Ibrahim Ayman

أعرف حد من قرايبي كان مدمنها جدا وبطل لأنها خربت بيته وبنته كانت في ثانوية عامة وكانوا على قد حالهم شوية خلص منها من باب انها حرام وهيتحاسب عليها في الآخرة وان دي إهدار للوقت والصحة وهيتسأل على الصحة اللي ضيعها هو طبعا قطعها مرة واحده قدام الكل حرفيا وقالهم كلهم اللي كانوا بيشوفوه بيدخن عشان لو شرب تاني يمنعوه وفعلا ساعات في الاول كده كان بيحن بس حد من أهله يمنعه وساعات برده مكنش بيلاقي حد يمنعه ويمنع نفسه هو وكان شديد خالص مع نفسه في الحتة دي حتى لو حد عزم عليه وهما بيتكلموا كان بيرفض نهائي ومكنش بيقبل بس كان في زلة أو اتنين منه يعني شرب فيهم بس كمل ومستسلمش والنهاية الحمد لله بطلها وصحته بقت أحسن وعايش أحسن من الاول

وعليكم السلام أنا عندى نفس المشكلة دا بيكون ناتج عن المشتتات وهو التلفون والريلزات والتيك توك طول القعدة دي بتقلل التركيز دا اولا عشان تحل ده الغي السوشيال من حياتك سيب الواتس للاتصال صدقني هي صعبة بس هتفرق في حياتك وشغلك ثانيا بص بقى القرآن خلي ليك ورد يومي ٣ آيات مثلا اقعد احفظ فيهم طول النهار وسمعهم لما تروح البيت ياريت تبقى فاهم أن الصلاة أهم من أي شيء ودا الوقت المهم لعقلك أنه يرتاح ويصفى ويعيد حساباته تاني وأعرف اي عمل يلهيك عن الصلاة لا يبارك الله فيه خليك بشخصية وطلع صلي لو معاك فلوس لنفسك اسأل صيدلي عن دواء التركيز في حالتك انت واوصفله حالتك هيكون عارف دوا كويس يجيب معاك حل إن شاء الله وأهم حاجة بعد الصلاة ريح أعصابك شوية هدي نفسك يا يوسف خدل فاصل لعقلك عشان على الأقل يقدر يستوعب اللي حصل أخيرا كلنا بنغلط مفهوش غلط ولا عيب أهم حاجة تشتغل على نفسك وتطور منها عشان بعد كده هتبص تلاقي اللي بيتنمروا عليك هما اللي عاوزين يقلدوك ويبقوا شبهك ومتخليش كلام حد يأثر فيك لا بالحلو ولا بالوحش.

عاوز اقولك اني مريت بنفس الشعور اللي مريت بيه ودا تقريبا بعد علاجي منه عرفت أنه دا مدخل شيطاني بيبقى شيطانك كارهك وعاوز يوقعك بأي طريقة فلاش تسمع له وهو هيبدأ يحييك انك مضغوط وعاوز تعيش زي باقي الناس الحرة وانك مقيد بحاجات معينة ويبدأ هو يتلاعب بأحاسيسك ويحسسك دائما بالقرف والكره للبيئة بتاعتك علاج ده انك تهدى كده وتروق وتروح تسمع محاضرة للشيخ أمجد سمير هتلاقيه بيتكلم عن الحاجة دي هيقولك تعمل ايه بالظبط وياريت تسمع قرآن كتير وتحافظ على أذكارك لأن شيطانك عاوز يدمر حصونك ومع الوقت هتحس أن الشعور ده راح ورجعت طبيعي

بصي كويس انك اعترفتي دلوقتي بقى عيشي ايامك تاني أحسن من الأول انا واثق انك عرفتي قيمة الأيام الحلوة بين أهلك بعد اللي حصل انت هتعملي الآتي هتنسي الراجل دا تماما ولا كأنك تعرفيه قبل كده ولو قابلك في حتة ولا تعبري ببصلة حاول يكلمك اعملي نفسك طرشة وياريت متديلوش اهتمام ولا تقعدي تفكري فيه تاني لأن الموضوع ادام اتعرف مستحيل تتجوزوا انسي كل حاجة وحشة حتى النظرات من أهلك والنظرات من الناس حاولي متعمليش مشاكل الفترة الجاية متزعقيش مع حد ولا تشتمي بصي بقى الصلاة الصلاة الصلاة اهم حاجة صلي وادعي أن ربنا يغفر لك ويتوب عليك ويسامحك ورزقك الراجل الحلال فعلا وزيادة كلنا بنغلط واهم حاجة متكررش تاني ولو باباك هيجوزك لواحد مش كويس ياريت ترفضي هيقولك حطيت راسنا في التراب والكلام ده قوليلو انك عايزة تتجوزي جوازة كويسة وانك مكنتيش فاهمة اوي وانك عايزة تعيشي كويسة في المستقبل وانك ندمانه عاللي حصل ومش هيتكرر وياريت متسيبيش الغلطة دي تدمرلك حياتك هو ميستاهلش

بصي أنا بشوف معجزات للخلفة يامة قدامي بسبب قيام الليل في ستات كتير ربنا رزقهم الخلفة بسبب القيام والدعاء فدا يكون طريقك زيهم مفيش يا بنتي مستحيل مع ربنا الواحد مننا اقسم بالله ساعات الدنيا كلها بأراضيها الواسعة بتقفل في وش الواحد خالص ومش بيكون ليها أسباب الأسباب معدومة عشان الحاجة الفلانية تحصل لكن سبحان الله بترفع أيدينا وفجأة من حيث لا تحتسب نجد الخير كله جه زي ما الآية بتقول "ومن يتوكل على الله فهو حسبه إن الله بالغ أمره قد جعل الله لكل شيء قدرا "

وعليكم السلام ثقي في الله ربنا العاطي والوهاب ربما تشخيص الدكتور انك مش هتعرفي تخلفي دا على حسب قدرة العلم اللي وصلنالو لحد دلوقتي يعني في المستقبل ممكن العلم يكتشف بعد كده أن الست ممكن تخلف عادي جدا بنفس حالتك فدا تشخيص دنيوي انت بني آدم وربنا اللي خلقك روحيلو صلي القيام وادعي زي ما نبي الله زكريا ما كان بيدعي زوجته كانت عقيم وربنا رزقه يحيى أمرك كله لله والشخص اللي متقدملك ده ياريت متضيعهوش من ايدك ولازم تقوليلو عالحقيقة عشان يبقى عارف ويكون معاك يساندك وهنا بالظبط دا الاختبار التاني ليك لازم تتقبلي رأيه أما يرفضك أو يقبل وتساعدوا بعض ومتضغطيش عليه وانت بتقوليلو الحقيقة وياريت لو في امل تقوليلو برده عليه علاقة من اولها تكون مبنية على الصراحة والحب والأمان من كلا الطرفان انا اسف لو هيزعلك بس لابد منه اعملي الصح لنفسك