السلام عليكم هو إي مقياس الجمال بتاع البنت ؟
يعني أنا عارفة إنّي مش جميلة، وكل اللي حواليا تقريبًا عارفين ده. دايمًا لما بسألهم عن ملامحي أو شكلي يردوا عليا بـ”كفاية خفة دمك”، وكأنهم بيهربوا من الإجابة. وأقرب ناس ليا لما يلاقوني زعلت يقولوا لي “إنتِ جميلة” أو “إنتِ صبية”، بس بحس إنهم بيقولوا كده علشان يواسوني وخلاص.
بجد بقالي حوالي خمس شهور مببصش في المراية ولا بفتح الكاميرا. ولما بغصب نفسي أبص، بيجيلي ضيق شديد وبحس إني مكتئبة ومش طايقة شكلي.
غير كمان إن واحدة صاحبتي قالتلي بصراحة إني مش جميلة، ومن وقتها الكلام ده مش راضي يطلع من دماغي. بقيت شايفة كل عيب فيا مكبر أوي، وبقيت أقارن نفسي بأي بنت أشوفها.
ليه الجمال مهم عند الناس للدرجة دي؟ وليه بحس إن علشان حد يحبك أو يرتبط بيك لازم تبقي جميلة؟ وليه الناس ممكن تتنمر على حد بسبب حاجة هو أصلًا متخلقش بإيده؟
أنا مش بدور على مجاملات ولا حد يقولي “لا إنتِ قمر” وخلاص، أنا فعلًا تعبت من التفكير في الموضوع ده. تعبت من المقارنات، ومن إني أحس إني أقل من غيري، ومن إني أخاف أبص لنفسي في المراية.
هو فعلًا شكل البنت هو اللي بيحدد قيمتها عند الناس؟ ولا أنا بس اللي بقيت شايفة الدنيا كده من كتر اللي سمعته واتعرضتله
يا بنت الناس الكلام ده لقلبك ولعقلك او حاجه لازم تعرفيها إن قيمتك وحقيتك في الوجود مش مستمدة من تقييم البشر ولا من نظرة في مراية ربنا سبحانه وتعالى لما خلقك كرمك لذاتك ونفخ فيكي من روحه وجعل ليكي غاية ومهمة في الأرض أكبر بكتير من مجرد غلاف خارجي ملامحك وشكلك دي أرزاق مقسمة وملكيش يد فيها ولا يصح أبداً تعلّقي قيمتك الإنسانية والروحية بحاجة متغيرة أو بنظرة الناس اللي أصلاً أهوائهم متقلبة وكل يوم ليهم مقياس جديد الجمال الحقيقي والصلابة النفسية بيبدأوا لما تتصالحي مع عطاء ربنا وتفهمي إنك مش سلعة معروضة للتقييم ولا مستنية شهادة من صاحبة أو قريبة عشان تقولي أنا موجودة ارجعي لربنا واعرفي قيمتك عنده واشتغلي على جوهرك وعقلك وقلبك ولما تعمري الداخل بالثقة والإيمان والسكينة الخوف من المراية والمقارنات ده كله هيروح وهتشوفي نفسك بعين الرضا والكرامة اللي ربنا سبحانه وتعالى ادهالك وفكك من وهم المقاييس المزيفة دي لأنك أكرم عند الله من انك تقارني نفسك مع حد . ربنا يحفظك ويوفقك لما يحب ويرضى 🌷
تم النشر السبت، ٢٠ يونيو ٢٠٢٦
السلام عليكِ، أولاً أقدر جداً إنكِ فتحتِ قلبكِ بالطريقة دي ووصفتِ اللي بتحسي بيه بصراحة. الشعور ده مش سهل، وإنكِ تعبتِ من المقارنات والخوف من المراية ده دليل على إن الموضوع بيأثر عليكِ نفسياً بشكل عميق، وده طبيعي لما الرسائل الخارجية تتراكم. مقياس الجمال مش ثابت ولا موحد. هو في الأساس بناء اجتماعي بيتغير حسب الثقافة والزمن والإعلام، مش معيار مطلق. الناس اللي بيردوا عليكِ بـ"خفة دمك" أو مجاملات سطحية غالباً بيعملوا كده عشان مش عارفين يتعاملوا مع الموضوع بصراحة، أو عشان هما نفسهم متأثرين بنفس المعايير. أما صاحبتك اللي قالت رأيها بصراحة، فده كان جارح، لكن حتى لو كان صادق من وجهة نظرها، ده مش بيحدد قيمتك كإنسانة. من منظور إسلامي، الجمال الحقيقي مش بس في الملامح. الله سبحانه وتعالى بيقول "إن الله لا ينظر إلى صوركم وأموالكم ولكن ينظر إلى قلوبكم وأعمالكم". التقوى والأخلاق والطيبة والذكاء والروح الإيجابية دي الأشياء اللي بتدوم وبتجذب الناس الحقيقيين. الشكل الخارجي بيتلاشى مع الوقت، لكن الشخصية والقيم بتفضل. كتير من الرجالة اللي بيبحثوا عن شريكة حياة بيختاروا بناءً على التوافق والاحترام مش الجمال فقط، رغم إن المجتمع بيروج للعكس. قيمتكِ مش مرتبطة بشكلكِ، وده مش مجرد كلام. الناس اللي بتتنمر أو بتركز على المظهر بيعملوا كده غالباً من نقص داخلي أو تأثير مجتمعي، مش لأن ده الحقيقة. أنتِ مش أقل من حد بسبب ملامحكِ. عشان تقللي من تأثير المقارنات، جربي تركزي على جوانب في حياتكِ تقدري تطوريها: مهارات، هوايات، قراءة، أو حتى مساعدة الآخرين. كل خطوة صغيرة في تطوير نفسكِ هتزود ثقتكِ تدريجياً. لو الموضوع بيسبب لكِ ضيق شديد زي ما وصفتِ، فكري في البحث عن أسئلة مشابهة على فدني عشان تشوفي تجارب بنات تانيين وتاخدي منظور أوسع. أنتِ مش لوحدكِ في الشعور ده، وبتقدري تتجاوزيه بخطوات عملية ووقت.
