كيف أتجاوز هذا الوضع الصعب؟

Question

قصة حياتي مختصرة نوعا ما! السلام عليكم انا شاب في سن 18 عام حياتي مدمره انا دائما مش بعرف احكي واقول احكي ليه ما هو ربنا الافضل من الكل يسمعني ويحللي مشاكلي بس انا فعلا بقيت بحس وهو بيهديني أو فعلا بيكلمني اوقات الاقي الراديو يجيب ايات قرأنيه على اللي بيدور في دماغي أو الاقي نفسي بفتكر اللي انا عارفه وبرد على نفسي والله معرفشي ممكن اكون بتخيل بس فعلا بحس بكده بس انا مش بسمع الكلام وبفضل اعمل الذنب أو المشكله اللي انا فيها ،انا تعبت من الذنوب والتفكير والمعاصي اللي في حياتي بس انا فعلا مدمر العاده السريه والإباحية دمرتني نفسيا دمرت حياتي كليا ولو كنت بسيطر عليها اوقات بس هي السبب انا مدمن عاده سريه من وانا في تالته اعدادي أو تانيه مش متذكر بس انا الموضوع كبر معايا من ساعه ما دخلت الثانوي انا كنت بصلي بس مش الفروض كلها وكنت بعدت عن حفظ القرآن الكريم برضه انا كنت صغير وزي زي اي طفل ليا حلم في حياتي ومستقبل في خيالي نفسي تحققه معرفتش انا دماغي واقفه دماغي تعبت من الذنوب و الدوبامين الاباحيه ودوبامين التسويف والاسكرول علي الفيديوهات و دماغي تعبت من السلبيات اللي في حياتي ، انا ممكن اللي عرفني الحاجات دي اصدقاء السوء بس برضه مفروض انا عارف الصح والغلط ومكنتيش امشي ورا شيطاني واعمل حاجه زي كده بس للأسف وقعت وندمان دخلت فتره الثانوي بدأت متحمس وبداية جديده انا الحمدلله جايب مجموع عالي دخلني ثانوي مستريح وقلت انا قدها وهكمل وعاوز أخش هندسه بدأت دروسي كويس وبعد كده صحابي بدأوا تعالى نلعب بلايستيشن نروح كافيه ونتأخر ونقول احنا بنفهم أحسن من غيرنا والمنهج سهل لحد بالمعني الحرفي انا مكنتش بروح ولا درس في آخر الترم وفضلت كده سنه أولى اروح مره واغيب مرتين دخلت تانيه قلت لا وبدأت كويس وبرضه وقعت في نفس المشكله بس كانت أسوأ مكنتش بروح درس خالص شربت شيشه وڤيب بس كانت لمده شهر وبعد كده كنت بطلتها ورميت الڤيب وكنت بقا سهر واباحيه يوميا لمدة السنتين دول كان في الاسبوع اربع ايام وخلال اليوم اكتر من 4 مرات و اوقات 8 مرات مفيش صلاة غير صلاة الجمعة عشان من صغري بصليها وبحب أسمع الخطبه عشان كنت بتعلم منها فعلا دخلت تالته ثانوي بدأت كويس فعلا بس المذاكره كانت نص نص وشويه أشد وشويه واقف نزلت جيم بدأت أحاول اصلي والجيم فضلت مستمر عليه اربع شهور وجسمي اتغير فعلا والصلاه كنت بجاهد فيها بس والله العظيم انا خلال فتره التلت سنين دول مكنتش بعرف انام كل احلامي كوابيس كوابيس وكان بيجي جاثوم كتير وانا مكنتيش فاهم ، انا فضلت ماشي في تالته ثانوي كويس لحد ما قررت اقعد في البيت وأكمل اونلاين أحسن وطبعا اوسخ قرار خدته في حياتي وكنا فى رمضان كمان ساعتها من حظي الاسود انا كنت دائما ماشي بمبدأ اني عندي اخوات بنات ومرضاش عليهم حاجه وحشه واللي مرضهوش على بنات الناس مرضهوش على اخواتي بس عشان خلاص يبقا الشيطان ختم معايا كل حاجه وقعني في بنت وكنت كلمتها لمده شهر قبل رمضان وفضلت لحد شهر 5 وسابتني ساعتها عشان خاطر مذاكرتها وانا كنت بدعي في قيام الليل أنها لو شر تبعد عني والحمد لله ربنا تقبل دعوتي بس البنت دي ضيعت وقتي كله هي كانت يومي كله وانا كانت اول مره في حياتي أكلم بنت فكنت عامل زي العبيط بس الحمد لله بعدت بس كلمت بنتين بعدها وسبتهم خلال شهر عشان كنت فقت من الغيبوبة اللي انا فيها والاستهلاك العاطفي اللي كنت فيه بس رجعوا كلموني كلهم بعد الامتحانات بس قفلت معاهم وعملت بلوك وعرفتهم اي صور ليهم مسحتها ومرضاش الشر لأخواتي ومش هرضي الشر ليكم وسيبتهم واحده منهم رجعت تاني في دخلة الكليه بس عملت بلوك من غير ما اتكلم ، انا طبعا دخلت الامتحانات ثانوية عامة وانا نص مذاكره بالمعني الحرفي اجيب 70 % بمذاكرتي وكنت داخل مش هغش لو السماء انطبقت على الارض بس وقعت وغشيت وكانت اللجنه بتاعتي الوحيدة اللي مجامعها عاليه كلها وجبت 84% ودخلت حاسبات ومعلومات اللي هي شغفي اللي اكتشفته لما بحثت في البرمجه وخدت كورس وقلت ده حلمي ، بس عمري ما توقعت أن حلمي اجيبه بالغش والكدب انا حتى النتيجة كنت برسم الضحكه بس جوايا قهره مفيش طعم لحاجة كنت بقول ليه يا رب يا ليتك خلتني أشيل واعيد السنه وادخل بمجهودي انا كنت طول حياتي والدتي معلماني الغش حرام وكنت بخاف اغش ،ولكن دخلت الكليه ودخلت اول ترم اتغربت للأسف بعدت عن امي اللي كانت هي كل حاجه في حياتي ومش بقدر اعدي يوم من غيرها وفعلا حسيت بامي واني من غيرها مليش لازمه وكنت بعيط يوميا اني بعدت ومكنتش مستريح وبقول دي مش اللي انا عاوزه مكنتش عاوز الكليه كده وكنت عاوز احول لتجاره بسبب تأنيب ضميري بس كلمت صديق ليا وقالي رزقك مكتوبلك اذا كان بالحرام أو بالحلال وقالي إحمد ربنا وابدأ صفحه جديده وتوب ، تبت بس معرفتش أذاكر وكنت بنام يوميا اكتر ما كنت بصحى وشيلت اربع مواد في الترم الاول ومش فاهم حاجه وحاليا الترم الثاني ومش بذاكر حاجه برضه انا فعلا ضيعت وقتي من عمري في ذنوب ومعصيه ومازال بس الحمد لله فقت وبدأت اجاهد نفسي رجعت اصلي بحاول اقرأ قرآن لحد ما رمضان يخلص وهشوف شيخ أحفظ القرأن معاه بس مازلت في واقع الاباحيه بس الحمد لله بعدت عن السوشيال ميديا مسحت فيسبوك وانستجرام وتيك توك من أول رمضان بس اليوتيوب الوقت بسرح فيه بس بحاول امنع نفسي الحمدلله اتغيرت عن الاول كتير انا المشكله عندي سلبيات حياتي كتير حتى اهلي ابويا وامي في مشاكل مع اهلهم من زمان انا وعيت علي وش الدنيا لقيت والدي مش بيكلم اخوه الصغير بسبب اخوه غدر بيه وضيع شاق عمره والزيت وقع في أخطاء كتير في حياته وكان يتكلم معايا انت الكبير ذاكر عشان انت الكبير ذاكر عشان تبقا ظهر اخوتك مضيعشي وقت متلعبشي ده متتفرجشي علي ده متعملشي ده ودائما كان يشتم كتير بس كنت بحاول انسي بس مكنتيش بعرف الشتميه كانت بتقهرني ولما كنت اعيط يقولي انت الراجل والراجل مش بيعيط البت بس اللي بتعيط لحد ما فعلا مفيش دمعه بتنزل من عيني والله العظيم انا بدأت اعيط غير من قريب لما بدأت اتكلم مع نفسي واشكي لربنا وتصعب عليا حياتي ، انا كنت معظم الوقت في البيت مش بروح في حته كانت حياتي علي التلفزيون وكنت اوقات اتمنع منه ، ابويا من ضمن اصغر اتنين في العيله ومفيش حد من سني ولاد اعمامي وكمان بسبب المشاكل والظروف الماديه السيئه مكناش بنعرف نروح لحد ولا حد بيجيلنا ودائما يستقلوا بينا مكنوش بيكلموا غير ابويا علي التلفون وامي كانت تقول لوالدي روح لأهلك وخد والدك عشان يتعودا عليهم ويقول حاضر ومش بيعمل حاجه وكبرت مش بشوف أهل ابويا غير في المناسبات والأحزان وبالمعنى الحرفي منعزل عنهم عامل زي المقطوع من شجره ، والدتي ربنا يديها الصحه طيبه بس مشكلتها انها مرضت نفسيا بسبب ابويا وأهل ابويا واهلها ومرضها هي مريضه قلب واكتشفت ده بعد ولادتي وابويا راجل محترم كتر خيره صبره معاها في مرضها لحد دلوقتي وعمره ما ضربها ولا مد ايده عليها ، والدتي يتيمه الاب اصلا وكبرت امها كانت بتعاملها وحش وكانت محمله عليها انها بتساعدها في تربية اخواتها من وهي في الابتدائي كانت تعلمها أمور البيت وطبعا معامله سيئه امي كبرت واتجوزت ابويا قالت بقا هترتاح لقت بقا ابويا وأهل ابويا والمشاكل والظروف الماديه السيئه ومرضها بقا عندها كبت في حياتها امي طيبه وبتحبنا وربتني احسن تربيه وعلمتني وعرفتني الصح من الغلط بس مشكلتها ان الكبت اللي عندها بقا عصبية وامي اصلا بطبعها هاديه بس بقت عصبيه وعصبيتها بقت تتطلع علينا علي اتفه الأسباب هو مش بتضربنا كتير بس كانت بتصوت وتزعق وتشتم كنت تعبت من صوتها بقا تاعبني ودائما بسكت بس مين كانت تحكيله المشاكل وتشتكيه من الظروف انا كنت خزان القرف والسلبيات والضغوط النفسية اللي مرت بيها امي غير كلام ابويا وأنه بيحاول ينصحني واني لا أقع في أخطائه بس طبعا بطريقه تخليني اكره النصيحه اصلا انا الكبير في اخواتي بقا طبعا مرض امي اثر عليها في خدمتنا بس كانت بنحاول والله علي قد صحتها وكنت بساعدها والله اروح معاها السوق وتساعدها في تنظيف البيت واروح اجيب طلبات البيت والمشاوير وكنت مش بطلب مصروف والله انا فاكرها كنت ببقا في الحضانه واوقات مكنتيش باخد مصروف وكنت عمري ما عيط علي حاجه زي كده امي بتقولي انت كنت بتبقا فاهم ومكنتيش بتطلب ومكنتيش بطلب حاجات زي بقيت العيال بتطلب مكنتيش اشوف لعبه كنت اطلبها ببقا عارف ان مفيش ظروف تسمح بيها الهدوم من العيد للعيد كنت عمري ما قولت لا ولا رفضت وبقول الحمدلله إن شاء الله بابا ربنا يرزقه وهيجيبلي اللي نفسي فيه وكنت لما خلاص ببقا نفسي في الحاجه اوي اوي واطلبها وكان يتقالي إن شاء الله وكنت افرح كنت ببقا واثق بكرم ربنا أنه هيرزق ابويا وافضل اسمع كلمه إن شاء الله سنه سنتين تلت سنين فضلت اسمعها العمر كله لحد ما بطلت اطلب حاجه ويمكن الموضوع معتشي كلمه إن شاء الله بس بقت ذاكر عشان لما تكبر تجيب اللي نفسك فيه ذاكر عشان اخواتك البنات مش هيبقى ليهم حد بعد ربنا وبعدك انا بقول الحمدلله بس ليه ذنبي ايه اشوف صحابي اهلهم بيعملوهم حلو اهلي والله بيعاملوني حلو بس انا واخواتي كان بيطلع فينا زهقهم إذا كان زعيق وصريخ أو شتيمه ذنبي ايه تبقا نفسي في الحاجه وخايف اطلبها ذنبي ايه صحابي بيكلموا قرايبهم