كيف أحسم قراري وهل شكي صحيح؟

Question

السلام عليكم ورحمة الله وبركاته من قيمه شهر بالضبط لقيت شخص غريب شايف استورى ع تليجرام عندي الرقم مش معايا من زمان عشان كده استغربت اى االى جاب الرقم هناك.. دخلت سالت مين وكده قالى عايزه الصراحه ولا غيرها قلته الصراحه طبعا المهم قالى اسمه حاجه عنه وشافني فين وكلام من ده وعايز يجى يتقدملى انا مكنتش مصدقه الموضوع خصوصا انى مش بخرج كتير بس شكيت يمكن حد بيعمل مقلب وحتى لو مش مقلب انا برضو خفت. حاولت كتير اعرف مين اللي أعطاه الرقم مرضاش يقول حصلت شويه حاجات ف النص اختصار الكلام، انا عرفت بعدين انه كلامه صح هو قالى عايز يشوف رأيي الاول عشان مش عايز يجى واترفض واحرج اهلى وكلام كده الصراحه محساش انها شى مقنع كان مستنى رأيي ع نار وعنده حماس كبير المهم انا بعد يومين رديت عليه وقلته اللى عايز حد يجى من الباب هو قالى بس قولى موافقه وامتى ما عايزه انا هجى.. قال هكلم والدى واجى اسال واتقدم ( هو سال عنى اكيد وسمع احلى كلام بس لزوم انه يتقدم وكده قصده) المهم والده قاله أستنى شهرين معاه الشاب شغل معين والده قاله خلصه الاول فقالي اها فرصه جتلك عشان تركزي ف الامتحانات بتاعتك وان شاء الله نتقابل ف شهر ٨ ( انا في تالته ثانوى) المهم قفلت معاه كلام وقلته مينفعش نتكلم لوقتها وهو احترم كده بعدها ب ٣ ايام بعتلى عامله ايه ووحشانى انا اضايقت وروحت بعتله فيديو قرآن هو شافها من هنا وحذف التليجرام من هنا وانا بعدها عملت بلوك بعدها بأسبوع تقريبا رجع التليجرام وشكله شاف البلوك المهم الصوره شالها بس معملش بلوك ولا حاجه وتقريبا حذفه تانى.. انا من يومين فكيت البلوك وسجلت الرقم عندي... المهم لقيت نفسي في حاجه مخوفانى هل ياترى الموضوع ده هيكمل ولا لا هو فيه كذه صفه كنت اتمناها الصراحه وعلى فكره انا حكيت الموضوع ده لماما اول ما حصل وقلت له انى حكيت لماما المهم كنت عايزه اختبره قلت اجرب ابعت اى حاجه اشوف لسه بنفس الحماس ولا اى دخلت قلته همتحن بعد كام يوم ادعيلى وكده مقالش حاجه غير ربنا يوفقك ويوقف معاكى وتعدي على خير بس الموضوع بالنسبالي هو غريب ولا عادى بعدين قلت له انا خايفه وكده وقعد يطمنى حاول يلمح عن الموضوع يعنى مثلا قلت له انا قلبى بيدق من الخوف راح قالى عقبال ما يدق ليا مره قلت له حاولت احب الفيزياء بس هى مش بتحبنى قالي ما تحاولي تحبى حاجه تانى طيب مش لازم الفيزياء انا عامله نفسى مش فاهمه حاجه المهم خلصت معاه كلام ومجابش سيره برضو الموضوع ولا قال حاجه جيت النهارده قلت له بنت عمتى جاها عريس واتفقوا وقرايه الفاتحه قريب ومش عارف اى موضوعنا احنا بس اللي معقد قالى ولا معقد ولا حاجه كل شى بأوانه ركزى انتى بس ف امتحانك انتى كده كده اصلا مش فاضيه دلوقتي وإن شاء الله خير قلت له برضو انه جالى عريس ورفضته مداش ولا اى رد فعل هو كده رد فعله عادى ولا حس انى عشان كلمته تانى دى حاجه مش كويسه ولا يمكن يكون صرف نظر ولا اى الافكار اللي بيفكر فيها مثلا انا مش عارفه اعمل ايه دلوقتي

Accepted Answer

عليكم السلام ورحمة الله وبركاته بصي يا أختي اللي إنتي بتعمليه دا غلط ماينفعش تدخلي تكلميه وإن هوا يدخل يقولك عامله إيه وحشتيني دا شئ مريب جدا فنصيحتي ليكي إعمليله بلوك وركزي في إمتحاناتك وهوا فعلا لو عاوزك في الحلال ييجي يتقدملك وبعدها ولدك يسأل عليه ويشوفه مناسب أو لا وشوفي بعدها لو هتوافقي ولا لا غير كدا بلاش وماتسبيش باب للشيطان يدخلك منه ربنا يحفظك ويرزقك بالزوج الصالح.

