من اكتر المواقف المضحكه انى
قررت افكر بعقلى وقلت انا فعلا تعبانه ومفيش مانع ان اعرف مالى ولا بمر بإيه
دعيت اللّه سبحانه كتير ولكن قلت اخد بالأسباب
فانا معرفش دكتوره نفسيه قريبه منى فقلت اتكلم مع ميتا واصلا بيحاول يبان انسان فحكيت من باب افرغ شويه يمكن اتحسن فقالى لازم تقعدى مع متخصص وبعتلى ارقام الصحه النفسيه والهلال الاحمر وغيره ، بعتلهم ويا جمال الرد وحلاوتو كانى بكلم خدمة عملاء قلت انى تعبانه وعندى مشاكل مش عارفه اتعامل ازاى وكدا لقيتها بتقولى لازم مكالمه هاتفيه وتقولى بياناتك وتلخيص الشكوى اللى هو مترغيش كتير فقلتلها خلاص مش هقدر اتكلم غير شات بس قالتلى تمام لما يكون مناسب كلمينا🙂😂❤️🩹
نفسى افهم ليه الناس كدا يعنى هو علشان دا شغل مينفعش يكون فى انسانيه انا لو حد وقفنى فى الشارع وقاللى مدايق مستحيل اسيبه غير لما اهون عليه واطمنه واحاول احل مشكلته واسمع برغم ان جوايا زفت ، بس عشان يحس انه انسان وانه مهم وفى ناس بتساعد
متهيألى نفس الدكتوره لو بفلوس كان رسمتلى الدنيا جنه والحياة بقت وردى واستغفر اللّه إن أسأت بها الظن ، اللّه يهدينا بجد ، ولو كنت لقيت حد بمقابل كان عادي ودا مش عيب عشان محدش يفهمني غلط أي حد بيتعب فشغله ومن حقه ياخد مقابل ولكن الطريقة نفسها والاسلوب الجاف وانا حرفيا اتخذت الإنسان دا سبب وآخر محطة ليا قبل م أنهار فمفيش مانع انك تعاملني كإنسان بس مش أكتر ومحسش اني بكلم روبوت دا شات جي بي تي بيكلمني احسن من كدا ، وان عادي انا مش فارقلك اصلا مادام مش موافق بشروطنا اللي هي اصلا عمري م هقدر اعملها ولا هعرف اتكلم فون لأني هفضل اعيط ومش هعرف اقول كلمه
محتاجين بجد نقرأ السيرة النبوية ، اصبحنا مفتقرين لكتير من الأخلاق ، محتاجين نتعلم النبي صلى اللّه عليه وسلم كان بيعاملوالناس ازاي ، واللّه المستعان .
فعليا زعلانه من نفسي جدا ... زعلانه ان كل مره بعيط كل مره بتكسر واتوجع واتخزل بقول خلاص اتعودت على دا ومعدتش هستغرب خزلان الناس ، معدتش هتغرب كسرهم لخاطري ، معدتش هستغرب قسوتهم عليا فأكتر أوقات بكون محتاجه حد يقلي انا جمبك اللي هو انا جيت عشان تعبانه ومستنيه منكم تسندوني ف لااا مفيش الكلام دا احنا هنكسرك اكتر وهنوجعك اكتر وهنشوف فييين جرحك دا مش عشان نداويه لااا عشان ندوس عليه بزياده وتموتي من الألم ..
وفى الآخر يظل الشعار ثابت " الاكتفاء بالذات وعدم سؤال العباد عز "
لأن ببساطة الشكوى لغير اللّه مذلة .
اخدت من وقتكم ، اسفه !
أنا آسفة إنك مريتي بكل ده، وأقدر تمامًا إحساسك بالإحباط والتعب. اللي حصل معاكِ مش غريب، كتير بيواجهوا نفس الجفاف ده لما بيحاولوا يطلبوا مساعدة، وده بيخلي الواحد يحس إنه مجرد "حالة" مش إنسان. شعورك طبيعي، وإنك حاولتِ تاخدي بالأسباب رغم الدعاء ده دليل على قوتك مش ضعفك. النبي ﷺ كان يعامل الناس بإنسانية عميقة، يسمع ويطمّن ويخفف حتى لو كان مشغول أو متعب، وده اللي بنفتقده دلوقتي في كتير من التعاملات الرسمية. الطريقة الجافة اللي واجهتيها مش مبررة، وصحيح إن الشكوى لغير الله مذلة، لكن الله سبحانه أمرنا بالأخذ بالأسباب، ومنها طلب المساعدة المناسبة بدون ما نهين نفسنا. لو الشات أو الخطوط الساخنة مش مناسبة لظروفك، ممكن تفكري في طرق أخرى زي كتابة مشاعرك يوميًا في مذكرة خاصة، أو البحث عن محتوى إسلامي موثوق عن الصبر والتوكل يساعدكِ تهدي نفسكِ شوية. أنتِ مش لوحدكِ في الشعور ده، وكتير بيشاركوا تجارب مشابهة. جربي تبحثي عن أسئلة مشابهة على فدني عشان تشوفي وجهات نظر إضافية. خدي خطوة صغيرة واحدة النهاردة، حتى لو مجرد الدعاء بصوت عالي أو الاستماع لآية تطمئن قلبكِ. الله معاكِ، وهو أرحم بكِ من أي حد.
تم النشر الاثنين، ١٧ أغسطس ٢٠٢٦
السلام عليكم ورحمه الله وبركاته. طيب لما ناخد طريق خلينا ملتزمين بالطريق بتاعنا شويه العقبات اللي هتبدا تظهر لنا نتعامل معاها ليه لان ان شاء الله عندي صدقه جدا لانك عايزه توصلي لحل الحاجات اللي مقلناكي او الحاجات اللي تعباكي او الحاجات اللي هنخليها حياتك مش احسن حاجه خلينا كده نفكر سوا اييي ليه ممكن يكون حصل معاكي الموقف ده في انه ااا الشات الخاصه بالصحه النفسيه؟ خلولك لازم مكالمه هاتفيه انا هقول لك بقى لما بيكون الكلام من خلال الشات مش واضح ده بيقول انه ممكن الشخص يكون مش قادر ان هو يحرك نفسه ويقول الكلام اللي عنده او الكلام اللي يساعد الطبيب او الشخص اللي بيتواصل معاه ان هو يقدر يساعده بنحتاج تواصل مباشر اكثر المكالمه التليفونيه اول تواصل مباشر وليه المكالمه التليفونات المكالمه التليفونيه انا اقدر ان انا اتكلم مع الشخص واقدر اقيس مثلا درجه توتره حتى لو هو مش قادر يتكلم يعني انا ممكن عن طريق بس اشوف سكوتك ما بين الكلمه والكلمه قد ايه هقدر احدد غالبا انت ممكن تكون مش فين اقدر احدد نسبه القلق بتاعتك اقدر احدد اذا كان في عندك لا قدر الله اضطراب نفسي ولا لا يعني ممكن بس من مجرد الكلام وطريقه الكلام يقدر الدكتور يحدد اذا كان الشخص ده عنده مشكله كبيره ااا تحتاج دواء تحتاج لا ده انت محتاج جلسات تيجي وتحضر في العياده او لا ده الموضوع بسيط ونقدر نوجهك عن طريق التليفون المكالمه التليفونيه طالما طلبت منك يبقى معنى كده ان احنا محتاجين تواصل اكثر عشان نقدر نساعدك بشكل افضل علشان ما نشخصش حاجه غلط عشان ما نقولكيش حاجه غلط ولو يهمك لانك عندك حاجه هي مش عندك اصلا خلي بالك ان ده من باب المساعده مش من باب التطبيق حقيقي خالص يعني وخليني اقول لك ده من خلال. يعني الاحتياجات الشخصيه بتاعتي ممكن حد يطلب مني استشاره عن طريق الواتساب ومش حابب يتكلم في التليفون انا بسمح ده وعادي جدا وبقول تمام مفيش مشكله لو ده اللي هيخليك تقدر تتكلم براحتك ولكن لما بيكون المسجات كمان ما بقتش مخليه شخص يتكلم براحته وهو اصلا مش قادر يعبر او مش قادر يتكلم. او انا بشوف انه بعد ما تكلمنا شويه لا على فكره انا محتاج ان انا