انا مدرسة بأسس ولد عنده ١٣ سنه عاوزة اجيبله هدية تخليه يستمر ويحب الدرس ويحب يتعلم وتخليه يستمر ف ايه انسب هدية اجيبهاله؟ وبرضو ايه احسن طريقة اتعامل معاه بيها خصوصا انه عنده مشكلة ف القراءة والكتابة بسبب مشكلات نفسية مر بيها
تم النشر الاثنين، ١٠ أغسطس ٢٠٢٦
وعليكم السلام ورحمة الله وبركاته لو معندكش مشكلة ف الاستمرارية ملهاش لازمة كورسات كل المحتوى اللي هتحتاجه هتلاقيه على يوتيوب زي the American English وليه ابليكيشن وكذلك طليق ده برضو ابليكشن .. طيب احنا عندنا 4skills(speaking.. Reading.. listening.. writing) علشان احسن اللغة لازم اشتغل عليهم كويس زي اني اختار موضوع اسمع عنه وبعدها اعمل سيرش على chat gpt اطلع مصطلحات جديدة بعدها اكتب براجراف عنه واتكلم مع حد ف الموضوع ده لو استمريت 100% هتتحسن احسن من 100 كورس .. الكورس عامل شبه الجيم لو روحت من غير م اظبط اكلي او اشتغلت على عضلة واحده عمري م هعمل الفورمة اللي عاوزها ف الوقت اللي انا عاوزه ف انت لو دخلت كورس محتاج برضو تشتغل مع نفسك برا الكورس على كل المهارات ..وكمان في sites زي Test English د< موقع مجاني تقدر تحسن من عليه كل المهارات وبيجيبلك على حسب مستواك ايه و Grammar & vocabulary وغيره لكذا موضوع كمان وبالنسبه لل speaking في ابليكشنز كتير تقدر تتكلم فيها مع اجانب ولكني مقدرش ارشح حاجه فيهم لاني مش متأكده هل هى حلال او لا لإن معظمها اختلاط ..غير كده تقدر تتكلم مع ابليكشنز Ai زي chat gpt & DeepSeek وغيره وممكن تتكلم مع نفسك ف ريكورد او تدور على حد تتكلم معاه وتشدو بعض
تم النشر الخميس، ٢٣ يوليو ٢٠٢٦
بعيداً عن انك سألتيه ف حاجات كبنت مينفعش تسألي فيها (كحياء) ولكن مقولة مؤمنه بيها محدش بيغير حد اياً كان مين هو يا ملتزم يا مش ملتزم ده اولا ..ثانياً كلنا بنعصي وبنعمل معاصي وبنتوب ولكن هل انتي هتتقبلية بعد اللي عرفتية او لا!! هل ده ينفع اب صالح لأولادك ..فكري بعقلك شوية وشوفي هل هتتقبلي لو تاب الشخص ده تاني او لا والأهم صلي استخارة مره واتنين وتلاته وعشرة وشوفي هترتاحي ولا لا ..اوعي تبني حياتك على حاجه اسمها تغيير وهيتغير وهيتصلح وهيتوب هو كلام حلو ولكن متبنيش حياتك على ده ابداا
تم النشر الأربعاء، ٢٢ يوليو ٢٠٢٦
اتكلمي مع اهلك وقولي ليهم انك مش متقبلة لو هما هيتقبلو ده وحاول تتكلمي مع بنت عمك ولإنها ممكن تتقمص وتحصل مشكلة كبيرة لو جبتيها بطريقة مباشرة ممكن تتكلمي معايا وتقوليلها انك ممكن تساعديها شوية زي انك تروحي تساعديها يوم ف الاسبوع ف حاجه وتخلي عيالها عندها والموضوع فعلا محرج للمتربي ولكن مؤخرا بقيت بشوف ان لو حد سوري يعني بجح مينفعش ابدا اتعامل معاه بطريقتي اللي هى الاحترام والاخلاق لانه ببساطة مش هيفهم وهيترجم ده على انه ضعف وهى لو كويسه هتتفهم ان الموضوع بيضايقك يمكن مش واخده بالها ولكن لو اتقمصت انتي مش غلطانه وده حقك وواحده واحده هى هتفك ولكن صدقيني لو عودتي حد على انك تتحملي مشاكله وتسكتي عن حقك هيعتبر مع الوقت ان ده حقه هو... مش بقول تبقي انانية وتفكري بس ف نفسك لا طبعا فكري فيهم بس باعتدال متبقيش بتعمل الحاجه وانتي متضرره الدنيا ابسط بكتر من كده.. والاهم من ده كله ادعي ليها بالهداية وانها تلاحظ من نفسها او جوزها يقولها انه مينفعش او اي حاجه يعني المهم ادعي الدعاء مهم جداا يمكن تتحل من غير تدخل ولا مشاكل..