تم النشر السبت، ٢٠ يونيو ٢٠٢٦
أنا بعيد نفس كلام إسلام وعصمت+ في الحقيقة أن الجمال هو المعيار للقيمة فدي حاجة مش بيقول بيها إلا اللي وعيهم ضعيف, لأن لو شاب عنده مبادئ سليمة فهيكون الجمال بالنسبة ليه هو رقم تلاتة مثلا, على سبيل المثال لو شاب عرف أن فلانة أخلاقها كويسة وعندها حياء وتعاملها لطيف وهكذا فهتحيز لاإراديا أنها جميلة ( ودا لو هو قبل ما يعرف الصفات دي كانت بالنسبة ليه شكلها مش جميل أو عادي) , وممكن مش مجرد هيشوفها جميلة بل ربما يحس أنها مش هيتكرر زيها, ودا بيفسر أن فيه شباب كتير بيحبوا بنات ربما شكلهم مش جميل بالمعيار المجتمعي ولكن الجمال هو تابع بالنسبة للناس اللي عندها الصفات الأخلاقية مقدمة على الصفات الشكلية " ليه الجمال مهم عند الناس للدرجة دي؟" في الحقيقة أي جمال مهم للناس سواء جمال شكلي أو جمال أخلاقي وروحي(تواضع, حياء, رحمة) أو جمال فكري وعقلي(حكمة وحسن تعامل) ودا طبيعي بس الفكرة أن أول حاجة الناس بتشوفها هي الجمال الشكلي فبيحصل تحيز نفسي بيخلي اللي بيشوف حد جميل شكليا بيتوهم أن عنده كل الأخلاق وأي حاجة كويسة فبيحبه ولكن بمجرد ما تظهر الأخلاق والتعامل وهكذا ربما الشخص دا يكون من أكتر الناس المكروهين وعشان كدا الزواج الشرعي بيكون أن الشاب يسأل عن البنت الأول قبل ما يشوفها " ليه بحس إن عشان حد يحبك أو يرتبط بيك لازم تبقي جميلة؟" أظن أن كلامي فيه إجابة على تساؤلك " ليه الناس ممكن تتنمر على حد بسبب حاجة هو أصلا متخلقش بإيده؟" خليط بين الجهل والنقص النفسي اللي عندهم " شكل البنت بيحدد قيمتها عند الناس؟" لا خالص الحوار دا بيتفرد بيه الناس اللي معندهمش قيم بس والغريزة بالنسبة ليهم هي رقم واحد , هو فعلا بسبب كام موقف حصلوا أنت ركزتي عليهم وربما أعدتيهم في عقلك عشرين مرة فالموضوع اتضخم كدا وخد مساحة كبيرة, قال الله عز وجل ( والمؤمنون والمؤمنات بعضهم أولياء بعض) وقال النبي صلى الله عليه وسلم ( فاظفر بذات الدين تربت يداك) وقال الشاعر : أقبل على الروح واستكمل فضائلها فأنت بالروح لا بالجسم إنسان
تم النشر السبت، ٢٠ يونيو ٢٠٢٦
مفيش مفهوم معين للجمال ف حتى لو مش حلوة فى نظر ناس ف فى ناس تانيه بالنسبه لهم ده الجمال كله .. ومفيش حد مش جميل على فكرة وهنا بتكلم ع الشكل تحديدا مش الروح والكلام ده .. لكن بقى المشكلة بتبقى فى مجتمعات زى قرى او اماكن شعبيه بيبقى كل منطقه ليها مفهوم معين ف الجمال .. اللى الجمال بالنسبه له لون بشره او وزن او عيون او غيره وغيره وده تخلف عامة .. ف لو ليا نصيحة ف هى انك لازم تشوفى نفسك جميلة لان الناس هتشوفك زى ما انتى شايفه نفسك .. ف حبى نفسك وثقى فيها واعرفى انها خلقة الله يعنى مفيش احلى ولا اكمل من كدا والبسى كويس وشيك واهتمى بنفسك ف الامور المتاحه لك وبس مش مطلوب منك حاجه تانى .. ونصيحة اخيرة مش هتعرفى ترضى كل الناش او مش هتعرفى تخلى كل الناس شايفاك حلوة ف ارمى كل ده ورا ضهرك وابسطى نفسك وعيشى ..
تم النشر السبت، ٢٠ يونيو ٢٠٢٦
لعرض السؤال في فدني اضغط هنا