Shahd Ahmed 𓂀

وعليكم السلام يجميله القلب.. بصي يعيوني دي حاجه حلوه انك عايزه تطوري من نفسك وربنا يكرمك باذن الله.. في الاول كده حاولي تقرأي كتب كتيره.. وتشوفي فيديوهات عن تطوير النفس صدقيني هتستفادي واقرأي كتب كتيره علي قد متقدري.. ومدام عندك وقت فاضي اتعلمي لغه جديده.. هتفيدك جدا وربنا معاكي ويكرمك يعيوني.. وصدقيني مدام ربنا حطك في الكليه دي يبقي فيها خير ليكي وتذكري دائما ان "رب الخير لا يأتي الا بالخير" ❤

فخوره بيكي بجد.. 🤎🤎

خير بإذن الله وانا واثقه اننا هنكون قدها 🤎🤎🤎

لما انت تكون مهتم بنفسك ومقدر نفسك صدقني كل الناس حواليك هتقدرك وهتحبك.. خليك دايما واثق من نفسك ومحدش فارق معاك.. يعني اللي يكلمك يكلمك.. واللي ميكلمكش ف داهيه خلاص.. وصدقني لو عيشت بمبدأ ان الصحاب بتروح وتيجي.. ومحدش بيكمل للاخر.. هتعيش مرتاح.. لان بعض الصحاب في حياتنا فترات والله مش اكتر.. ف خلي كل اللي فارقلك هو نفسك وبس.. وحاول تخلي من نفسك نسخه احسن.. اسعي في شغلك ودراستك واثبت لنفسك انك حد مهم.. وهما اللي خسروك والله م انت.. وكبر دماغك منهم ومن اي حد.. وروح وتعالي واخرج ومتبينش لحد مهما كان مين انو فارق معاك المهم ان انت وعيلتك بخير.. وعلاقتك مع ربنا كويسه.. و في وكل الحاجات الباقيه دي شكليات

بصي لازم اول حاجه تثقي بنفسك وخدي الدنيا ببساطه.. وباباكي كلم الاولاد دي ف خلاص م هيتعرضولك.. ولو اتعرضو تاني روحي للمديره او المدير اللي في المدرسن ومينفعش انك متروحيش الدرس او المراجعه علشان حد بيضايقك بالعكس تروحي وتتفوقي وتنجحي... ومتخليش شويه ناس ملهمش لازمه يوقفوكي عن حلمك ودراستك.. وخليكي قويه و واثقه في نفسك

علشان تبطلي تحبيه لازم متكلميهوش.. لان طول ما انتي بتكلميه صدقيني هتحبيه اكتر واكتر.. حاولي تنهي الموضوع وتمسحي اي حاجه ليها علاقه بالشخص ده علشان متحنيش ليه تاني ومره علي مره هتنسي.. ورينا يقدملك اللي فيه الخير

بالعكس انتي صح.. وصح جدا كمان.. وصدقيني ربنا هيعوضك والله وهيراضيكي.. ومدام هو قالك م عايز اعرفك تاني متحاوليش معاه خلاص لانك مغلطيش في حاجه.. من كلامك انتي مقولتيش حاجه غلط وكل كلامك صح.. والمفروض ان هو اللي كان ياخد موقف من الاول..

خايفه اويي والله 😂😂

بصي ياعيوني.. قبل اما تنزلي من البيت تأكدي انك مظهرك او لبسك مافيهوش اي شئ ملفت.. وكمان حاولي تاخدي حقك بنفسك يعني كان ممكن المتحرش ده تضربي او تزعقي وتلمي عليه الناس.. وساعتها كلهم هيتدخلو.. وكمان حاولي تكلمي مامتك وتقوللها اللي حصل او حد من عيلتك.. ولو عندك اخ ولد ممكن يوديكي الدروس البعيده.. او ممكن تحجزي الكرسيين اللي جمب السواق اللي قدام وتقعدي تجنبا للمضايقه.. بس خليكي قويه ومتضعفيش ابدا.. وبلاش تعيطي يجميله ❤

بصي ف الاول كده والله انا فرحانه وفخوره بيكي انك رجعتي للصلاه تاني.. وربنا يثبتك ويهديكي يارب.. ثانيا بقا حاولي متقارنيش نفسك بحد ولا تحطي نفسك مقارنه مع حد قارني نفسك بنفسك.. بمعني جبتي امبارح ف الامتحان درجه تاني يوم الدرجه زادت.. ومتحطيش في دماغك كلام اي حد يحبطك نهائي.. ولا تحطي في دماغك مقارنه مع صحابك لانك هتتعبي والله.. خليكي مع نفسك بس قارني نفسك بتاعت امبارح بنفسك بتاعت النهارده.. وربنا يقف معاكي ويكرمك يا عيوني يارب.. وحاليا انتي لو في تانيه ثانوي.. ف انا كمان في تانيه وممكن تعتبريني اختك وصاحبتك..