اسمع الشخص وهو بيتكلم عشان اقدر فعلا احدد اللي هو بيقوله ده بشكل افضل فده بيبقى من من السجل اللي علشان نساعد الشخص بالشكل الافضل ونبقى وفرناله فعلا المعلومه الصحيحه وما ضحكناش عليه او مديناهوش معلومه خاطئه. تعالي بقى نروح لشويه حاجات كده انا هوضحها لك علشان تاخدي بالك منها وانت ان شاء الله في الرحله السابقه بتاعتك دي في انك تغيري الحاجات اللي خلايا حياتك مش احسن حاجه وتخليها الاحسن حاجه كمان لما بيكون في عندنا افكار والافكار دي بتكون من نفس النمط كده بتاع اييي انا ما حدش هيفهمني انا لو اتكلمت ما حدش هيحس بيا لو انا حاطه الفكره دي في بالي وفي نفس الوقت او يعني هي فكره اصيله موجوده جوايا ما حدش بيحس بحد مهما حد حاجه لحد ما حدش حد بيحس بالتاني وما حدش يعرف يحط نفسه مكان حد لو انا في بالي الفكره دي الفكره دي موجوده متاصله فيا وهروح اتكلم مع حد واحكي له مشكلتي انا قبل ما اسمع الشخص هيقول ايه او هيتعاطف معايا او هيحاول يساعدني او او او ايا كان رد. الفعل اللي هيطلع من الشخص انا بالفعل حكمت الحكم من بدري واخذت رد الفعل انا كمان من بدري ان الشخص ده ايا كان اللي هيقوله هو ما فهمنيش لان الشخص ممكن يكون فهمني واستوعبني وتفاعل معايا كويس وتعاطف معايا وكمان بدا يقدم لي مساعدات انا هترجم كلامه وبتظهر صفاته. كلها على حسب الفكره اللي موجوده ومبناه عندي خلي بالك كويس قوي انه افكار من نوعيه الشكوى غير الله مذله الواحد المفروض يعيش لوحده وما يليقش لحد خالص بتخلي الانسان تقيل عليه قوي قوي قوي تقبل المساعده من الاخرين مهما كان هم بيقدموها ازاي هو هيلاقي نفسه بيشوف طريقتهم مش لطيفه مجرد ان في حاجه جوه عقله جوه العقل اللاواعي بتاعه مش العقل الواعي بتقول له لا احنا عايزين ناكد الفكره اللي عندنا اوعى تطلع لنا فكره جديده هي لسه مش اكيد خلي بالك من النقط دي كويس احنا معاكي هنا نقدر نتعامل. زي الشات بالضبط وخلينا نشوف نقدر نساعدك ازاي؟
تم النشر الثلاثاء، ١٨ أغسطس ٢٠٢٦
السلام عليكم، ربنا يعينك ويصلح أحوالك كلها يا رب. بالنسبة للي حصل معك، متأكدة إنها دكتورة نفسية اللي ردت عليكِ بالأول؟ يعني مش مثلا موظفة عادية بترد على المتصلين وبتوجههم مش أكتر. *** عارفة الكلام في التليفون صعب، بس ليه متجربيش مرة وعادي لو عيطتِ ما ده هيكون تفريغ للتراكمات اللي جواكِ وبتخنقك. عموما، أنتِ ممكن تكتبي وتفرغي مشاعرك على الورق سواء حرقتِ الورق أو تركتِه وابحثي برضه على النت أو اسئلي الذكاء الاصطناعي عن وسائل تانية لتفريغ التراكمات وتحسين النفسية إذا صعب حاليا تتابعي مع مختص. **** لو فيه إمكانية فحاولي جديا في حوار التليفون ده. وجربي تشوفي كده في قائمة الخبراء على التطبيق فيه طبيبات نفسيات ولايف كوتشز، اختاري منهم ومن داخل الصفحة الشخصية تضغطي على زر حجز استشارة هيوصلك بالخبيرة اللي اختارتِها، اسئليها على جلساتها وأسعارها ونظام التواصل شات ولا تليفون وهكذا وفيه منهم بيقدم جلسات بأسعار مناسبة أو مخفضة لأعضاء التطبيق. *** هل الخط اللي تواصلتِ معه كان واحد من الموجودين في السؤال ده؟ لو كان منهم اكتبي تجربتك واللي حصل معك في السؤال أو لو مش منهم جربي كده يمكن حاجة منهم تكون مناسبة لطلبك ويقدروا يساعدوك. https://www.fedni.net/q/81575881 وربنا معك يا رب وتكوني بأفضل حال عن قريب.💚💚
تم النشر الاثنين، ١٧ أغسطس ٢٠٢٦
لعرض السؤال في فدني اضغط هنا