تم النشر الاثنين، ١٨ مايو ٢٠٢٦
بصي انتي لازم تشوفي نفسك بنظرة تانية اللي هو انتي ليه متتحبيش ليه شايفة نفسك وحشك!! انا عارفه ومجربة ومدركة صعوبة الامر ولكن حقيقي متسيبيش نفسك لاكتئاب ولحزن وحرفيا اسحلي نفسك اهتمام بنفسك واهتمي بها وحبيها انتي تستاهلي ده.. ايا كان ايه ذنوبك وايه اخطاءك والكلام ده كله.. اللي خلقك رب جميل يحب الجمال تستوعبي ان ربنا ممكن يكون خلق حد وحش..؟ يستحيل بجد صدقيني لو بصيتي لنفسك بنظرة تانية هتلاقي نفسك اوتوماتك بتحبي نفسك.. بلاش، تجرحي ف نفسك كل شوية.. متستاهليش تعيشي مش عايشة لأي سبب كان واللي فات مات مينفعش كل يوم احط ايدي ف جرح واقول ليه مش بيتلم.. فكري وشوفي انتي عاوزة ايه.. لو حسيتي انك محتاجة اخصائي نفسك متتردديش ف ده استثمري ف صحتك ونفسك اهم حاجة بجد
تم النشر الأحد، ٨ مارس ٢٠٢٦
اولاً اللي اكتشفته ف موضوع الخسسان ده مؤخرا انك الأول لازم تتقبلي نفسك وتشوفي نفسك حلوة حتى لو مليانه شوية.. ملهاش لازمة تضعي احسن ايام عمرك مش واثقة ف نفسك ودايما بتسمعي كلمة اي ده مش هتخسي والكلام ده... انتي جميلة وبجد لو شوفتي نفسك بعنيكي انتي هتلاقي نفسك جميلة اويي.. شوفي فين المشكلة بالظبط ممكن هرمونات وممكن عندك اضطراب اكل وممكن حاجات كتير ف دوري على حل وشوفي دكتور كويس يحسسك انك ماشية على لايڤ استايل مش مجرد دايت قاسي لازم امشي عليه يعني لازم امنع اكل خالص وهكذاا لا خالص مش ده الدايت بجد عيشي واتبسطي وكلي اللي تحبية بكميات قليلة وحددي وقت اكلك وروحي لدكتور كويس علشان تشجيعك بس م اكتر
تم النشر الاثنين، ٢٠ أكتوبر ٢٠٢٥
طبيعي ف البداية تبقى كده ولكن اعرف فين المشكلة انك تتكلم مع حد تسألة على حاجة؟ فكر اي ابشع حاجة ممكن تحصل لو سألت الشخص ده على المحاضرة اللي فاتت مثلا هتلاقي ولا حاجة حرفيا يعني هل لما تسألة هيقولك امشي من هنا اكيد لا ولو عمل كده فده كده شخص عنده مشكلة ولكن عادي خد الخطوة واسألهم انت حضرت المحاضرة اللي فاتت طب معاك المحاضرة طب ممكن تبعتهالي وهكذا بقى او الدكتور قال على حاجة مهمه وهكذا واحدة واحدة الموضوع هيبقى سهل.. واسمع ياسر الحزيمي بجد تحفة ف الموضوع ده غير فكرته بجد بنسبة 80% ومبقتش بخاف من حاجات كتير كنت بخاف منها (خلي بالك في فيديوز بيبقى فيها موسيقى أحيانا ف تجنبها علشان مشلش ذنبك)
تم النشر الاثنين، ٢٠ أكتوبر ٢٠٢٥
وبالعقل كده انا لو معايا كوباية ماية ووانا ماشية وقغ شوية ف الارض هل الصح ارمي باقي الماية وارمي الكوباية واكسرها!! ولا امسح الماية واكمل الكوباية!!
تم النشر الأربعاء، ١٧ يونيو ٢٠٢٦
بصي انتي بتجلدي ذاتك بطريقة اوڤر اويي خليكي رحيمة بنفسك شوية وليه رابطة اني لو عملت غلط ابقى اوحش حد ف الدنيا!! احنا هنا كلنا بلا استثناء بنغلط ف عادي اننا نغلط ونضيع فرص ونتعب ونزهق كل طبيعي ولازم يحصل لكل حد اللي مش طبيعي استمر ف الغلط او اني مذاكرش وافضل متضايق اني مذاكرتش فمذاكرتش علشان متضايق اني مذاكرتش.. الحل اتي ارحم نفسي ضبعت وقت ايه المشكلة قدر الله ونا شاء فعل يلا نبدأ من تاني بداية جديدة لسه في فرصة ولسه في وقت لو استغلتيه صح تقدري تجيبي مجموع وتعملي حاجه وارحمي نفسك خلاص اللي فات مات مش هنقدر نغيره ولا معانا وقت نزعل عليه.. المهم اعمل للي جاي.. واهم حاجه انك تقتنعي من جواكي انه والله بتوفيق ربنا مش بيكي خالص انتي ممكن تكوني مذاكره الماده كويس اويي وحفظااها حرفيا تروحي الإمتحان تنسي اللي ذاكرتيه وممكن تكوني مذاكره الماده بس وبتوفيق ربنا تقفلي ف كله توفيق من ربنا لينا ومتفكريش كتير ف النتيجية النتيجة دي بتاعة ربنا مش بتاعتك خالص حسابتنا غير تماما بس حسابات ربنا دايما الخير لينا.. اهدي كده واستعيني بالله وصلي ركعتين بنية التوفيق وادعي ربنا كتير انه يوفقك وابدأي اعمل حاجه وذاكري وهاتي اخرك الايام اللي جاية
تم النشر الأربعاء، ١٧ يونيو ٢٠٢٦
انا لما كنت ف ثانوية لما كنت بحس بكده كنت يإما بقفل الفون خالص يإما بحطه ف مكان مشوفهوش او اخليه ممل بمعنى امسح كل حاجه ممكن تخليني اضيع وقت عليه.. والاهم كنت بذاكر مع ناس مختلفه فلو تعرفي جروبات للمذاكرة ذاكري فيها.. خلي عندك روتين نوم وصحيان ثابت والمذاكرة قسميها مثلا بطريقة بومودورو اللي هو 25د و 5د بريك او 50د و 10 بريك او هكذا وشجعي نفسك بإنك ف البريك تعملي حاجه انتي شغوفه بيها زي تسمعي حاجه بتحبيها تقومي تتمشي ف البيت او تقعدي ف البلكونه.. والاهم غيري اماكن المذاكره زي مثلا ممكن تذاكري ف البلكونه شوية او اي مكان... والاهم ركزي ف نقطة واحده مينفعش ابقى زي اللي طلع 15 دور وجه على الدور ال 16 وقال لا خلاص مش قادر مش هطلع ف شجعي نفسك وافتكري هدفك وحطية قدامك كده شوفي هتندمي اد ايه بعد كده انك كان بإيدك فرصة وضيعتيها مفيش اسوأ من الندم اللي هو تدمري نفسك بإيدك؟ ف لا طبعا كملي. واجتهدي واستمري حتى لو فاقدة الشغف والطاقة حاولي للنهاية كلها شهر وكل ده هينتهي وده اهم وقت تنجزي فيه.. ربنا يوفقك وحاولي تصلي قيام وتدعيي كتييير توصلي للي انتي عاوزاه وان ربنا يعينك صي
تم النشر الخميس، ١٤ مايو ٢٠٢٦
لعرض الملف الشخصي في فدني اضغط هنا