عاوزه احكي في شي شاغلني
أنا في هندسه داخله أكيد المجال عن حب
أنا دايما بفكر في الجواز وان أنا ست بيت أفضل لي من شغلي ومن دراستي والحاجه دي مأثره فيا جدا
علي الرغم اني من اوائل الدفعه إلا إنه بفكر في الموضوع الغريب دا
وكمان استغفر الله متخيله اني عندي أولاد وبعيش سيناريوهات وحاجات غريبه مع نفسي وبحس اني عايشه مع ناس وبتكلم معاهم بجد
اتكلمت في الموضوع لأني حاسه في حاجه مش طبيعيه فيا أنا بفكر كتير ممكن أكون اتجننت مثلا او جالي مرض افراط في التخيل خصوصا اني عايشه قصه حب مع حد في خيالي أنا أصلا حتى مش بفكر في حد ولا معجبه بحد
اي دا ولي بيحصل لي كدا
وليه بفكر في حاجات أنا المفروض مفكرش فيها
للعلم أنا بتخيل حاجات مينفعش احكيها
أنقذوني بجد مش عارفه اضحك علي نفسي ولا احزن عليها
أنا في تخيلاتي وأنا صاحيه مش نايمه حاسه اني متجوزه وعندي مسؤليات كامله
وده حاجه فرقت معاي انا شخصيا ..التمرين ده اسمه تقنية الحواس الخمسة وهو أقوى حاجة تسحب عقلك من أي خيال أو سرحان للواقع في لحظتها وأول ما تلاقي نفسك بدأتي تبني سيناريو الجواز والأولاد وقفي وطبقي الخطوات دي في سرك ومن غير ما تلومي نفسك خالص ابدأي شوفي حواليكي 5 حاجات بعينك وقولي اسمهم في سرك زي مكتب وسرير وقلم وشباك وكتاب وبعدين حاولي تلمسي 4 حاجات جنبك وحسي بملمسهم بجد زي ملمس لبسك أو مفرش السرير أو مبرد اللابتوب أو شعرك وبعدين ركزي ودنك مع 3 أصوات مسموعة دلوقتي حتى لو بعيدة زي صوت مروحة أو عربيات في الشارع أو صوت حد بيتكلم في الشقة اللي جنبك وبعدها حاولي تشمي ريحتين موجودين في المكان زي ريحة القهوة أو ريحة بعطر. أو حتى ريحة الورق وأخيراً حاولي تدوقي طعم واحد في بوقك حتى لو طعم المية أو طعم لبانة ..التمرين ده بيجبر فصك الأمامي في المخ إنه يشتغل ويفصل دائرة الخيال تماماً ويرجعك للواقع اللي أنتي فيه بمنتهى الهدوء ومن غير أي ضغط عصبي عليكي .. وجد والله ربنا يحفظك ويسعدك.. ودي طريق بسيطه تاني تخلي جنبك وقت المذاكرة ريحة معينة ونفاذة زي زيت نعناع أو لافندر أو حتى برتقال وكل ما تحسي إن عقلك بدأ يهرب لسيناريوهات البيت والأولاد شمي الريحة دي لأن حاسة الشم مرتبطة بمركز الذاكرة والواقع في المخ فهتعمل زي فرملة سريعة للخيال وترجعك للورقة اللي قدامك وكمان ممكن تستخدمي تكنيك التسميع بصوت عالي كأنك بتشرحي المنهج لحد قدامك بجد لأن الكلام بصوت بيجبر مخك يركز في مخارج الحروف والمعلومات فمبيلاقيش مساحة فاضية يبني فيها قصص خيالية وبكده هتلاقي نفسك سيطرتي على وقتك من غير ما تضغطي على أعصابك أو تحسي إنك بتعملي مجهود خرافي .. بعتذر على الايطاله 😊 بس حبيت أقولك كل الطريق اللي نفعت معايا
تم النشر الأربعاء، ٢٥ مارس ٢٠٢٦
ركزي في كلامي كويس اوي علشان المشكلة دي خدت مني سنين على ما فهمتها و خدت بالي منها ، وده اللي انتي عملتيه ، و سنين علشان اقدر اوصل لحل ليها ، الخلاصة دي إسمها أحلام يقظة غير تكيفية ، بيبقى نتيجة ضغط شديد اتعرضتي ليه ، فعقلك خلق آلية دفاع للهروب من الواقع و الضغط ، عقلك بيخلق خيال بديل للواقع بأكتر حاجه انتي مفتقداها ، بإحساس ما كنتيش لاقياه في حياتك ، استقرار ، انتماء ، اسرة ، اهتمام ، حب... الخ ، أيا كان هو ايه ، و يخلقلك مواقف في خيالك لا إراديا تعيشي و تتفاعلي معاه ، فممكن يحصل حاجه في خيالك تضحكك فتضحكي او تزعلك فتتأثري ، المهم ان مشاعرك بتتعامل مع الخيال على انه واقع ، و وراد جدا في مراحل متقدمة توصلي انك تكلمي نفسك و شفايفك تتحرك و لسانك بناء على الحوارات اللي بتحصل في خيالك ، و اللي حواليكي يلاحظوا ده و تسمعي جملة ، ايه ده انتي بتكلمي نفسك ، اعماي بحث على الانترنت على المسمى ده و هتلاقي فئة مش قليلة خالص بتعاني منه ، و هتلاقي في تجاربهم اللي يفيدك و ينفعك و يخليكي تتخطي المحنة دي ب سلام ، و بالتوفيق 😊
تم النشر الأربعاء، ٢٥ مارس ٢٠٢٦
