السلام عليكم الاول انا بعتذر لاني اتكلمت فالموضوع ده قبل كده انا بقالي سنتين مريض بالوسواس القهري واضطراب القلق قعدت فتره طويله لحد ما رحت لدكاتره كويسين يعني يعتبر بقالي سنه مع دكتور مخ واعصاب ونفسي ده الي جاب نتيجه بقالي معاه سنه بس اغلب المرات قالي ان الدوا عمل الي عليه والباقي عليا اني مقعدش فاضي واعمل رياضه وانزل الكليه وكده واشغل نفسي وانا بلتزم شويه والاغلب لا
وكمان في نفس الوقت رحت لدكتوره جلسات تقريبا قعدت معاها ٧ شهور مدنتيش غير تمرين واحد وكانت الجلسه عباره عن اني بحكي وهي بتكتب وترد وبس وبعدها رحت لدكتوره نفسيه تانيه للجلسات بردو حسيت انها فاهمه اكتر وانها بتساعد بجد ووضحتلي كل المشاكل الي عندي وادتني تمارين حوالي ١٢ تمرين او حاجه مطلوبه
لحد دلوقتي بقالي معاها تقريبا شهرين او تلت شهور بس مبلتزمش بال هي بتقوله ومبعملش التمارين بس اخر كام يوم بدات التزم فا انا مش عارف هل هي كويسه ولا اروح لدكتور تاني انا بسمع ان الجلسات النفسيه دي الناس بتقعد مع الدكتور جلستين تتكلم تبقا احسن بفرق واضح
هي بتساعدني اه بالكلام وكده وبتديني التمارين بس انا مش عارف هي كويسه ولا اروح لدكتور تاني مش عايز اكرر الغلطه الي حصلت مع الدكتوره الاولانيه ومش عايز اقضي بقيت عمري بتعالج
فعايز افهم هل ده طبيعي اني لسه مخفتش ولا بسبب تقصيري وهل الدكتوره دي كويسه هي ادتني تمارين يقظه وتمرين تسامح وتمرين تنفس وتمرين تخيل وتمارين تانيه وحاجات اعملها فهل استنى معاها شويه والتزم لحد ما اشوف نتيجه ولا اروح لدكتور تاني وانا عندي مشاكل تانيه غير المرضين دول زي قلة ثقه بالنفس وحاجات شبه كده اسف على الاطاله وشكرا مقدما
وعليكم السلام ورحمة الله وبركاته، إن الأخذ بالأسباب مطلوب صحيح؛ ولكن اعتمادك المطلق على انّ انسان سوف يغيّرك هذا هو غير المطلوب! مهما كان الانسان خبير ومتعلم، هو بشر بالنهاية، لن يساعدك الا بإذن الله فقط؛ اتكلم معك وانا قد تعلمت الاستشارة وتعلمت عن العديد من الامراض النفسية والعصبية؛ اجعل في قلبك يقين دائما انه اذا ساعدك انسان ولو بشيء بسيط فهذا تسخير من الله فقط لا غير؛ وانّ الله سبحانه وتعالى قادر ان يشفيك في اقل من ثانية، اجعل في قلبك هذا الأمر، نصيحتي لك اجلس في الثلث الأخير من الليل، جلسة ولكن مناجاة لخالقك؛ مع من بيده أن يغير حياتك كلها للأفضل؛ مع اللطيف الخبير الحكيم الودود الشافي، تكلّم بلغتك، لا تتكلف، اشك... كل ما يقلقك كل ما تفكر به ولو كان مشوش، كل المواقف التي اثرت بك خلال النهار ولو كانت تافهة في اعين الناس، واختم شكواك بالدعاء بصلاح الحال وانت على يقين بأن الله قد سمعك وبيده ان يشفيك. الزم الاستغفار؛ طهور ان شاء الله
تم النشر الخميس، ٩ أبريل ٢٠٢٦
الاول هي اه دكتوره كويسه والفرق بينها وبين الدكتوره الاولى انها انتقلت من مرحله فضفضه بس ل تمارين وتغير فعلى ، تاني حاجه ليه مش حاسس بفرق كبير لحد دلوقتي وده مش فشل فى العلاج ده بسبب حاجتين اولا عدم التزام بالتمارين المطلوبه ولازم تعرف ان الجلسه النفسية بتشكل 20% بس من العلاج ،وال80% الباقيه تعتمد على ممارستك للتمارين فى حياتك اليومية من غيرها هتكون زي اللى بيروح الجيم يتفرج علي المدرب وهو بيتمرن بدل ما يتمرن هو ، ثانيا طبيعه الوسواس :الوسواس القهري يحتاج لوقت وجهد ذهني وتكرار مستمر للتمارين عشان تبدأ المسارات العصبيه فى الدماغ بالتغيير ،ونصحتي لبك بلاش تغير الدكتوره لان التنقل المستمر بين الدكاتره هيشتت ذهنك ويخليك تبدأ من فى الصفر فى كل مره ادي نفسك والنظام العلاجي فرصه حقيقه لمده ٣ شهور على الاقل مع التزام كامل بكل حاجه الدكتوره تطلبها منك حتى لو حسيت فى البدايه انه بسيط او انه غير مؤثر و افتكر دايما إن ربنا سبحانه وتعالى قال في كتابه الكريم: {إِنَّ مَعَ الْعُسْرِ يُسْرًا} [الشرح: 6] والآية دي هي أعظم طمأنينة ليك؛ لأن "العسر" اللي أنت فيه دلوقتي من وسواس وقلق، ربنا وعدك إن "اليسر" والشفاء ملازمين ليه وهيوصلوا بإذن واخيرا :أنت مش مقصر ولا ضيعت عمرك، كل اللي فات كان "دروس" عشان توصل للمرحلة دي وتفهم نفسك أكتر وتعرف تسلك طريق صح اعتبر التمارين دي "عبادة" بتتقرب بيها لربنا عشان تحافظ على الأمانة اللي هي (نفسك وعقلك). ، وقول لنفسك: "أنا بعمل اللي عليا والباقي على الشافي".