وبيحبوهم و بيزورا بعض وانا لا ذنبي ايه الاقي جدة صحابي بتحب احفادها ومش بتخبي منهم الاكل ولا بتقعد تستعبدك وتوديني وتبعتني واروح واجي ذنبي ايه لو حصل مني موقف غلط ومش بيبقا قصدي والله واسمع صريخ وانضرب واحس بكسره مشكلتي اني مش بنسي انا فاكر جدي ابو ابويا اللي انا كبرت لقيته متوفي انا فاكره لما كنت عندي تلت سنين مش بعرف انسي فاكر كل كبيرة وصغيره عقلي كان كبير عن سني كنت ببقا في اولي ابتدائي وفاهم أنه مينفعشي اطلب طلبات ملهاش لازمه ذنبي ايه اروح استلف فلوس وابقا رايح اطلب كده علي حس امي أو ابويا واتكسف والله كنت ببقا مكسوف وكنت اخد الفلوس وانا ماشي بقعد في جنب في الشارع واعيط واعيط واحس بقهره والله كنت الابتدائي وفاكر وكنت اتسكف لما اخر فلوس الدرس واحس بنظره صحابي أو المدرس ليا بس كان بيصبروا عليا كنت بحس بكسره كنت بنام معيط وادعي ربنا كتير من صغري وبقول بكره هيبقي احسن بكره هيبقي احسن بكره هيبقي احسن عملت إيه عشان الاقي ابويا كده امي كده أهل امي كده أهل ابويا كده مفيش عم عدل خال عدل عمة عدلة خالة عدلة والله العظيم عمي مات ومكنتيش شوفته بقالي سنتين عمتي اللي كنت بحبها قعدت اكتر من سنتين مشوفتها ومكلمتنيش غير لما نتيجه الثانويه ظهرت ،انا لوحدي انا والله التلفون بتاعي بيفضل طول اليوم عمر ما حد هيرن عليا غير امي أو ابويا عشان بيكمني كل تلت ايام ولا حاجه اكمنه مش بيبقي فاضي معظم الوقت مفيش حتى صاحب عدل محدش اقدر اتكلم معاه اخاف يفضح سري انا حتي لما كنت باجي اكلم امي كانت تسكت شويه وترجع تقلب عليا وتقول ما انت مش بتعمل ومش بتسوي ولو كنت احكي ليها علي مشكله في مدرسه أو مع حد كانت تزعق وتصرخ لو انا عملت حاجه غلطت اتكلمت غلط حتي هي بتقولي معتيش بتكلمني قولتلها ملهاش لازمه انا كده كويس انا بعد ده مفروض ابقا عامل ازاي أو اعيش ازاي انا لما دخلت الثانوي بقيت كل يوم في خناق مع اخواتي و مع امي و لما كانت تصرخ مكنتيش بطيق صوتها كنت اهرب من مشاكل البيت اني أخرج مع صحابي لمده التلت سنين ، انا تعبان والله انا السنه دي تعبت لما روحت الكليه وكشفت إن عندي الضغط وانا حاليا متشخص مريض ضغط بس السبب غير واضح هل بسبب نفسي ولا سبب مرضي بس عملت جميع التحاليل المناسبه وكانت كويسه وكان آخر تحليل عامله من يومين واكتشفت أنه بسبب هرمون معين مش متذكر الدكتور قال ايه بس بسبب أن الهرمون ده بيتم افرازه بنسبه عاليه شويه ده سبب ارتفاع الضغط عندي الحمدلله . نفسي ربنا يريحني من العذاب اللي انا عايشه بس مشكلتي اني لو مت انا معملتيش حاجه تدخلني الجنه ،انا تعبت والله فاض بيا بس لسه عندي أمل في ربنا اني اتغير عندي امل ان في الاخر هفرح بس مش عارف اعمل ايه ابدأ ازاي انا بقيت صفر في كل حاجه دماغي بطلت تشتغل في مذاكرة بطلت تشتغل في صلاه بصلي بالعافيه بطلت تطيق انها تسمع فيديو طويل اعلم منه حاجه ،الحمدلله انا راضي بقضاء الله واسف اسف جدا على الكلام الطويل ده انا سرحت وافتكرت حاجات كنت ركنتها في جنب بس كنت عاوز افضفض يمكن حد يقولي حاجه تساعدني وشكرا

