متزوجه من 19 عام وحصل مشاكل كتير لدرجه انى خلاص انطفيت بجد ونفسي اطلق وفى نفس الوقت العيشه مع امى اصعب الدنيا عماله تضيق عليا وتعبت حتى ولادى مش حاسه بحبهم ليا بقيت طاقه نكد فى البيت لاهما عايزنى ولا انا عيزاهم نفسي اخرج مرجعش
السلام عليكم ورحمة الله وبركاته شكرا لحضرتك ع المشاركة شعورك واصلني جدا والحل فإيدك بس مفيش حاجة سحريه هتتغير من يوم وليلة هاخد كلامك من اوله حصل مشاكل كتير ١-اكتبي المشكله قدامك وعملتي فيها ايه حسيتي انك اخدتي حقك ساعتها ولا سكتي وخلاص كل المشاكل كده اكتبي رده فعلك كده ايه فالأغلب هيكون هروب من المشكله وسكوت عليها لحد ماتيجي مشكلة تانيه تقلب الدنيا جواكي ٢-نفسي اطلق أكيد الكلمة مش من فراغ بس هل عندك اسباب قويه لده ولا ممكن يكون ايه ؟ فكرتي فحل تاني ؟بالذات ان في اولاد ؟ هتيعيشي فين ؟ منين ؟ ولادك فين ؟مع مين ؟مصاريفهم ؟حواراتهم ؟هل هتكوني مرتاحة؟ هيكون أقل الضررين فعلا؟ولا محتاجة ادي نفسي فرصة؟عشاني !؟ ٣-الدنيا عمالة تضيق قال تعالي "ان مع العسر يسر " معاه يعني هتلاقيها اتحلت لو فكرتي وسلمتي امرك لله وقومتي بدورك صح ودا يدخلنا ع النقطة اللي بعدها ٤-حتي ولادي مش حاسه بحبهم كوني رحيمه بنفسك اكيد انتي وولادك بتحبوا بعض بالفطره بحاجات كتير بينكم ممكن التصرفات بس منك او منهم محتاجة تعديل وتضبيط منك شويه وان شاء الله هتقدري علي ده شوفي مر عليكي خلال ال١٩سنة زواج مصاعب ومشاكل قد ايه وعديتيها حتي لو مش احسن حاجة بس دا في حد ذاته انجاز قومي بدورك اللي تحبيه معاهم دور تحبي انهم يفتكروكي بيه ذكري ليكي عندهم يدعولك بيها أثر طيب فحياتك الآن وبعد كده دورك اللي يرضي ربنا ويرضيكي بدون مايكون تعاملك معاهم رده فعل ع مشاكل بينك وبين والدهم او ضغط انتي حاسه بيه الولاد ملهومش ذنب شاركيهم باحساسك ناحيتهم كتري من الذكريات والمواقف الحلوه انتي تقدري تعملي ده ان شاء الله ٥-نفسي اخرج مرجعش هروب مؤقت مش هترتاحي بعده ممكن تاخدي هدنه اخرجي تبع ظروفك ممكن ساعتين ليكي او اكتر فمكان بعيد لو متاح غيري روتين حياتك خلي في وقت لنفسك حبي نفسك واعرفي هيا محتاجه ايه حاسه بايه ولو احتاجتي اي استفسار انا معاكي 🌷
تم النشر السبت، ٧ أكتوبر ٢٠٢٣
الموضوع مختصر وتفاصيلة تفرق فى الحلول واضح انك افنيتى العمر السابق فى تفاصيل كلها شد وجذب دون اعطاء نفسك حقها وكنتى فى انتظار الاخرين ان يكونوا مسئولين عن سعادتك انصحك بالمتابعه مع مختص نفسى لمساعدتك بالتفصيل للخروج من هذه الحفره ( عدى عليا حالات مشابهه الحقيقة ) سؤالك يؤكد انك مستعدة لتغيير كل ذلك فعليكى باتباع اى سبيل للخروج
تم النشر السبت، ٧ أكتوبر ٢٠٢٣
نصيحه واحده تخرجي بيها من كل الضيق ده ولو بعد مدة كبيرة ان شاء الله ذكر الله وبسسسس خلي لنفسك ورد يومي من الاستغفار والصلاة على النبي صلى الله عليه وسلم وكل يوم الصبح وبالليل تقولي ( حسبي الله لا اله الا هو عليه توكلت وهو رب العرش العظيم) سبع مرات ..من قالها كفاه الله ما اهمه من امر الدنيا والاخرة وخلي ليكي ورد قران يومي حتى لو خمس صفحات بس بعد كل صلاة صفحه وحافظي على صلواتك في وقتها بعد كل دول هتلاقي حياتك بتتحسن ان شاء الله بس واظبي والتزمي بيهم
تم النشر السبت، ٧ أكتوبر ٢٠٢٣
اصنعي لنفسك حياه جوة بيتك عادى.... مش بقول كلام وخلاص والله ... احنا للاسف مش بنفكر فى نفسنا ونديها حقها... شوفى حاجه انتى بتحبيها اعمليها تفصلك تماما عن اللى انتى عايشه فيه... لو بتعملى حجات هاند ميد... اعملى صفحه مثلا على فيسبوك... اقرى فى حجات بتحبيها .. متسبيش نفسك كده انتى ابعديها عن كل ده... احنا بنتولد مش بيبقى مختارين مين ابونا ولا امنا ... ولا بنكون مختارين الحياه وشكلها ... احنا بنكبر فى كل ده مجبرين ... بيحصل إننا بنتعامل مع الموضوع انه لا يمكن إننا نتحكم فيه... اعتقد لو حطيته نفسك فى قصه انه واقع وانتى مجبرة تعيشيه يبقى عيشيها صح... طالما بتقولى العيشه عند اهلك مش لطيفه يبقى وجودك فى بيتك اسلم لنفسك ... يبقى المطلوب منك انك تصنعي لنفسك حياه بالحجات اللى بتحبيها ... لو بتحبى رياضه... تفننى فى المطبخ.... لو عندك مهارة ما فى شغل اليدوى ...طالما مفيش خيار تانى يبقى تاقلمى.. بس بصورة تخليكى فى عالم تانى ... انتى قدها 💪
تم النشر السبت، ٧ أكتوبر ٢٠٢٣
لعرض السؤال في فدني اضغط هنا