Answer

وعليكم السلام ورحمة الله وبركاته اولا : انتى غلطتى لما رديتى عليه بس خلاص انتى رديتى وخلص الموضوع ليه بقا بتفتح معاه كلام كتير تانى ثانيا : انتى فتحتى معاه كلام كتير واتكلمتو كتير لدرجة انو اخد عليكى وبدأ يقلك حجات مش ينفع تتقال لو اتكلمتو مرة ولا اتنين بس فواضح جدا انكو اتكلمتو كتير وده ابو الغلط كمان ثالثا : ودى اهم حاجه أن دا حرام انتى بتقولى انك قلتي اللى عاوز حد بيدخل من الباب ايه بقا اللى وصلكى للمرحلة دى ونصيحة يا اختى لو لسا بتكلميه بطلى وركز فى امتحاناتك وحتى لو بعتلك تانى. اوعى وبحذرك اى عليه ممكن يكون فعلا طيب وابن حلال وممكن يكون فاضى ومش وراه حاجه فدخلك وعشمك بالجواز وكدة ومش تنسى اهم حاجه أن الموضوع دا حرام

Answer

السلام عليكم ورحمه الله وبركاته طبعا انت غلط ابدا اجابه اني اقول لك انت غلطتي انت كنت ماشيه صح بس طبعا الفضول والفرحه بتاعه انه انا مرغوبه وان في حد عاوزني واحاول يقرب لي بالشكل ده والفضول بانك عايزه تعرفي الشخص ده هو اللي خلاك تقعي في الفخ ده طبعا مش هنتكلم او نشكك في نيه الولد لانه احنا منعرفهاش وفيها احتمالات كثير احتمال يكون الولد فعلا صادقت وهو عاوز يتقدم وكان حابب ان هو بس يشوف اذا كان انت عندك قبول ولا لا قبل ما يجي البيت وده كلام جميل جدا ومحتمل وفي احتمال ثاني ان هو بس كان بيقول الكلام ده عشان يبقى بيوقعك في الفخ ده انه انت هتتشدي للفكره هترفضي في الاول وبعدين هيختفي وبعدين يرجع فانت تحبي تشوفي ايه ده هو راح فين ايه ده هو لسه عايز يتقدم ولا لا ويبدأ يدي شويه اعذار والكلام ده كله ولا هيجي يتقدم ولا اي حاجه لكن احنا برده عندنا الاحتمال الثاني ان هو يكون صادق فممكن يكون صادق فعلا وكل اللي هو بيقوله صدق انه في شغل محتاج يخلصه وانت محتاجه تخلصي امتحاناتك علشان يكون التوقيت ان ان شاء الله اعتبار ان كل الاحتمالات احنا مش محتاجين نعمل دايما غير حاجه واحده بس حد جالي من اليمين جالي من الشمال جالي عن طريق التليجرام وقفني في الشارع يعني عن طريق ايا كان الشخص ده انا هقوله حضرتك لو عاوز تيجي تتقدم حابب ان انا اتعرف عليك واشوف اذا كان في قبول ما بيني وما بينك ولا لا اتفضل رقم بابا فقط لا غير مش محتاجه تعملي ايه اكثر من كده وتاخدي بعضك وتروحي لباباكك يا بابا عشان تبقى عارف انا اوقات بيقابلني الموقف ده واحده صاحبتي تقول لي كذا انا بقوم قايله لها ده رقم بابا في ولد قابلني في الشارع رحت قايله له كده اتفضل ده رقم بابا بس كده. ممكن ساعتها باباكي يقول لك تمام ماشي ما فيش مشكله وانا لو حد كلمني انا هبقى اعرف اتكلم معاه او بابا ممكن يقول لك لا مثلا في الحاله دي اه ادي له رقمي في الحاله دي لا ما تديروش رقمي ايا كان اللي بابا هيوجهك ليه ولكن دي الطريقه اللي ما فيهاش اي استثناءات واللي عملتيه ده توقفي عنه تماما ما تتوصيش معايا وقولي له انا مش هدخل على التليجرام ثاني علشان انا هركز في الامتحانات ووقفي لحد كده واا وقت ما انت تحب تكلم بابا رقم اهو وانا بعد ما اخلص الامتحانات هبلغه بس كده وخلاص والموضوع يقف عند النقطه دي وما فيش افطر من كده وما تحاوليش تجسسي النمط اا انت مش هيبان لك الموضوع الا بحاجه واحده بس لقيت باباك جه قال لك الولد كلمني عرفت ان هو كده تمام وجميل وصادق ومسلمه ما اكلمهوش يبقى خلاص كده الموضوع مقفول ومش محتاجه تروحي تتساءلي فيه ولا تسالي انت ليه عملت كده وانت طلعت مش كويس وانت ايه اللي يخليك تعلقني مفيش بقى الكلام ده خالص مش هنعمله

كيف أحسم قراري وهل شكي صحيح؟

اجتماعية

زواج

علاقات

سؤال من احد أعضاء فدني

تم النشر الجمعة، ٢٧ يونيو ٢٠٢٥

3 إجابة

2 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك