دلوقتي انا رايحة تانية بكالوريا وعايزة ان شاء الله مسار هندسة (علمي رياضة )بس اهلي مش مقتنعين وشايفين ان مسار طب (علمي علوم) اضمن وهتخرج اشتغل ع طول "وجه نظرهم" المهم انا قعدت طول فترة الاجازة اللي فاتت دي اقنعهم بالمجال دا وهوا موجود ف هندسة حاسبات او كلية حاسبات وممكن كمان اشتغل من بيت ماما مشكلتها في حتة تقول مفيش كلام مفيش شغل من بيت مش حقيقي كان غيرك أشطر بس انا شوفت ناس كتير عملوا كدا
والكلام رسي ف الاخر بتقولي هاتي حد فعلا عمل كلام دا اشتغل أونلاين وقبض بدولار زي ما بتقولي أكلمهم
ف انا مش عارفة الاقي ناس دي فين او اعمل اي عشان اقنعها عشان الحتة دي مش جاية ع دماغهم خالص
حد هنا عمل كدا فعلا او حتي يعرف حد عمل كدا او اي طريقة اجاوب بيها ع سؤالها دا
السلام عليكم، هل بتسألي عن فريلانسر في مجال البرمجة تحديدًا ولا أي مجال؟ هو عموما شغل الفريلانسر بقى منتشر أكتر من فترة كورونا والعزل وزاد حاليا، وكتير شغالين فيه منهم اللي بقى متفرغ له تماما بعد ترك الوظيفة الأصلية أو بيشتغله إلى جانبها. *** هتلاقي جروبات الفريلانسر كتير على فيسبوك وفيها ناس اشتغلت عادي. اللي أعرفه من المشهورين وكان خريج هندسة وتركها وتفرغ للعمل الحر وصناعة المحتوى هو أحمد أبو زيد... يعني لو حبيتِ تعطيهم نموذج معروف وعلى ما أذكر تكلم في قناته على يوتيوب عن العمل من البيت وكان عامل فيديوهات مشتركة مع فريلانسرز تانيين بيشتغلوا من البيت سواء في مجال تخرجهم أو مجال تاني تعلمه مع نفسهم بعد كده. *** وممكن تعملي حساب على لينكدن وهتلاقي ناس كتير شغال فريلانسر. كمان من اللي أعرفه على فيسبوك جروب (click your future) ولهم موقع وقناة على يوتيوب، بس ده أكتر هتلاقي ناس اشتغلت في مجال التسويق الرقمي وصناعة المحتوى ومشاريع الدخل السلبي وبينشروا تجاربهم مع العملاء وفيه منهم اللي قبض بالدولار عادي. وفيه أكاديمية ابن سينا بينشروا تجارب اللي أخدوا كورسات في الأكاديمية واشتغلوا بعد كده.. فشوفي برضه صفحتهم على فيسبوك. *** هو عموما مجال العمل الحر أو الشغل من البيت له مزاياه وعيوبه وهيحتاج مجهود وشغل على مهاراتك ونفسك وتعرفي إزاي تنافسي في سوق العمل وتسوقي للخدمة اللي ممكن تقدميها لعملائك المستهدفين، فحاولي تطلعي عليه أكتر قبل ما تتكلمي معهم. الموضوع عامة غريب على الأهالي والناس العادية لأنهم متعودين إن الوظيفة أو الشغل معناه الخروج من البيت أو الوظيفة الحكومية واللي قاعد في البيت ده شخص عاطل، فطبيعي تلاقي معارضة وعدم تفهم منهم. واستخيري ربنا، ونصيحة، متدخليش كلية مش حاباها أو غير مقتنعة بها عشان ممكن كرهك للمجال أو التخصص يؤثر على دراستك وعلى شغلك في المجال بعد كده. استخيري واتكلمي معهم تاني بهدوء ومن غير انفعال وإن شاء الله اللي فيه الخير ييسره لك ربنا. بالتوفيق.💚
تم النشر الخميس، ٢٠ أغسطس ٢٠٢٦
إزيك يارب تكوني بخير عرفت إنك قلتي إن والدك هو اللي اختارلك المسار وإن أهلك مش موافقين على الهندسة ومش مقتنعين بفكرة الشغل أونلاين وكده فحبيت أحكيلك تجربتي يمكن كلامي يكون اتأخر شوية بس يمكن يخليكي ترضي بالموضوع أو على الأقل تبصي له من زاوية تانية أنا تقريبًا شبه الموضوع ده حصل معايا بالظبط بس مش تهديد يعني أهلي مكانوش راضيين يغصبوني بس في الأول كانوا بيقولوا لا هندسة ملهاش لازمة للبنات ووالدتي كانت بتقول إنها عارفة ناس شخصيًا وأنا شفتهم أصلًا وكانوا بنات حلمهم هندسة واتخرجوا واشتغلوا مدرسات رياضيات في الآخر طبعًا عارفة إن دي مجرد نبذة ومينفعش نعمم من كام تجربة بس عمومًا أنا في الآخر اقتنعت إني أمشي في الطريق اللي أهلي شايفينه مناسب ليا وصدقيني لحد دلوقتي الحمدلله مش ندمانة وبحس إن كلامهم كان صح من ناحية الأمان الوظيفي وكده ومن الحاجات اللي ساعدتني أتقبل الموضوع إني أصلًا متعددة الهوايات وبحب حاجات كتير جدًا فعلًا بس طبعًا مش بنفس الدرجة فمكنش عندي مشكلة إني أختار حاجة وأسيب حاجات تانية لأن أصلًا عندي أكتر من حاجة ممكن أتعلمها وأجربها وأطور نفسي فيها بعدين وده مش معناه إن الطب لازم يكون حلمك أو إنك تحبيه بالعافية زيي لكن حتى لو مش حابة الطب فأنتِ إن شاء الله هتلاقي كلية أحلى في نفس المسار تليق بيكي ومسار الطب وعلوم الحياة أصلًا من أكتر المسارات اللي فيها كليات وتخصصات وعارفة يمكن يكون واخدك الحماس للحاجات اللي بيشجعوا عليها دلوقتي زي الشغل أونلاين والـAI والبرمجة ووو لكن صدقيني مش كله بينجح في ده والمجالات دي فيها منافسة قوية جدًا ومنافسين أقوياء فمش الموضوع سهل لمجرد إننا بنسمع عنه كتير طيب أنتِ لسه برضو حابة الكلام ده يبقى لي متضربيش عصفورين بحجر يعني تختاري مسار الطب وتجتهدي فيه وتجيبي آخرك وتدخلي كلية حلوة وفي نفس الوقت تتعلمي بعد كده البرمجة مثلًا أو أي حاجة من أدوات الـAI وساعتها تكوني جمعتي بين حاجتين بحيث لو أي حاجة اتغيرت في واحدة منهم يبقى معاكي التانية وأنا شايفة إن من أحسن الحاجات اللي ممكن تكون عندك أصلًا هي القدرة على التكيف إنك تعرفي تكملي وتنجحي حتى لو الطريق اتغير عن اللي كنتِ مخططاله وخلي هدفك دايمًا السعي والاجتهاد وتحقيق النجاح أيا كان المكان اللي هتكوني فيه ومش معنى إن الطريق اللي كنتِ عايزاه الأول اتغير إن حلمك انتهى أو إنك مش هتقدري توصلي لحاجات بتحبيها ممكن الطريق بس هو اللي يتغير وأنا مش بقولك تعملي زيي أو تتنازلي عن حلمك أنا بس بحكيلك تجربتي يمكن تخليكي تبصي للموضوع من زاوية تانية وهحطلك كمان رابط سؤال شبه حالتك أتمنى تشوفيه يمكن يفيدك https://www.fedni.net/q/60318714 بالتوفيق 🤍
تم النشر السبت، ٢٢ أغسطس ٢٠٢٦
ربنا يوفقك، واعذري والدتك هي بالتأكيد يهمها مصلحتك لكن ممكن مفيش في نطاق معارفها حظ اشتغل اون لاين أو لو فيه فتجاربهم سيئة، فنصيحتي لكِ أولا استخيري على المجال اللي عايزاه واستعيني بالله. بالنسبة للشغل اون لاين فهو حقيقي، وأنا شخصياً مهندسة كهرباء وما اشتغلتش في مجالي، اشتغلت اون لاين في كتابة المحتوى وتركيزي حاليًا على التدريب للنساء في مجال الفريلانسينج وللأطفال واليافعات في غرس القيم والمهارات، هاترك رابط التقييمات الخاصة بيا على موقع مستقل وفيه غيري ناس كتير لو تحبي تشرحي الموضوع لوالدتك وتوريها ناس فعلا اشتغلت من البيت https://mostaql.com/u/Noha_Radwan2016/reviews