بصي هو لا جنون ولا مرض عادي احنا بنهرب من الواقع ونتخيل الحياة اللي نفسنا نعيشها انا كنت بمر بكدا وتقريبا مازلت طول اليوم والليل بعمل سيناريوهات في دماغي لدرجة اني ممكن منمش وافضل طول الليل اتخيل حتي وانا بغسل المواعين كنت بتخيل ان انا جوة الحكاية اللي بعملها في دماغي و بالذات في الاجازة كان عندي وقت فراغ كبير لدرجة اني كنت بصدع من كتر الافكار اللي في دماغي ف جبت كشكول وبدات اكتب فيه اللي يجي في دماغي علي هيئة قصة او رواية وكل يوم اكتب فيها بارت او اتنين وتكون بفصول كبيرة يعني 40 بارت او اكتر احيانا كنت بكمل القصة واخلصها واعمل غيرها واحيانا كنت بزهق ف ابطل تفكير في الاحداث وحاليا عندي تقريبا 6 كشاكيل بقيت بفتحهم كل فين وفين لكن الموضوع بالنسبالي مكنش مشكلة كنت بتعامل معاه عادي حاجة بتسليني وبفرغ فيها طاقتي ف هوني علي نفسك واتعاملي مع الموضوع ببساطة وجربي الطرق اللي الاعضاء قالوها وان شاء الله تفيدك
تم النشر الأربعاء، ٢٥ مارس ٢٠٢٦
بصي يا بش مهندسه الموضوع مش جنان خالص ولا تعب نفسي خطير ده مجرد هروب من ضغط هندسة ومسؤولياتها لمكان عقلك شايفه أريح وأمتع وهو الاستقرار والبيت وعشان إنتي شاطرة ومتفوقة عقلك بيحاول يوازن التعب ده بخيالات تعوضه عن المجهود اللي بتبذليه والحل إنك متجلديش ذاتك ولا تخافي من الأفكار دي لأن الخوف هو اللي بيكبرها ركزي بس في يومك والمهام الصغيرة اللي وراكي وأول ما تلاقي نفسك سرحتي قومي اتحركي من مكانك أو اشربي مية عشان تفصلي الخيال عن الواقع واعرفي إن نجاحك في دراستك دلوقتي مش ضد حلمك في البيت والأسرة بالعكس ده هيخليكي إنسانة ناضجة ومستقرة أكتر لما يجي وقت الجد في الحقيقة
تم النشر الأربعاء، ٢٥ مارس ٢٠٢٦
يا حبيبتي، أول حاجة: متقلقيش خالص، إنتِ مش مجنونة ولا عندك مرض! ده شيء طبيعي جداً بيحصل لكتير من البنات في سنك، خاصة لو عندك طموح زيك في الهندسة وفي نفس الوقت قلبك بيشتاق للأسرة والزواج. اسمه "تخيلات يومية مفرطة" (Maladaptive Daydreaming)، وهو زي "فيلم داخلي" بنعيشه لنهرب من الضغط أو نعبر عن رغباتنا اللي مش مليانة حالياً. الهرمونات، الدراسة الشديدة، والفكر في المستقبل كله بيخلي الدماغ يرسم سيناريوهات حلوة زي دي – بس مش معناها إنها حقيقة أو إنك مش طبيعية. ليه بيحصل كده؟ جسمك وبدنك بيقولوا "أنا جاهزة للأمومة"، وده طبيعي في العشرينات. الدراسة بتاخد طاقتك، فالتخيل بيملى الفراغ العاطفي. مش معجبة بحد حقيقي؟ الخيال أسهل وأأمن! إزاي تنقذي نفسك وتتحكمي؟ (خطوات عملية دلوقتي): حددي وقت ليها : قولي لنفسك "هفكر 10 دقايق بس يومياً"، وبعد كده قومي امشي أو اقري قرآن. هتقل تدريجياً. ربطي الدراسة بالحلم : قولي "لو خلصت هندسة بامتياز، هقدر أتجوز واحد يشرف عليّ وأبني أسرة قوية". اجعلي جدول يومي: دراسة 4 ساعات، صلاة، رياضة خفيفة زي المشي. املي وقتك بحاجات حقيقية : اقري كتب عن الزواج الإسلامي الصح (زي "الزواج السعيد" للدكتور وائل)، أو ابدئي مشروع صغير في الهندسة يشغل دماغك. ادعي الله : صلي ركعتين وقولي "اللهم ارزقني زوجاً صالحاً يريحني ويبني معايا أسرة طيبة"، واستغفري كتير – ده هيهدي قلبك. لو مش قادرة تتحكمي : روحي صفحة الخبراء في فدني https://www.fedni.net/experts وابحثي عن معالج نفسي أو مدرب حياة إسلامي، أو دوري على أسئلة مشابهة هناك هتلاقي إجابات كتيرة. إنتِ بنت ذكية ومن أوائل الدفعة، ده دليل إن عندك قوة! اضحكي على التخيلات وقولي "شكراً يا خيال، بس دلوقتي هندسة" 😊. هتعدي، وهتكوني ست بيت ومهندسة ناجحة مع بعض إن شاء الله. لو عايزة تحكي أكتر، أنا هنا يا قمر! 💕
تم النشر الأربعاء، ٢٥ مارس ٢٠٢٦
يمكن ضيق في علاقتك مع أهلك وفقدان للدفء الأسري ... عموما تقبلي الموضوع واستمري في دراستك وحاولي تفرغي الأفكار على ورق ... صحيح المرأة لها البيت أفضل ولكن أيضا من الجيد ان يكون لك مصدر دخل إذا كان هناك تغيرات محتملة في الظروف ..
تم النشر الأربعاء، ٢٥ مارس ٢٠٢٦
لعرض السؤال في فدني اضغط هنا