ما التصرف الصحيح في هذه الحالة؟

Question

امبارح حصل معايا موقف غريب و مش فهماه كنت اعرف واحد شغال في السوبرماركت اللي عندنا و قالي نتكلم و نبقى صحاب و كدا و بنتكلم كل فين و فين و انا اصلا مش بطيقه و بعدين هو يعرفني من بدري بس ميعرفش عني حاجه شخصيه ولا أسرار ولا غيره المهم من حوالي شهرين في حد جديد اشتغل معاهم و لما بروح بيبصلي لما انا مكنش باصه عليه و اختي اللي بتقولي انو بيبص عليا و بعدين جيت اشتري ماسكرا منه و اخد القديمه بتاعتي احتفظ بيها المهم حسيت اني مبسوطه و جيت تاني يوم اللي كان صديقي دا قالي انو قال انو شقطك و هيجي يطلب رقمي(للعلم الشخص الأول كان بيحبني ونا رفضته كتير و كذبت و قلتله اني مخطوبه عشان يحل عني و مفيش فايده) بعدها قالي ابعدي عنه دا بيشتم و بيشتم البنات اللي كان مرتبط بيهم و انو وحش و شتم عليه بعدها اتكلمنا كول و كان اغلب كلامه جنسي بجد حضن و بوس و تلزيق و قرف و اتغير معرفش هو فعلا الشخص التاني قال كدا ولا لا انا مش بحب الأول بس أعجبت بالتاني بس و خايفه يكون وحش هو كمان دا مش هيأثر عليا نفسياً بس مش عارفه اعمل ايه عشان يبعد عني الأول و التاني مياخدش عني فكره وحشه

Accepted Answer

السلام عليكم، هو الحقيقة الصح الوحيد في الموضوع إنك تبعدي تماما عن الاتنين. الشخص الأول أنتِ كده كده مش طايقاه، فمكنش لازم تتكلمي معه وحتى لو مش طايقاه المفروض يكون فيه حدود في التعامل، حتى لو كلامكم كان عادي ومفيش تجاوز ولا عرف عنك حاجة شخصية او أسرار، الكلام نفسه مينفعش. بلاش تفتح باب للشيطان يجرك بعد كده لكلام أو تصرفات غلط أو يسمح لشخص معندوش ضمير ولا أخلاق إنه يستغلك. الشخص الثاني، أنا متفهمة مشاعر الإعجاب والإنجذاب خاصة لو أنت سنك صغير، بس صدقيني، الحب مش بالنظرات خالص، ولو هو شخص جاد وأعجب بك مثلا وافترضنا صدقه فالمفروض يسأل على أهلك ويدخل البيت من بابه. غير كده سواء الكلام اللي قاله الأول حقيقي أو لأ وأيا كان سبب تصرف الثاني ونظراته، فالصح إنك متظهريش إعجابك وتوقفي الموضوع قبل ما يحصل مشاكل أنتِ في غنى عنها. ***** افتكري إنك غالية فمتخليش أي واحد يستغل مشاعرك ولا يحاول يتسلى بك، اللي جاد ناحيتك هيتقدم لك في الحلال غير كده هيكون بيتسلى شوية زي ما بيعملوا مع بنات كتير. **** اقطعي خالص مع الشخص الأول والأفضل تبطلي خالص تروحي السوبرماركت ده، شوفي مكان تاني على الأقل لحد ما تتجاوزي مرحلة الإعجاب وكمان تعرفي تتعاملي بحدود مع الاتنين بعد كده. وربنا يوفقك.

Answer

ابعدي عن الاتنين ومش أي حد يبص عليكي يبقى نظرته بريئه وبالشكل الرومانسي اللي إنتي متخيلاه ده لإن معظمهم عيال لئيمه أوي وبستميلوكي فبلاش تقعي وخليكي متماسكه كده ومش أي نظرة تأثر فيكي والأفضل البعد التام ومنع التعامل معهم

Answer

الشخص اللي كلامه قلب قلة أدب وتلزيق بمجرد ما لقى منك رفض ده شخص بيحاول يكسر عينك ويقلل من قيمتك عشان يحس إنه مسيطر. كلامه عن الشخص التاني غالباً نفسنه وانك تعمليلو بلوك مش اختيار، ده فرض عين عشان كرامتك وراحتك. انبهارك بالشخص التاني ممكن يكون مجرد هروب من سخافة الأولاني. متخليش نظراته تنسيكي إنك لسه معرفتيهوش. الشخص الكويس بيجي من الباب وبأدب، مش محتاج واسطة ولا محتاج تبرري له حاجة. لو هو فعلاً محترم، مش هيصدق فيكي كلمة من واحد زي الأولاني. انتي مش محتاجة تثبتي لده ولا لده إنك بنت ناس. اللي يحترمك ويقدرك يشيلك فوق راسه، واللي يقل أدبه أو يشوه صورتك يبقى مكانه تحت رجلك متديش فرصة لحد يخليكي مادة للكلام في السوبر ماركت أو غيره. اختفي تماماً من قدام الأولاني، واتعاملي مع التاني بحدود البيع والشراء وبس. لو التاني مهتم بجد، هيعرف يوصلك باحترام.. ولو طلع زي الأولاني، يبقى كسبتي نفسك ووفرتي وقتك. الراحة النفسية بتبدأ لما تقرري إن مش أي حد ينفع يدخل حياتك، ومش أي كلام يستاهل تردي عليه بعتذر عن الإطالة 😊 وجد ربنا يحفظك

ما التصرف الصحيح في هذه الحالة؟

اجتماعية

سؤال من احد أعضاء فدني

تم النشر الخميس، ٢٩ يناير ٢٠٢٦

4 إجابة

3 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك