انا مريت بظروف صعبة من الطفولة حتى الآن أحس اني دايما بابتلاءات ومصاعب ومش هكون كدابة لو قولت انها من بداية الولادة اصلا ووالدي ووالدتي في مشاكل باستمرار وحتى لما اتجوزت وكنت فاكرة جوزي هيحتويني وحكتله جزء من مشاكلي مش كلها كان في البداية محسسني انه عوض وسند ليا بعد ربنا وانه في ضهري بس بعد الجواز اتغير
بقى اهمال عاطفي ومبقاش بيسمعني وساعات يعايرني بمشاكلي وسبت الشغل عشانه لانه اقنعني بده وان هيخليني ادور على فرصة احسن انا اتنازلت عن حاجات كتير عشانه عشان حسيت انه في ضهري
دلوقتي حاسة اني لوحدي انا مليش أصحاب قريبين ولا حد احكيله ومليش مصدر دخل ثابت بيديني مصروف على مضض وبيحسسني انه ضغط عليه انا حاسة اني لوحدي ومبقاش عندي طاقة أعمل اي حاجة
نفسيتي زي الزفت صحتي في النازل مكنتش كده انا لا مني بقيت سنجل وقادرة آخد قرارات في حياتي ولا مني متجوزة مستقلة بقرارتي في حياتي انا تعبت بجد وهو مبقاش بيسمعني وكمان مسافر وسايبني لوحدي
انا محتاجة احس بدعم صحي في حياتي مش عايزة ناس مزيفة مش عايزة علاقات مصلحة مش عايزة احس اني بحكي لدكتور وفي الآخر ادفع فلوس اخر السيشن وهو اصلا كل مرة ناسي موضوعي بيتعامل معايا شغل بس
صليت وحكيت لربنا كتير بس يمكن فرجه مش قريب بس انا محتاجة حد في حياتي بجد يكون داعم ليا حد فعلا بيخاف عليا مش لاقية وتعبت ومبقتش قادرة ولا فيه اي طاقة لاي حاجة مش عارفة اعمل ايه بجد
حبيبتى ... شدى حيلك... خليكى اقوى من كده .. مبدئيا ربنا مش بيشيل حد شيله غير ويبقى مجهز الكتف اللى يشيل ... فهو ابتلاء ... اكيد انتى قده طالما ربنا ابتلاكى بيه .... حل كل الحجات اللى حكتيها ديه هتبتدى من جواكى .... يعنى انتى لازم تتعلمى تطبطبى على نفسك وتساعدى نفسك انها تقف على حيلها... انتى مش ضعيفه .... ولازم تتعلمى تبنى حياتك على نفسك متستنيش حد يطبطب او يعملك او تكونى مستنياه ييجى يغير ليكى حياتك .... واضح انك مش بتشتغلى.... ركزى فى الهدف من المحن اللى بتعشيها .... انا تحت امرك لو حبيتى احتجتينى ... ربنا يصلح حالك يارب ويعينك
تم النشر الأحد، ١٤ ديسمبر ٢٠٢٥
السلام عليكم، حتى في غياب الدعم اللي بتبحثي عنه مش مستحيل إنك تقفي بنفسك وتخرجي من الوضع اللي أنتِ فيه حاليا. أيوه ممكن تلاقي الموضوع صعب وهيحتاج منك تبذلي جهد لكن في النهاية نفسك تستحق. مش بقولك متبحثيش عن الدعم، لكن انتظارك للدعم عشان تغيري حياتك معناه إنك متعلمتيش من أخطاء الماضي، زي ما افتكرتِ إن زوجك هيكون الدعم وفي الآخر خاب ظنك. مش محتاجة تكرري الغلط وتدوري على دعم ممكن يخذلك، مفيش دعم أكتر من اللجوء لربنا ثم الاعتماد على نفسك. ارمي الماضي بكل أخطائه اللي مش لكِ ذنب فيها (زي ظروف ولادتك وأهلك) وحتى اللي كانت بسبب سوء تقديرك للأمور أو أفكار مش صح (زي اعتقادك إن الزوج هيكون هو السند والداعم وتنازلاتك اللي قدمتِها) كل ده انسيه واعتبري إنك بتبدئي صفحة جديدة خالص. الماضي بكل مشاكله كانت دروس حتى لو صعبة بس استفادي منها عشان تتخطي الحاضر وتصنعي مستقبل أفضل لك. الأوان مفاتش على فكرة. استعيني بالله وتوكلي عليه واسأليه يغير الحال ويعينك على الخروج من مشاكلك كلها. واظبي على صلاتك وأذكار الصباح والمساء واقرأي سورة البقرة يوميًا بنية إن ربنا يفرج همك ويبارك في حياتك. وعلى فكرة، لما تصلحي علاقتك بنفسك وتكون علاقة صحية عارفة فيها حقوقك وواجباتك وامتى تعطي وامتى تمنعي وإنك متخليش أي حد محور كونك ساعتها علاقاتك بالآخرين هتتوازن وهتبقى صحية وسليمة. لما تقدري نفسك اللي حولكِ تلقائيًا هيقدروكِ... هتهملي نفسك وتفضلي تقدمي تنازلات على حساب نفسك اللي قصادك هيهملك وهيتوقع منك تنازلات على طول الخط من دون أي تقدير أو شكر. فكري في نفسك وخدي بيدها عشان تتجاوزي كل ده. ممكن تشوفي الفيديو ده إن شاء الله يساعدك وأنصحك تتابعي القناة هتلاقي فيها فيديوهات تفيدك على تغيير الوضع بإذن الله. https://www.youtube.com/watch?v=8xO-FS0IJKs وربنا معك.
تم النشر الاثنين، ١٥ ديسمبر ٢٠٢٥
@Shahd Ahmed اللهم امين يارب... هحاول ان شاء الله... شكرا ❤️
تم النشر الأحد، ١٤ ديسمبر ٢٠٢٥
ربنا يرزقك يارب ويهون عليكي ويفرح قلبك ويفك حزنك يارب وشدي حيلك كده واقوي وحبي نفسك وقريبي منها وخليكي قويه نفسيا
تم النشر الأحد، ١٤ ديسمبر ٢٠٢٥
ربنا يصلح حالك و يوفقك في حياتك
تم النشر السبت، ١٣ ديسمبر ٢٠٢٥
انا معنديش مانع نكون اصدقاء والله
تم النشر السبت، ١٣ ديسمبر ٢٠٢٥
حبيبتي ربنا يهون عليكي يارب ويعملك الخير
تم النشر السبت، ١٣ ديسمبر ٢٠٢٥
مش عارفة ابعت ازاي انا بعتلك متابعة
تم النشر السبت، ١٣ ديسمبر ٢٠٢٥
ابعتيلي علي الخاص يا قمر
تم النشر السبت، ١٣ ديسمبر ٢٠٢٥
ازاي اتواصل معاكي يا سارة
تم النشر السبت، ١٣ ديسمبر ٢٠٢٥
طب علي الاقل ادعولي احس بأي دعم 😢
تم النشر السبت، ١٣ ديسمبر ٢٠٢٥
لعرض السؤال في فدني اضغط هنا