أنا عندي 16 سنة في تانية ثانوي، وأختي عندها 22 سنة. اللي حصل كان علشان أنا استخدمت حاجة من حاجتها، وكنت مضطرة، وبعد ما خلصت رجعتها مكانها سليمة. لكن أختي اتضايقت لما عرفت إني استعملتها، فقامت كسرت لي حاجتي وسرقت مني الأدوات اللي بستخدمها وفلوسي، مع إن الحاجات دي غالية عليا.
أول ما اكتشفت إن حاجتي متكسرة، خدتهم وروحت أشتكي لماما. ماما ما اتكلمتش معاها بشكل جدي، بس قالت لها: "إنتي ما عندكيش دم؟ ليه تكسري حاجتها كده؟" فأختي قالت إنها ما كسرتش حاجة.
بعد كده بدأت أدور على أدواتي، وما لقيتهاش، ولا حتى الفلوس اللي كانت جنبها. قلت لماما: "ممكن تخليها تطلع حاجتها علشان أدور فيها قدامك؟ أنا متأكدة إنها هي اللي أخدتهم." ماما اتضايقت، وجابت حاجتها، لكنها رفضت تخليني أدور.
أنا أصريت أدور بنفسي، فماما علشان تبعدني، مسكت سكينة كانت جنبها وبدأت تهددني. أنا ما خدتش بالي من السكينة، فالضربة جات فيا بالغلط. اتنقلت المستشفى، وكان الجرح سطحي، لكن كنت بنزف كتير، وخيطوا الجرح بخمس غرز في جنبي.
بعد ما خرجت من المستشفى وفقت من البنج، لقيت بابا بيزعق لي بعد ما ماما قالت له اللي حصل، ولما حاولت أحكي له الحقيقة، ضربني على أساس إني أنا الغلطانة وإني بسرق أختي.
بعدها عمي جه وهدى بابا، وأنا كنت بدور في حاجتها، ولقيت فعلاً حاجتي عندها. وقلت لهم علشان يتأكدوا إني كنت على حق، وإن أنا عمري ما بحط حاجتي في المكان ده.
لكن رغم كده، ما كانوش مصدقيني، وكانوا بيقولوا إني أنا اللي حطيت حاجتي هناك. لا وغير كده النهارده انا قاعده في اوضتي لوحدي تعبانه وما حدش عايز حتى يجي يغير لي على الجرح وقاعدين بياكلوا بره يبقى دول يتقال عليهم اهل؟! ده يبقى اب؟! ولا دي تبقى ام؟! دول ما عندهمش قلب
و أنا مش عارفة أستحمل كل ده. بجد كرهت نفسي وكرهتهم، وكرهت أبويا وأمي وأختي…وعيلتي كلهم بقيت حاسة إن وجود بابا و ماما في حياتي تعبني جدًا، وبفكر إني هكون أرتاح لو ما كانوش موجودين.أفضل اني اكون يتيمه. 😭
طيب ليه أختك عقلها صغير كدا؟ فين التفاهم بعدين ليه الموضوع يكبر لدرجة دي أي يعني ما تشاركوا بعض في الأدوات الفكرة هنا أختك كبيرة هي المفروض رابعة جامعة أو متخرجة حاليًا إزاي دماغها كدا ؟ طيب فين دور الأم إزاي ترفع سكينة حتى لو على سبيل التهديد مينفعش برضو!!!!! بس الموضوع كبر وخلاص بدون سبب ولا مبررات أنا حاسة في حاجة خطأ أو مثلًا حاجة مش مفهومة..في حاجة أكبر مهما كان الموضوع مش مستاهل حتى تدخل الأهل ممكن في مشكلة في أختك وأهلك طريقة التعامل خطأ جدًا جدًا الأب والأم الله المستعان
تم النشر الثلاثاء، ٢١ أبريل ٢٠٢٦
لعرض السؤال في فدني اضغط هنا