تم حذف هذا السؤال
السلام عليكم، كلمة سام بقينا نستخدمها عمال على بطال، مقدرش أحكم على الشخص ده بس هقول لك على الأقل كان صادق في حاجة واحدة. (هو لا خطيبك ولا جوزك ولا له حق عليكِ ولا وعدك بحاجة) دي أصدق جملة ممكن تتقال في علاقة زي اللي انتِ فيها. ** أنا مقدرة مشاعرك جدًا وإحساسك ومعلش لو حسيتِ إن كلامي صعب شوية أو مش على هواكِ، بغض النظر عنه هو شخصيًا وهل هو سام وهل عادي إنه يزعل من تصرفك، أنتِ غلطتِ كذا غلطة، من البداية كان غلط ارتباطك بشخص حتى لو صداقة لأن مفيش صداقة بين ولد وبنت. غلطت لما قبلتِ ترجعي حتى لو بعد عتاب. غلطتِ لما شاركتِ أسراركِ مع شخص غريب لمجرد إنك حسيتِه بيحبك وممكن تثقي فيه (مين ضمنك إنه ميستغلش أسرارك أو إنه يؤذيكِ بعد كده أو حتى إنه بيتسلى ومش جاد) ورغم اعتراضي على العلاقة نفسها فأنتِ غلطتِ لما كررتِ حاجة بتضايقه (لو كان صادق يعني) وطبيعي تلاقي رد فعل لده. غلطت إنك مفكرتيش في نفسك وخلتيها أولوية وعززتيها. غلطتِ إنك كملتِ على اعتقاد إنه بيحبك ومنتظر الظروف تتعدل عشان يتقدم لك (ممكن يكون فيه احتمالية صغيرة لده لكن الواقع بيقول إن في الغالب الشباب بيكونوا بيتسلوا ويقضوا وقت حلو مع البنات وياخدوا الظروف مبرر ويقعدوا البنات جنبهم بالسنين وبعدين يقولوا لهم مع السلامة) نصيحتي، متحاوليش تدوري على طريقة تصالحيه بها وتكملي العلاقة دي غير لو قرر يتقدم لك فعلا. لو مسألش تاني كبري خالص من الحكاية ومتجريش وراه وتحاولي تصالحيه واستحملي شوية الوجع اللي هتحسيه بعد انتهاء العلاقة ولو رجع سأل عرفيه إنك عاوزاه ياخد قرار نهائي في علاقتكم، هيتقدم ولا لأ. لو رجع يبرر ويتحجج بالظروف عرفيه إنك مش هتكملي في علاقة مش رسمية عشان ربنا يكون راضي عنكم. ** تحياتي
تم النشر الأحد، ٢٢ يونيو ٢٠٢٥
لعرض السؤال في فدني اضغط هنا