مبدئيا انا عارفه ان تفكيري غلط بس معلش ياريت لو حد يفيدني لان شايفه دا مش حنيه بس عيب .
بصو انا بيصعب عليا اي حد بمعنى حتى لو الحد دا غلطان بيصعب عليا جدا جدا وقلبي بيوجعني زي مثلا شفت قبل كدا ٢ شباب اخوات قتلوا حد كانو هيسرقوا بيته ولكن قتلوه فكان حكم الإعدام متصور لحد ما راحوا للمشنقه وكانوا ندمانين وفي واحد لما سألوه نفسك فإيه قال نفسي ربنا يغفرلي وانا اتفتحت في العياط وعماله اقول ليه يعملو في نفسهم كدا والشيطان اغواهم وشعور اهلهم دلوقتي ايه وهو ابنائهم الاتنين هيموتوا ولحد دلوقت كل م افتكر قلبي يوجعني ،
طبعا مش بقول ان ميتحاسبوش ويتم القصاص بس مش عارفه مالي ، الكبيره بقى لما بشوف حد اسرائيلي ودا كان فيديو بيمد ايده يسلم على واحد عربي وهو مواطن يعني مش جندي فالعربي مرضاش يسلم وكسفه انا بق بهبلي زعلت عليه جدا وانه هو مواطن اي ذنبه فاللي رئيسه بيعمله وطبعا مش مستنيه حد يقولي طب واللي بيعملوه في اخواتنا انا عارفه دا كويس وعارفه تفكيري غلط .
ومره تانيه كنت راجعه من الدرس فمسكو واحد بيسرق من السوق مش عارفه بق خضار ولا فلوس ووالله قلبي وقف من المنظر الناس كلها اتلمت وضربوه كتير اوي يعني اتهان واللّه وكان نفسي اقلهم يسيبوه والناس مسكته وكانوا اخدينه للضابط وكلو ماشي وراه واتفضح واتبهدل خالص والله والله كنت هعيط ولولا اني خايفه من الناس كنت قلت سيبوه وفضلت افكر ياترى لو ليه اهل واولاد اي احساسهم وهو اتكسر كدا وولي يتبع خطوات الشيطان م كان اشتغل 😓
انا والله مش ببرر الغلط والحرام بس عايزه اكون متزنه نفسيا ومزعلش كدا على حد يستاهل العقاب ، بكره القسوه بكل اشكالها وبخاف من اي حد كدا وبكره اي زعيق وصوت عالي الناس لما يكون في مشكله بتفضل تتفرج بل بتفاجئ البعض بيقول ان بيحب دا وعنده فضول ولكن لما بشوف حد بيضرب او ينضرب او يتأذي بأي شكل بفضل اعيط ومش بنسى وفدماغي ليييه الناس تعمل كدا لي القسوة يعني اللي سرق خضار دا ليه يفضحوه ويمشو وراه طب م كانوا ودوه القسم وبس مهو دا ذنب مش يمكن يتوب ،
بحس الناس بتدور على جروح بعض وتدوس عليها ، تعبت من اني اخرج مالبيت ونفسيتي هشه جدا ودا مدايقني يعني والله بعيش الموقف اكتر من صاحبه وافضل افكر طب احساسه دلوقت ازاي طب اهله طب ولاده . واللّه تعبت من كدا ليه القسوة😭😭واللّه بخاف اتعامل لو حد قسي عليا ولا كسفني ولا حد رفع صوته بس بنهار حرفيا وبخاف مش بزعل بس بخاف ودماغي بتقف .
فيدوني بالله انا مش عايزه اكون كدا لازم اكون قويه نفسيا لأن بشخصيتي دي مش هعرف اتعامل مع مجتمعاتنا
السلام عليكم، مش أنتِ لوحدك على فكرة، ناس كتير كده، كل الحكاية إن قلبك رهيف وحساس وبتعطي قيمة للإنسان أيا كان هو مين. لكن طالما قادرة تفرقي بين شعور الشفقة والتعاطف على بشري مهما كان وبين التبرير للجرائم فبلاش تقسي على نفسك كتير. تفهمي طبيعتك ومتقاوميش عشان المقاومة بتزود الشيء اللي بتقاوميه. كل اللي تعمليه أول ما تحسي بتعاطف إنك على طول تفكري في الضحية ومشاعرها وتفكري عقلك بالظلم أو الجرم اللي ارتكبه الجاني. متفكريش في التفاصيل الكتير ورا كل مشهد، التفكير الكتير في التفاصيل ومشاعر الجناة هو اللي بيوصلك للحالة دي... زي ما قلت ممكن انقلي تفكيرك لمشاعر الضحية لكن برضه متغرقيش في التفاصيل، مجرد تذكير وتصحيح لمسار أفكارك. ممكن ده يبقى صعب في الأول لكن مع الوقت والتدريب هيكون أسهل.💚
تم النشر الثلاثاء، ٧ يوليو ٢٠٢٦
