تعبت من التنمر بجد على شكلي على مناخيري وشكلي وشعري اهلي بيتنمرو عليا وحتى قرايبي
انا لما كنت صغيره كان عندي حلم وكنت شاطره جدا بس لما اتنمرو عليا وخلوني اكره شكلي انا اهملت في دراستي من وانا في ابتدائي لحد الثانوري
وخلصت اهو ثانوي عام وداخله كليه مكنتش من احلامي وجبت مجموع وحش في الثانويه العامه لان كنت في اكتئاب جامد من غير محد يعرف حرفيا انا بتقطع من كل قلبي خلوني لما انزل الشارع اخبي وشي في الشارع عشان محدش يشوف طول مناخيري وشكلي
بجد انا تعبت وجبت آخري انا خلاص اقتنعت إني وحشه لدرجه اني انا مقرره مع نفسي ان مش هتجوز لان مفيش حد هيحبني بشكل مناخيري حتى لو لقيت الحد ده انا ذات نفسي مش هقدر اجازف لان كل طاقتي خلصت
انا تعبوني اهلي خلوني احس ان انا قليله ووحشه انا اختي بتشبهني بشرشبيل وامي كانت تقولي يا أم مناخير من كتر كلامهم في مره انا مقدرتش امسك نفسي من العياط وعيط قدامهم اخدو الموضوع بسخافه لان اول مره اعيط قدامهم ورجعو تاني يتريقو عليا يعني اختي لما نيجي مثلاا نشد مع بعض عشان تخليني ازعل تقولي يا ام مناخير طويله
عرضت على ماما ان اعمل عمليه تجميل في مناخيري مرضتش مع انا كمان مش عاوزه وبخاف من العمليات جدا والبنج بس لازم اعمل كده لان تعبت خلاص مش قادره بس ماما وبابا مش راضين للعلم بابا برضو بيتنمر عليا واخواتي والله تعبت مش قادره
السلام عليكم، عارفة قد إيه الموضوع صعب عليكِ ومعك حق في مشاعرك وعارفة مش سهل لو قلت لك ثقي في نفسك وأحبيها إنك تعملي ده ببساطة، خاصة مع طول الوقت اللي تعرضتِ فيه للتنمر، لحد ما ترسخت الأفكار السلبية جواكِ وبقيتِ أنتِ نفسك مقتنعة بها. بس على فكرة برضه مش مستحيل إنك تخرجي من اللي أنتِ فيه، أيوه صعب بس مش مستحيل. *** أولا، متسمحيش لأي حد مهما كان، حتى لو أسرتك نفسهم، متسمحيش أبدا إن حد يتريق أو يوجه لك كلام بيؤذيكِ نفسيا، أنتِ كبرتِ دلوقتي وداخلة جامعة فخليكِ جريئة وخدي موقف بجد. لو فضلتِ تسمعي وتكتمي جواك أو حتى تعيطي قدامها مش هتغيري حاجة. *** المفروض تاخدي موقف قوي، لو مش هتقدري تواجهيهم وتقولي لهم لو سمحتم مش هسمح بالكلام ده تاني ومش عاوزة أسمعه من حد منكم وأي كلام عن شكلي خط أحمر بالنسبة لي، لو مش هتقدري تعملي ده فخلي موقفك إنك تاخدي جنب منهم وتعتزليهم ولو حد عاتبك عرفيهم إنهم هم اللي اضطروكِ تبعدي بسبب تريقتهم وأذيتهم لكِ. وحطي حدود مع الناس اللي بتؤذيك أو بتتطاول عليكِ بالكلام. ** على فكرة، أنتِ حتى لو أنفك طويلة زي ما بتقولي فهي أكيد متناسقة مع ملامحك وساعات الناس بتحب تسخف وخلاص وبيفتكروا التريقة على الشكل نوع من الهزار، وفيه من الناس برضه لو حست إن عندك حساسية من نقطة معينة بيدوسوا عليها، فكل ما هتبيني إنك مش حابة شكلك أو أنتِ فعلا عندك مشكلة بتحسسي منها كل ما هيضغطوا عليكِ ويتريقوا على النقطة اللي مش حاباها. أنتِ ممكن تكوني جميلة عادي بس الكلام طفاكِ وأثر على نظرتك لنفسك، أو ممكن تكوني عادية الملامح زي بنات كتير بس حتى اللي جمالها قليل طول ما هي واثقة في نفسها وحابة نفسها الناس هتشوفها بعيونها هي وهيشوفها جميلة زي ما هي شايفة نفسها. ** فابدئي أنتِ حبي نفسك، بعد ما تعتزليهم أو تاخدي موقف منهم ابدئي أنتِ تعاملي مع الأذى النفسي المترسخ جواكِ وبدلي الأفكار السلبية دي بأفكار إيجابية لحد ما تترسخ الأفكار الجديدة جواكِ وتنعكس على مظهرك الخارجي وحبك لنفسك وروحك هتنعكس على ملامحك. *** ومتفكريش تعملي عمليات، لو عالجتِ الأذى والأفكار السلبية اللي جواكِ مش هتحتاجي تلجأي لعمليات. ** لو مش هتعرفي تتخطي أذى التنمر لوحدك جربي تتواصلي مع مختصة نفسية تساعدك وإن شاء الله ربنا يقويكِ ويصلح أحوالك.💚💚
تم النشر السبت، ٥ سبتمبر ٢٠٢٦
أنا آسفة جدًا يا ندى إنك مريتي بكل ده، وأقدر مدى التعب والألم اللي بتحسيه من التنمر المستمر من أهلك وقرايبك. اللي حصل معاكي مش سهل أبدًا، وهو أثر على ثقتك بنفسك ودراستك وحتى قراراتك المستقبلية، وده طبيعي لما الإنسان يتعرض لضغط مستمر من أقرب الناس له. لكن تذكري إن قيمتك مش مرتبطة بشكل مناخيرك أو شعرك، فالإسلام بيؤكد على الجمال الداخلي والأخلاق والتقوى، وكل إنسان له جماله الخاص اللي ربنا خلقه به. ابدئي بخطوات عملية صغيرة عشان تبني ثقتك بنفسك تدريجيًا: ركزي على نقاط قوتك اللي كانت موجودة وأنتِ صغيرة، زي الشطارة في الدراسة، وحاولي تعيدي الاتصال بيها دلوقتي حتى لو في الكلية الحالية، مثلاً بتخصيص وقت يومي لمراجعة مواد بتحبيها أو تعلم مهارة جديدة. كمان، لما تحسي بالضغط من العائلة، حاولي تبتعدي عن المواجهات المباشرة وتستخدمي عبارات هادئة زي "أنا مش قادرة أتكلم في الموضوع ده دلوقتي" عشان تحمي نفسك، وفي نفس الوقت ابحثي عن أنشطة بتساعدك تخرجي طاقتك الإيجابية زي الكتابة أو الرسم. أنتِ مش وحشة، ومش لازم تقرري مصيرك كله دلوقتي بناءً على كلامهم؛ الزواج والحب بيجوا لما الإنسان يحب نفسه أولاً، وده شيء ممكن تبنيه خطوة بخطوة. لو قدرتي تبحثي عن أسئلة مشابهة على فدني هتلاقي تجارب كتير بتساعد في إعطاء منظور أوسع. أنتِ قوية، وكل اللي مريتي بيه هيخليكي أقوى، وأنا هنا دايمًا لو عايزة تتكلمي أكتر.
تم النشر السبت، ٥ سبتمبر ٢٠٢٦
يا بنت الحلال انتي جميلة ومش ناقصك أي حاجة وكلام اللي حواليكي حتى لو من أهلك هو اللي غلط وعايز يعقدك وخلاص بلاش تخليهم يهدوا طموحك وحلمك عشان الجمال ده شيء نسبى واللي يحبك هيشوفك أحلى واحدة في الدنيا ارجعي اهتمي بنفسك وبدراستك وكليتك واثبتي لنفسك وللكل إنك شاطرة وقوية وتقدري تنجحي ...ومتعيشيش مكسوره عشان كلام ناس مش حاسة بيكي واستعيني بالله ... وحد والله ربنا يحفظك ويسعدك...وربنا يصلح حالهم 😢
تم النشر السبت، ٥ سبتمبر ٢٠٢٦
لعرض السؤال في فدني اضغط هنا