Accepted Answer

لو مش عايز ترجع للذنب - عاقب نفسك لوعملته بس بحاجه حلوه زي صدقة مثلا تطلعها لو رجعت للذنب ده او انك تصلي 20ركعة تطوع أواستغفر 1000مره أي حاجه تخليك تمنع نفسك عن الذنب تاني حاجة بالنسبه للنفس الأمارة بالسوء ملهاش غير انك تكون أقوى منها ودا بيكون بعدة طرق أولا انك تجاهدها وتكلمها وتقف قصادها وعلشان تتغلب على النفس دي الطريق الوحيد اللي يخليك تقوى عليها هوا الطاعات كل ما تعمل طاعة لله عز وجل هتخليها تحت طوعك وأهم الطاعات هيا:( الطاعات اللي بتحتاج مجاهدة نفس) لانك كل مره بتغلبها بتصبح أضعف وانتا بتقوى عليها زي الالتزام بالتكبيرة الاولى في المسجد لمدة 40يوم دا بالإضافة إلى أنو هيبرأك من النار والنفاق هوا من أشد التمارين اللي هتكسبك انضباط وتحكم عالي في النفس والالتزام بصلاة الضحى وقيام الليل وغيرها. - بس كدا هوا موضوع البعد عن الذنوب دا ومجاهدةالنفس دا عضلات انتا بتنميها وتكبرها كل ما تزود في الطاعات -والدنيا كلها تعب وانتا اللي بتختار التعب اللي يناسبك إما تعب مع توهان وضياع وذنوب ونار وإما شوية طاعات للخالق عز وجل في دنيا فانية (ده تعب وده تعب بس احدهم يصحبه شقاء في الدنيا وفي الاخره واحدهم يصحبه نعيم في الدنيا والاخره)وماهي إلا ساعة وسنلقاه وأسأل الله تعالى أن يرزقنا وإياك لذة النظر لوجهه الكريم وأن يعيننا على أنفسنا فلا حول ولا قوه الا به +دعاء تطهير النفس:(اللهم آت نفوسنا تقواها وزكها أنت خير من زكاها أنت وليها ومولاها ياحي يا قيوم برحمتك استغيث اصلح لي شاني كله ولا تكلني الى نفسي طرفه عين ابدا) الخلاصة : انتا لازم تقعد قعدة مع نفسك وتاخد كام يوم إجازة بس متكونش اجازة فاضية لازم تملأها بحاجات كتير تشغلك عن كل معصية +لازم كل يوم تحاسب نفسك قبل ماتتحاسب تعرف عملت ايه وتتابع تقدمك هتتشجع وترجع أحسن من الأول ولو وقعت تاني لا تيأس .. (قُل يا عبآدي الذين اسرفوآ علىٰٓ انفسهم لا تقنطوا من رحمه اللٰه ان الله يغفر الذنُوب جميعاٰ) . . ولّا انتا شايف ايه 🙂

Answer

عليكم السلام ورحمة الله وبركاته إزيك يا صديقي مبدئيا أنتا فعلا عشت حياه صعبه وإتحرمت من حجات كتير بس أنا مبسوط بيك جدا إنك لسه عاوز تتغير ومش راضي عن الحجات الغلط اللي إنتا وقعت فيها وعلي فكره مش لازم أبدا تلوم نفسك أبدا إن إنتا كنت عارف إن الحجات اللي إنتا بتعملها غلط ومع ذالك كملتها كلنا غلطنا وبنغلط المهم نعترف بغلطنا ونحاول نصلحه بسرعه نصيحتي ليك حاول علي قد ماتقدر تقرب من ربنا وإشغل وقتك ماتسبش عندك وقت فراغ إتعلم رياضه خد كورسات المهم ماتسبش عندك وقت فاضي ده المفتاح اللي هيخليك تبطل إباحيه وأي عاده سيئه وإنسي كل اللي فات وركز علي مستقبلك وحاول تحسن علاقتك بإخواتك وأهلك وإصبر علي أذاهم وربنا ييسرك أمورك.

Answer

شوف هقولك حاجة مبدائيا الدنيا دي مش جنة وفيها حاجات صعبة كتير وصدقني والله انا عديت بحاجات صعبة برضو بس فهمت ان دي الدنيا احنا هنا في دار ابتلاء يعني ايه؟ يعني دار شقاء طيب هتقولي انا تعبت هقولك والأنبياء تعبوا والرسل تعبوا والصحابه تعبوا مفيش حد عايش مش تعبان طب هل مكتوب علينا نفضل مهمومين وتعابيبن طول العمر ؟ هقولك لا. لانك وسط المشاكل دي كلها والابتلاءات تقدر تكون سعيد وتحس بالراحة من جواك المشكله مش في اللي احنا شفناه في حياتنا. المشكله فينا احنا إننا شوفنا الوحش بس مش بلومك والله انا عارفه إننا ساعات بننسي نعم كتير في حياتنا ربنا اكرمنا بيها بس على الجانب الاخر النعم دي لو كانت اتاخدت مننا مكناش هنعرف نعيش بيها وبالنسبه لموضوع الإدمان ده لازم تروح لمتخصص. الموضوع مش هيروح بالاراده ولا الدين الموضوع بجد نفسي محتاج علاج واظن لو صلحته و اتعافيت حاجات كتير هتتغير في حياتك. هتعرف تضبط حياتك انصحك تنزل الجيم او تمارس رياضة ده هيساعدك كتير وغير كده بقا هنصحك بجد اوعي تيأس من نفسك لأن ده اللي الشيطان عايزه مهما عملت واذنبت عندك باب توبه مفتوح ربنا. مش غلط انك تغلط لكن الغلط انك تفضل مستمر عليه وشايفه عادي انت جواك شخص طيب بلاش تخلي الشيطان يقنعك انك هتفضل كده واعرف ان ربنا بيبتلي عبده اللي بيحبه اكتر الناس ابتلاء كانت الأنبياء والرسل بعدها الصالحين وهكذا فكل ما تحس ان الدنيا ضاقت اعرف ان ربنا بيحبك. انت عايز تصلح حياتك لان ربنا لسه عايزك ترجع فيه ناس عايشه في المعصية ولا هاممها لكن انت بتحس بالذنب وده أكبر دليل ان ربنا عايزك ترجع ابدأ صفحة جديده مع نفسك. انزل صلى في المسجد. روح احفظ قرآن. خلي عندك صحبة صالحة تعينك اهم حاجة. اتعلم علم شرعي عشان تكون مسلم عنده علم مش جاهل بدينك واساسياته. حاول عشان نفسك وعشان الجنة تستاهل سلعه الله غاليه محتاجة إننا نتعب عشانها واوعي تفتكر انك بعد ما تقرأ كلامي هتقوم وحياتك تتغير لا الموضوع محتاج صبر وعزيمه على التغيير ومحتاج استمراريه. ولما اقولك صبر فانا بتكلم صبر بجد مش يومين وخلاص. الرسل صبروا على اقوامهم في الدعوه عشرات السنين عشان بس رسالتهم توصل. احنا محتاجين نصبر على نفسنا و منيسأش لان لا ييأس من روح الله الا القوم الكافرون. توب عن كل اللي فات في حياتك وارجع ولو حسيت ان ذنوبك كتيره افتكر الآيه دي قل يا عبادي الذين أسروفوا على أنفسهم لا تقنطوا من رحمة الله إن الله يغفر الذنوب جميعا كل الذنوب بتتغفر بمجرد ما تنوي التوبة لازم تاخد خطوه جديه في حياتك وتروح لاخصائي نفسي يساعدك في موضوع الإدمان ده لازم لازم أخصائي. وبس اتمنى مكونش طولت.

كيف أتجاوز هذا الوضع الصعب؟

نفسية

اجتماعية

سؤال من احد أعضاء فدني

تم النشر الجمعة، ١٣ مارس ٢٠٢٦

4 إجابة

7 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك