السلام عليكم ورحمة الله،
أنا حاليا تالتة ثانوي ستيم وفاضلي وقت قليل على الامتحانات، ومحتاج أذاكر حاجات كتير، المشكلة أني واخد الأمور بتهاون وعدم جدية ومش بستغل الأيام وبضيعها، أنا مش متوتر أو خايف لكنها فترة مهمة جدا، فأنا عايزك تكتب أي حاجة فيها قسوة وتأنيب أو بأسلوبك عادي لأني بتأثر بالنصيحة بالذات لما تكون موجهة ليا، وهحتفظ بيها وهقرأها أكتر من مرة وجزيت خيرا مقدما.
بص خليني أقولك ان انت اللي بتعمل في نفسك كده ومحدش غيرك هيتحاسب على ده انت عارف إن الوقت قليل وعارف إنك محتاج تذاكر وبرضه سايب نفسك تضيع الأيام وبتقول مش متوتر كأنها حاجة كويسة مع إنها في الحقيقة استهتار واضح لأن الطبيعي تبقى قلقان شوية يخليك تتحرك مش قاعد مستني المزاج ييجي المشكلة مش إنك مش قادر المشكلة إنك مش عايز تتعب دلوقتي فبتهرب وتريح نفسك لحظيًا وبترمي الحمل على نفسك بعدين وده اختيارك انت مش ظروفك وفكرة إنك مستني حد يشد عليك أو يقولك كلمتين يغيروك دي وهم لأن مفيش كلمة هتذاكر مكانك ولا هتدخل الامتحان بدالك اللي هيفرق فعلا إنك تقوم دلوقتي وتبدأ حتى لو غصب عنك وتكمل حتى لو مش طايق لأن بصراحة لو كملت كده انت ماشي بإيدك ناحية نتيجة مش هتعجبك وساعتها مش هينفع تقول أصل ومكنتش ومش عارف لأن كل ده معروف من دلوقتي انت مش محتاج تبقى مثالي ولا تذاكر بالساعات من أول يوم بس على الأقل ابقى صادق مع نفسك واقعد ذاكر جزء واضح خلصه و اللي بعده من غير ما تسيب نفسك تفاوضك كل شوية كل مرة تقول بعد شوية انت بتختار التأجيل وكل تأجيل ليه تمن وانت اللي هتدفعه في الآخر لو عايز تلحق نفسك فعلا اقفل أي حاجة بتضيع وقتك دلوقتي وافتح أول مادة قدامك وابدأ حتى لو ساعة واحدة بس بجد مش بالكلام لأن الفرق بين واحد بيعدي وواحد بيقع مش الذكاء ولا الظروف الفرق إن واحد قعد وذاكر والتاني فضل يقول هبدأ..و انت بنفسك تختار عايز تكون انهي فيهم. (اسفه ع الاطاله)
تم النشر الثلاثاء، ٢٨ أبريل ٢٠٢٦
وعليكم السلام ورحمة الله وبركاته.... جربت تشوف فرحة الاهل لما اولادهم بيطلعوا من الاوائل؟؟؟ و قد اى هما بيبقوا اسعد من الابن اصلا!!.. جربت تشوف مستقبلك بعد عشر سنين وانت فاشل علشان مذاكرتش السنه دى وانت متمرمط علشان تجيب مصروف لبيتك او انك مش قادر تلبى طلبات بيتك بشكل كافى علشان ف وظيفه مرتبها قليل... و شعورك لما تبقى صارف ع ابنك كتير ف تعليمه و ف الاخر ميذاكرش زى شعور باباك يعنى كدا اكيد هتزعل منه و عليه صح؟؟؟؟... جربت تقعد ع الكتاب خمس دقايق بس؟..جربت تفكر ف تعب اهلك معاك و املهم فيك؟... جربت تفكر شكل اهلك هيبقا اى بعد ما تجيب مجموع مش كويس؟... انت ليه عايز تحفيز مننا و تحفيزك لنفسك فين؟؟؟ علفكرا الناجح اللى مش بيستى حد يحفزه هو بيحفز نفسه بنفسه بيفكر ف الاضرار اللى هتضيع مستقبله و يتجنبها و كل ما يقع يقوم و مش بيهتم بالوقت و بيبدا مهما كان الوقت ضيق و مؤمن بالله و توفيقه و مش بيهتم بالظروف و مش مستنى حد يجى يفوقه... انت مسؤول و سواء كنت عارف او مش عارف تذاكر فبرضو لسا مسؤول من المذاكرة.. المذااااكره مسؤوووليه مش شغف و تحفيز... والسلام عليكم
تم النشر الأربعاء، ٢٩ أبريل ٢٠٢٦
وعليكم السلام ورحمة الله وبركاته يا أخي الغالي، يا ولد، أنت في تالتة ثانوي ستيم، وده مش لعبة! الوقت بيجري زي السيف، وقد قال رسول الله صلى الله عليه وسلم: "اغتنم خمساً قبل خمس: شبابك قبل هرمك، وصحتك قبل سقمك، وغناك قبل فقرك، وفراغك قبل شغلك، وحياتك قبل موتك". أنت مش خايف ولا متوتر؟ طيب، ده خطأ كبير! اللي مش خايف بيضيع، واللي بيستهتر بيندم. تخيل نفسك بعد الامتحانات، لو نجحت هتقول "الحمد لله، جديتي نفعتني"، بس لو رسبت أو طلعت ضعيف، هتقعد تلوم نفسك: "ليه ما جددتش؟ ليه ضيعت الأيام دي؟" الندم ده أقسى من أي ضربة، يا أخي. أنت مسؤول عن مستقبلك، عن أهلك اللي بيأملوا فيك، عن نفسك اللي تستاهل النجاح. التهاون خيانة لنفسك، وخيانة للفرصة اللي ربنا أعطاك إياها. كفاية كلام، يا بطل! ابدأ دلوقتي: قسّم اليوم : ٨ ساعات مذاكرة مكثفة، كل ساعة ٥٠ دقيقة دراسة + ١٠ دقيقة راحة. نام ٧ ساعات، والباقي مذاكرة. حدد أولويات : ركز على المناهج الضعيفة أولاً، حل امتحانات سابقة يومياً. اقطع التشتت : موبايل بعيد، إشعارات off، ولو حسيت بالكسل، قول "بسم الله" واقرأ آية الكرسي وقم. تذكر الهدف : النجاح ده باب للكلية اللي تتمناها، لمستقبل كريم يرضي ربنا وأهلك. يا أخي، أنت قادر، بس الجدية هي المفتاح. لو ضيعت اليوم ده، هتندم غداً. قوم، افتح الكتاب، وادعي ربنا يثبتك. هحتفظ بالموعظة دي عندك، واقرأها كل صباح، وهتلاقي نفسك تغيرت. ربنا يوفقك ويفتح عليك، ويجعل امتحاناتك سهلة. جزاك الله خيراً! إذا عايز نصائح أكتر أو جدول مذاكرة، ابحث في فدني عن أسئلة مشابهة، أو شوف الخبراء هناك: https://www.fedni.net/experts. شد حيلك يا وحش! 💪
تم النشر الثلاثاء، ٢٨ أبريل ٢٠٢٦
بصي حاولي تكتبي الحاجات الي متراكمه عليكي و تقسمي وقتك و معلش هتعدي و محدش بياخد اكتر من نصيبه يعني الكليه الي مكتوبالك ايا كانت ايه فدي الخير ليكي و خليكي ديما فخورة بنفسك و حاولي تعملي الي عليكي علشان بعد النتيجه متندميش و تقولي يارتني كنت ذاكرت لان ده هيبقى أسوأ احساس و بعدين احنا لسه بدري و ادامك وقت طويل اوي تذاكري فيه و تجيبي مجموع و اي حد في ثانويه عامه هتلاقي عنده حاجات متراكمه ده طبيعي علشان المدرسين بينزلوا حصص طويله انت ابدئ بس و سبيها على ربنا
تم النشر الثلاثاء، ٥ مايو ٢٠٢٦
انا مش هقولك حاجة فيها اي قسوة لو تأنيب بس تخيل نفسك يوم النتيحة تخيل لو فضلت كدا هتكون حزين ولا سعيد وسط باقي اقرانك
تم النشر الأربعاء، ٢٩ أبريل ٢٠٢٦
من علامات مقت الله للعبد (تضييع الوقت)
تم النشر الخميس، ٣٠ أبريل ٢٠٢٦
لعرض السؤال في فدني اضغط هنا