زوجي أفصح أنه يريد طلاقي و لكن بيننا طفلة .
يهجرني و يريد أن يستمر في ذلك. هل أستمر معه أم أتركه
الانسحاب مباشرة دون محاولة الإصلاح أظن إنه شيء ممكن تندمي عليه مستقبلًا، جربي تقعدي معاه قعدة صفا وتفهمي منه ايه اللي مضايقه وتصارحيه إنت كمان باللي مضايقك، وتبحثي معاه لو فيه حلول للإصلاح، ولو انتم الإتنين مش قادرين تصلحوا اعرضي عليه تروحوا لاستشاري أسري يساعدكم على إصلاح علاقتكم والوصول لنقطة تواصل جيد بينكم الطلاق ده بنلجأ له بعد ما تغلق كل أبواب الإصلاح ونستنفذ كل الطرق، فحاولي الأول قبل الإنسحاب أو الانفصال لعل وعسى ربنا يكتب لكم الصلاح وادعي كتير وصلي على سيدنا محمد بنية تفريج همكما والصلح بينكما
تم النشر الأحد، ١٥ مارس ٢٠٢٦
بصي الدين والشرع بيقولوا ...فإمساك بمعروف أو تسريح بإحسان.... فكرة إنه يهجرك ويسيبك معلقة دي وضع لا يرضي الله ولا رسوله، وإنتي ليكي حق في حياة مستقرة وكريمة. ومفيش حد هيدلك على الصح زي ربنا. صلي صلاة استخارة وادعي ...اللهم اخْتَر لي ولا تُخيّرني... وربنا هييسر ليكي القرار اللي فيه الخير ليكي ولبنتك. ومتفتكريش إن الاستمرار في بيت مكسور فيه هجر وإهمال هو ده اللي في مصلحة البنت. البنت محتاجة بيئة هادية وأم نفسيتها مرتاحة عشان تطلع سوية. حاولي مع حكم من أهله القرآن الكريم وصى بـ ...فابعثوا حكماً من أهله وحكماً من أهلها... لو فيه حد كبير وحكيم يقدر يواجهه ويشوف نيته إيه هل هيصلح حاله ولا خلاص بايع؟ يبقى عملتي اللي عليكي لآخر لحظة. ولو لقيتي الأبواب اتقفلت وهو مصر على الهجر، فكري في نفسك وفي كرامتك. ..وإن يتفرقا يغنِ الله كلاً من سعته..، ربنا مش هيضيعك إنتي وبنتك أبداً. الخلاصة استخيري، ودخلي حد حكيم، ولو مفيش تغيير.. يبقى كرامتك وراحة بالك إنتي وبنتك أهم من أي بيت ملوش أساس. وجد ربنا يحفظك ويسعدك
تم النشر الأحد، ١٥ مارس ٢٠٢٦
فكرة إن الزوج يقرر الانسحاب أو الهجر بسبب 'خلافات عادية' ده معناه إن فيه فجوة في التواصل بينكم محتاجة وقفة حقيقية.نصيحتي ليكي عشان تاخدي قرار صح: 1.الهدوء التام: متخديش أي قرار وأنتي في حالة زعل أو تحت ضغط هجره ليكي. الهجر وسيلة ضغط صعبة، بس حاولي متخليهاش تكسرك أو تخليكي تترجي وجوده. 2.جلسة مصارحة أخيرة: اطلبي منه قعدة هادية، بعيد عن البنت، وقوليلو: 'إحنا بينا طفلة ومستقبل، والخلافات العادية ممكن تتحل لو فيه نية صادقة. هل أنت فعلاً بايع العشرة عشان أسباب ممكن تتصلح؟'. 3.وسيط حكيم أو استشاري: لو الخلافات 'عادية' زي ما بتقولي، فممكن جداً جلسة مع حد متخصص في العلاقات الزوجية (Marriage Counselor) تفتح عيونكم على حاجات مش شايفينها وتنقذ البيت. 4.فكري في نفسك وبنتك: لو هو مصر على الهجر والطلاق رغم كل محاولاتك، افتكري إن بنتك محتاجة 'أم قوية ومتزنة نفسياً' أكتر ما هي محتاجة بيت فيه أب حاضر جسدياً وغائب روحياً وبيهجر أمها. 5.استخيري: مفيش أحسن من ربنا تلجأي له في الحيرة دي. صلي صلاة استخارة، وربنا هييسر ليكي اللي فيه الخير ليكي ولبنتك.وافتكري دايما الطلاق مش نهاية العالم، والاستمرار في علاقة فيها هجر وإهانة لمشاعرك برضه مش حل. المهم إنك تعملي اللي عليكي عشان لما تبصي لعين بنتك بعدين، تكوني عارفة إنك حاولتي بكل طاقتك تحافظي على البيت، وربنا يكتبلك الصالح ويألف بين قلوبكم لو فيه خير.
تم النشر الأحد، ١٥ مارس ٢٠٢٦
بسبب خلافاتنا العادية المتكررة
تم النشر الأحد، ١٥ مارس ٢٠٢٦
ماهو ايه السبب ف كدا ، لازم توضحي عشان كل سبب ليه علاج
تم النشر الأحد، ١٥ مارس ٢٠٢٦
لعرض السؤال في فدني اضغط هنا