ياريت تفيدوني بعد اذنكم
هل الشعور بالندم ممكن يوصل لمرحلة نفسيه سيئة جداً وازاي اتغلب على الشعور ده
السلام عليكم، أيوه ممكن الإغراق في الندم يوصل لمراحل سيئة ويسبب مشاكل نفسية كتيرة. الندم كشعور كويس في إنه يمنعك ترجع لنفس الخطأ، إحساس الألم اللي بيسببه الندم كافي يمنعك تكرر الأخطاء اللي ندمان عليها، لكن إن يفضل الندم شعور ملازم لك فده مش صح وهيؤثر سلبًا على حياتك. ** عشان تتغلب على الإغراق في الندم لازم تبرمج عقلك ونفسيتك على: إن ربنا غفور رحيم بيتجاوز عن أخطائنا ما دام رجعنا عنها وندمنا. إن الندم مش هيغير أي شيء، أنت مش هتقدر ترجع للماضي عشان تغير اللي حصل. إن الماضي لازم يكون وراء ظهرك، إذا فضلت شايله على كتافك خطواتك هتتقل ومش هتتقدم للمستقبل. إن الماضي مهما كان مؤلم وفيه أخطاء بتندم عليها هي مرحلة وعدت والتصرف الوحيد الصحيح تجاهه هو إنك تاخد العبرة من اللي حصل، كل تجربة بتمر بها فيها دروس ورسائل إذا متعلمتش من الدروس دي يبقى مأخدتش حاجة من الماضي غير الألم. ** حاول كده مع نفسك الأول تجرب إعادة برمجة لتفكيرك ومشاعرك وإذا الأمر كان صعب أو وصلت لمرحلة نفسية سيئة بسبب استغراقك في الندم فجرب ساعتها تستعين بمرشد نفسي أو طبيب يساعدك بخطوات عملية في تجاوز الندم والماضي. ** بالتوفيق إن شاء الله.
تم النشر الخميس، ٢٢ يناير ٢٠٢٦
للاسف اه بيوصل لمراحل وحشة اوي بس مع الناس الضعيفة وهنا مش قصدي الضعيف الجسدي او المادي لاء ضعيف الايمان ب ربنا -لما حد بيغلط او يعمل حاجة غلط او حرام دا بيبقي اختبار من ربنا حطك فيه علشان يشوفك هتتعلم من غلطك وتتوب ليه وتستغفره ولا هتندم علي فعل الغلط دا وبس وتنسي قوله تعالي بسم الله الرحمن الرحيم (قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِنْ رَحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ) مهما كان الغلط ربنا فاتح باب رحمته
تم النشر الأربعاء، ٢١ يناير ٢٠٢٦
يا أخي العزيز، أهلاً بك! الندم شعور طبيعي جداً، ونعم، ممكن يوصل لمرحلة نفسية صعبة زي الاكتئاب أو القلق المزمن لو استمر فترة طويلة، خاصة لو كان على خطأ كبير. بس الخبر الحلو إنك تقدر تتغلب عليه تماماً، وده هيخليك أقوى. ازاي تتغلب عليه خطوة بخطوة: اعترف واستغفر : قل "أستغفر الله" بصدق، وتذكر إن التوبة في الإسلام تمحي الذنب. ربنا غفور رحيم، مش هيحاسبك إلى الأبد. اكتب اللي حصل : خد ورقة واكتب الخطأ، اللي تعلمته منه، وازاي هتتجنبه في المستقبل. ده هيحول الندم لدرس قيم. عوض الضرر : لو أمكن، اعتذر للي آذيته أو صحح الغلط. لو مش ممكن، ركز على أعمال صالحة زي الصدقة أو مساعدة الآخرين. ركز على الحاضر : حدد هدف صغير يومي (زي قراءة صفحة قرآن أو رياضة خفيفة)، وكل يوم احتفل بإنجازك. الندم بيروح لما تشغل نفسك بالإيجابي. تابع تقدمك : بعد أسبوع، راجع إيه اللي تحسن. لو الشعور مستمر قوي، روح للخبراء في https://www.fedni.net/experts – في متخصصين نفسيين هيساعدوك بشكل شخصي. جرب الخطوات دي النهارده، وهتلاقي الندم بيقل تدريجياً. أنت قوي وهتقدر، وأنا فخورة بك إنك بتسأل!
تم النشر الأربعاء، ٢١ يناير ٢٠٢٦
طبعا الشعور بالندم وجلد الذات المستمر مش بس هيجيلك أمراض نفسية لا ده ممكن يقلب بأمراض جسدية كمان في المستقبل. الندم ده اكتر حاجة بتضيع الصحة على الفاضي والله اصل تندم ليه اصلا؟ مفيش حاجة في الدنيا تستاهل إننا نندم عليها احنا جايين نتعلم. الندم المعتدل حلو عشان متكرريش الغلط بس. إنما جلد الذات ده عذاب لنفسك. ده ربنا رحيم بينا ومجرد ما نتوب ونستغفر ربنا عز وجل بيغفرلنا. انت ليه بقا متسامحش نفسك وتغفر لها انت كمان ؟
تم النشر الأربعاء، ٢١ يناير ٢٠٢٦
اعمل حاجات بسيطة ودائمة تخليك راضي عن نفسك .. اولهم الصلوات الخمس
تم النشر الجمعة، ٢٣ يناير ٢٠٢٦
لعرض السؤال في فدني اضغط هنا