السلام عليكم ورحمة الله وبركاتة
مش عارفة ابدأ منين ولا منين بس انا في كمية وجع متتوصفش والله دلوقتي انا مخطوبة بقالي سنة بالظبط اول سنة يعتبر عدت كويس كان فيه خلافات ايوا بس مش اوي اللي هيا تعدي كدا عادي انما الفتره دي لقيت قلة اهتمام عادي لقيت كلام برضو منه معايا اصل مش عارفه مين بتبصلي اصل مين كان نفسها ترتبط بيا انا مش زعلانه انه بيحكي قد ما زعلانه انه بيكبر المواضيع ويحسسني اني قليله ك شكل مع ان والله بشهاده الكل شكلي حلو وملامحي ما شاء الله يعني والقي مثلا باعت ساعات اد لبنت كانت بتشتغل معاه او كدا ف انا من النوع الغيور اوي ودلوقتي كلمت اهله وحكتلم واهلي سمعوا وقالوا براحتك مش هندخلك في حاجة ودلوقتي بابا عايز هو اللي يكلم اهله ونشوف الدنيا وانا مش عارفه اعمل اي انا بحبه بس برضو مش مرتاحه خالص الفتره دي " هو مش بيكلم حد عليا علشان اكوناتنه وكل حاجته معايا "
السلام عليكم، أنتِ لسه على البر والوجع اللي حاساه دلوقتي هيبقى أضعاف بعدين. الحب مش كل حاجة ولا مبرر لتحملك أي وضع غير مريح لك ومؤذي لكرامتك. الحب مش هينفعك لو استمر الحال كده، والمشاعر بتنطفي مع الوقت والمعاملة الجافة أو السيئة وممكن تقلب للعكس. فاركني الحب على جنب دلوقتي وابدئي ادرسي علاقتك به وراجعي نفسك وهل الشخص ده يستحق تكملي معه وتصرفاته دي معناه إيه وهل ينفع تتقبلي التصرفات دي في حق نفسك وهتقدري تتعايشي معها وتتحمليها بعد الزواج. وصلي استخارة ضروري وادعي ربنا يختار لك اللي فيه الخير. بالتوفيق.
تم النشر الأحد، ٢٨ يونيو ٢٠٢٦
وعليكم السلام ورحمة ورحمة وبركاته 🌷 طيب ليه الخطوبة مدتها طويلة كدا؟ ثانيًا يا غالية لعل وعسى مدة الخطوبة طالت عشان تأخدي القرار الصح، بصي هو طالما أخد قرار وخطبك من البداية يبقى المفروض مفيش سيرة أي بنت في الكلام، تاني حاجة الزواج مسؤولية عايز حد ناضج؟؟ مش حب مراهقة أنتِ وهو محتاجين تأهيل، ولكن جزئية الحب فـ أنا عايزة أقولك دا مش حب دا تعلق الحب أكبر وأعمق من كداا وأعتقد مش هيجي دالوقتي أنتم بس في حالة حب رومانسي ودا فترة وهيعدي لكن البيت بيتبني بـ أم وأب ناضجين!! فأنا عايزاكِ تبني قراراتك وتفهمي يعني زواج وإختيار الزوج الصح!! وكلامه معاكِ وعنك أكيد وضحلك شخصيتة أسالي نفسك هل دا فعلًا الإنسان الـ هيبني بيت ولا شاب مراهق بيجرب، وأنتِ برضو بلاش جزئية الحب تأثر عليكِ عشان الإختيار الصح هيساعدك سنين قدام والخطأ هيدمرك قدام الله يرضى عنك اللهم آمين 🌷
تم النشر الأحد، ٢٨ يونيو ٢٠٢٦
وعليكم السلام ورحمة الله وبركاته، أول حاجة أحب أقولها لكِ إن مشاعركِ طبيعية جدًا، وإن الوجع اللي بتحسي بيه دلوقتي مش مبالغ فيه. أنتِ مخطوبة من سنة، والعلاقة كانت في البداية فيها خلافات عادية، لكن الفترة الأخيرة بقت فيها إشارات واضحة بتأثر على راحتكِ النفسية: قلة اهتمام، مقارنات، وكلام بيخليكِ تحسي إن شكلكِ أقل. ده مش مجرد غيرة زيادة، ده شعور بالإهانة والتقليل من قيمتكِ، وده شيء مهم جدًا في علاقة زي الخطوبة اللي المفروض تبني أمان وثقة. اللي بيحصل دلوقتي إنكِ بتحبيه، لكن