بالعكس الدكتور النفسي ده.. دكتور زي اي دكتور.. وانك تروحي دي حاجه م عيب.. لان فيكي حاجه عايزه تتغير او تتعالج ف مافيهاش حاجه.. حاولي تجيبيها ليهم براحه وتقنعيهم شوفي مين اقرب حد ليكي اتكلمي معاه براحه وصدقيني مافيهاش اي حاجه والله ان الواحد يروح عند دكتور نفسي

بصي في الاول كده.. ليه متقعديش تتكلمي معاها وتحتويها وتشوفي اسبابها مثلا.. ليه ماتكونيش صاحبتها.. وتحاولي توعيها.. يعني هاتيها باللين اقعدي معاها وفهميها انها لازم تعزز نفسها.. وان لو حد عايزها هايجي البيت من بابو.. مينفعش انك تقعديها من الكليه.. لانك لو استعملتي معاها العنف.. ممكن صفاتها تسوء وتبقي نسخه اوحش

بصي يا جميله القلب.. تقدري اول حاجه تعمليها انك تسمعي فيديوهات او قصص عن سيدنا محمد وعن خلقه وعن عفوه.. تاني حاجه العصبيه دي رغم انها وحشه..لكنك بتطلعي كل اللي جواكي ف بتدل علي نقائك.. انا كمان زيك عصبيه وعصبيه جدا والله.. بس بحاول.. بحاول علي قد اما اقدر اتحكم في عصبيتي. حصل موقف مثلا عصبك اهدي وخدي نفس عميق.. وصلي علي النبي في سرك وبعد كده تقدري تتناقشي في الموقف..

بصي مدام انتي حاطه ف دماغك انك م هتقدري توصلي لحاجه انتي عيزاها.. بيكون عقلك الباطن بيتبرمج علي كده.. انك خلاص م هتوصلي ودايما هتشوفي نفسك فاشله.. لكن لو حطيتي في دماغك انك قويه وايجابيه وجميله وهتقدري تعملي اي حاجه.. صدقيني عقلك الباطن هيتبرمج علي كده وكل الاحباطات والفشل اللي انتي حساه ده هيروح واحده واحده مع مرور الوقت.. دايما وانتي قاعده اقعدي قولي لنفسك انك جميله وحلوه وتستحقي كل الحب اللي في العالم وانك تعرفي تعملي حاجه غيرك ميعرفش يعملها وان الناس بيحبوكي علشانك انتي لذاتك انتي لانك تستحقس الحب.. ربنا مبيخلقش حد وحش والله كل واحد وليه جماله الخاص بيه.. صدقيني ممكن تكون ثقتك مهزوزه بنفسك من ناحيه شكلك بس لا في غيرك شايفك جميله.. لو انتي اديتي الثقه دي لنفسك انك جميله.. كل الناس هتشوفك بعينك انتي.. هتشوف انك جميله علشان انتي شايفه ده.. لازم تحبي تفسك وتتقبليها الاول.. علشان تلاقي ده من اللي حواليكي.. واقرأي كتب او اسمعي بودكاست كتير عن الرهاب الاجتماعي وكل ده.. صدقيني مافيش حاجه تخوف زي ما انتي فاكره.. واتعرفي علي ناس جديده واكسبي منهم خبرات.." انتي جميله وجميله جدا كمان..وتقدري تعملي اي حاجه انتي عيزاها وعمرك ماهتكوني فاشله" ❤

بصي في الاول كده صلي علي النبي وخدي نفس عميق واقعدي مع نفسك.. انتي بتقولي انك مش حابه نفسك كده وعايزه ترجعي للبنوته الجميله بتاعت زمان اللي كانت كلها حيوية ونشاط وبتسعي علشان حلمها.. ليه متحاوليش من تاني ترجعي كده.. هتقعي في مرات كتير بس صدقيني مع المحاولة هتواظبي تاني.. الموضوع م هيرجع ف يوم وليله.. وقبل كل ده لازم لازم تصلي اغصبي علي نفسك.. مره واتنين وهتلاقيكي من تلقاء نفسك بتصلي ده اولا.. ثانيا بقا حاولي طول الفتره دي تكلمي مامتك في الموبايل وتطمني عليها.. بمعني تصلي الرحم وربنا اكيد شايف وعارف انتي بتعملي ايه... يعني اعملي اللي عليكي للاخر.. وكمان طول ما انتي ماسكه الفون حاولي تستغلي الوقت.. واقرأي كتب او هاتي احاديث او اسمعي بودكاست.. وشوفي ايه عقوبه تارك الصلاه.. وحاولي تشجعي نفسك علي المذاكره من تاني.. مره ع مره الموضوع هيرجع تاني.. ومتحاوليش دايما تسمعي لاي حد يحبط.. خليكي ايجابيه تجاهه نفسك وارجعي للرياضه مره تاني

