من وأنا في ثانوي حصلي موقف مأثر فيا لحد دلوقتي.
وقتها كنت مراهق وصغير في التفكير شوية، وروحت لأخويا وقلتله إني بحب بنت وعايز أتجوزها. بدل ما يفهمني أو ينصحني، زعقلي جامد وقالّي:
“إنت رايح المدرسة تتعلم ولا تعمل مشاكل مع بنات الناس؟”
وقتها اتعصب عليا قدام مراته وعياله، وعيّطني قدامهم، وخاطري اتكسر جدًا.
الموقف ده فضل جوايا، ومن ساعتها حسيت إن الكلام مع البنات حاجة غلط أو عيب.
لما دخلت الكلية بقيت حتى مش بعرف أبص لبنت أو أعبر عن اللي جوايا.
عدّت سنين، ومن 2019 تقريبًا وأنا كده… أكتر من 5 سنين مش بعرف أتكلم مع بنت بشكل طبيعي.
حتى لما حاولت أدخل في موضوع صالونات وأقعد مع بنات للجواز، بلاقي نفسي مش عارف أتكلم ولا أفتح موضوع، كأن في حاجز جوايا وبترفض من اول مقابلة حتى.
أنا دلوقتي عندي 28 سنة، ونفسي أتجوز وأكون بيت وأسرة.
خصوصًا إني عايش لوحدي ومفيش حد في حياتي، والموضوع مأثر عليا نفسيًا.
كتبت الكلام ده يمكن حد مرّ بتجربة شبه كده، أو يقدر ينصحني أعمل إيه عشان أتخطى الخوف ده وأبدأ حياة طبيعية زي أي إنسان.
موضوع انك تكون بتعرف تتكلم ده مش لازم يكون موهبه ممكن تكون مهاره نتعلمها او نكتسبها ـ في نفس الوقت ممكن تعقدك أو تتقفل منها زي اللي حصل لك كده ـ مشكلتك بس شويه حواجز لازم تكسرها وشويه مهارات لازم تكتسبها ـ الحواجز اللي لازم تكسرها هي الخوف من الغلط والرهاب الاجتماعي فاول حاجه لازم تعملها انك تتيقن انك انسان عادي ممكن يغلط ويتعلم من غلطه وده بيحصل لما تتكلم كثير في مواضيع مختلفه مع ناس مختلفه بيعمل لك حصيله لغوية كبيرة وبالتالي هتكون جاهز لاي موضوع لانك اتكلمت فيه قبل كده ـــ بالنسبه بقى للموضوع اللي ما اتكلمتش فيها ولا مره مش عيب انك تجهز كلام مش عيب انك تكلم نفسك مش عيب انك تصور نفسك وانت بتتكلم حتى لو كل يوم عشان تعرف تتكلم عشان تعرف تواجه ـ وبكده يا صديقي هتكون قدرت تكسر حواجز وفي نفس الوقت تكتسب مهارات لان انت كل موضوع بتتكلم فيه على الاقل مره واحده حتى لو مع نفسك هتكون خبير فيه ــ اهم حاجه تكون واثق من نفسك ما تقعدش تحاسب نفسك وتندم على كلمه غلط انت قلتها انت كده هتتعقد زياده ـ وطبعا لازم تنزل وتتعامل مع بشر كثير من اي جنس سواء ولد او بنات وتكون صداقات وموضوع الجواز هيجي لوحده (حاولت انصحك على قد ما اقدر في نقطة الحوار⬆️ من حيث علاقتك مع الناس) ـ اما بقى بالنسبه للاهم وهي علاقتك مع ربنا فهي لازم تكون كويسه ولازم تكون بتصلي وتذكر ربنا كويس وما تشغلش نفسك بحاجات كثير زياده عن اللزوم ولا تخلي حاجه تشغلك عن ربنا علشان ما تكونش مشتت وتايه في الدنيا ومش عارف حتى تتكلم واللي هيدخلك في الدوامه دي العلاقات المحرمه سواء كان من كلام مع بنت او صديق سوء واي علاقه بدايتها لاترضي الله نهايتها مش هتعجبك خالص ـ واسال الله لنا ولك التوفيق وزوجة صالحة لا تشقى بصحبتها ابدا
تم النشر الأحد، ١٥ مارس ٢٠٢٦
هو الموضوع مش كبير، بس لو انت مش قادر تطبق النصيحة اللي كتبها أ. مصطفى فوق فممكن تجرب تروح لثيرابيست يساعدك على التخلص من العقدة بتاعت الماضي باذن الله فيه نقطة كمان بالنسبة للقعدة الشرعية في جواز الصالونات كتير من الأشخاص مش بيكون قادر يحدد هو هيتكلم في ايه فعلا، فالمفترض إنه تكون مجهز المحاور والنقاط اللي هتتكلم فيها مع اللي قصادك بحيث تعرف من الإجابات إنتم مناسبين أو لأ، والكلام لو اتفتح بس بيروح ويجي بإذن الله ممكن تسمع دورة البيت المسلم للبشمهندس أيمن عبد الرحيم هي دورة للتأهيل قبل الزواج وهو هيحيلك على دورة كمان مهمة تسمعها وبإذن الله الدورتين دول يساعدوك تحدد المحاور اللي هتتكلم فيها مع العروسة اللي هتتقدم لها بإذن الله رزقك الله بالزوجة الصالحة عاجلًا غير آجلًا وفي صحة وعافية
تم النشر الأحد، ١٥ مارس ٢٠٢٦
يا حبيبي، أول حاجة أقولك إني فاهمة تمامًا اللي جواك، وده مش عيب ولا ضعف.. ده صدمة نفسية (trauma) من موقف أخوك ده، اللي خلى عندك حاجز داخلي يقولك "الكلام مع البنات خطأ". بس الحمد لله، ده قابل للعلاج، وأنت في سن مثالي (28) عشان تبدأ حياة جديدة وتتجوز وتبني أسرة. ليه حصل كده؟ الصدمة دي زي "برمجة" سلبية في دماغك من سن المراهقة، خلتك تخاف الرفض أو الإحراج. إيه اللي تعمله دلوقتي عشان تتخطى ده؟ غير الاعتقاد الداخلي : كل يوم، قول لنفسك 10 مرات: "أنا راجل كويس، والكلام مع بنت للجواز حقي وحلال". ابدأ خطوات صغيرة عملية : في صالونات الزواج، متفتحش موضوع شخصي أول دقيقة. ابدأ بـ"السلام عليكم، إيه أخباركم؟" أو "بتحبي اللي عملتوه في الشغل إيه؟". حدد هدف: 5 دقايق كلام عام بس. مارس لوحدك: سجل فيديو لنفسك وأنت تتكلم عن نفسك (شغلك، هواياتك)، هيساعدك تشوف نفسك طبيعي. أنت مش لوحدك، كتير رجالة مرّوا بكده وتجوزوا وصاروا أبطال عائلات. متيأسش، خطوة خطوة هتكسر الحاجز ده. جرب الأسبوع ده هدف واحد بس، وقولي إيه اللي حصل! لو عايز نصايح أكتر أو تجارب مشابهة، ابحث في فدني عن أسئلة مشابهة، هتلاقي إجابات كتير. ولو محتاج استشارة متخصص، روح صفحة الخبراء هنا: https://www.fedni.net/experts – في خبراء زواج ونفسية هيساعدوك مباشرة. ربنا ييسر أمرك يا رب، ويجعل زواجك قريب! 💪❤️
تم النشر الأحد، ١٥ مارس ٢٠٢٦
يعني الموضوع كبير ؟
تم النشر الأحد، ١٥ مارس ٢٠٢٦
روح لأخصائي نفسي يعالجك و يساهم ف حل مشكلتك لان غالباً دي عقدة م الموقف بتاع اخوك و مش هتتحل غير بكدة
تم النشر الأحد، ١٥ مارس ٢٠٢٦
اللي انت فيه ده حب من ربنا .. صدقني هتعيش حياه مع اللي ربنا كتبهالك حياه هتعوضك الوحده اللي انت فيها دي حاليا .. صبرا ي أخي
تم النشر الأحد، ١٥ مارس ٢٠٢٦
لعرض السؤال في فدني اضغط هنا