راحتكِ النفسية بتتأثر، وده تناقض صعب. الغيرة الشديدة اللي عندكِ مش غلط في حد ذاتها، لكن لما الطرف التاني يغذيها بكلام زي "البنات اللي كانوا عايزين يرتبطوا بيا"، فده بيخلق جو من عدم الأمان بدل ما يطمنكِ. كمان إنكِ قلتِ لأهله وأهلكِ سابوا القرار لكِ، ووالدكِ عايز يتدخل، ده بيحطكِ قدام مسؤولية كبيرة. أنتِ مش لوحدكِ في القرار، لكن في النهاية أنتِ اللي هتعيشي مع النتيجة. نصيحتي العملية دلوقتي: خدي وقت قصير لوحدكِ عشان توضحي لنفسكِ الأولويات. اسألي نفسكِ: هل السلوك ده هيتغير بعد الجواز ولا هيزيد؟ هل أقدر أتكلم معاه بهدوء وأقول له إن الكلام ده بيجرحني وإني محتاجة احترام وطمأنينة؟ لو رد فعله كان دفاع أو تقليل من مشاعركِ، يبقى ده إشارة مهمة. ولو قررتِ تكملي، خلي والدكِ يتكلم مع أهله زي ما هو عايز، عشان الموضوع يبقى رسمي وواضح. أنتِ بنت شكلها حلو وملامحها جميلة زي ما الكل بيقول، وأهم من كده إنكِ تستحقي شريك يخليكِ تحسي بالقيمة مش بالنقص. خدي القرار بهدوء ومن غير استعجال، وربنا يوفقكِ لللي فيه الخير ليكِ. لو عايزة تتكلمي أكتر عن اللي جواكِ، أنا هنا.
تم النشر الأحد، ٢٨ يونيو ٢٠٢٦
السلام عليكم اولا انتي كإنسانة مسلمة محتاجة تعرفي ايه ضوابط الخطوبة وايه الحلال فيها وايه الحرام اعملي سيرش على الموضوع دا على اليوتيوب وهتلاقي كذا بودكاست اسمعي اللي قلبك يرتحله. ثانيا بما انك بتكلميه وكدا متخلهوش يحطك ابدا في موضع مقارنة مع حد تاني حتى لو كان مين وطالما بتقولي انك مش مرتاحة بس بتحبيه يبقى تصلي استخارة لله وامشى ورا عقلك ومتمشيش ورا قلبك عشان قلبك دا اللي هيضيعك وترجعي تقولي ياريتني حسبتها صح من الاول. انقذي نفسك انتي لسا على الشط برا قبل ما تدخلي في الغويط.
تم النشر الاثنين، ٢٩ يونيو ٢٠٢٦
الحب مش كل حاجة صدقينى مش كفاية عشان يفتح بيت واسرة فى حاجات كتير تانية اهم لازم تكون موجودة فيه وزى ما الاستاذة قالت انا شايفة انك تستخيرى برضو لان دى ربما تكون علامات من ربنا ليكى وصدقينى متقبليش بكلام اقل من اللى تستحقيه عشان الحب لانك الحاجات اللى انتى مش مرتحالها وبتستحمليها دلوقتي هتدفعى تمنها قدام والخطوبة يا حبيبتى معموله عشان اصلا تشوفى هو مناسب ولا لأ فى حاجات كتير اهم المفروض يكلمك فيها اهم من مين قالتلو ومين عادتلو اللى بيحبك هيطمنك هتحسى بأمان وراحة في وجوده مش شك وقلق وخوف عارفة ان الكلام دا ممكن متفهميهوش عشان انتى بتحبيه بس صدقينى اهم حاجة هى الراحة والامان والاهتمام لازم الحب يبان فكل تصرفاته مش فكلامه بس دا رأى الشخصى طبعاً وانتى ليكى الخيار تعملى بيه او لا وقبل كل شيء اكيد صلى استخارة وادعى واللى هتحسيه اعمليه ومتفكريش عشان ربنا اكيد مش هيضيعك واكيد شايلك احسن حاجة
تم النشر الاثنين، ٢٩ يونيو ٢٠٢٦
للخطبة *ضوابط* على *المسلمين *الالتزام بها
تم النشر الأحد، ٢٨ يونيو ٢٠٢٦
ثقي فيا مش بعقدك بس صلي استخاره وعيدي نفسك لانه ربنا بيحاول يبين لك بيان الله أعلم بردو 🤷♀️ربنا يكتبلك الخير ❤️
تم النشر الأحد، ٢٨ يونيو ٢٠٢٦
لعرض السؤال في فدني اضغط هنا