بالعكس انتي ناجحه.. وناجحه جدا.. كونك ام ومسؤله عن بيت وزوجك واولاد وقادره انك تديري بيتك وتربي اولادك صح ف انتي كده ناجحه.. وفرصتك مضاعتش ولا حاجه وتقدري تنزلي تشتغلي.. بس تكوني واثقه انك هتفضلي مهتميه ببيتك وزوجك واولادك ومتقصريش في حقهم.. وكمان فين شغل اونلاين كتير اويي لو عايزه شغل من البيت.. ومتحاوليش تحبطي في نفسك بالعكس.. شجعي نفسك دايما وحبيها

حاولي تحبي نفسك وشغلك وكل حاجه فيكي وطولك ده عادي جدا انا هتم ال17 سنه في شهر سته الجاي باذن الله وطولي 173 او ازيد بحاجات بسيطه.. ف الطول م وحش بالعكس والله افضلي حببي نفسك في نفسك.. انتي لو ابتديتي تتقبلي نفسك وشغلك صدقيني هتكوني مبسوطه ومرتاحه ومافيش اي حاجه

حاولي تقللي البرشام واحده واحده يعني م من اول مره..وشوفي ايه اللي بيخليكي تاخدي البرشام ممكن تكوني متضايقه من حاجه او في حاجه حصلت لازم تعالجي الموضوع الاول وحاولي تبسطي نفسك بنفسك.. و علي قد ما تقدري قللي البرشام ومع الوقت باذن الله هتبطليه خالص

ممكن تقعدي معاه وتكلميه براحه وتفهميه وجهه نظرك وتقوليلو اني كده هكتسب خبره كبيره ومهاره وهتنفعني ف المستقبل ف حياتي وشغلي ودراستي كمان..

ممكن مثلا تقعدي معاه وتقوليلو شاركني حزنك واتكلم معايا.. ولو موقفتش جمبك ف الاوقات الصعبه دي هقف جمبك امتي.. وحاولي علي قد ما تقدري تخليه يتكلم.. علشان مايفضلش يكتم ف حزنه ولقدر الله يتعب.. واقفي جمبه دايما

خلي حد اكبر منك يكلمها براحه ويفهمها ان ده غلط ومينفعش

بالعكس متحوليش من الكليه.. وحاولي تتغلبي علي خوفك ده.. لان مافيش حاجه تخوف فعلا.. ده مجرد مثلا سؤال او امتحان.. يعني لو غلطي م هيحصل حاجه وتتعلمي من غلطك.. وكمان م انتي بس اللي بتتسألي فيه غيرك بيتسأل و حاولي تشاركي ف الكلام مع اصحابك وتهزري.. وحاولي متحطيش الموضوع ف دماغك او تفكري فيه كتير..

حاولي تشغلي نفسك بأي حاجه ومتقعديش لوحدك كتير.. واشغلي وقتك دايما وقربي من ربنا.. وكل لما صوتك الداخلي يعلي الهي نفسك ف اي حاجه

ممكن تقعد مع والدتك وتتكلمو براحه وتعرف اسبابها وان هي ليه بتعاملك كده..وتفهمها انك بتحبها وان دلوقتي يعتبر انت راجل البيت ومينفعش تعمل كده قدام اخواتك او تقلل منك بأي شكل مهما كان قدام اخواتك وقدام اي حد.. وهات لاخواتك كاندي كتير وخرجهم لو في استطاعتك واقعد هزر معاهم واحتويهم.. صدقني هيحبوك جدا وهيحترموك.. حسسهم انك باباهم التاني.. ومتتعصبش عليهم وكلمهم براحه.. واعرف اسباب مامتك ايه وباذن الله كل حاجه هتتحل بس مع الوقت مش من يوم وليله

دي فتره مراهقه يحبيبتي وطبيعي تعجبي ب اي حد واللي انتي حساه ده اعجاب م حب.. وكمان انتي لسه صغيره جدا.. يعني دلوقتي خلي هدفك مذاكرتك وبس.. ذاكري وانجحي وتوفقي وبعد كده ركزي ف الموضوع ده عيشي سنك وحياتك.. واي حد يجيب سيره الجواز قولي تعليمي الاول.. ومره علي مره محدش هيفتح الموضوع ده غير لما تكبري..

ابدأي صفحه جديده مع نفسك وانسي كل اللي فات.. خدي شاور واتوضي واخرجي صلي ركعتين توبه لله وافضلي عيطي لربنا هو الوحيد اللي هيسمعلك وهيتقبلك وهيكون جمبك.. وادعي ربنا كتير اويي واقعدي استغفري وشغلي قران والهي نفسك ف حاجه البيت.. وكل ما تحسي انك فاضيه وهتمسكي الفون وتدخلي شات اي حد الهي نفسك ف اي حاجه.. ممكن مثلا تكلمي جوزك او تقعدي مع بنتك واضحكو وهزرو.. او قومي صلي.. والاهم من ده دكلو انك تربي بنتك تربيه سليمه.. واقعدي صلي قدامها واقراي قران.. وكمان حاولي تكوني ام صالحه علشان بنتك تطلع صالحه وباره بيكي وبالوالدها وربنا يهديكي ليه ❤