أنتِ تمتلكين قلبًا رقيقًا وحساسية عالية تجاه آلام الآخرين، وهذا في حد ذاته صفة جميلة وإنسانية، لكنها أصبحت تثقل عليكِ نفسيًا وتجعلكِ تشعرين بالإرهاق والخوف من مواجهة الحياة. ما تصفينه ليس "غلطًا" تمامًا، بل هو تعاطف زائد يحتاج إلى توازن حتى لا يتحول إلى عبء. في الإسلام، الرحمة مطلوبة، والنبي ﷺ كان يرقّ قلبه للناس، لكن الرحمة لا تعني إلغاء العدل أو القصاص؛ فالله سبحانه وتعالى رحيم وعادل في آنٍ واحد، وهذا التوازن هو ما يساعدنا على التعامل مع الواقع دون أن ننهار. لكي تصبحي أقوى نفسيًا دون أن تفقدي رقّتكِ، جربي أن تفصلي بين الشعور بالأسى على الشخص وبين قبول العقاب كنتيجة طبيعية لأفعاله. عندما يأتيكِ الموقف، ذكّري نفسكِ بأن الشخص اختار طريقه، وأن الرحمة الحقيقية قد تكون في الدعاء له بالهداية أو التوبة بدلًا من التمني ألا يُعاقب. هذا لا يعني أن تكوني قاسية، بل أن تحمي قلبكِ من الغرق في مشاعر الآخرين. كذلك، حددي لنفسكِ "حدودًا عاطفية" صغيرة: عندما تشعرين بالانهيار، اسمحي لنفسكِ بالاعتراف بالشعور ثم حوّلي انتباهكِ إلى شيء عملي مثل الدعاء أو التفكير في كيف يمكن للمجتمع أن يحمي نفسه من الجرائم بدلًا من التركيز فقط على ألم المذنب. أنتِ لستِ مطالبة بأن تكوني "قاسية"، بل بأن تكوني متوازنة، وهذا يأتي بالتدريج من خلال تذكير نفسكِ يوميًا بأن قوتكِ لا تتعارض مع رقتكِ. كثيرات يمررن بمثل هذه الحساسية الشديدة، ومع الوقت والوعي يتعلمون كيف يحمون أنفسهن دون أن يفقدن إنسانيتهن. يمكنكِ البحث عن أسئلة مشابهة على فدني لتري تجارب أخريات وتستفيدي من وجهات نظر إضافية. أنتِ قادرة على التغيير، وهذا الوعي الذي لديكِ الآن هو أول خطوة نحو التوازن الذي تطمحين إليه.
تم النشر الاثنين، ٦ يوليو ٢٠٢٦
انتي محتاجة تتقبلي إن مش كل إحساس لازم يتغير. وجود الرحمة في قلبك مش مشكلة، المشكلة إنك بتسيبي كل موقف يستهلكك. طالما عارفة تفرقي بين الرحمة وبين تبرير الغلط، فمفيش حاجة محتاجة تتصلح. اللي محتاج تركزي عليه هوا إنك بعد ما الموقف يخلص متفضليش تعيشي فيه بالساعات والأيام، لأن ده مش هيغير اللي حصل، وهيتعبك إنتِ بس.
تم النشر الاثنين، ٦ يوليو ٢٠٢٦
شكرًا لحضرتك فعلا ممكن كدا بس تعرضت لكدا مش بشكل مباشر ولكن زي البيت او موبايلات اخواتي بتتسرق ولكن برضو مش بغل اوي عالشخص اللي عمل كدا بمعنى بأشفق عليه من حساب ربنا وبشوف انه اتبع خطوات الشيطان ووصل لكدا وحتى لو حد اذاني جدا زي مثلا الناس اللي بتغش وبتعلي التنسيق عليا الناس كلها بتدعي وانا مش بعرف لأن شايفه حساب اللي بيعملوه صعب جدا وبشوف الناس كلها بتدعي عليهم فبقول هم فغفله وانا مسامحه بس يارب يتوبوا ويفوقوا ، اللي مدايقني في هو كثرة البكاء والهشاشه النفسيه وبإذن الله هحاول اصلحها ، لا مش بثق فحد بسرعه ابدا بل بفضل سنين عشان اعرف اتعامل بطبيعتي مع اي حد
تم النشر الأربعاء، ٨ يوليو ٢٠٢٦
أظن انك مش بتتعرضى للمواقف الى زى كده كتير زى النصب أو حد يسرقك او يستغلك و هاكذا فا ده بيخليكى تتطمنى للكل و تشوفى الكل طيب و انه مهما عمل هوا إنسان و بيغلط أيوا فعلا الإنسان بغلط بس لازم يوقف و يعرف غلطه هوا أنا فعلا ماعكى انه شعب قاصى لاكن الشخص الى تعرض للضغط و المشاكل يصبح صلب ذهنيا لأنه كل ما جسمك تعرض للألم كل ما جسمك بنا مقاومة ضد الألم إنما الحياة اللى مفيهاش ضغط و مشاكل و لا أى عقبة فى حياته أقل موقف ممكن يخليه يبكى يومين ، يعنى انا عاوزك تتخيلى معايا شخص عمره ما تعرض للنصب و لا لسرقه ولا لأى موقف مؤلم هل تتوقعى و شخص نصب عليه فى أتنين كيلو موز ممكن يقعد حزين يومين فا هل تتوقعى أن الشخص ده يقدر يواجه الحياة لا طبعا فا لو أنتى متعرضتيش لمشاكل كفايه وضغوط كفاية فقد تكون دى النتيجه أو يمكن انا بفتى و انتى مثلا عندك متلازمه معينه او مرض نفسى معين بعد الشر عليكى طبعا انا بس بتوقع مش اكتر و فى النهاية شوفى أيه الى و صلك للمرحله دى وحاولى تحليها لأن دى مشكله فعلا و ممكن اى شخص يستغل الثغرة دى لأنك شايفه الكل طيب و بتثقى بسرعه ، انا حاسس ان الثقه ملهاش علاقه خالص و حاسس أنى عكيت جامد بس اتنمى أكون فيدتك و انصكك تقرى كتاب فن اللا مبالاة او كتاب لا يمكنك إيذائى أيوا انا عارف أن الكتب دى لا تليق بأنثى بس ممنك تفيدك
تم النشر الأربعاء، ٨ يوليو ٢٠٢٦
لعرض السؤال في فدني اضغط هنا