Mohamed AbouElenein

اللي جواكي شعور بالغضب لعدم الرضا عن تغيير عاداتك وافكارك وانجازاتك لاسباب انتي شايفاها غير منطقية من وجهة نظرك حاسه انها تحكم من المسؤلين عنك اللي هم اهلك ... هم اكيد بيتمنوا لك كل الخير وحريصين على مصلحتك وخايفين عليكي من حاجات كتير مش هيعرفوا يعبرولك عنها وبيحاولوا يحموكي من كل المخاوف اللي بتيجي في بالهم ... انتي دلوقتي قدامك هدف لازم تركزي فيه وتحققيه انك تجيبي درجات كويسة تساعدك تدخلي الكلية اللي حابها وتختاري مسارك اللي جي بشكل سليم وصحيح وحطي في بالك ان انتي اللي بتنجحي في اي حاجة تدخلي فيها مش النشاط هو اللي بينجحك يعني اقصد عادي الفترة دي تختاري نشاط تاني او هواية تانية زي عزف تمثيل رسم تلوين غناء اي حاجة حسية او فنيه توظفي فيها طاقتك وتنجحي فيها برضو وتكوني دايرة علاقات وهكذا ... وبكرة تدخلي الجامعة والدنيا تكبر ودايرتك وخبرتك تزيد وتطوري وشخصيتك تتطور وهكذا ... ربنا يكتبلك التوفيق وتحصلي اكبر قدر من الدرجات يساعدك الفترة اللي جاية في الاختيار شيلي من دماغك اي افكار سلبية وركزي على تحقيق النجاح والسعادة اللي تستحقيهم وربنا يوفقك

لابد من تدخل حد يوجهه للتخلص من الافات المذكورة لانها تعتبر من سموم العلاقات ولازم ينوي يتغير ويتحسن ويحافظ على علاقتكم لان دي اخر فرصة ويعاهدك عل ده وفكري في الرجوع بالشروط دي عشان لو في اولاد يبقى اديتي لنفسك اخر فرصة للحفاظ على قوام البيت اتكلمي معاه بالهداوة واتفقوا على عدم تكرر الاحداث بالشكل ده

الشك من مفسدات العلاقات ... وتفكيرك في انه ممكن يكون مخبي حاجة هيفضل ينغص عليكي... ياما تشيلي التفكير ده ياما تتكلمي معاه مباشرة وتوصفيله احساسك وتشوفي هيراعي ويطمنك والا ايه اللي هيحصل

حبي نفسك وركزي على نقاط قوتك والصفات الايجابية اللي فيكي ومايفرقش معاكي رد فعل الناس ولا تسترضيهم هتلاقيهم هم اللي بيتمسكوا فيكي وطول مانتي ماشية اتعرفي على ناس جديدة يفضل اللي يفضل واللي يمشي ساب مكان لغيره ....

عوامل الاعجاب بالشريك من المهم ان تكون واضحة للطرفين حيث ان التواصل الجيد بينهم يزيد الالفة والانس بالاخر والدور متبادل بين الطرفين والمبادرة من الطرفين ... شاركها شعورك بالتفصيل بدون تغيير واطلب منها مشاركتك لشعورها في مساحة صداقة بينكم لتطوير العلاقة بينكم دون خجل او خوف

لغات التعبير عن الحب مختلفة من شخص للتاني ومهم جدا ان الشريكين يعرفوا اللغات الخاصة بيهم وتعلمها وممارستها لاشباع الشريك ، الطلب وتوضيح الطريقة المناسبة والمساعدة في تنفيذها وقبول المحاولات المبذولة والتشجيع هيساعدكم توصلوا لمرحلة تكونوا راضيين فيها

خدي جنب منه شوية وحسسيه انه مش فارق معاكي انشغاله عنك وامسكي موبايلك كتير انتي كمان بشكل ملحوظ قلديه و شوفي هيلاحظ التغير في سلوكك ولو انتقد تصرفك قوليله حبيت اسيبك على راحتك واجرب اللي بتعمله يمكن يعيد حساباته

الاحساس بالاحتياج للطرف الاخر فطرة ودليل على السواء النفسي ولكن عند الوقت المناسب والقدرات اللازم توفرها ولحد ماتحقق ده انت مطالب بالاجتهاد في تحقيق اهدافك واعداد نفسك بشكل جيد ومميز عشان لما تتقدم للشريك المناسب يرحب بيك

وعليكم السلام مرحلة عدم وضوح الرؤية المستقبلية مرحلة طبيعية كلنا بنمر بيها على مدار مراحل العمر ده شيء طبيعي لكن الاهم استمرار التقدم واحراز النجاحات ، انتي الان مطالبة بتحقيق اكبر قدر من الدراسة والعلوم واجتياز الامتحانات باكبر حصيلة درجات تقدري تحققيها وده هيساعدك انه يفتحلك مجالات دراسة جامعية كتيرة ومتنوعة ، وده هدفك الحالي والخطوة اللي بعديها تقدري تعملي كرير كوتشينج وتعملي اختبارات تحديد المهارات ومجالات التميز وتقدري تختاري المجال الاقرب لطموحك وتحقيق تميزك واهلك هيتبسطوا اكيد بنجاحك واستقرارك ولما يلاقوكي ديما في تطور وتقدم فما تخليش الخوف يزيد عن الحد الطبيعي للتحفيز والتوجيه ناحية الصواب والاستعداد الصحيح لمواجهة المخاوف بشكل صحيح ، اجتهدي واسعي لتحقيق نجاح مميز ربنا يوفقك للي فيه خير ليكي

تدور على محامي متخصص في النوع ده من القضايا يطالب بكل حقوقها قبل مايرفع طلاق للضرر وماتتنازلش عن حقها وحق بنتها مهما حصل او حتى لو عندها القدرة على ده وماتخافش منه

اختلافك عنهم واضح وطموحك شيء جميل ومبشر وللاسف افكارهم مغلوطة وصعب تتغير بسهولة وده تحدي قدامك انك تتعاملي معاهم بالهداوة وبعد صدام او عناد لكن تمسكي بطموحك واثبتيلهم مزايا ونقط القوة في اختيارك وان الفرص هتبقى اكبر وارقى وان السن مش هو معيار القيمة زي ماهم متخيلين وان التعلم هيفتح قدامك فرص ارتباط بمستويات ارقى وناس اجتماعيا احسن وهكذا ... ربنا يصلح لك الحال ويهديهم عليكي ويسخرلك اللي يساندك في تحقيق مايرضيكي

طول مدة الارتباط واستهلاك المشاعر والتقارب الزيادة عن اللزوم وكثرة اللوم كلها امور بتحسس بالاختناق من العلاقة ، طبيعي ان الانجذاب لو كان بشكل مبالغ فيه في بداية العلاقة بيحصل له نوع من التراجع مع الاحساس بضمان وجود الطرف الاخر ... خدوا بريك اسبوع مثلا بدون تواصل نهائي وشوفوا تأثير ده عليكم ايه

ممكن يكون في اختلاف في تعريف التعاون بين الطرفين وكل واحد شايف التعاون بمنظوره هو فقط، تغيير العادات والسلوكيات بتحتاج مساحة كبيرة من التفاهم والتشجيع بدون احباطات ولازم تتم عن طريق توفير مساحة امنة للصداقة قبل كل شيء .... العلاقات بتحتاج مجهود مستمر ربنا يصلح لكم الحال

لا شك ان تجارب الماضي بتأثر على السلوكيات مستقبلا مالم يتم معالجتها بشكل سليم وصحيح وبصدق نية وتوبة ... واللي بتحكيه ده من مؤشرات الخطورة في العلاقات اذا كان المقصود انه مستمر في ارتكاب الافعال المذكورة واكتشفتيها فجأة ، فكري تاني وماتجبريش نفسك على تقبل وضع او سلوكيات فيها اذى ليكي سواءا نفسي او خلقي ربنا يدلك على الصواب

يستطيع الانسان ان يبدع في اكثر من مجال بالطبع ، ويستطيع ايضا مع تنمية قدراته وادارة وقته ان يصل الى حد المهارة التي يمكن من خلالها ان يتكسب ويجني ثمار ابداعه فقط عندما يتجاهل كلام المحبطين ويستعين بالكتمان على قضاء حوائجه

طبعا كلامك يحترم وانتي قايمة بدور عظيم لكن والدك لو في احتياج للجواز ساعديه يختار صح واتعرفي على الشخصيةاللي هتيجي وماحدش هياخد مكانة والدتك لكن ممكن تطلع انسانه كويسة وتتعاون وتخفف عليكم ، بلاش تسبقي الاحداث وتفترضي السوء وتبني الموقف على افكار سلبية وتدخلي مع والدك في صراعات انتو في غنى عنها .... اتعرفي على اختياره وشاركيه مخاوفك وانا واثق انكم هتتراضوا

في الحالات اللي زي دي بنحتاج حد يساعدنا نخرج من الدايرة المغلقة دي ويحفزنا ويشجعنا على التنفيذ ، دوري على حد عنده نفس الرغبة او انضمي لجروب بيمارس النشاط اللي عايزاه واندمجي وسطيهم