طول الوقت زمان كنت حد حدودي قوي لدرجة كان بيجيلي تعليقات ان ده مخلي التعامل معايا صعب ولاني للاسف نظرتي للحياه يا ابيض يا اسود اما قررت اسمع النصيحه جيت ع نفسي جامد من غير قصد ولسه مكتشفه ده قريب اما لقتني بخسر نفسي جامد لمجرد اني اكسب ناس في حياتي ومبقاش لوحدي
دلوقتي مشكلتي اني بحاول اوازن ولسه مش حاسه ان ده اترسخ جوايا بحسني ساعات ممكن اسرح فبخاف ارجع زي زمان وبخاف برده اجي على نفسي ف ازاي الإنسان بينضج وبيعرف يعمل ده بطريقه مفيهاش تكلف ازاي يكون متزن بشكل تلقائي من غير تأهب طول الوقت؟
اعتقد مفيش وقت ثابت نقول فيه خلاص الإنسان نضج النضج مش بالسن خالص حاجه بيكتسبها من تجاربه اللى بيتعلمها ويفهمها من الحياه أنتِ مش محتاجة تتغيري كل شوية علشان تبقي كويسة وبالاخص دا تحت تأثير كلام الناس أنتِ محتاجة تبني نسخة ثابتة منك بتسمعي أي نصيحة وبتحسي آه دي صح فتغيري نفسك بسرعة وبعد شوية تحسي إنك تايهة أو مش شبه نفسك الإنسان مش محتاج يبقى مثالي هو محتاج يبقى فاهم اوك اسمعى النصيحة بس متنفذهاش فورًا خدي وقتك واسألي نفسك هل ده مناسب ليا أنا؟ ولا مناسب للشخص اللي قالها؟ اقبلى إنك مش لازم تتغير كل شوية التغيير الكتير السريع بيضيع الهويه زى ما انت بتقولى جيت على نفسي جامد بسبب نصيحه شخص ما واحتمال تكون غلط اصلًا حطي مبادئ بسيطة تمشي عليها اعرفي نفسك أكتر وحبّى نفسك اكتر خليكِ واثقه اكتر فى نفسك يبقى عندك ثبات شوية في قراراتك مش تغيري حاجه ولو غيرتى يبقى للاحسن
تم النشر الخميس، ٢ أبريل ٢٠٢٦
بصي، إنتِ مش غلطانة لما كان عندك حدود قوية، و مش غلطانة برضه لما حاولتي تسمعي نصيحة و تبقي أهدى، بس اللي حصل إنك بدل ما توازني، نقلتي من أقصى اليمين لأقصى الشمال، ، فطبيعي تحسي إنك تايهة و بتخسري نفسك. التوازن مش إنك تيجي على نفسك عشان الناس، ولا إنك تقفلي على نفسك عشان تحمي نفسك. التوازن إنك كل مرة تسألي نفسك سؤال بسيط: أنا موافقة على ده فعلاً ولا بعمله عشان مزعلش حد؟ لو موافقة يبقى تمام، لو لأ يبقى بهدوء اعتذري أو ارفضي من غير إحساس بالذنب. حاولي كمان تعملي قاعدة لنفسك: أي حاجة هتزعلك و هتفضلي شايلة منها، يبقى كان المفروض تقولي لأ. و أي حاجة مش هتفرق معاكي أوي، يبقى التنازل فيها عادي. كده تبقي بتختاري تنازلاتك بإيدك مش تحت ضغط إنك متخسريش حد. و أهم حاجة لازم تفهميها إنك مش مطالبة تكسبـي كل الناس، إنتِ محتاجة بس متخسريش نفسك، لأن اللي بيرتاح معاكي و إنتِ بتتعبـي، مش ده الشخص اللي المفروض تخافي تخسريه.