تم النشر الجمعة، ٢١ أغسطس ٢٠٢٦
أولاً، أقدر تماماً إن الموضوع ده بيسبب لك ضغط كبير، خاصة وأنتِ داخلة على مرحلة مهمة زي تانية بكالوريا. إحساسك إنك عايزة تختاري مسار يناسب قدراتك واهتماماتك (زي هندسة الحاسبات) طبيعي جداً، وفي نفس الوقت رغبتك في إقناع أهلك بطريقة محترمة بتظهر نضجك. خلينا نفكر مع بعض في خطوات عملية تساعدك تتعاملي مع الموقف ده بهدوء وواقعية. بالنسبة لتحدي والدتك إنها عايزة تشوف ناس حقيقيين اشتغلوا أونلاين وقبضوا بالدولار، جربي تبحثي عن قصص نجاح محلية من خلال مجموعات على فيسبوك أو لينكدإن بتتكلم عن "freelance developers Egypt" أو "مبرمجين مصريين يعملون عن بعد". ممكن تلاقي قصص لشباب وبنات مصريين بدأوا من البيت ووصلوا لعملاء دوليين، وده هيخلي الحوار أكثر مصداقية. لو مش لقيتي أمثلة مباشرة، اقترحي عليها تشوفي مع بعض فيديوهات أو مقابلات مع مصريين في المجال ده (بدون ما تذكري روابط محددة). كمان، ممكن تطلبي من أستاذ أو حد من الأقارب اللي عنده خبرة في التكنولوجيا يتكلم معاها، عشان الكلام يجي من مصدر موثوق مش بس منك. من ناحية إقناع الأهل، ركزي على الحوار الهادئ والمنظم. جهزي نقاط واضحة: أولاً، أبرزي إن مجال الحاسبات فيه فرص عمل كتير محلياً ودولياً، وإن المهارات اللي هتتعلميها (زي البرمجة) بتفتح أبواب للعمل الحر حتى لو مش من أول يوم. ثانياً، اقترحي خطة وسطية زي إنك تدخلي كلية حاسبات وفي نفس الوقت تاخدي كورسات إضافية أو تجهزي للعمل الأونلاين تدريجياً. ثالثاً، ذكّريها إن الرزق بيد الله، وإن النجاح مش مرتبط بمسار واحد بس، وده يتوافق مع قيمنا الإسلامية في السعي والتوكل. جربي تعملي جلسة حوار هادئة، واستخدمي أسلوب "أنا فاهمة مخاوفكم، وأنا مستعدة أثبت لكم..." عشان تحسيها إنك مش بتتحديهم. لو الموضوع مستمر، فكري في صلاة الاستخارة واستشيري حد موثوق من العائلة أو معلمة. ولو عايزة أفكار إضافية أو طرق تانية للرد على أسئلة والدتك، ابحثي عن أسئلة مشابهة على فدني عشان تشوفي تجارب بنات تانيين مروا بنفس الضغط ده. أنتِ قادرة تتجاوزي المرحلة دي، واختيارك المدروس هيخليكِ أقوى. لو حابة تتكلمي أكتر عن خطة الإقناع، أنا هنا.
تم النشر الخميس، ٢٠ أغسطس ٢٠٢٦
بصي أنا بحثت ولقيت فعلا زي ما بتقولي مش بإيدك دلوقتي غير حلين ١ / يا تقنعي والدك إنه يحولك لعلمي رياضة لسة معاكي فرصة للتحويل المدارس لسه مبدئتش. ٢ / ولو خلاص مُصِّر علي قراره ف تقدري تدخلي كلية تخصص المعلوماتية الحيوية ، ودا علفكرة بيدمج بين البرمجة والبيانات الحيوية والطبية ، وفي شركات كتير بتطلب المجال دا يعني فرص شغله عالية وحتي الطب برده بيطلبه .
