هو الغيره اللى عندي دي اي
انا بنت 25سنه وعندي صاحبتي ماي بيست فريند صحاب قريبين اوي يعني
بس انا بغير عليها اوي من اي حاجه وكل حاجه
اقرب مثال مابحبش تقول ع شخص ده وحشني بدااااايق اوووووي
مابحبش تقولى اصلى بحب فولانه او فلان
بغير اوووي حقيقي
بحس اني عايزاها ليا انا وبس عارفه ان ده اكيد مرض
بس انا محتاجه حل بجد لان ده بقا بياخد من طاقتي كتيرررر اوي
بحسها لما بتقول كده ع حد فبالتالى انا مش بوحشها مثلا ولو بتقول ع حد بحبو يبقا م بتحبني زيو
بجد انا الموضوع مدايقني جدا جدا جدا
يعني هي مثلا ممكن تقول ع شخص وحشني جدا
بينما انا وهي ممكن نقعد حبه او مثلا يوم منتكلمش متقوليش وحشتيني زي ماكانت بتقولى الاول
بالله عليكم انا عاوزه حل جذري
غالبا نمط تعلق قلق وممكن خوف من الفقد لحل جذري تواصلي مع أخصائية للتشخيص والتقييم وعمل خطة علاجية
تم النشر الثلاثاء، ٢٤ فبراير ٢٠٢٦
بصي إنتي مش بتحبيها.. إنتي محتاجة لها.. وده الفرق بين الحب والتعلق. صاحبتك مراية مش حياة إنتي شايفة فيها النقص اللي جواكي، فبتحاولي تملكيها عشان تحسي بالأمان. الحقيقة إن الأمان بييجي من جواكي إنتي، مش من كلمة وحشتيني من حد تاني. والخنقة بتبعد مش بتقرّب تخيلي نفسك محبوسة في أوضة مع حد بيراقب كل نفس بتتنفسيه، هتزهقي وعايزة تخرجي تشمي هوا.. ده اللي هي هتحسه لو استمريتي كده. سيبيها تحبك بمزاجها مش بالضغط. و قيمتك مش في درجة قربها لو هي النهاردة مشغولة أو حبت حد تاني، هل ده معناه إنك بقيتي وحشة؟ طبعاً لا. غلاوتك ثابتة سواء هي قالتها أو لأ. لما بتغيري كده، إنتي بتهزي صورتك قدام نفسك قبل ما بتهزيها قدامها. بصي اقطعي خيوط المراقبة بتكلم مين؟ قالت لمين وحشتيني؟ . و الغيرة دي فضا عاطفي. اشغلي يومك بحاجة تخصك إنتي لوحدك (كورس، رياضة، هواية) عشان لما تقابليها يكون عندك حكاوي تانية غير إنك مستنية منها كلمة. الكلمة اللي عايزك تحفظيها ..اللي بيحب حد بجد، بيفرح لفرحه مع غيره.. واللي عايز يمتلك حد، بيخسره في الآخر. حبي نفسك الأول، وهتلاقي إنك مش محتاجة تتسوّلي الاهتمام من حد، لأنه هيجيلك لوحده لما تكوني إنتي مكتفية بنفسك.بعتذر أن كنت قسيت شويه و بعتذر عن الإطالة 😊 وجد ربنا يحفظك ويسعدك
تم النشر الثلاثاء، ٢٤ فبراير ٢٠٢٦
لعرض السؤال في فدني اضغط هنا