سندس ماهر

لا طبعا الضرب مش اسلوب متحضر ابدا وأسلوب سيء وجاهل اولا هما من ١٠ الي ١٣ سنه بيبدأوا يفهموا وعارفين جدا الصح من الغلط وعارفين مصلحتهم ولو استخدمنا معاهم اسلوب التعنيف حتي لو الضرب مش جامد بس مؤلم عمرهم ما هيحبوا اصلا الحاجه دي ولا هيعرفوا إنهم يحفظوا قرآن أو أي حاجه عموما وبعدين حضرتك بتقولي الضرب مش جامد لكنه مؤلم معلش اي الفرق بين انه مش جامد لكنه مؤلم وجامد ومش مؤلم كله ضرب ممكن تفهميها ان الاستهزاء شيء غلط وتعقليهمباسلوي راقي وكلامي عن تجربه انا اتعنفت واتضربت من المعلم اللي بيقولوا عليه معلم من وجهة نظر المجتمع وكنت في سن البنات دول عارفه حضرتك بدعي عليه لحد الان علي قدر ما عذبني في صلاتي فمتخليش حد يكرهك حضرتك واكيد انتي اعلم وادري بنصلحتهم واسفه لو طولت. وازعج حضرتك❤️

الفتنه مش بالصوت الفتنه لما صوتك في ترقيق وتليين اما لو صوتك عادي فمش حرام بإذن الله،وتجنبا للفتنه حاولي لو انتي في البيت تقفلي الشباك ولو في الشارع حاولي تستني اما تروحي او تقرأين في مكان هادي بعيد عن الناس وشكلك قصدك بكلمه ثانويه انك مستنيه ميعاد دروسك فممكن تشوفي مسجد قريب للسيدات اقرأي فيه كما اردتي انا كنت بعمل كدا وشيء جميل جدا وجزاك الله خيرا كل الخير بإذن الله علي هذا العمل وثبتك الله

خذيها نصيحه من اخت ليكي انتي قلتي في كلامك علاقه حرام اهو انتي عارفه وقلتي بنفسك وهو لو في خير ربنا هيقربه ليكي فسيبيه ومترجعيش للحرام ومن ترك شيئا لله عوضه الله خيرا منه سيبيه وانتي لسه صغيره قدامك الوقت كتير بمعني ركزي في مذاكرتك لانك في اهم مراحل حياتك وممكن اللي انتي حاسه مش حب لانك في مرحله مراهقه فممكن مش عارفه اقولك اي بس ابعدي واوي كمان ولو هو خير هيستناكي لحد ما تخلصي اهم مرحله ويدخل البيت من بابه مش من التليجرام

السلام عليكم ورحمه الله ما شاء الله ثبتك الله على الحجاب لكن نصيحه مني متفكريش برا الصندوق واللي بمعني متفكريش في حاجات مالهاش إجابه لانها هتوديكي لأماكن بعيده تانيه جدا الشيطان اصلا هو اللي بيمهد ليكي الطريق علشان تفكري في الحاجات دي يعني معلش خلي التفكير للناس بتوع الفلسفه دول اما بيفكروا كتير بتوصل للالحاد والعياذ بالله ،،تعرفي هحكيلك عن حاجه وانا في فتره الاعداديه كان بيجي في دماغي افكار غريبه زي مين خلق ربنا وهو اي والعياذ بالله وكنت بفكر واتخيل لو مفيش حياه لقيت دماغي حرفيا هتتشل رحت لمامتي واخواتي وعيطت لهم وقلتلهم على الحاجات اللي بفكر فيها قعدوا يضحكوا عليا ونصحوني ما افكرش في حاجات ماليش دعوه بيها من هنا فهمت حاجات كتير كل اما الشيطان يفتح دماغي للتفكير في حاجات زي كدا ببعد ببعد اويييي مش بقولك ما تفكريش لا فكري وتدبري في الكون وجمال خلق الخالق ،،،، بالنسبه بقا للجزء بتاع الاديان التانيه الطفل بيتولد فأكيد هيلاقي عيلته علي ديانه ما فهيبقى على ديانه ابيه او عيلته يعني ،،،بصي الطفل مش هيتحاسب من يوم ميلاده لحتى يوم بلوغه ربنا رافع عنه القلم واكيد البلوغ مش معناه بلوغ الجسد فقط ولا البلوغ اللي كلنا عارفينه بالنسبه للجنسين البلوغ بردو معناه بلوغ العقل فالعقل لازم يكون حكيم وعاقل ومتدبر وفاهم اوييي اول ما يبقى مثلا المسيحي بالغ عاقل هيبدأ يتحاسب علي كل حاجه🙂زيه زي المسلم اللي بلغ ومش بيصلي مثلا هيبدأ يتحاسب ،،،، في نقطه مهمه انتي بتقولي ان الانسان بيختار ديانته على حسب عيلته عايزه اقولك لو هو طفل كلامك صحيح لكن بعد كدا لا لان الإنسان مخير وليس مسير ،، هحكيلك قصه بصي واحده جارتنا كانت مسيحيه متجوزه مسيحي ومخلفه تلاته بنت وولدين ،،،الست دي أدركت ان الدين الصحيح هو الإسلام هربت بعيالها للمنطقه اللي احنا فيها اسلموا سمت بنتها فاطمه وابن محمد والابن التاني بلال ،،،بلال كان عنده ٨ سنين كان بيكره الإسلام كره شديد هرب ورجع لباباه مامته سابته اكيد بتدعيله بالهدايه ماشاء الله لسه داخلين الإسلام لكنهم يعرفوا الإسلام اكتر من ١٠٠ واحد مسلم اصلا يا ريت ما اكون طولت عليكي يا حبيبتي وبقولك متفكريش برا الصندوق علشان هتعملي زييي😂

اهلك هما السبب والعيب عليهم يعني اي قبيله ويعني قانون هو احنا في العصر الحجري دا حتى الجاهليه مكنش كدا ،،، لو فعلا قبيلتهم بتحكم عليهم بكدا ففي حاجه اسمه شرطه وحكومه في محاكم ونيابات بتحمي الأطفال والدستور المصري اللي بتمنع ايذاء اي شخص بيتعرض للتعنيف، ، يعني اي الاب والام مش قادرين يعملوا حاجه لعيالهم دا بحد ذاته حاجه لا يستوعبها العقل البشري هو احنا في عصر العبوديه والاستبداد الاب والام في ايدهم الحل وقادرين جدا يحموا أولادهم يعني اي بيخافوا قصدك بيخافوا على نفسهم يقوموا يأذوا أطفالهم انا مستغربه ان لسه في حاجه زي كدا موجوده بجد مش عارفه اقول اي لكن لازم اكيد انتي واعيه بما انك مش راضيه عن الكلام دا لازم تكوني عارفه القانون المصري ضد الجواز بالإكراه انتي عارفه مجرد البنت مش موافقه معنويا بس من غير ما تقول فدا جواز باطل شرعا وقانونا القانون بيحمي صدقيني حاولي تمشي من المكان دا علشان تعرفي الحكومه علشان توضع حد للمنطقه دي وربنا يقويكي وأرجو كلامي ميكونش تقيل عليكي

اولا السلام عليكم ورحمه الله وبركاته، ،،، مامتك طبعا اسلوبها مش كويس لانها بتقلل منك قدام خطيبك بس عاوزه أوضح ليكي فكره ان انتي مش قليله ولازم تحطي دا حلقه في ودانك ودا اهم حاجه ،، تقليل مامتك منك لا ريب انه شيء مؤذي ليكي نفسيا قدام نفسك وقدام خطيبك لكن لازم بينك وبين مامتك تحاولي تفهميها وتتفهموا سوا ان دا شيء بيجرحك وبيضايقك ومينفعش يحصل قدام خطيبي لان لو قللت منك قدام خطيبك احتمال خطيبك بكره يقلل منك فلازم تحطي حد للموضوع. واي معلش يخلي الناس تقلل منك؟؟!!! لا زم تبقي حكيمه ومتخليش حد يتجرأ يقلل منك ابدا ,,, كمان هو قالك حقك عليا فدا تعاطف وحس بالزعل عليكي لكن دلوقت هو مش عاوز مقارنات بين الأمهات فبيحط حدود للهزار انتي خليكي رزينه وحكيمه ومتهزريش معاه بجد هيفرق معاكي والكل هيعمل لك الف حساب متزعليش يا قلبي طبيعي اللي بيحصلك اصلا كلنا بيحصل لنا توبيخ من امهاتنا ممكن بتهزر وانا عارفه ان هزارها مؤذي ليكي فلازم تحاولي تعرفيها وتتكلمي معاها بهدوء ان دا غلط وصدقيني امورك هتتحل حبيبتي وربنا هيكرمك ويحسن الأمور بينك وبين مامتك وخطيبك

حبيبتي دا تفكير زايد جدا عن اللزوم او اقولك وسواس بيحاول يفشلك دايما بكلامه السيئ بيقعد يقولك انتي فاشله وهتسقطي في كل حاجه وانتي اصلا مش ساقطه بيحاول يثبط تفكيرك عن الحاجات الإيجابيه ومخلي تفكيرك سلبي جدا ودا بيخليكي في ضغط نفسي ليه ممكن تفشلي وانتي بإيدك تنجحي!!؟ دا وسوسه الشيطان الرجيم افتكري قوله تعالي (ومن شر الوسواس الخناس الذي يوسوس في صدور الناس) صدق الله العظيم ،،، ها شفتي الآية بيوسوس في صدور الناس بيخلي هموم علي قلوبهم ،، طيب سؤال ليه تبقي تعيسه وربنا قال "لا تقنطوا من رحمة الله" لو جيتي تقارني بين الاحساس السلبي ورحمه ربنا فهتلاقي ان مفيش زي رحمه ربنا ابدا ،، سؤال كمان ليه تحسي انك هتدخلي النار دا نوع من انواع جلد الذات علفكره كلنا أوقات بنحس ان احنا هندخل النار طيب تتخيلي اي سبب ان احنا ندخل النار غير ان احنا نغضب ربنا !!! طيب أغضبنا ربنا نصلح غلطنا ونتوب يبقى كدا معتش سبب ان احنا ندخل النار لان الاستغفار من الحسنات والحسنات تذهب السيئات عالجنا مشكله وممكن نعالج شعورنا السلبي بالاستعاذه من الشيطان الرجيم ،،، أحيانا لما نعمل ذنب او غلطه بتخلينا نحس بكدا لكن لا مينفعش نخلي الاحساس يكمل لابد نحارب الاحساس السلبي دا ،،،قال تعالى (قل يا عبادي الذين أسرفوا على أنفسهم لا تقنطوا من رحمة الله) صدق الله العظيم معناه اي دا ربنا بيقول ما تيأسوش من رحمه الله عايزه اقولك ربنا مش مستني يعذبنا ربنا بيحبنا جدا ،،، عاوزه اقولك ان اليأس اللي انتي فيه هو المشكله واللي لازم نحاربها وربنا هيقويكي وهيكرمك أكيد دا نفسيه وإن شاء الله تتحل عايزه اقولك انتي مش فاشله انتي مش تعيسه وانتي مش هتدخلي النار ودا حاجه مهمه حطيها حلقه في ودانك وربنا ييسر ليكي ويسهل عليكي يا حبيبتي

هو الاحتمال الاول ممكن زي ما بتقول العجله والاحتمال التاني ممكن سكر الدم hyperglycemia لازم تتأكد طبعا من حد متخصص بس سكر لو بتحس بعطش شديد وجوع لو بتحس بارهاق لو بتحس بردو بجفاف في الفم تبعك،، وممكن بسبب الضغط على الأعضاء فبيسبب كدا بردو واللي بيكون عند الذكور حاجه اسمها ال perineum بيمر فيها مجرى البول فالضغط عليه بيهيأ المخ انك عايز تتبول لان المخ ساعتها بيبقى مش عارف يفرق بين امتلاء داخلي في ال urinary (المثانه) والضغط الخارجي فساعتها عندك رغبه في التبول الكلام دا لو في ضغط لكن لو مفيش ضغط فممكن تروح لمتخصص لان ممكن مشاكل في المثانه وعلى فكره انت ذكرت انك بتقلل مايه بتشرب بوق كل ٨ ساعات دا غلط جدا هو حضرتك علشان تعالج حاجه تقوم تدمر حاجات؟ !لابد تشرب كتير لان عدم الشرب كتير هيخلي البوتاسيوم يزيد هيسبب حصوة لا قدر الله ومشاكل كلى وحاجات كتير مش بخوف حضرتك دي معلومات انا عرفتها بس إن شاء الله خير لازم تروح لمتخصص علشان تعمل check لنفسك وتتطمن لان طبعا مفيش أهم من الصحه ملحوظه انا مش دكتوره متخصصه بس دي معلومات كانت عندي ياريت اكون أفدت حضرتك

حبيبتي عايزه اقولك ان ثانويه عامه مش مقياس عارفه ان انتي تعبتي كتير مذاكره وسهر ودروس بس دا نصيبك ولازم تعرفي ان تعبك دا ما راحش وأن ياما ناس كتير ذاكرت في اللي جاب درجات وفي اللي سقط وفي اللي اتظلم وفي اللي ظلم وفي اللي جاب درجه كويسه في حدود ٨٥ في الميه واتشعلق في النص لانه درجته كويسه وما لحقش كليه زي ما بيقولوا مرموقه عارفه ان حلمنا كلنا من واحنا صغيرين نبقي دكتور او مهندس او ظابط لان احنا تفكيرنا في البدايه كان غلط ولأن دا اصلا ما كانش تفكيرنا كان كلام الناس اللي حوالينا ولازم تعرفي بردو ان في ناس دخلوا الكليه اللي بيحبوها بس جالهم أمراض نفسيه ولا نفسهم كليه ولا نفعهم حلم وفي نفس الوقت ناس دخلت ما تستاهلش بس اناي لازم تفتكري دايما انتي ربنا هيكرمك بس لسه ما جاش الوقت الفرق بينك وبيت حد دخل كليه حاببها ان ىربنا رزقه بدري وانتي رزقك جاي بس متأخر شويه ﴿ يَرْزُقُ مَن يَشَاءُ بِغَيْرِ حِسَابٍ ﴾ وافتكرت انك تعبتي كتير وأن ﴿ وَأَنْ لَيْسَ لِلْإِنْسَانِ إِلَّا مَا سَعَى]الدنيا ما وقفتش حبي جامعتك هتحبك الجامعه ذاكري وكأنك بتحبي تعملي حاجه حببي نفسك فيها لان شيطانك اللي بيحاول يكرهك في الكليه لو ذكرتي وجبتي تقدير اي المشكله ما دا تحقيق حلم ممكن تلاقي شغل يليق بيكي وهيسعدك ربنا وأن شاء الله يسعدك ربنا ويحقق اللي في خير ليكي ودا مش اكتأب يا حبيبتي متخافيش ان شاء الله خير ولو احتاجتي مساعده انا موجوده❤️