تم النشر الخميس، ٢ أبريل ٢٠٢٦
بترسيخ مبادئه و أولوياته و معرفته عن نفسه ، هي دي مرحلة النضج اللي بتخفي اي صراعات نفسية او حياتية او فكرية ، مبادئك : ايه اللي ينفع و ايه اللي ما ينفعش ، ايه المسموح و ايه لأ ، ايه المرغوب و ايه لأ ، ايه اللي تقدميله تنازلات و ايه لأ. اولوياتك : ايه قبل ايه و ايه اولى من ايه ، لازم الليست دي تبقى واضحة جدا ليكي علشان ما يحصلش عندك تضارب في الأولويات ، و دايما تدي كل طاقتك و اهتمامك الأولوية الاعلى ثم الاقل ثم الاقل ثم الأقل ، فما ينفعش تبقى اولويتك تجيبي لنفسك حاجه عايزاها و بتحوشيلها مثلا و حد يجي يحتاج منك الفلوس دي تقوليله اتفضل ، وضوح اولوياتك هو اللي بيحدد انتي هتعيشي ازاي . نفسك : بعد ما تحددي كل اللي فات بتبني بقى هويتك و معرفتك عن نفسك ، انتي مين عايشه ليه عايزه ايه بتتبسطي ازاي و ايه اللي بيزعلك و لما تكون كل امورك الحياتية واضحة وقتها هتقظري تعيشي من غير تذبذب لإنك هتبقي ظبطتي تردد الراديو علىالموجة المناسبة ليكي و سامعاها بوضوح ، و بالتوفيق 😊
تم النشر الأربعاء، ١ أبريل ٢٠٢٦
يا حبيبتي، أول حاجة أقولك إنك مش لوحدك في ده خالص – كتير مننا بيمر بمرحلة "الأبيض أو الأسود" وبعدين بيحاول يلاقي الرمادي، وده رحلة نضج طبيعية. الاتزان الداخلي مش زرار تشغيل، ده عملية بتترسخ مع الوقت والممارسة اليومية، زي بناء عضلة. هقولك خطوات عملية، عشان تكوني متزنة تلقائياً بدون "تأهب" دائم: 1. ابدئي بالوعي الذاتي اليومي (المرآة الداخلية) : كل يوم قبل النوم، اكتبي 3 حاجات: "إيه عملتها النهارده عشان أنا؟"، "إيه تنازلت عنه عشان غيري؟"، "إيه الوسط اللي كان ممكن أعمله؟". ده هيساعدك تشوفي الأنماط وتعدليها بدون خوف. مع الوقت، هيبقى تلقائي زي التنفس. 2. ممارسة الوسطية الإسلامية (الاعتدال اللي ربنا أمر بيه) : اقرئي آية: "وَكَذَٰلِكَ جَعَلْنَاكُمْ أُمَّةً وَسَطًا"، وادعي ربنا يثبت قلبك. الصلوات الخمس والذكر اليومي (سبحان الله 100 مرة) هيرسخوا الاتزان جواكِ، عشان بيربطوكِ باللي أكبر من المشاكل. 3. حدود صحية بلطف، مش حرب : لما حد يطلب حاجة، سألي نفسك: "ده هيأذيني لو وافقت؟ هيضر غيري لو رفضت؟" قولي "لا" بابتسامة: "بحب أساعدك، بس دلوقتي مش هقدر". جربيها مرة واحدة يومياً، هتشوفي إن الناس مش هتختفي، والعالم مش أبيض/أسود. 4. النضج يجي بالصبر والتجارب الصغيرة : متخافيش الرجوع للوراء؛ الخوف ده علامة إنك بتنضجي. ابدئي بقرارات صغيرة يومية (زي اختيار وجبة أكل بدون تأنيب ضمير)، وهتكتشفي إن الاتزان بيبقى غريزة بعد شهور. فكري كده: زي الطفل اللي بيتعلم المشي، هيقع بس هيقوم أقوى 😊. لو عايزة أعمق، ابحثي في فدني عن "التوازن النفسي" أو روحي لصفحة الخبراء https://www.fedni.net/experts – فيه متخصصين نفسيين هيساعدوكِ باستشارة شخصية. أنتِ قوية وهتوصلي. 💕
تم النشر الثلاثاء، ٣١ مارس ٢٠٢٦
عفواً الله يعينك و ييسر امرك
تم النشر الأربعاء، ١ أبريل ٢٠٢٦
عشان توصلي للاتزان الحقيقي من غير ما تفقدي نفسك أو تضطري لتمثيل دور مش شبهك، ركزي في الـ 3 نقط دول: الحدود "مرونة" مش "سور": الاتزان مش معناه إنك تلغي حدودك عشان ترضي الناس، لكن معناه إنك تخليها زي "الباب"؛ يفتح للي يقدرك ويقفل في وش اللي يستغلك. القوة في إنك تختاري مين يدخل، مش في إنك تقفلي على نفسك تماماً. التلقائية محتاجة وقت: طبيعي في البداية تحسي إنك "متأهبة" وبتحسبي كل خطوة لأنك في مرحلة تدريب لعقلك على نظام جديد. مع التكرار، عقلك هيبرمج إن (المنطقة الوسطى) هي الطبيعي، وهتلاقي نفسك بقيتي متزنة تلقائياً من غير مجهود. الصدق مع النفس: اسألي نفسك دايماً: "أنا بعمل كدة عشان خايفة أخسرهم، ولا عشان أنا فعلاً حابة أكون لطيفة؟". لو السبب هو الخوف، يبقى إنتِ بتيجي على نفسك. الاتزان الحقيقي بيبدأ لما يكون عطاؤك نابع من اختيارك وحبك لنفسك أولاً. الخلاصة: النضج هو إنك تحبي الناس وتتعاملي معاهم بمرونة، بس من غير ما تسمحي لأي حد إنه يهد "ثوابتك" اللي بتحميكي.
تم النشر الأربعاء، ١ أبريل ٢٠٢٦
شكرا جدا اجابتك مترتبه ووصلتني كويس هعمل بيها بإذن الله تسلمي
تم النشر الأربعاء، ١ أبريل ٢٠٢٦
لعرض السؤال في فدني اضغط هنا