عندي 15 سنه و طبعا في السن دا اغلبنا مش بيشوف نفسو حلو و انا عن نفسي من الاغلبيه دي و مش قادره اتقبل شكلي و دايما بقارن نفسي بغيري حتى لما بشوف واحده من صحباتي احلى مني ببقى حاسه ان انا مش كفايه و ان مينفعش ابقى صاحبتها بسبب نسبة جمالها الي أعلى مني و دايما بعمل دايت و رياضه بس بردو بفضل على نفس الوزن يمكن أنا مش تخينه اوي لكن انا بحب المثاليه ببقى عايزه ابقى مثاليه في كل حاجه و لما مش بقدر اوصل المثاليه دي بكتئب و بحس ان مستاهلش اي اهتمام من اي حد و لا حتى من عيلتي
حبيبتي، مش لازم تقارني نفسك بحد تاني عشان تحسي بقيمتك. كل واحدة فينا جميلة بطريقتها. انتِ شخصية مميزة وليكي مواهب وقدرات كتير فريدة من نوعها. ركزي على الحاجات الحلوة اللي جواكي وابتسمي لنفسك كل يوم في المراية. خليكي واثقة في نفسك شوية ومتسمعيش كلام الشكوك اللي بتقولك انك مش كفاية. انتِ كفاية وزيادة يا سكرة!
تم النشر الاثنين، ٣١ يوليو ٢٠٢٣
كل فكرتك عن نفسك غلط ف غلط بصي هي جميله وحده بس (حبي نفسك ) ركزي ف الجمله دي كويس صدقيني اما تحبي نفسك وتشوفي انو كل حاجه فيكي حلوه عشان انتي حباها كل اللي حوليكي هيشوفو انها حاجه حلوه ومثاليه بجد لازم تتصالحي مع نفسك وتحديدا لان نفسك ليها عليكي حقوق
تم النشر الأحد، ٣٠ يوليو ٢٠٢٣
هترتاحي لما تعرفي ان الناس مش مهتمه .. مش مهتمين بمين احلى من مين ومين ملامحها جميله اكتر .. قرأت مره ان انت مش وحش انت بس متعود ع ملامحك .. يعني انتي شايفه نفسك مش حلوه بس غيرك هيشوفك قمر وما شاء الله اهتمي بنفسك واعملي سكين كير وهير كير روتين هتحسي بانتعاش و ب (ايه الحلاوه واللذاذه دي 🌸) واشغلي حياتك واتعلمي مواهب وانجحي صدقيني دي الحاجات اللي هتحسسك بالرضا عن حياتك كلها مش شكلك بس
تم النشر الخميس، ٣ أغسطس ٢٠٢٣
بس محدش كده .. وديه الحقيقه اللي انتي محتاجه تقتنعي بيها .. (محدش كده) وكل فكرتك عن الاشياء اللي انتي ذكرتيها هي في الحقيقه مش واقعية ولا حقيقية بتاتا .. كل مشكلتك انك مش شايفة نفسك اصلا .... انتي شايفة غيرك علطول .. بتحاول تملي الاحتياجات ديه بالناس اللي حواليكي .. صحابك، اي حد ، حتى لو كانت ممثلة بتحبيها وحابه مثلا شكلها ونفسك تبقى زيها .. اما عن جزء انك مينفعش تبقى صاحبتها علشان هي احلى .. ف مفيش حد احلى من التاني .. ديه حقيقة مفيش اصلا مقاييس للجمال .. هقولك على حاجه في مجتمعات زي المجتمعات الريفية عندهم نسبة الجمال في البنت انها تكون كريفي او ممتلئة - يعني اي بنت رفيعه ممكن يعيبوا عليها ويقولوا شوفوا المعصعصة .. عندك مثلا في مجتمع تاني .. ممكن يكونوا شايفين البنت الرفيعة احلى واجمل .. عندك في مجتمع تاني بيشوف ان الخدود لما تبقى في الوش بيبقى شكلها احلى .. غض النظر بقى ان فيه بنات من غير خدود وشكلها برضه حلو .. ها ممكن تقوليلي انهي فيهم اللي صح؟ ببساطة شديدة .. محدش صح ومحدش غلط امال ايه؟ ديه اسمها ثقافة مجتمعات وشعوب .. لا اكتر ولا اقل .. يعني ثقافة مجتمع ( يعني العرف او التقاليد) اللي المجتمع مقتنع بيها .. وماشي عليها .. لكن هي مش كتاب ربنا علشان نصدقه ولا نقتنع بيه .. اقتنعي بنفسك انتي، وشوفي نفسك انتي، متشوفيش حد غيرك .. فهماني. اما عن الاهتمام ليه شايفة نفسك انك متستاهليش حب ولا اهتمام؟ هل برضه قصدك ع الشكل ولا فيه حاجه تاني؟
تم النشر الأحد، ٣٠ يوليو ٢٠٢٣
أولا أنتي سنك صغير يعني الدنيا والحياة والمستقبل قدامك . مفيش حد بيوصل للمثالية ده لو فرضنا إن إيه هي المثالية أصلاً لكل فرد لأنها موضوع نسبي وبتختلف من شخص لشخص المهم هو الوصول للرضى مش المثالية . إنك تبقى راضية عن نفسك عن شكلك عن عيشتك عن سلوكك . الشعور بالرضى أهم شيء وعدم المقارنة مع الغير نهائي . ربنا خلقنا وكل واحد فينا فيه مميزات عن التاني فيه إللي صوته حلو فيه إللي بيرسم حلو جدآ فيه إللي بيهتم بالعلوم والرياضيات وكده فيه إللي شاعر وهكذا دوري على مميزاتك موهبتك ونميها وكبريها وبلاش مقارنات نهائي مع حد . كلنا بنكمل بعض . حب نفسك وطوريها ونميها وبس علشان توصلي للرضا وبس .
تم النشر الأحد، ٣٠ يوليو ٢٠٢٣
لعرض السؤال في فدني اضغط هنا