنتِ قوية وهتقدري، يا ذكية معاكِ! 💪❤️
تم النشر السبت، ٤ أبريل ٢٠٢٦
لاء مش غلطانة غلطك الوحيد انك فتحتي علي نفسك الباب دا ف اقفليه واللي عايزك يجي يخبط علي الباب وهو فعلا مكنش بيحبك من الاول واللي بيحبك بجد هتلاقيه خايف عليكي وعليه من الحرام وهيعمل اي حاجة علشان يتقدملك
تم النشر السبت، ٤ أبريل ٢٠٢٦
انتي صح، واللي عملتيه صح برضو مينفعش تباني قدامه ضعيفه برغم انك كذبتي وبرغم انك اتأذيتي واكيد عاوزه فترة تتخطي بس هو كان عاوزك متاحه علطول وقت ما يبقي عاوز يتكلم يلاقيكي علشان كدا قالك استنيني ويرجع يقولك اصل فكرتك هتفهمي لوحدك وغالبا هيرجع يكلمك تاني ف اقطعي العلاقه من جذرها وكأنك معرفتهوش وهتتخطي وهتعيشي وهتبقي اقوي من الاول بس متسيبيش نفسك لدماغك تسوحك وتخليكي في نفس الدوامه وانك مش قادره تتخطي لا احنا بنتخطي عادي بس الأثر بيفضل ومبيأثرش علي حياتنا عادي ونصيحه بلاش ارتباط لأنه في الاول وفي الاخر حرام وكدا كدا مكتوبلك أحدهم واكيد هو دا الخير ليكِ، واعتبري دي مرحله تتطور في شخصيتك انك تبقي اقوي من دلوقتي، بالتوفيق ي سكره 💗
تم النشر السبت، ٤ أبريل ٢٠٢٦
سيبك من أنتِ غلطانه ولا لا أنت قاعدة سنة مستينة دالوقتي جاية تثبتي بكلامك القوي معاه إنك فعلًا مش فارق معاكِ الله المستعان المهم تعيشي كلامك فـ الحقيقة مش مجرد كلام وانتقام وصديقني لو الشخص دا مش فارق معاكِ مكنتيش قولتلي حسسني إني غلطانة، وحاسه كمان إنك تسرعتي في الرد المهم تتخطى وتبدأي صفحة جديدة مع ربنا وتتدعي ربنا إنك تمارسي حياتك ولا تنتظري حد مرة ثانية ويارب تكوني تعلمتي
تم النشر الأحد، ٥ أبريل ٢٠٢٦
لعرض السؤال في فدني اضغط هنا