تم النشر الأحد، ٢٣ أغسطس ٢٠٢٦
طيب استني كدا أبحث في الموضوع دا
تم النشر الأحد، ٢٣ أغسطس ٢٠٢٦
اه بس كلام دا ف نظام القديم ثانوية عامة دلوقتي الوزير عامل بكالوريا وبقيت نظام مسارات عندك مسار طب اللي كان علمي علوم ومسار هندسة اللي كان علمي رياضة دلوقتي ف موضوع المسارات دا كليات اختلفت لو اعرف ابعتلك صورة بس مش بتتبعت بقا مسار طب كلو كليات طبية وكلية حاسبات وكلية ذكاء اصطناعي بقيت من مسار هندسة فقط عشان دي ليها علاقة ب البرمجة
تم النشر الأحد، ٢٣ أغسطس ٢٠٢٦
عندك كليات الحاسبات والمعلومات والذكاء الاصطناعي فيها أقسام لعلمي علوم زي حاسبات وذكاء اصطناعي جامعة القاهرة حاسبات ومعلومات جامعة عين شمس حاسبات وعلوم البيانات جامعة الإسكندرية حاسبات ومعلومات جامعة المنصورة، أسيوط، والزقازيق كليات الحاسبات بالجامعات الأهلية والخاصة زي ( جامعة الجلالة، العلمين، بنها الأهلية). بس لما هتدخلي من علم علوم هتدرسي أول سنة مادة الرياضة عشان تعوضي الفارق في الأساسيات الرياضية اللي علمي رياضة أخذوه ، وبعدها هتستكملي الدراسة بشكل طبيعي زي الباقي......توكلي بس علي ربنا وإن شاء الله خير إنتي خلاص اتحطيتي في الأمر الواقع .
تم النشر الأحد، ٢٣ أغسطس ٢٠٢٦
للاسف الوزير شال كل تخصصات اللي ليها علاقة بالبرمجة من مسار طب وحطها في مسار هندسة يعني حاسبات وذكاء اصطناعي بقا من علمي رياضة فقط
تم النشر الأحد، ٢٣ أغسطس ٢٠٢٦
خلاص ارضي بقضاء الله وعلفكرة العلمي علوم فيه مسارات برده حلوة للهندسة كمان
تم النشر السبت، ٢٢ أغسطس ٢٠٢٦
مهو انا مليش دعوة بيهم فعلا انا بعمل اللي انا عايزاه بس بابا راح المدرسة ومضي الورقة علمي علوم غصب عني ويقول انتي مش فاهمة حاجة انا عارف اكتر منك وبيهددني لو دخلتي حاجة غير كدا مش هصرف عليكي مش هدفع فلوس ف حاجة ملهاش لازمة
تم النشر السبت، ٢٢ أغسطس ٢٠٢٦
سيبك من أهلك وشوف انت مرتاح لإيه ولأنهي مسار في النهاية ده مستقبلك انت وانت اللي هتتعب محدش هيذاكر غيرك وادخل اللي انت مرتاح له وادعي ربنا إنه يوفقك فيه
تم النشر السبت، ٢٢ أغسطس ٢٠٢٦
ابحثي علي اليوتيوب ي قلبي ، في ناس بيعملوا مقاطع كتير لحاجات من دي وانهم ازاي نجحوا وحاليا بيقبضوا بفلوس حلوه ، أو تقدري تجيبلهم فديو بيتكلم عن كلية الهندسة وممكن يقتنعوا
تم النشر الجمعة، ٢١ أغسطس ٢٠٢٦
لو انتِ شايفة شغفك في مسار الهندسة قوليلهم اعملي اي حاجة واقنعيهم شوفي اهلك بيقتنعو ازاي وحاولي مادام ده شعفك ومتخليش حد يتحكم في مستقبلك وادخليه وتوكلي على الله
تم النشر الخميس، ٢٠ أغسطس ٢٠٢٦
لعرض السؤال في فدني اضغط هنا