shahd mamdoh

حاولي تتشجعي كل مرة يحصل فيها حاجة زي كدة وتلاقي نفسك بتتوتري يعني انا مثلًا كنا واقفين طابور كببر في دفع فواتير وانا علشان شكلي صغير وفي ثانوي راجل جه دخل قبلي ومعرفتش أعمل حاجة ولا أكلمه رغم إني اضايقت وحسيت بالضعف جامد بس ملومتش نفسي من جوايا ولا قولت لنفسب كلام سلبي وقولت المرة الجاية بجد اي حد هيعمل حاجة مش هسكت وحصل معايا موقف بردوا في الدرس بعدها بنات مكنتش عايزين يقعدوني علشان حاجزين لصحبتهم وانا جاية بدري روحت اتوترت وحسيت اضايقت وقولت هقوم وخلاص بس بعد كدة اتراجعت واتخانقت معاهم وقعدت والموقف ده أداني ثقة مرة مرة يحصل حاجة بتحدى نفسي أكسر الكسوف اللي هو هنا مش نعمة لما يوصل للحد ده بل نقمة بالشكل ده هي تبان مواقف تافهة بس حرفيًا لما تسيبي حقك ده بتأثر عليكي وكان بتأثر عليا جامد دلوقتي حتى لو مش جريئة أوي بس بردوا أتطورت هو الموضوع تحدي اتحدي نفسك وأول ما ييجي موقف كدة اثبتي على موقفك وخليكي واثقة في نفسك و أوعي تبيني توترك ده هيخلي الناس تزيد بجاحة اتكلمي بثقة بس مش بأسلوب يليق بيكي ميظهركيش شخص أسلوبك وحش

بصي انتي حرة لو بتفكري في الزواج وكدة ، بس لازم تعرفي إن التعليم شىء مهم للجميع سواء ست أو راجل والتعليم بيضمنلك مستقبلك في المستقبل والزمن اللي أحنا فيه ده في البلد وحال البلد بيخلي كل مدى التعليم أهم أكتر وأكتر، ومجموعك في ثانوي متفكريش فيه انتي دلوقتي في كلية حلوة ففكري إنك تجتهدي فيها وتتخرجي منها بتقدير كويس متبصيش على اللي عدى لأنه خلاص أنتهى ركزي على اللي في أيدك دلوقتي ، وخلي عندك حافز إنك تذاكري وحاولي اللي هو حتى لو متكاسلة أو كدة إنك بردوا تيجي على نفسك وتذاكري وتحفزي نفسك على المذاكرة يعني مثلًا لما تذاكري وكدة ممكن تكافئي نفسك بإنك تعملي حاجة بتحبيها مثلًا وحبة مع حبة لما هتلاقي نفسك بتنجزي وكدة وبتعملي إنجاز هتتعودي وهتحبي الموضوع إن شاء الله بس انتي تبدأي ومتأجليش ومتشغليش بالك في التفكير بقى في إنه مش هتعرفي تذاكري أو الندم على قبل كدة

أوافق التعليق الأول ممكن تبدأي تتعلمي حاجة تفيدك في شغل الاونلاين زي تصميم موقع من وورد بريس أو جرافيك أو برمجة والأهم من كل ده إنك تهتمي بدراستك وتتفوقي علشان بالدراسة والجهد تقدري توصلي لمكانة كبيرة بإذن الله وساعتها تجيبي كل اللي نفسك فيه كل حاجة محتاجة مجهود وتعب بس تستاهل في الأخر

ده بالنسبة للأحياء يعني

وتابع الأسئلة اللي بينزلها مستر الخديوي محمد كمال جوالي ٧٥ سؤال على كل درس انا كنت باخد معاه وده كان الواجب وكان حرفيًا ناس كتير بتشوف الأسئلة دي من باقي المحافظات حقيقي مفيدين وبيبقى فيهم أسئلة أمتحانات سابقة

بص معرفش في الجيزة بصراحة بس اونلاين بجانب مدرسك اللي هتاخد معاه وتنزل معاه دروس لازم تشوف فيديوهات دكتور أحمد غريب وشرح الدرس لا يتعدى نص ساعة وبيشرح بالرسوم والأنيميشن حقيقي هتستفاد جامد ومش هتندم ومش بيسيب حاجة

بصي لما تحسي الأحساس ده ابقى كملي بردوا مذاكرة ومتناميش وقاومي النوم علشان المخ ساعات لما يكون عايز يتهرب من مسؤولية ما بيسبب الشعور ده فلو قاومتي هتتعودي بعد كدة متناميش

معلش دي صاحبة تتعب نفسيًا وعصبيًا أحسنلك تبعدي عنها مش عارفة أيه الصاحبة اللي تقعد تشتم صاحبتها كل شوية وتطالبها برد الهدايا في خناقة ، انتي ممكن لو مش عايزة تقاطعيها خالص تسلمي عليها وتسألي عنها فقط بس متخليش علاقتك مقربة منها ، هو أحتمال يكون سنكوا صغير أنا معرفش فعلشان كدة صاحبتك دي تصرفاتها مش واعية شوية منغير قصد ولكن في كل الأحوال أنتي لو مش مرتاحة ممكن متخليش علاقتك معاها قريبة أوي ويبقى كلام بسيط ما بينكوا

انا متفهمة إنك عايزة صديقة كويسة وكدة والصداقة شىء كويس لما تكون مع صديق كويس ، بس أنتي دلوقتي في تالتة ثانوي متتشغليش بالك دلوقتي بموضوع تكوين صداقات ده انا بردوا في ٣ ثانوي ومعرفش حد في الدروس بس ممكن تصاحبي لما تدخلي الكلية عادي ساعتها أبقى فكري براحتك في تكوين صداقات أما دلوقتي متشغليش بالك هي سنة مهمة ركزي فيها لو لقيتي حد تتصاحبي كويس عليه بالصدفة خلاص حلو ولو ملقيتيش متشغليش بالك السنادي خالص لما تدخلي الكلية ابقى أسعي إنك تتعرفي على ناس ده رأيي يعني

متتعبش نفسك وتفكر كتير ، لمايجيلك وسواس زي كدة فكر فيها هيشتموك ليه وانت متعرفهمش ومعملتلهمش حاجة ؟ وأكيد ده بيحصل إنه بيتهيألك كذا مرة فكل دول هيشتموك ليه ؟ فأول ما ييجي في بالك حاجة زي كدة أنهي الموضوع في دماغك وأنهم أكيد بيتكلموا في حاجة تانية ومش عليك و متفكرش في الموضوع تاني