تم النشر الجمعة، ١٠ أبريل ٢٠٢٦
وعليكم السلام ورحمة الله وبركاته، أخي الكريم، شكراً لثقتك وصراحتك، ولا داعي للاعتذار عن الإطالة – ده يساعدني أفهم وضعك كويس. أنت بتواجه وسواس قهري وقلق مع مشاكل زي قلة الثقة بالنفس، وده مش سهل، بس اللي بتعمله خطوة إيجابية إنك بتجرب وبتبحث عن حلول. هل الشفاء بيأخر طبيعي، وهل تغير الدكتورة؟ نعم، طبيعي جداً إن الشفاء يأخذ وقت ، خاصة في الأمراض النفسية زي الوسواس والقلق. مش زي الصداع اللي بيروح بجرعة واحدة؛ ده عملية تدريجية (شهور أو سنين أحياناً)، و السبب الأكبر هنا تقصيرك في الالتزام (زي ما قلت بنفسك). الأدوية بتساعد في السيطرة على الأعراض، بس التمارين والتغييرات في السلوك هي اللي بتبني الشفاء الحقيقي. سماعك عن "جلستين وخلاص" دي أسطورة – الدراسات النفسية بتقول إن العلاج السلوكي المعرفي (CBT) اللي الدكتورة بتعمله يحتاج 12-20 جلسة على الأقل مع التزام يومي. الدكتورة الحالية تبدو كويسة : أعطتك 12 تمرين (يقظة، تسامح، تنفس، تخيل) – دول أدوات قوية ومبنية على أساليب مثبتة علمياً للوسواس والقلق. اللي فات مع الدكتورة الأولى (تمرين واحد بس) كان أقل فعالية، فـ استمر معاها و التزم تماماً لمدة 2-3 شهور قادمة** (سجل يومياتك: إيه اللي عملته، إيه التحسن؟). لو ملتزم ومفيش تقدم واضح (أقل أعراض بنسبة 30-50%)، ساعتها فكر تغير – بس مش دلوقتي، عشان متكررش الغلطة. نصائح عملية سريعة (من منظور إسلامي وعلمي): التزام يومي : ابدأ بـ3 تمارين بس كل يوم (مثل يقظة + تسامح + تخيل)، حدد وقت ثابت (بعد الفجر مثلاً). استخدم تطبيق زي Habitica عشان تتابع. رياضة وروتين : زي ما الدكتور قالك، مشي 30 دقيقة يومياً + ركز على دراستك/شغلك – ده بيبني الثقة بالنفس تدريجياً. دعم إضافي : صلِّ النوافل، اقرأ قرآن، وادعُ بـ"ربي اشرح لي صدري". راجع الدكتور النفسي عن تعديل الدواء لو الأعراض شديدة. تابع تقدمك : كل أسبوعين، قيس: هل الوساوس أقل؟ الثقة أحسن؟ لو عايز دعم أكتر أو استشارة متخصص، شوف الخبراء في https://www.fedni.net/experts – فيه دكاترة نفسيين محترفين. وابحث في فدني عن "وسواس قهري" عشان تجيب آراء تانية. أنت قوي وقادر، بس الصبر مفتاح الفرج. هتتحسن إن شاء الله. ربنا يشفيك وييسر أمرك! 💪
تم النشر الخميس، ٩ أبريل ٢٠٢٦
هحاول حاضر شكرا جدا ليك
تم النشر الجمعة، ١٠ أبريل ٢٠٢٦
ربنا يخفف عنك ان شاء الله بس انت المفروض تكمل مع الدكتوره دي وتلتزم وتشوف النتيجه لكن تخاف انك ماتكملش من غير ماتجرب ده خطأ ان شاء الله هتكون دكتوره كويسه وتكمل علاجك وتخف وتبقا زي الفل بس لاذم تلتزم معاها وتعمل التمارين
تم النشر الجمعة، ١٠ أبريل ٢٠٢٦
طب ما تحاول تلتزم ب كلامها واللى بتقولك عليه وبعدين تحكم وتشوف فاهمنى ... ربنا يشفيك ويعافيك وييسر أمرك ويهدى قلبك وعقلك ويوفقك يخويا يارب
تم النشر الجمعة، ١٠ أبريل ٢٠٢٦
قليل دائم خير من كثير منقطع..حاول تلتزم وتستمر على القليل
تم النشر السبت، ١١ أبريل ٢٠٢٦
علاج الوسواس القهري مش حاجه سهله و بتتطلب من شهور لسنين .. غير انك اوقات كتير بحسب كلامك مش ملتزم بالتمارين اللي يتطلبها منك .. الفكره أن الاخصائي أو المعالج مفيش فأيده عصابه سحريه بتحل كل المشاكل أوقات المعالج مبيقدرش يحدد حالة المريض قبل ٨ جلسات .. حاول تلتزم بالتمارين ز متستعجلش النتائج .. محتاج تركز اكتر على تمارينك النفسيه و الذهنيه و متستعجلش و خليني اقولك الوسواس تحديدا محتاج مجاهدة نفس و معافره و التزام كتير و ده على الدوام مش بس مجرد وقت .. ربنا يقويك و يعينك و يرزقك السكينه و يمدك بمدد من عنده يااارب 🤲🏻
تم النشر الجمعة، ١٠ أبريل ٢٠٢٦
هحاول شكرا
تم النشر الجمعة، ١٠ أبريل ٢٠٢٦
لعرض السؤال في فدني اضغط هنا