بماذا تنصحونني في مشكلتي؟

Question

السلام عليكم ورحمه الله كنت عاوزه احكي عن حاجه ونصيحه منكم رجاء لوجه الله في حل مشكلتي ويا ريت تقرأووا البوست ما تتجاهلونيش رجاء أنا حكيت قبل كدا فيها وتلقيت ردود إيجابية وقد إي أنا محترمه وكويسه بس المره دي أنا مش عاوزه الردود دي أنا عاوزه حل لمشكلتي الحكاية وما فيها إني لسه في السنه الاولى من جامعتي أنا في كلية طبيه بس برا بلدي ما علينا المهم أنا قبل ما أروح الكلية تلقيت دروس من مامتي والجيران واخواتي وولاد من العيلة كتير نصحوني أخلي بالي من الولاد لأنهم هيحاولوا يستدرجوني ويتكلموا معايا وبدأوا يخوفوني من مخاطر إني لو كلمت ولد خارج الحدود خصوصا ولاد العيلة نصيحتهم أثرت فيا لأنهم فاهمين أكتر دماغ الشباب اللي زيهم قالولي هتلاقي حد باعت ليكي أنا ما سجلتش المحاضره ممكن تبعتيها وهيفتح معاكي كلام فعلا دا اللي حصل ودخل لي حد في البدايه وشدني في الكلام أنا عملتله بلوك بس ما انكرش اني اتكلمت معاه لكن يعلم الله انها بحدود منكرش ان الكلام مع ولد اجنبي بخدو او من غير حدود حرام معترفه بخطأي عملت بلوك ومستحيل كنت أتكلم مع ولد ووعدت نفسي بعد فتره في السميستر التاني سألت علي جروب الدفعه ممكن حد يبعت عالجروب pdfs محدش رد وانا بردو مطلبتش تاني لقيت ولد داخل لي عالخاص وبعتهم لي وتشكرته وقفلت عالموضوع بالشكر وانتهينا لقيته كل شويه يبعت ريكورد قد اي المذاكره تقيله وبيحكي قصة حياته أنا كنت برد عليه وانا مش عاوزه أرد أصلا قلت اعمل له بلوك ؟ طبيب لو عملت له بلوك مينفعش لانه ساعدني ومنعرفش بعض أصلا وهيبقي شكلي وحش اني أدي بلوك لحد معرفوش وساعدني وإفتكرت إنه هل جزاء الإحسان إلا الإحسان قلت مش هعمل بلوك كل شوية يبعت في حدود الدراسة اسأله وكلام من دا لاحظت انه ما أتعداش حدوده فكنت برد لان دي دراسه فجأة سألني أنا منين فعرفته أنا منين بعفوية ندمت ندم عمري اني عرفته أنا منين بعد كدا بدأ يبعت كأنه متجوزني تعملي كدا وما تعمليش كدا وما تتفاعلين عالجروب بتاع الدفعه وحاجه في قمت السفالة وقلة الذوق وكان بيقذفني وقت ما يحب مش عارفه أنا كنت ساكته ليه ومعملتش بلوك بس كان خوف فظيع منه يأذيني وإحنا في غربة لقيته باعت ليا احلي بلوك لعيونك أنا كنت في قمة السعادة انه عمل لي بلوك الكلام دا كله بقاله شهرين امبارح شال البلوك وباعت لي ازيك وبيسأل زي زمان أنا مش برد عليه وهو إنسان في قمة قلة الذوق حسبي الله ونعم الوكيل فيه باعت لي بيقولي انتي بتكلمي ولاد غيري الصراحة قلبي وقف ومقدرتش ما أردش قلتله انه اتعدى حدوده وإنه أسلوبه بيعكس تربيته وبلكته أنا حزينه اني رديت من اول يوم بعت لي البي دي أف حزينه اني وصلت حد يقذفني بكلام لا هو يمثلني أبدا حزينة اني في بابا واثق فيا اني مش ممكن اعمل غلط أبدا وزوج في المستقبل مش ممكن اني اعترف له بشيء زي دا واني رديت علي ولاد ولا هو أصلا هيحب كدا حزينه جدا اني عصيت أمر من أوامر ربنا واني كلمت ولد الولد دا كان من اوائل الدفعه عامل فيها شيخ ومحترم والكل بيحبه حتى دكاترة الجامعه علي الرغم انه بيعمل كدا وميعرفوش إلا أنا بجد خايفه يأذيني لدرجة بفكر انه ممكن يقتلني اعمل اي ساعدوني أنا حزينة عارفة اني مش ممكن حد يسامحني علي اخطائي بس واثقة ان ربنا معايا بس عاوزة نصيحه لوجه الله

Accepted Answer

بصي انتي غلطك الحقيقي كان إنك طولتي المساحة بعد ما بدأ يتجاوز وحدوده تبقى غريبة، ودا درس تتعلمي منه مش سبب إنك تكرهي نفسك. النوعية دي غالبًا أول ما تلاقي البنت محترمة ومش بتحب تعمل مشاكل تبدأ تتمادى حبة حبة، عشان كدا من أول سؤال شخصي أو تحكم أو كلام مريحش قلبك يبقى لازم توقف عنده فورًا. دلوقتي الأفضل تعملي بلوك نهائي بدون نقاشات زيادة، ومترديش حتى لو حاول يستفزك أو يخوفك، وخلي أي شيء يخص الدراسة داخل الجروبات فقط. ولو عندك رسايل فيها إساءة احتفظي بيها احتياط وخلاص.كمان لو تقدري تحكي الموضوع دا و لو من غير تفاصيل كتير ل اختك او والدتك او اي حد تثقي فيه بحيث متبقيش شايله الضغط لوحدك يكون افضل. و لو ساء الموقف كدا ممكن لو ينفع معاكي ف تقولي ل حد مسوؤل ف الجامعه عن الموضوع دا عشان تبقي مأمنه نفسك شويه ع الاقل. وبرضو متخليش تأنيب الضمير يكبر الموضوع جواكي لدرجة تحسي إنك عملتي مصيبة، لأن واضح من كلامك إنك مكنتيش داخلة في حاجة غلط أصلًا لكن اتعرضتي لشخص مستغل وقليل الذوق. واتمنى فعلًا لو حد هنا عنده خبرة أكتر أو حتى من الشباب يفهم طريقة تفكير الأشكال دي يفيدك.

Answer

وعليكم السلام ورحمه الله وبركاته.. بصي يابنت الناس جمدي قلبك وخليكي قوية الواد ده مستغل طيبتك وقلة خبرتك في أول سنة جامعة وعمال يضغط عليكي نفسياً عشان يحسسك بالذنب ويسيطر على تفكيرك وهو في الآخر زميل وموش أي سلطة عليكي انتي مغلطتيش غلط كبير يستاهل الرعب ده كله انتي اتعاملتي بذوق وبنية صافية عشان ورق المحاضرات وهو اللي تعدى حدوده وتطفل على خصوصيتك وعاش دور مش دوره فكك خالص من أوهام الخوف والرعب وموضوع إنه يقتلك أو يؤذيكي دي مجرد تهيؤات من ضغط الغربة الواد ده آخره كلام وميقدرش يعملك أي حاجة تضرك اقطعي معاه تماماً واعملي بلوك من كل الحتت ومن غير عتاب أو كلام ومترديش على أي رسالة منه تاني وامسحي الشات ده خالص من تليفونك عشان تريحي بالك ومستقبلك ودراستك أهم بكتير من الأشكال دي وخليكي واثقة في ربنا وفي نفسك وطالما انتي مأمنة نفسك وبطلتي كلام معاه محدش يقدر يمسك عليكي حاجة ولا يبوظ علاقتك بأهلك والمرة الجاية أي كلام بخصوص الكلية والدراسة يكون على الجروب العام قدام الدفعة كلها ومفيش أي كلام في الخاص مع شباب تاني خالص ربنا يوفقك في كليتك ويريح بالك... وغيري رقم الفون وريحي دماغك هاتي رقم جديد عشان تخلصي من الموضوع ده...بس ممكن اعرف اخر الاحداث لانك بتقولى انك يعني الرساله دي من فتره ... 🤔

Answer

وعليكم السلام ورحمة الله وبركاته. بصي ي اختي اللي حصل حصل خلاص المهم انك تكوني توبتي توبه نصوحا و عملتي بلوك وحذفتي اي وسيلة توصله بيكي ولو قدرتي تغيري رقمك غيريه . اللي عملتيه غلط ولاكن في غلط بيكون محمود على قدر مهو مذموم لانه بيكون زي قرصت ودن كده بيخليكي مستحيل تقربي للطريق ده تاني لأنك خلاص اتقرصتي منه مره واتعلمتي من غلط . يعني لولا قدر الله لكي ومكنش حصل معاكي الموقف ده مع شخص مريض زيه وجه شخص تاني في اي سنه من السنين وكان كويس وحنين ويبدو انه مثالي وجرك لنفس الطريق وعلقك بيه من غير ما تحسي في الوقت ده كانت التوبه بالنسبه لك هتكون صعبه اوي دلو جه في بالك توبه اصلا . ف احمدي ربنا واشكريه انه منّ عليكي بالتوبه و سترك وكان ابتلائك بسيط مقارنه بالأبتلائات الناس الأخرى . أدام الله عليكي ستره في الدنيا والآخرة وجعلك دائما من الاوابين 🌸🤲

بماذا تنصحونني في مشكلتي؟

اجتماعية

سؤال من احد أعضاء فدني

تم النشر الأربعاء، ٣ يونيو ٢٠٢٦

4 إجابة

5 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك