انا بجد تعبانه تعبانه اوي بقالي كتير حاسه اني استهلكت نفسيا والله العظيم ومليش صحاب بقي مليش حد الحد الوحيد اللي كنت بقول عليه ليا تسعين في الميه من الوجع جايلي منوا هو
أنا والله العظيم فاقده الامان وفاقده كل حاجه حلوه كانت فيا وقاعده كل يوم بندب الحيطان لوحدي بسبب واحد انا مش عارفه احدد والله العظيم اتكلم عنوا حلو ولا وحش بس هو حد يعني أنا كنت شايفاه الدنيا والدين ومقصرش معايا في الاول خالص
حاليا بقي المشاكل كالتالي أولا مكنش عندوا استعداد خالص قبل كده يخسرني كان بيتجنن حرفيا لو قولتلوا نسيب بعض دلوقتي لا بيقولي نسيب بعض عادي ودي اكتر حاجه قهراني حرفيا انا معرفش احنا خدنا عين ولا ايه بس نفسي اوي اوي يرجع زي الاول كده
محدش يقولي ابعدي عنوا أو سيبيه لأن هو حد كويس اوي عامة لو هيحب اللي قدامه بجد والله يا بختها انا مش عايزه اسيبوا انا بس عايزه حلول عاوزاه يرجع تاني شاريني وميقدرش يعيش من غيري لا انا بقيت حزينه بجد بقالي شهور
السلام عليكم، تعبك واستهلاكك النفسي وضع طبيعي ومش مستغرب أبدًا. يعني أنتِ منتظرة إيه؟ مخلية أمانك وحياتك كلها مرتكزة على شخص ومخلياه هو الكون بالنسبة لك فطبيعي لما يتخلى عنك ويؤذيكِ تحسي إن كونك كله اتهدم. ولما تخلي واحد بالنسبة لك زي ما قلتِ الدنيا والدين (وأتمنى أكون قرأت التعبير ده بالغلط أو أنتِ كتبتِه غلط) طبيعي هيبقى رضاه عنك أهم من رضاكِ عن نفسك وتقديرك لها، وحتى أهم من رضا ربنا لأنك قلتِ محدش يقول ابعدي عنه. ولو هو مش زوجك أصلا ولا فيه رابط شرعي بينكم يبقى ربنا غير راضي عن علاقتك به لكن أنتِ خليتيه هو أهم حاجة ومستمرة في حاجة حرام تغضب ربنا. ** مش هامك حتى إنه عنده استعداد يبيعك في لحظة وخلاص بعد ما راحت حلاوة البدايات وبقيتِ بالنسبة له زي أي بنت بيقول لك مع السلامة بكل بساطة وأنتِ لسه بتشكري فيه وتقولي هيسعد البنت اللي هيحبها وحظها حلو؟ ** ليه بجد مخلية نفسك قليلة قوي كده؟ يعني شايفة نفسك لا تستحق شخص يحبك ويقدرك وتكوني غالية عنده ومش بسهولة كده يبيع ويؤذيكِ؟ طبيعي ميقصرش معك في الأول لأن اللي زيه بيكون بيصطاد البنت فلازم يغرقها باهتمام ويحسسها قد إيه بيحبها وهي غالية عليه، وبعد كده بعد ما تخلص التسلية أو تبقى البنت عادية بعد ما راحت الزهوة والغموض حواليها فخلاص كده مش محتاج يغرقها باهتمامه وهيتعمد يهمل ويتجاهل عشان تبعدي من نفسك. ولو البنت مبعدتش بعد كل ده هيبعدها هو ويقطع العلاقة بطريقة تخليها مجروحة ومكسورة طول العمر. ** فليه بجد تعملي في نفسك كده؟ مش هقولك ابعدي زي ما أنتِ مش عاوزة تسمعي، هقولك اقعدي مع نفسك كده وراجعي حياتك وشوفي اللي أنتِ فيه ده وضح صح ويرضي ربنا ويرضيكِ عن نفسك ولا لأ. وفي النهاية اعملي اللي يريحك لأن محدش فينا خسران حاجة، مفيش غيرك في الوضع ده كله متأذي.
تم النشر الثلاثاء، ٣٠ سبتمبر ٢٠٢٥
هي لو كانت علاقة غير شرعية يعني من ورا الأهل فدي نتيجة معروفة والمتوقعة من أي علاقة شبه كدا ؛ النبي (ص) قال: "إن الله يغار وغيرة الله أن يأتي المرء ما حرم الله عليه" والمقولة المشهورة اللي بتقول "البداية التي لا ترضى الله نهايتها لا ترضيك" و "ما عُصيَ الله بشئ إلا أفسده على صاحبه"... ف أي فعل محرم نهايته عقاب وألم سواء كان في العلاقات أو غيره. ولو كانت علاقة في النور وحلال فكوني على يقين إن لو ربنا بعده عنك فدا الخير ليكي وهيعوضك بالأحسن منه بإذن الله. في نوع من الناس لما يحسوا انهم ضمنوا الطرف التاني، يبدءوا ينسحبوا هم كإن دا هدفهم من البداية. ف الحل معاهم إنك تشوفي حياتك، تبني حياة لنفسك، اسعدي نفسك بنفسك، ما تحسسيش الطرف التاني ان الدنيا واقفة عليه، لأ... حسسيه ان هو ليه الأولوية بس انتي برده عندك حاجات تانية مالية حياتك زي أهلك مثلا، أصحابك، الجيم، القراءة او اي هواية تانية. وابدئي فعلا شوفي ايه اللي يسعدك ويخلي ليكي حياتك الخاصة وما تحسسيش حد انك محتاجاه اوي عشان مايستغلكيش.
تم النشر الخميس، ٢ أكتوبر ٢٠٢٥
غريب جدا ان الواحد يخلي جنته وناره في يد شخص ثاني طبعا علاقه مسمومه ربنا يقوى قلبك
تم النشر الجمعة، ٣ أكتوبر ٢٠٢٥
لعرض السؤال في فدني اضغط هنا